Fambisa Tidyondzo Ta Bibele Leti Endlaka Nhluvuko, U Lo Yima Kunene Ni Hi Riqingho
1. Hi xihi xikongomelo xa hina loko hi fambisa dyondzo ya Bibele?
1 Hakunene swa tsakisa ku sungula dyondzo ya Bibele! Kambe ku kuma munhu la tsakelaka ku dyondza Bibele ko va masungulo ntsena. Xikongomelo xo dyondza na yena i ku n’wi pfuna leswaku a va mudyondzisiwa wa xiviri wa Kreste. (Mat. 28:19, 20) I yini lexi nga hi pfunaka leswaku hi fikelela pakani yoleyo?
2. Swi vula yini ku fambisa dyondzo ya Bibele u lo yima kunene kumbe hi riqingho naswona ha yini swi pfuna?
2 Vanhu Lava Tshamaka Va Khomekile: Masiku lawa vanhu va tshama va khomekile swinene. Etindhawini tin’wana a va ha talanga vanhu lava nga pfumelaka ta ha suka leswaku mi dyondza swin’we Bibele awara hinkwayo. Leswaku hi pfuna lava nga riki na nkarhi, hi khutaziwe ku sungula tidyondzo ta Bibele hi lo yima kunene kumbe hi riqingho. Eku sunguleni, tidyondzo leti ti nga ha va ti komile swinene naswona swi nga ha vula leswaku mi ta dyondza Matsalwa ma nga ri mangani ni ndzimana yin’we kumbe timbirhi, mi ri karhi mi tirhisa nkandziyiso wo fana ni buku leyi nge Leswi Bibele Yi Swi Dyondzisaka. Swa tsakisa leswi vahuweleri vo tala se va fambisaka tidyondzo ta Bibele va lo yima kunene kumbe hi riqingho!
3. Ha yini hi fanele hi lwela ku engetela nkarhi wa dyondzo leyi hi yi fambisaka hi lo yima kunene?
3 Kambe, xana hi fanele hi eneriseka ntsena hi ku yi fambisa hilaha ku nga heriki dyondzo yoleyo yo koma hi lo yima kunene? Doo! Hambileswi hi nga fanelangiki hi heta nkarhi wo tala loko hi endzile, Vutirheli Bya Hina Bya Mfumo bya May 1990, eka tluka 4, byi te: “Loko se mi sungurile ku dyondza naswona n’wini wa muti a ya a tsakela, mi nga ha heta nkarhi wo lehanyana mi ri karhi mi dyondza.” Leswi i swa nkoka. Hi xikombiso: Loko n’wana a khomiwe hi ndlala, u nga ha n’wi nyika swakudyanyana hakatsongo-tsongo kukondza a xurha, kambe a wu langutelanga leswaku swakudyanyana sweswo swi n’wi wundla tin’hweti ni leswaku swi n’wi nyika matimba swi tlhela swi n’wi kurisa. Hilaha ku fanaka, xichudeni xa Bibele xi lava dyondzo leyi kongomeke naswona mi dyondza nkarhi na nkarhi leswaku xi kota ku va nandza wa Xikwembu la wupfeke.—Hev. 5:13, 14.
4. Swi pfuna ha yini ku fambisa dyondzo ya Bibele mi tshame hansi?
4 Ku Fambisa Dyondzo Ya Bibele Mi Tshame Hansi: I swinene ku fambisa dyondzo endhawini leyi nga riki na huwa yo kota ekaya kumbe kun’wana laha ku fanelekeke. Sweswo swi ta pfuna xichudeni leswaku xi dyondza hi ku olova nileswaku xi ri twisisa kahle Rito ra Xikwembu. (Mat. 13:23) Nakambe swi ta pfuna wena tanihi mudyondzisi leswaku u pfumelelanisa rungula leri mi ri dyondzaka ni swilaveko swa xichudeni. Tlhandlakambirhi, ku heta nkarhi lowu engetelekeke mi ri karhi mi dyondza swi ta endla leswaku Rito ra Xikwembu ri pfuna ku tiyisa ripfumelo ra xichudeni hilaha ku engetelekeke.—Rhom. 10:17.
5. Xana hi nga endla njhani leswaku n’wini wa muti a hi nyika nkarhi wo tshama hansi hi dyondza ku ri ni ku dyondza mi lo yima kunene?
5 Xana u nga endla njhani leswaku n’wini wa muti a ku nyika nkarhi wo tshama hansi mi dyondza ku ri ni ku dyondza mi lo yima kunene? Loko se mi dyondze ko hlayanyana, swi nga va swinene leswaku u n’wi kombela mi lehisanyana nkarhi wa dyondzo ya n’wina. Kumbe u nga ha n’wi vutisa hi ku gega u ku, “Xana namuntlha u nga va ni nkarhi wo tshama hansi hi bula hi mhaka leyi?” kumbe “Xana u nga rhandza ku heta nkarhi wo tanihi kwihi namuntlha leswaku hi bula hi mhaka leyi?” Loko u vona leswaku matshalatshala ya wena a ma humeleli nikatsongo, hambeta u dyondza na yena mi lo yima kunene. Loko nkarhi wu pfumela, tlhela u n’wi kombela leswaku mi kuma nkarhi wo dyondza mi tshame hansi.
6. Xikongomelo xa hina xi fanele xi va xihi loko hi ri karhi hi endla ntirho wa hina wo chumayela?
6 Loko hi ri karhi hi lavisisa lava nga ni timbilu letinene, hi nga rivali xikongomelo xa hina loko hi sungula tidyondzo ta Bibele. Xikongomelo xa hina i ku pfuna lava nga ni timbilu letinene leswaku va va malandza ya Yehovha lama tinyiketeleke ma tlhela ma khuvuriwa. Onge a nga katekisa matshalatshala ya hina loko hi ri karhi hi endla ntirho wa hina wo chumayela hi ri ni xikongomelo xexo.—2 Tim. 4:5.