Ku Sungula Tidyondzo Ta Bibele U Lo Yima Kunene Ni Hi Riqingho
1, 2. Hi nga yi fambisa njhani dyondzo ya Bibele leswaku hi kota ku pfuna vanhu lava tshamaka va khomekile?
1 Masiku lawa vanhu va tshama va khomekile. Kambe vo tala va vona va ti rhandza timhaka ta swa moya. Xana hi nga va pfuna njhani leswaku va timula torha ra vona ra moya? (Mat. 5:3) Vahuweleri vo tala va swi kota ku fambisa tidyondzo ta Bibele va lo yima kunene kumbe va ti fambisa hi riqingho. Xana u nga ndlandlamuxa ntirho wa wena wo chumayela hi ndlela leyi?
2 Leswaku hi kota ku sungula tidyondzo ta Bibele, hi fanele hi lunghiselela ndlela leyi hi nga ta yi sungula ha yona dyondzo loko ho tshuka hi pfulekeriwe hi nkarhi wo yi sungula. Xana leswi swi nga endliwa njhani naswona swi nga endliwa kwihi?
3. Ha yini u fanele u kombisa n’wini wa muti ndlela leyi dyondzo ya Bibele yi fambisiwaka ha yona eka riendzo ro sungula, u lo yima kunene, naswona sweswo u nga swi endlisa ku yini?
3 U Lo Yima Kunene: Loko u kuma munhu la swi tsakelaka ku bula hi Bibele, pfula eka ndzimana leyi u yi lunghiseleleke, yo kota yo sungula ya dyondzo 1, eka broxara leyi nge Leswi Xi Swi Languteleke, kutani u sungula hi yona. Hlaya ndzimana, u vutisa xivutiso, kutani mi bula hi tsalwa rin’we kumbe mambirhi. Hakanyingi, u nga endla tano u lo yima kunene hi timinete ta ntlhanu kumbe ta khume. Loko munhu wa kona a tsakela bulo ra n’wina, endla malunghiselelo yo tlhela u dyondza na yena ndzimana yin’we kumbe timbirhi leti landzelaka enkarhini lowu taka.—Swiringanyeto swin’wana swo sungula tidyondzo hi ku kongoma swi nga kumiwa eka Vutirheli Bya Hina Bya Mfumo bya January 2002, tl. 6.
4. Xana hi nga yi sungula njhani dyondzo ya Bibele eka maendzo yo vuyela hi lo yima kunene?
4 U nga tirhisa ndlela leyi fanaka leswaku u sungula tidyondzo ta Bibele eka maendzo yo vuyela. Hi xikombiso, u nga ha fambisa broxara leyi nge Leswi Xi Swi Languteleke ivi mi pfula eka dyondzo 2 leyi vulavulaka hi vito ra Xikwembu, mi bula hi tindzimana 1-2. Eka riendzo leri landzelaka, mi nga ha bula hi leswi Bibele yi swi vulaka hi timfanelo ta Yehovha, mi tirhisa tindzimana 3-4. Eka riendzo leri landzelaka, mi nga ha bula hi tindzimana 5-6 ni hi xifaniso lexi nga eka tluka 5 leswaku u kandziyisa ndlela leyi Bibele yi hi pfunaka ha yona leswaku hi tiva Yehovha. Bulo ra n’wina hinkwaro mi nga ri heta mi lo yima kunene hi milenge.
5, 6. (a) I yini lexi nga endlaka leswaku vanhu van’wana va swi tsakela ku dyondza Bibele hi riqingho? (b) Hi xihi xingheniso lexi u nga xi tirhisaka loko u hlamusela munhu hi ta dyondzo leyi nga ta fambisiwa hi riqingho?
5 Hi Riqingho: Vanhu van’wana va nga swi tsakela ngopfu ku fambiseriwa dyondzo ya Bibele hi riqingho ku ri na ku dyondza na vona mi ri ndhawu yin’we. Anakanya hi ntokoto lowu landzelaka: Makwerhu un’wana wa xisati loko a ri karhi a chumayela hi yindlu ni yindlu, u kume wansati un’wana loyi a tshamaka a khomekile hi ntirho naswona a nga ni vana. Loko makwerhu a nga ha n’wi kumi ekaya, u ehlekete ku n’wi bela riqingho. Wansati yoloye u hlamusele leswaku a nga na wona nkarhi wo bula hi Bibele. Makwerhu loyi u te: “U nga dyondza swo tala hi timinete ta khume kumbe ta 15, hambiloko hi bula hi riqingho.” U te: “Loko hi ta bula hi riqingho, swi lunghile!” Ku nga ri kungani, se a va hamba va dyondza swin’we hi riqingho.
6 Xana van’wana va lava u va endzelaka, va nga swi tsakela ku dyondzeriwa hi riqingho? U nga ha ringeta xingheniso lexi hlamuseriweke laha henhla, kumbe u nga ha ku: “Loko u swi tsakela hi nga bula hi Bibele eriqinghweni. Xana sweswo swi ta va swi lunghile?” Loko hi fambisa dyondzo ya Bibele hi ku ya hi swiyimo swa vanhu, hi nga ha va pfuna leswaku va “kuma vutivi bya Xikwembu.”—Swiv. 2:5; 1 Kor. 9:23.