Ndlela Yo Tirhisa Broxara Leyi Nge, Mahungu Lamanene Lama Humaka Eka Xikwembu!
Broxara Leyintshwa Leyi Endleriweke Ku Hi Pfuna Ku Endla Maendzo Yo Vuyela Ni Ku Sungula Tidyondzo Ta Bibele
1. I broxara yihi leyintshwa leyi humesiweke eNtsombanweni wa Muganga lowu a wu ri ni nhloko-mhaka leyi nge, ‘Hlayisa Mbilu Ya Wena!’ leyi endleriweke ku hi pfuna ku endla maendzo yo vuyela ni ku sungula tidyondzo ta Bibele?
1 ENtsombanweni wa Muganga lowu a wu ri ni nhloko-mhaka leyi nge, ‘Hlayisa Mbilu Ya Wena!’ a hi tsake swinene loko hi kuma broxara leyintshwa leyi nga ta hi pfuna ku endla maendzo yo vuyela ni ku sungula tidyondzo ta Bibele. Broxara leyi nge, Mahungu Lamanene Lama Humaka Eka Xikwembu! ya yelana ni broxara leyi nge, Leswi Xi Swi Languteleke, leyi siviwaka hi leyi, hileswi tidyondzo ta yona ti baka nhloko ya mhaka. Leswi swi ta hi pfuna leswaku hi yi tirhisa ku fambisa tidyondzo ta Bibele hambi hi lo yima enyangweni. Kambe, hambileswi broxara leyi nge, Leswi Xi Swi Languteleke a yi hlamusela leswi languteriweke eka Vakreste, leswi swi nga ha tikaka leswaku swichudeni leswintshwa swi swi amukela, broxara leyi leyintshwa yi dzika eka mahungu lamanene lama kumekaka eBibeleni.—Mint. 15:35.
2. Ha yini ku kandziyisiwe broxara leyi nge, Mahungu Lamanene?
2 Ha yini yi kandziyisiwile? Vamakwerhu emisaveni hinkwayo a va ri karhi va kombela leswaku ku humesiwa nkandziyiso wo olova lowu nga ta kokela vanhu entiyisweni ni lowu nga ta endla leswaku ku dyondziwa buku leyi nge, Leswi Bibele Yi Swi Dyondzisaka, ku nga buku leyi hi yi tirhisaka ku fambisa tidyondzo ta Bibele. Vanhu lava va lolohaka ku dyondza hakanyingi va swi tsakela ku dyondza Bibele va tirhisa broxara. Ku engetela kwalaho, broxara yi hundzuluxeriwa hi ku olova hi tindzimi to tala.
3. Broxara leyi yi hambane njhani ni minkandziyiso yin’wana leyi hi yi tirhiselaka ku fambisa dyondzo?
3 Ndlela Leyi Yi Endliweke Ha Yona: Minkandziyiso ya hina yo tala leyi tirhiseriwaka ku fambisa dyondzo yi tsariwe hi ndlela leyi olovelaka munhu leswaku a hlaya a tlhela a twisisa ntiyiso hambiloko a nga pfuniwi hi munhu. Nkandziyiso lowu wu hambanile. Wu tsaleriwe ku pfuna munhu leswaku a dyondza Bibele swin’we ni mudyondzisi. Hikwalaho loko u wu fambisela munhu, i swinene ku bula hi ndzimana yin’we kumbe timbirhi. Tindzimana ta kona ti komile, hikwalaho ti nga ha hlayiwa mi yime enyangweni ekaya ka munhu kumbe mi ri endhawini ya yena ya bindzu. Hambileswi swi nga swinene ku sungula eka dyondzo 1, hi nga ha sungula ku dyondza na munhu eka dyondzo yin’wana ni yin’wana eka broxara leyi.
4. Broxara leyi yi hi pfuna njhani leswaku hi dyondzisa vanhu hi ku tirhisa Bibele hi ku kongoma?
4 Eka minkandziyiso ya hina yo tala, tinhlamulo ta swivutiso ti kumeka eka tindzimana. Kambe, eka nkandziyiso lowu, tinhlamulo ti kumeka eBibeleni. Vanhu vo tala va lava ku hlaya Bibele ematshan’weni yo hlaya minkandziyiso ya hina. Hikwalaho, matsalwa yo tala lama kombisiweke a ma tshahiwanga. Ma fanele ma hlayiwa eBibeleni. Leswi swi pfuna swichudeni ku vona leswaku leswi swi swi dyondzaka swi huma eka Xikwembu.—Esa. 54:13.
5. Ha yini swi ri swa nkoka leswaku mudyondzisi a yi lunghiselela kahle dyondzo yin’wana ni yin’wana?
5 Broxara leyi a yi hlamuseli matsalwa hinkwawo. Ha yini? Yi endleriwe ku khutaza xichudeni ku vutisa swivutiso ni ku pfumelela mudyondzisi leswaku a tirhisa vuswikoti bya yena byo dyondzisa. Hikwalaho, i swa nkoka ku yi lunghiselela kahle dyondzo yin’wana ni yin’wana. Xitsundzuxo: U nga vulavuli ngopfu. Ha swi rhandza ku hlamusela Matsalwa. Kambe hakanyingi ku ni swo tala leswi hi nga swi fikelelaka loko hi kombela xichudeni leswaku xi hlamusela leswi xi ehleketaka leswaku tsalwa ri vula swona. Loko hi tirhisa swivutiso hi ndlela leyinene, hi nga xi pfuna ku twisisa leswi tsalwa rin’wana ni rin’wana ri vulaka swona.—Mint. 17:2.
6. Hi nga yi tirhisa njhani broxara leyi (a) loko vanhu va nga tshembi leswaku Xikwembu xi kona naswona va kanakana Bibele? (b) loko hi chumayela hi yindlu ni yindlu? (c) loko hi sungula tidyondzo ta Bibele endzhaku ko kombela munhu hi ku kongoma? (d) loko hi endla maendzo yo vuyela?
6 Ku fana ni minkandziyiso yin’wana leyi hi yi tirhiselaka ku fambisa tidyondzo, broxara leyi hi nga yi fambisa nkarhi wun’wana ni wun’wana, ku nga khathariseki leswaku ku fambisiwa yini hi n’hweti yoleyo. Vo tala va ta tsakela ku yi tirhisa leswaku va sungula tidyondzo loko va vulavula ni munhu ro sungula va yime enyangweni. Ku engetela kwalaho, hilaha swi hlamuseriweke hakona entsombanweni wa muganga, loko hi yi tirhisa loko hi tlhelela eka lava va kombiseke ku tsakela “hakunene swi nga endla leswaku maendzo yo vuyela ma tsakisa!”—Vona mabokisi eka matluka 5-7.
7. U nga yi fambisa njhani dyondzo ya Bibele u tirhisa broxara leyi?
7 Ndlela Yo Fambisa Dyondzo: Hi nga sungula bulo hi ku hlaya xivutiso lexi nga ni nomboro lexi tsariweke hi marito yo dzwihala. Endzhaku, hlaya ndzimana ni (ma-)tsalwa leri nga voyamisiwa. Vutisa swivutiso hi vutlhari leswaku u pfuna n’wini wa muti a twisisa leswi matsalwa ma vulaka swona. Kutani, loko mi nga si hundzela eka xiyenge lexi landzelaka, kombela n’wini wa muti leswaku a hlamula xivutiso lexi tsariweke hi marito yo dzwihala, ku vona loko a swi twisisa. Eka maendzo ma nga ri mangani yo sungula, swi nga va swinene loko mi kambisisa xivutiso xin’we ntsena lexi tsariweke hi marito yo dzwihala. Hi ku famba ka nkarhi, mi nga ha lehisa mabulo hi ku bula hi dyondzo hinkwayo.
8. Hi fanele hi endlisa ku yini loko hi lava ku hlaya matsalwa naswona ha yini?
8 Matsalwa lama kombisiweke lama nga ni rito leri nge “hlaya” hi wona lama xi hlamulaka hi ku kongoma xivutiso lexi tsariweke hi marito yo dzwihala. Loko u lava ku hlaya tsalwa, papalata ku vula leswaku, “Muapostola Pawulo u tsale leswi” kumbe “Xiya leswi Yeremiya a swi profeteke.” N’wini wa muti a nga ha anakanya leswaku hi hlaya marito lama tsariweke hi vanhu. Swi nga va swinene ku vula leswaku, “Rito ra Xikwembu ri ri” kumbe “Xiya leswi Bibele yi swi profeteke.”
9. Xana matsalwa hinkwawo lama kombisiweke ma fanele ma hlayiwa hi nkarhi wa dyondzo?
9 Xana hi fanele hi hlaya matsalwa hinkwawo lama kombisiweke kumbe hi fanele hi hlaya ntsena lama kombisiweke leswaku “hlaya”? Sweswo swi ta ya hi swiyimo. Matsalwa hinkwawo lama kombisiweke ma tsariwe hi xikongomelo xo karhi. Rin’wana ni rin’wana ri ni rungula leri ku faneleke ku buriwa ha rona. Kambe eka swiyimo swin’wana, loko xichudeni xi nga ri na nkarhi, xi nga tsakeli kumbe xi nga swi koti ku hlaya swi nga va swinene leswaku hi hlaya ntsena matsalwa lama kombisiweke leswaku “hlaya.”
10. Hi rini laha hi nga sungulaka ku tirhisa buku leyi nge, Leswi Bibele Yi Swi Dyondzisaka?
10 Loko Se U Fanele U Tirhisa Buku Leyi Nge, Leswi Bibele Yi Swi Dyondzisaka: Endzhaku ka loko se mi dyondze ko hlayanyana naswona loko se mi dyondza nkarhi na nkarhi, mi nga ha tirhisa buku leyi nge, Leswi Bibele Yi Swi Dyondzisaka kumbe mi ya emahlweni mi tirhisa broxara leyi nge, Mahungu Lamanene ku fikela loko mi yi heta. Vahuweleri va nga tirhisa vutlhari ku vona leswaku hi rini laha va nga tirhisaka buku yoleyo. Loko mi sungula buku leyi nge, Leswi Bibele Yi Swi Dyondzisaka, xana mi fanele mi sungula eku sunguleni? A ku vekiwanga milawu emhakeni leyi. Vanhu a va fani. Kambe, swichudeni swo tala swi nga vuyeriwa hi ku tlhela swi dyondza tidyondzo leti fanaka hi vuenti eka buku leyi nge, Leswi Bibele Yi Swi Dyondzisaka.
11. Ha yini hi fanele hi tirhisa broxara leyi leyintshwa hi ndlela leyinene?
11 Emisaveni leyi mahungu lamanene ma kalaka, hi ni lunghelo lerikulu ro chumayela mahungu lamanene ku tlula hinkwawo, ya leswaku Mfumo wa Xikwembu wa fuma nileswaku ku nga ri khale wu ta tisa misava leyintshwa laha ku nga ta va ni ku lulama! (Mat. 24:14; 2 Pet. 3:13) Ha tshemba leswaku vo tala lava twaka rungula leri va ta pfumelelana ni marito lawa lama huhuteriweke lama nge: “Milenge ya loyi a tisaka mahungu lamanene ya languteka hakunene ehenhla ka tintshava, loyi a twarisaka ku rhula, loyi a tisaka mahungu lamanene ya leswo antswa, loyi a twarisaka ku ponisiwa, loyi a byelaka Siyoni a ku: ‘Xikwembu xa wena i hosi!’” (Esa. 52:7) Onge hi nga tirhisa broxara leyi leyintshwa leswaku hi yisa mahungu lamanene lama humaka eka Xikwembu eka lava va nga ni torha ensin’wini ya hina!
[Bokisi leri nga eka tluka 5]
Loko Vanhu Va Nga Tshembi Leswaku Xikwembu Xi Kona Niloko Va Kanakana Bibele:
● Etindhawini tin’wana, vahuweleri va xiye leswaku loko va tirhisa rito leri nge, “Xikwembu” ni leri nge, “Bibele” vanhu a va ri tsakeli rungula ra vona. Exiyin’weni xexo, eka riendzo ro sungula, swi nga va swinene ku vulavula hi timhaka leti karhataka vanhu endhawini ya ka n’wina, to fana ni ku lava ku va ni hulumendhe leyinene, laha mpfuno wa xiviri wa mindyangu wu nga kumiwaka kona ni leswi vumundzuku byi hi khomeleke swona. Kumbexana hi nga va komba broxara leyi nge, Mahungu Lamanene endzhaku ka loko hi bule na vona ko talanyana malunghana ni ndlela leyi hi swi tivaka ha yona leswaku Xikwembu xi kona ni leswaku ha yini Bibele yi tshembeka.
[Bokisi leri nga eka tluka 6]
Loko Hi Chumayela Hi Yindlu Ni Yindlu:
● “Ndzi endzele ku ta ku komba ndlela leyi swi nga olovaka ha yona ku tiva xikongomelo xa Xikwembu hi vumundzuku bya vanhu. Xana u tshame u tivutisa loko Xikwembu xi ta ku herisa ku xaniseka? [Yimela nhlamulo.] Broxara leyi yi kombisa laha u nga kumaka nhlamulo ya xivutiso lexi eBibeleni. [N’wi nyike broxara kutani u hlaya na yena ndzimana yo sungula eka dyondzo 1, swin’we na Yeremiya 29:11.] Hi ku ya hi rungula leri, xana a swi kombisi leswaku Xikwembu xi lava hi va ni vumundzuku lebyinene? [Yimela nhlamulo.] Loko u yi tsakela, u nga sala na yona broxara leyi. Enkarhini lowu taka, hi nga kambisisa ndzimana ya vumbirhi leswaku hi kuma nhlamulo leyi nga eBibeleni ya xivutiso lexi nge, ‘Xana Xikwembu xi ta va ntshunxa njhani vanhu eka swilo leswi va vangelaka ku xaniseka?’” Loko n’wini wa muti a tikomba a ri ni nkarhi lowu engetelekeke eka riendzo ro sungula, mi nga ha hlaya mi tlhela mi bula hi ndzimana ya vumbirhi ni tindzimana tinharhu ta le Bibeleni leti nga eka yona. Hlela ku tlhela u vuya leswaku mi ta bula hi xivutiso xa vumbirhi eka dyondzo yoleyo.
● “Vanhu vo tala va rhandza ku khongela, ngopfu-ngopfu loko va ri ni swiphiqo. Xana wa khongela minkarhi yin’wana? [Yimela nhlamulo.] Xana u anakanya leswaku Xikwembu xi yingisa swikhongelo hinkwaswo kumbe swi kona swikhongelo leswi nga xi tsakisiki? [Yimela nhlamulo.] Laha ndzi ni broxara leyi kombaka ndlela yo kuma tinhlamulo ta le Bibeleni ta swivutiso leswi. [N’wi nyike broxara kutani mi bula swin’we hi ndzimana yo sungula eka dyondzo 12 mi tlhela ma hlaya ni matsalwa lama kombisiweke leswaku “hlaya.”] Xana a swi tsakisi leswi Xikwembu xi tiyimiseleke ku hi yingisela? Kambe leswaku hi khongela hi ku pfumelelana ni ku rhandza ka Xikwembu, hi fanele hi xi tiva kahle Xikwembu. [Pfula eka dyondzo 2 kutani u n’wi komba swihlokwana swa kona.] Loko u swi tsakela, ndzi nga ku siyela broxara leyi naswona hi nkarhi wun’wana hi nga kuma tinhlamulo ta le Bibeleni ta swivutiso leswi leswi tsakisaka.”
● “Ndzi ku endzerile hileswi vanhu va tivutisaka leswaku misava leyi yi kongome kwihi. Xana u anakanya leswaku swiyimo swi ta kala swi cinca? [Yimela nhlamulo.] Vanhu vo tala va hlamala loko va dyondza leswaku Bibele yi ni mahungu lamanene lama nga hi nyikaka ntshembo. Hi leswi swivutiso swin’wana leswi Bibele yi swi hlamulaka.” N’wi nyike broxaka kutani u n’wi kombela leswaku a hlawula xivutiso lexi n’wi tsakisaka eka xifunengeto xa le ndzhaku xa broxara. Kutani pfulani eka dyondzo ya kona, ivi u n’wi komba ndlela leyi yi dyondziwaka ha yona. Endla malunghiselelo yo tlhelela leswaku mi ta bula hi xivutiso lexi landzelaka eka dyondzo yoleyo.
[Bokisi leri nga eka tluka 7]
Ringeta Ku Kombela Dyondzo Ya Bibele Hi Ku Kongoma:
● “Ndzi ku endzele swa nkarhinyana leswaku ndzi ta ku komba xitirhisiwa lexintshwa xo fambisa dyondzo ya Bibele. Broxara leyi yi ni tidyondzo ta 15 leti kombisaka laha u nga kumaka tinhlamulo ta swivutiso swa nkoka eBibeleni ya wena. [N’wi kombe xifunengeto xa le mahlweni ni xa le ndzhaku xa broxara.] Xana u tshame u ringeta ku twisisa Bibele? [Yimela nhlamulo.] Inge ndzi ku komba ndlela leyi tidyondzo leti ti olovaka ha yona. [Bulani hi ndzimana yo sungula eka xivutiso xa vunharhu eka dyondzo 3 kutani mi hlaya Nhlavutelo 21:4, 5. Loko swi fanela, bulani hi ndzimana leyi landzelaka ni matsalwa lama kombisiweke leswaku “hlaya.”] Loko u swi tsakela, ndzi nga ku siyela broxara leyi. Hi ku khutaza leswaku u ringeta ku dyondza Bibele u tirhisa xitirhisiwa lexi kan’we. Loko u swi tsakela, u nga ya emahlweni. Enkarhini lowu taka, hi nga bula hi dyondzo yo sungula. Xiya leswaku yo va eka tluka rin’we ntsena.”
[Bokisi leri nga eka tluka 7]
Vulavula Hi Yona Eka Riendzo Ro Vuyela:
● Loko hi tlhelela eka munhu loyi a kombiseke ku tsakela, hi nga ha ku: “Ndza tsaka ku tlhela ndzi ku vona. Ndzi ku tele ni broxara leyi nyikelaka tinhlamulo ta le Bibeleni eka swivutiso swo tala leswi tsakisaka. [N’wi nyike broxara kutani u n’wi kombela a languta xifunengeto xa hala ndzhaku.] Hi yihi nhloko-mhaka leyi ku tsakisaka swinene eka leti? [Yimela nhlamulo. Kutani pfula eka dyondzo leyi a yi hlawuleke.] Inge ndzi ku komba ndlela leyi broxara leyi yi nga tirhisiwaka ha yona ku kuma nhlamulo leyi nga eBibeleni.” N’wi kombe ndlela leyi dyondzo yi fambisiwaka ha yona hi ku va mi bula hi ndzimana yin’we kumbe timbirhi mi tlhela mi hlaya matsalwa lama kombisiweke leswaku “hlaya.” Hi ndlela leyi se u sungule dyondzo ya Bibele! Siyela n’wini wa muti broxara kutani u endla malunghiselelo yo tlhela u vuya. Loko mi hete dyondzo, mi nga bula hi dyondzo yin’wana leyi hlawuriweke hi n’wini wa muti kumbe mi sungula eku sunguleni ka broxara.