Xiyenge 1: Dyondzo Ya Bibele I Yini?
Ku Fambisa Tidyondzo Ta Bibele Leti Endlaka Nhluvuko
1 N’hweti na n’hweti vanhu va Xikwembu va fambisa tidyondzo ta Bibele ta kwalomu ka timiliyoni ta tsevu emisaveni hinkwayo. Loko hi tirhisa madyondziselo lamanene, hi nga pfuna swichudeni leswi leswaku swi endla nhluvuko kukondza swi tinyiketela ivi swi khuvuriwa, kutani swi ‘faneleka kahle ku dyondzisa van’wana.’ (2 Tim. 2:2) Xana u nga tsakela ku pfuna xichudeni xa wena leswaku xi endla nhluvuko wo tano? Ku sukela eka nkandziyiso lowu wa Vutirheli Bya Hina Bya Mfumo ku ta va ni ntlhandlamano wa swihloko leswi nga ta hlamusela tindlela leti lavekaka to fambisa tidyondzo ta Bibele leti endlaka nhluvuko.
2 Dyondzo Ya Bibele Yi Fanele Yi Vikiwa Rini?: Loko mi tshamela ku va ni bulo ra Bibele, hambiloko ri komile, u ri karhi u tirhisa Bibele ni yin’wana ya tibuku leti ku fambisiwaka ha tona dyondzo, u va u ri eku fambiseni ka dyondzo ya Bibele. Mhaka leyi ya tirha hambiloko mi dyondzela ekaya kumbe hi riqingho. Dyondzo yi nga vikiwa loko se yi fambisiwe kambirhi endzhaku ka loko u ta va u n’wi kombile ndlela leyi ku dyondziwaka ha yona niloko u ri na ntshembo wa leswaku mi ta hambeta mi dyondza.
3 Minkandziyiso leyi ku fambisiwaka ha yona tidyondzo ta Bibele i broxara leyi nge Leswi Xi Swi Languteleke ni buku leyi nge Vutivi. Loko minkandziyiso leyi yi hetiwile, naswona munhu wa kona a tikomba leswaku u endla nhluvuko, hambiloko a hlwela, kambe loko a swi twisisa leswi a swi dyondzaka, u nga hambeta u dyondza na yena buku leyi nge Gandzela Xikwembu. Vanhu lava nga dyondzangiki ku ya kule kumbe lava nga swi tiviki kahle ku hlaya, ku nga dyondziwa na vona broxara leyi nge U Nga Va Munghana Wa Xikwembu!
4 Ntirho wo dyondzisa van’wana hi Bibele wu pfune timiliyoni ta vanhu leswaku ti va vadyondzisiwa va ntiyiso va Yesu Kreste. (Mat. 28:19, 20) Loko u tirhisa swiringanyeto leswi nga ta humelela eka ntlhandlamano lowu wa swihloko, u ta fambisa tidyondzo ta Bibele leti endlaka nhluvuko.