Mpfuxeto Wa Xikolo Xa Vutirheli Bya Le Tilweni

Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi April 24, 2006. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra March 6 ku ya eka April 24, 2006. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]

TINHLA TO TIRHELA EKA TONA

1. Loko hi dyondzisa, ha yini hi fanele hi koka moya nkarhi wun’wana ni wun’wana loko hi cinca mongo wa mhaka, kambe i yini leswi nga hi sivelaka ku endla tano? [2, be-TS tl. 98 tindz. 3-4] Hi ku koka moya hi pfuna vayingiseri va hina leswaku va gayela, va lungheka ni ku lemuka leswaku hi suka eka yinhla yin’wana hi ya eka yin’wana. Loko hi koka moya, hi endla leswaku tinhla-nkulu ti twala kahle, ti dzika ti twelela naswona ti nga rivaleki. Xivangelo xin’wana lexi endlaka leswaku swivulavuri swin’wana swi tsutsumela ku nghena eka yinhla yin’wana handle ko koka moya, hi leswaku swi ringeta ku hlanganisa rungula ro tala ngopfu hi xinkarhana.

2. Ha yini swi ri swa nkoka ku koka moya loko hi ri eku chumayeleni? [3, be-TS tl. 99 ndz. 5–tl. 100 ndz. 4] Ku koka moya swi antswisa vuswikoti bya hina byo vulavula ni ku hi pfuna leswaku swi hi fambela kahle ensin’wini. Swi endla leswaku n’wini wa muti a kota ku vula mavonelo ya yena nileswaku a kota ku ehleketa. Loko hi koka moya hi ndlela leyi faneleke swi nga endla leswaku munhu a paluxa leswi nga embilwini ya yena kutani hi n’wi pfuna hi ndlela leyi faneleke. (Swiv. 20:5)

3. Ha yini swi ri swa nkoka ku kandziyisa mongo loko hi nyikela nkulumo, naswona hi nga wu kandziyisa kahle hi ndlela yihi? [4, be-TS tl. 101 tindz. 1-5, bokisi] Loko hi kandziyisa marito-nkulu ni swiga hi ndlela leyi faneleke, hi endla leswaku vayingiseri va fambisana na hina loko hi ri karhi hi va khutaza ni ku khumba timbilu ta vona. Hi nga kandziyisa marito hi ku tlakusa rito, hi ku hiseka, hi ku vulavula hi ku nonoka, hi ku yimanyana hi nga si vula yinhla leyi landzelaka, hi ku tshukatshukisa miri ni ku languteka ka xikandza xa hina ni hi ku cinca-cinca rito. Leswaku hi kandziyisa mongo hi mfanelo, hi fanele hi yi twisisa kahle mhaka ya hina naswona hi swi navela hi mbilu hinkwayo leswaku leswi hi swi vulaka swi dzika emianakanyweni ya vayingiseri va hina nileswaku va swi tirhisa. (Neh. 8:8)

4. Loko hi hlaya emahlweni ka vanhu, xana hi nga tiyiseka njhani leswaku ha ti kandziyisa tinhla-nkulu? [6, be-TS tl. 105 tindz. 1-6] Hi fanele hi rhanga hi anakanya kahle hi tinhla-nkulu ta mhaka hinkwayo. Leswi swi ta hi pfuna ku tiva leswaku hi tihi tinhla leti hi faneleke hi ti kandziyisa. Loko hi hlayela ehenhla loko hi ri karhi hi dyondzisa munhu Bibele kumbe loko hi ri enhlanganweni, hi fanele hi kandziyisa tinhlamulo ta swivutiso leswi tsariweke ni tinhla leti fambisanaka ni xihlokwana.

5. Ha yini mpfumawulo lowu ringaneke wu ri wa nkoka loko hi ri eku dyondziseni, naswona hi nga wu pima njhani mpfumawulo wolowo? [7, be-TS matl. 107-8] Loko van’wana va nga hi twi kahle, mianakanyo ya vona yi nga ha teka leti ni letiya naswona swi nga vi ni ntikelo leswi hi swi vulaka. Xisweswo hi nga tsandzeka ku khutaza vayingiseri va hina ku endla leswi va swi tweke. Leswi vayingiseri va langutekisaka xiswona i xikombiso xa kahle xo vona loko mpfumawulo wa hina wu ri lowu ringaneke. Loko hi vona van’wana va nga hi twi kahle hi fanele hi tlakusa rito. Xin’wana lexi nga lavaka leswaku hi tlakusa mpfumawulo wa hina i mpimo ni muxaka wa vanhu lava va hi yingiseke ni huwa leyi kavanyetaka.

NKULUMO NO. 1

6. Xana xiyimo xa Vakreste va namuntlha xi fana njhani ni lexiya xa Estere na Mordekayi, naswona hi nga xi tekelela njhani xikombiso xa vona? [1, si-TS tl. 94 ndz. 17] Ku fana na Estere na Mordekayi, namuntlha Vakreste va hanya ehansi ka “valawuri lava tlakukeke” emisaveni yimbe naswona va tikarhatela ku va vaaki lava hlayisaka nawu etikweni, va tlherisela “swilo swa Khezari eka Khezari, kambe swilo swa Xikwembu eka Xikwembu.” (Rhom. 13:1; Luka 20:25; Est. 1:1; 2:5, 7, 8, 21-23) Kambe Vakreste va fanele va xiya leswaku ku yingisa vafumi a swi vuli ku tlula nawu wa Xikwembu, hilaha swi kombisiweke hakona hi Mordekayi loyi a aleke ku yingisa xileriso xa hosi xo nkhinsama emahlweni ka Hamani, lowa Muagaga. (Est. 3:1-4; 5:9) Vakreste na vona va nga ha lava mpfuno wa hulumendhe loko swi fanerile. (Est. 4:6-8; Mint. 25:11)

7. Xana Solomoni a a hlamusela yini loko a vula leswaku “hinkwaswo a ku ri vuhava ni ku hlongorisa mheho”? (Ekl. 2:11) [3, w04-TS 10/15 tl. 4 tindz. 3-4] Hi ku ya hi mongo, Solomoni a a hlamusela vutomi lebyi titshegeke hi ku hlongorisa ntsako ni ku hlengeleta swilo hinkwaswo leswi vonakaka leswi nga kona emisaveni. Solomoni u ake tiyindlu a tlhela a va ni mintanga, malandza, swifuwo, ndhawu ni rifuwo. Nakambe a a rhandza swilo swo xonga. Kambe hinkwaswo sweswo a swi nga ri swa nkoka ngopfu eka yena, naswona swi n’wi siye a nga enerisekanga. (Ekl. 2:1-10) U gimete hi leswaku munhu u eneriseka ngopfu loko a rhandza rifuwo ra moya. (Ekl. 12:13)

8. Xana hi nga ku hlakulela njhani ku rhandza Yehovha? (Mar. 12:30) [5, w04-TS 3/1 matl. 19-21] Hi nga ku hlakulela hi ku va ni vutivi lebyi engetelekeke ha yena ni xikongomelo xa yena, hi ku va ni dyondzo leyi dzikeke ya Rito ra yena, ku nga Bibele. Hi nga tlhela hi anakanyisisa hi mintirho ya yena ni hi ntiyiso lowu hi wu dyondzaka. (Ps. 77:6, 11, 12) Xin’wana lexi nga tiyisaka ndlela leyi hi n’wi rhandzaka ha yona i ku anakanyisisa hi mintokoto leyi hi yi tsakeleke loko hi ri karhi hi n’wi tirhela ni vuyelo lebyinene lebyi hi veke na byona hikwalaho ko endla swilo hi ku ya hi ku rhandza ka yena. (Swiv. 3:5, 6)

9. Hi kwihi ku hambana exikarhi ka rifuwo ra moya ni ra nyama? [6, w04-TS 10/15 matl. 5-7] Ku rhandza rifuwo ra moya swi tisa ntsako lowu nga heriki ni vuyelo lebyi nga heriki, kasi ku hlongorisa swilo leswi vonakaka swi tisa ntsena ntsako wa xinkarhana lowu nga hetelelaka hi rifu. (Swiv. 11:4; Mat. 5:3; 2 Kor. 4:18) Swilo leswi vonakaka hakanyingi swi yenga vanhu leswaku va lava rifuwo, xikhundlha ni vulawuri hi ku tirhisa tindlela ta vukanganyisi, kasi rifuwo ra moya ri endla hi va lava hananaka, hi nga vi lava amukelaka ntsena. (Esa. 48:18; 1 Tim. 6:9, 10)

10. I yini lexi nga hi pfunaka hi rhiya ndleve etinhlengeletanweni ni le mintsombanweni handle ko kavanyetiwa? [7, be-TS matl. 15-16] Nchumu wun’wana wa nkoka i ku va ni nkarhi lowu eneleke wa ku etlela nivusiku leswaku hi ta kota ku yingisela kahle hi xamundzuku xa kona. Hi nga anakanyisisa hi nhloko-mhaka ya nongonoko wa siku rolero, hi languta xihloko xa nkulumo yin’wana ni yin’wana eka xiyimiso kutani hi ringeta ku anakanya hileswi ku nga ta vulavuriwa ha swona. Xin’wana lexi nga hi pfunaka i ku tsala tinhla-nkulu leswaku mianakanyo ya hina yi tshama yi ri eka leswi vuriwaka.

KU HLAYA KA BIBELE KA VHIKI NI VHIKI

11. Ha yini xikandza xa Hamani xi funengetiwile? (Est. 7:8) Hamani a nga tifunengetanga xikandza hikwalaho ka gome kumbe ku tivona nandzu. Swi nga endleka leswaku u funengetiwe hi vatirhela-mfumo va huvo, kumbexana a ku ri ku kombisa leswaku xiendlo xa yena xi khomisa tingana kumbe leswaku u langutane ni rifu. Swi nga endleka leswaku a ku ri goza ro sungula ro kombisa leswaku u ta gweviwa rifu. [1, w86-TS 3/15 tl. 25]

12. Xana i muxaka muni wa xivumbiwa xa moya lexi kuceteleke mianakanyo ya Elifazi? (Yobo 4:15, 16) [2, w05-TS 9/15 tl. 26 ndz. 2] Marito yo xopaxopa lama vuriweke hi Elifazi ma kombise leswaku a a nga seketeriwi hi ntsumi yo lulama ya Xikwembu. (Yobo 4:17, 18) Elifazi a a kuceteriwa hi xivumbiwa xa moya lexo homboloka. Leswi a swi vuleke a swi nga fambisani ni Xikwembu. Loko a a kuceteriwa hi ntsumi ya Xikwembu, Yehovha, a a nga ta va a sole Elifazi ni vanghana va yena vambirhi hikwalaho ko vulavula mavunwa! (Yobo 42:7)

13. Xana marito ya Yobo lama tsariweke eka Yobo 7:9, 10 na Yobo 10:21 ma kombisa leswaku Yobo a a nga pfumeli eku pfuxiweni ka vafi? Doo! Marito wolawo ya Yobo ma vulavula hi xiyimo lexi Yobo a a ta va eka xona ku nga ri khale. Swi nga ha endleka a a vula leswaku loko o fa, ku hava ni un’we wa vanhu va le nkarhini wa yena loyi a a ta n’wi vona. Hi ku ya hi vona, a a nga ta vuya kumbe a tsundzukiwa ku kondza ku fika nkarhi lowu vekiweke hi Xikwembu. Swi nga ha endleka leswaku Yobo a a vula leswaku a nga kona loyi a nga tihumesaka eSheol. Leswaku Yobo a a ri ni ntshembo wa ku pfuxiwa ka vafi ka nkarhi lowu taka swi vonaka eka Yobo 14:13-15. [3, w06-TS 3/15 “Rito Ra Yehovha Ra Hanya—Tinhla-nkulu Ta Buku Ya Yobo”]

14. Xana Yobo a a vula yini loko a ku, ‘Ndzi pone ni nhlonge ya meno ya mina’? (Yobo 19:20) A swi pfuni nchumu ku ringeta ku hlamusela marito ya Yobo hi ku ya hi leswi vativi va sayense va ha ku swi tshubulaka hi ti-microscope. (it-2 tl. 977) Hi ku vula leswaku u pone ni nhlonge ya nchumu lowu wu nga riki na nhlonge, swi nga ha endleka a a vula leswaku a nga ponanga na nchumu. [5, w06-TS 3/15 “Rito Ra Yehovha Ra Hanya—Tinhla-nkulu Ta Buku Ya Yobo”]

15. Xana Yobo a a vula yini loko a ku, “Ndzi nga ka ndzi nga tshiki vutshembeki bya mina,” naswona hi nga dyondza yini eka leswi? (Yobo 27:5) I Yobo ntsena loyi a a nga tshika vutshembeki bya yena hikuva vutshembeki byi titshege hi rirhandzu leri munhu a nga na rona eka Xikwembu. Hikokwalaho, hi fanele hi hlakulela ku rhandza Yehovha swinene leswaku hi ta kota ku tshama hi tshembekile. [6, w06-TS 3/15 “Rito Ra Yehovha Ra Hanya—Tinhla-nkulu Ta Buku Ya Yobo”]