Buku-nkulu Leyi Hi Nga Ta Fambisa Tidyondzo Ta Bibele Ha Yona Hi Leyi Nge Leswi Bibele Yi Swi Dyondzisaka
1 A swi tsakisa ku vona ku humesiwa ka buku leyi nge Xana Bibele Yi Dyondzisa Yini Hakunene? eNtsombanweni wa Muganga wa “Ku Yingisa Xikwembu!” Lava a va ri kona entsombanweni va tsakele ku kuma tikopi ta vona loko ku hela xiyimiso hi Mugqivela. Xana buku leyi leyintshwa yi ta tirhisiwa njhani? Yi hleriwe kahle leswaku yi va buku-nkulu leyi hi nga ta fambisa tidyondzo ta Bibele ha yona. Hambileswi yi nga ta sungula ku fambisiwa ensin’wini hi June, vahuweleri va khutaziwa leswaku va nga ha yimayimi, va namba va sungula ku fambisa tidyondzo ta Bibele ha yona.
2 Tidyondzo Ta Bibele Leti Nga Eku Fambisiweni: Vahuweleri lava fambisaka tidyondzo ta Bibele hi buku leyi nge Vutivi kumbe hi broxara leyi nge Leswi Xi Swi Languteleke, va fanele va va ni vuxiyaxiya va nga si endla xiboho xo sungula ku dyondza buku leyi ni vanhu lava va dyondzaka na vona. Loko dyondzo ya kona ya ha ku sunguriwa, swi nga va swinene ku tshika buku leyi dyondziwaka ivi mi sungula ku dyondza leyintshwa. Loko ku ri leswaku se mi le xikarhi ka buku leyi nge Vutivi, mi nga sungula eka ndzima leyi fambisanaka na yona ebukwini leyi nge Leswi Bibele Yi Swi Dyondzisaka. Loko se mi ri kusuhi ni ku heta buku leyi nge Vutivi, swi nga va swinene loko mo vhela mi yi hetisa.
3 A swi kanakanisi leswaku vo tala va hina ku ni vanhu lava hi va tivaka, lava nga ta pfuneka hi ku dyondza buku leyi nge Leswi Bibele Yi Swi Dyondzisaka. Ha yini u nga kombeli ha un’we wa vona leswaku mi dyondza swin’we buku leyi dyondzisaka tidyondzo ta Bibele hi ku landzelelana ka tona? Hi xikombiso, lava va dyondzeke broxara leyi nge Leswi Xi Swi Languteleke kumbe buku leyi nge Vutivi kambe va nga si tinyiketela ni ku khuvuriwa, va nga ha tsakela ku ya emahlweni ni dyondzo ya vona hi buku leyi leyintshwa. Vatswari va nga ha endla xiboho xo tirhisa buku leyi leyintshwa leswaku va dyondzisa vana va vona vutivi lebyi kongomeke bya Xikwembu.—Kol. 1:9, 10.
4 Ku Dyondza Buku Ya Vumbirhi: Xana xichudeni xa Bibele xi fanele xi dyondza buku ya vumbirhi loko xi heta buku leyi nge Xana Bibele Yi Dyondzisa Yini Hakunene? Ina, xi fanerile. Loko swi vonaka leswaku xichudeni xi endla nhluvuko, hambiloko xi nonoka naswona xi ya xi swi tsakela leswi xi swi dyondzaka, dyondzo yoleyo ya Bibele yi nga yisiwa emahlweni hi buku leyi nge Gandzela Xikwembu Xi Ri Xin’we Xa Ntiyiso. Ha tshemba leswaku buku leyi nge Leswi Bibele Yi Swi Dyondzisaka yi ta va mpfuno lowukulu eka hina leswaku hi endla ntirho lowu hi lerisiweke wona wo endla vanhu va va vadyondzisiwa.—Mat. 28:19, 20.