Ku Antswisa Vutshila Bya Hina eNsin’wini—Ndlela Yo Sungula Dyondzo Ya Bibele U Yime eNyangweni U Tirhisa Broxara Leyi Nge, Mahungu Lamanene Lama Humaka Eka Xikwembu!
Lexi Endlaka Swi Va Swa Nkoka: Leswaku hi endla vanhu vadyondzisiwa, hi fanele hi va hi ri vadyondzisi va Rito ra Xikwembu. (Mat. 28:19, 20) Hinkwerhu ka hina hi nga wu dyondzisa kahle ntiyiso hi tirhisa switirhisiwa leswi hi lunghiseleriweke swona. Broxara leyi nge, Mahungu Lamanene Lama Humaka Eka Xikwembu! yi endleriwe ku hi pfuna leswaku hi dyondzisa van’wana ntiyiso. Entiyisweni, hi nga yi tirhisela ku sungula dyondzo ya Bibele ni n’wini wa muti eka riendzo ro sungula hi yime enyangweni.
Ringeta Ku Endla Leswi N’hweti Leyi:
Khongelela ku va ni ku navela ko fambisa dyondzo. Nakambe, kombela Yehovha leswaku a ku pfuna u sungula dyondzo ya Bibele naswona u va mudyondzisi wa ntiyiso la nga ni vuswikoti.—Filp. 2:13.
Tinyike nkarhi wo tiva xingheniso xolexo hi nhloko, hi nkarhi wa vugandzeri bya n’wina bya ndyangu kumbe wa dyondzo ya wena n’wini. Sweswo swi ta ku pfuna leswaku u vulavula hi ku khorwiseka naswona u sungula dyondzo ya Bibele u yime enyangweni loko u ri ensin’wini.