Bokisi Ra Swivutiso

◼ Hi tihi tibuku timbirhi leti faneleke ti tirhisiwa loko ku dyondziwa ni lava tsakelaka?

Buku leyi nge Leswi Bibele Yi Swi Dyondzisaka hi yona ya nkoka leyi hi faneleke hi yi tirhisa loko hi fambisa tidyondzo ta Bibele. Hambileswi swi nga hoxangiki leswaku mi sungula dyondzo ya Bibele hi nkandziyiso wun’wana wo kota xiphephana lexi faneleke, mi fanele ku ringeta ku hatla mi cincela eka buku leyi nge Leswi Bibele Yi Swi Dyondzisaka. Ku ve ni vuyelo lebyinene loko dyondzo ya Bibele yi sunguriwa hi buku leyi nge Leswi Bibele Yi Swi Dyondzisaka.

Loko mi heta ku hlaya buku leyi nge Leswi Bibele Yi Swi Dyondzisaka naswona xichudeni xi endla nhluvuko, mi fanele ku ya emahlweni mi hlaya buku leyi nge Gandzela Xikwembu. (Kol. 2:7) Eka tluka 2, buku leyi yi hlamusela xikongomelo xa yona yi ku: “Bibele yi khutaza vanhu hinkwavo lava rhandzaka Xikwembu leswaku va ‘twisisa ku tlakuka ni ku enta’ ka ntiyiso wa yena wa risima. (Vaefesa 3:18) Buku leyi yi tsaleriwe ku hi pfuna leswaku hi endla sweswo. Onge yi nga ku pfuna leswaku u kula hi tlhelo ra moya, u lunghekela ku famba endleleni yo khuma leyi yisaka evuton’wini, emisaveni leyo lulama ya Xikwembu.”

Loko xichudeni xo fanelekela ku khuvuriwa xi nga si heta tibuku letimbirhi, dyondzo yi fanele yi ya emahlweni kukondza ku hela buku ya vumbirhi. Hambileswi xichudeni xi nga ta va xi khuvuriwile, loyi a fambisaka dyondzo yoleyo u fanele a vika nkarhi, riendzo ro vuyela ni dyondzo ya Bibele. Muhuweleri la fambaka ni loyi a fambisaka dyondzo yoleyo naswona a hlanganyela eka yona, u fanele a vika nkarhi wolowo na yena.