‘Marito Ya N’wina A Ma Ve Lama Lungiweke Hi Munyu Nkarhi Hinkwawo’
1. Xana swi vula yini ku ‘lunga marito ya hina hi munyu’?
1 “Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.” (Kol. 4:6) Ku lunga marito ya hina swi vula ku hlawula marito lama faneleke naswona hi vulavula hi ndlela leyi nga ta endla leswaku vayingiseri va hina va tsakela leswi va swi twaka. Ku vulavula hi ndlela yoleyo loko hi ri karhi hi chumayela i swa nkoka swinene.
2. Xana Yesu u swi kotise ku yini ku chumayela wansati wa Musamariya?
2 Xikombiso Xa Yesu: Loko Yesu a humurile ekusuhi ni xihlovo xa mati, u teke goza ro vulavula ni wansati wa Musamariya loyi a teke ku ta ka mati. Loko va ri karhi va vulavula, wansati loyi u ku boxe ko hlayanyana ku nga twani loku nga ni nkarhi wo leha ku ri kona exikarhi ka Vayuda ni Vasamariya. U tlhele a vula leswaku u pfumela leswaku Vasamariya i vatukulu va Yakobe hambileswi Vayuda va pfumelaka leswaku Vasamariya va huma eka vanhu vambe. Yesu a nga n’wi kanetanga kambe u dzike eka leswi va twanaka ha swona. Hikwalaho ka sweswo, u swi kotile ku n’wi chumayela lerova ku pfuneka yena ni Vasamariya vo tala.—Yoh. 4:7-15, 39.
3. Xana hi nga xi landzela njhani xikombiso xa Yesu loko hi ri karhi hi chumayela?
3 Loko hi ri karhi hi chumayela hi nga rivali leswaku xikongomelo xa hina i ku ‘vula mahungu lamanene ya swilo leswinene.’ (Rhom. 10:15) Hi lava ku byela n’wini wa muti rungula leri tsakisaka ni leri akaka, leri humaka eBibeleni, ku nga ri ku vonaka onge hi hlasela tidyondzo ta vukhongeri bya yena. Loko a vula swo karhi leswi hoxeke, a hi fanelanga hi n’wi komba xihoxo xakwe hi xihatla. A hi laveni leswi hi pfumelelanaka na yena ha swona eka leswi a swi vuleke kutani hi n’wi bumabumela. Kumbexana hi nga kombela ku n’wi hlayela tsalwa ro karhi kutani loko hi nga si hlaya, hi ku, “Twana leswaku Bibele yi ri yini emhakeni leyi!”
4. Hi fanele hi endla yini loko n’wini wa muti a hi rhukana?
4 Hi nga endla njhani loko n’wini wa muti a hi rhukana kumbe swi vonaka leswaku u lava ku pfuxa mholovo? Ndlela leyi hi tikhomaka ha yona ni leswi hi swi vulaka swi fanele swi swi veka erivaleni leswaku hi vanhu lava rhuleke. (2 Tim. 2:24, 25) Loko munhu a nga ri tsakeli rungula ra Mfumo, hi fanele hi ringeta ku tsema bulo rero hi vutlhari.—Mat. 7:6; 10:11-14.
5. Xana makwerhu un’wana u ve ni vuyelo byihi lebyinene hikwalaho ko hlamula hi musa?
5 Vuyelo Lebyinene: Loko makwerhu un’wana wa xisati a ringeta ku chumayela muakelani wa yena, u n’wi hlamule hi vukarhi a tlhela a n’wi rhuketela. Makwerhu u hlamule hi musa a ku: “A ndzi nga tiyimiselanga ku ku hlundzukisa. Sala kahle.” Endzhaku ka mavhiki mambirhi, wansati loyi u gongondze ekaya ra makwerhu loyi kutani a kombela ku rivaleriwa hi ndlela leyi a anguleke ha yona a tlhela a vula leswaku se u ta n’wi yingisa. Hakanyingi ku va ni vuyelo lebyinene loko u hlamula hi ndlela leyi rhuleke!—Swiv. 15:1; 25:15.
6. Ha yini swi ri swa nkoka ku lunga marito ya hina hi munyu loko hi ri karhi hi chumayela?
6 Tiyimisele ku lunga marito ya wena hi munyu loko u ri karhi u chumayela mahungu lamanene. Hambiloko n’wini wa muti a nga ku yingisi, a nga ha yingisa loko Timbhoni ta Yehovha ti n’wi endzela enkarhini lowu taka.