Tekelela Yehovha Hi Ku Khathalela Van’wana Hi Xiviri
1 Yehovha I Xikombiso Lexikulu Xa Munhu La Kombisaka Ku Khathalela Van’wana Hi Xiviri. Leswi A Nga Hosi Leyikulu Ya Vuako Hinkwabyo, Wa Swi Tiva Swilaveko Swa Swivumbiwa Swa Yena Swa Vanhu. (1 Pet. 5:7) Yesu U Khutaze Valandzeri Vakwe Leswaku Va Kombisa Mikhuva Ya Tata Wa Yena, Loyi A Humesaka Dyambu Ni Ku Nisa Mpfula Ehenhla Ka Vanhu Lavo Lulama Ni Lavo Homboloka. (mt. 5:45) U Nga Tekelela Yehovha Hi Ku Khathalela Van’wana Hi Xiviri—U Lunghekela Ku Byela Un’wana Ni Un’wana Loyi U Hlanganaka Na Yena Rungula Ra Mfumo. Loko U Tolovelane Swinene Ni Tibroxara Leti Nga Ta Tirhisiwa Evutirhelini Hi July, U Ta Va U Ri Exiyin’weni Lexinene Xo Nyikela Van’wana Mpfuno Wa Moya. Swiringanyeto Leswi Landzelaka Swi Nyikela Mpfuno Wa Mayelana Ni Ndlela Leyi U Nga Lunghiselelaka Ha Yona Riendzo Ro Sungula Kutani U Landzelela Ku Tsakela Hi Maendzo Yo Vuyela Ya Nkarhi Na Nkarhi.
2 Loko u fambisa broxara leyi nge “Xana Xikwembu Xa Hi Khathalela Hakunene?” u nga ha ku:
◼ “Xana u tshama u tivutisa leswaku ha yini Xikwembu xi pfumelela vanhu va xaniseka loko xi va khathalela hakunene? [Yimela nhlamulo.] Broxara leyi a yi nyikeli nhlamulo leyi enerisaka ntsena ya xivutiso lexi kambe yi tlhela yi kombisa leswaku Xikwembu xi tshembise ku susa ku onhaka loku munhu a titiseleke kona ni kaya rakwe ra la misaveni.” Hlaya ndzimana 23 eka tluka 27. N’wi kombise xifaniso lexi nga ehansi ka yona, kutani u hlaya Pisalema 145:16 leyi nga eka ndzimana 22. Fambisa broxara hi munyikela wa R1,00. Loko yi amukeriwa, vutisa xivutiso lexi nga ta hlamuriwa eka riendzo leri landzelaka, xo tanihi lexi nge: “Xana u nga tsakela ku tiva ndlela leyi Xikwembu xi nga ta hetisisa xikongomelo xa xona xo tisela vanhu mikateko ni ku hundzula misava yi va paradeyisi?”
3 Loko u tlhelela eka lava u va fambiseleke broxara leyi nge “Xana Xikwembu Xa Hi Khathalela Hakunene?” u nga sungula bulo rin’wana hi ndlela leyi:
◼ “Enkarhini lowu nga hundza loko ndzi ku endzerile, hi xiye leswaku Xikwembu xa hi khathalela hakunene, ni leswaku i xikongomelo xa xona ku susa ku onhaka loku munhu a titiseleke kona ni kaya ra yena ra la misaveni.” Pfula broxara eka xifaniso lexi nga eka matluka 2-3 kutani u ku: “Hi gimete bulo ra hina hi xivutiso lexi nge, Xana Xikwembu xi ta xi hetisisa njhani xikongomelo xa xona xo tisela vanhu mikateko ni ku cinca misava yi va paradeyisi? Xana u anakanya yini hi sweswo?” Yimela nhlamulo. Pfula eka tluka 17, kutani u hlaya ndzimana 2 na Daniyele 2:44. Endzhaku ka sweswo, hlaya ndzimana 12 eka tluka 18. Vutisa n’wini wa muti loko a ta swi tsakela ku hlaya na wena xiyenge 9 xa broxara leyi. Loko a swi tsakela, xi dyondze na yena.
4 Hi lexi xingheniso lexi nga ha tirhisiwaka ku fambisa broxara leyi nge “Loko U Feriwa Hi Loyi U N’wi Rhandzaka.” N’wi kombise xifunengeto xa yona kutani u ku:
◼ “Namuntlha hi vulavula hi ta broxara leyi leyi chaveleleke ni ku nyika ntshembo eka timiliyoni ta vanhu leti feriweke hi varhandziwa va tona. Xana u tshama u tivutisa leswaku hi wihi ntshembo lowu nga kona hi vafi? [Yimela nhlamulo.] Bibele yi xi hlamusela erivaleni xitshembiso xa Xikwembu xo pfuxa vafi.” Hlaya Yohane 5:28, 29. Pfula broxara ivi u hlamusela tinhla leti nga eka ndzimana yo hetelela eka tluka 28 ni ndzimana yo sungula eka tluka 31. N’wi kombise swifaniso leswi fambisanaka na tona. Fambisa broxara hi R1,00. U nga khulela ndlela ya riendzo ro vuyela hi ku vutisa u ku, “Hi nga tiyisekisa ku yini leswaku eku heteleleni rifu ri ta herisiwa hilaha ku heleleke?”
5 Laha u fambiseke kona broxara leyi nge “Loko U Feriwa Hi Loyi U N’wi Rhandzaka,” u nga ha lava ku tirhisa xingheniso lexi eka riendzo ro vuyela:
◼ “Loko hi vulavula enkarhini lowu nga hundza, hi bule hi ntshembo lowu hlamarisaka wa ku pfuxiwa ka vafi. Broxara leyi ndzi ku siyeleke yona yi hlamusela xivangelo lexi hi nga tiyisekaka ha xona leswaku eku heteleleni rifu ri ta herisiwa hilaha ku heleleke. Xana a wu kumanga switshembiso swa Xikwembu swi ri leswi chavelelaka ni ku tshembisa?” Yimela nhlamulo. Kutani u pfula eka tluka 31 ra broxara, kutani u hlaya ndzimana ya vumbirhi ni ya vunharhu, kun’we na Nhlavutelo 21:1-4. Kandziyisa ku langutela loku hi nga na kona ko tiphina hi vutomi handle ko fa. Loko u vona ku tsakela loku kombisiweke ni swiyimo swa nkarhi wolowo, u nga n’wi hlamusela hi ta dyondzo ya Bibele hi buku leyi nge Vutivi kumbe u vutisa xivutiso xin’wana leswaku u pfula ndlela ya riendzo rin’wana ro vuyela.
6 U nga ha vula leswi landzelaka loko u fambisa broxara leyi nge “Xana Xikongomelo Xa Vutomi I Yini—U Nga Xi Kumisa Ku Yini?”:
◼ “Vanhu vo tala va tivutisa leswaku hi xihi xikongomelo xa vutomi. Va tivutisa leswi: ‘Ha yini ndzi ri laha? Xana ndzi ya kwihi? Xana vumundzuku byi ndzi khomele yini?’ Xana u anakanya leswaku hi nga ti kuma kwihi tinhlamulo? [Yimela nhlamulo.] Xiya leswi Bibele yi swi vulaka. [Hlaya Pisalema 36:9.] Xana a swi twali ku va hi gimeta hi leswaku Muvumbi wa munhu hi yena a nga hi hlamuselaka ku antswa xivangelo xo va hi ri laha? [Yimela nhlamulo.] Broxara leyi yi komba xikongomelo-nkulu lexi Xikwembu xi hi vekeleke xona.” Pfula eka matluka 20-1, hlaya marito ya xifaniso, kutani u hlamusela xifaniso; ivi u fambisa broxara hi R1,00. Loko yi amukeriwa, vutisa: “Hi nga tiyiseka njhani leswaku xikongomelo xa Xikwembu xa leswaku vanhu va hanya hi laha ku nga heriki emisaveni ya Paradeyisi a xi hundzukanga?” Veka nkarhi wo tlhela u vuya.
7 Loko ku fambisiwe broxara leyi nge “Xana Xikongomelo Xa Vutomi I Yini—U Nga Xi Kumisa Ku Yini?” u nga ha vula swin’wana swo fana ni leswi loko u tlhelela:
◼ “Eka riendzo ra mina leri nga hundza, ndzi tsakele ku bula na wena hi langutelo ra Bibele mayelana ni loko vutomi bya munhu byi ri ni xikongomelo hakunene.” N’wi kombe xifaniso lexi nga eka tluka 31 kutani u vutisa, “Xana hi nga tiyiseka njhani leswaku ka ha ri ku rhandza ka Xikwembu leswaku vanhu va hanya hilaha ku nga heriki emisaveni ya Paradeyisi?” Hlaya ndzimana 3 eka tluka 20. Bula hi tinhla leti nga ehansi ka xihlokwana lexi nga eka tluka 21 lexi nge, “Xikongomelo Xa Xikwembu A Xi Hundzukanga.” Pfula eka xifunengeto xa le ndzhaku xa broxara, kutani u hlaya hi ta dyondzo ya le kaya ya Bibele ya mahala. Hlamusela buku leyi nge Vutivi, kutani u kombisa ndlela leyi hi yi tirhisaka ha yona tanihi xipfuneto xo dyondza Bibele.
8 Vutirheli bya hina byi fanele byi kombisa ku tsakela ka hina ka xiviri loku hi nga na kona ko pfuna va timbilu letinene leswaku “va fika laha va kotaka ku tiva leswi swi nga ntiyiso.” (1 Tim. 2:4) Hikwalaho, endla nkarhi eka xiyimiso xa wena xa ntirho wo vuyela eka munhu un’wana ni un’wana loyi u n’wi fambiseleke broxara. Loko u va khathalela hi xiviri swi nga pfuna lava rilaka ni ku konya hikwalaho ka swilo swa manyala leswi endliwaka evukhongerini bya mavunwa leswaku va fungheriwa ku pona. (Ezek. 9:4, 6) Nakambe u ta kuma ntsako ni ku eneriseka loku tisiwaka hi ku tiva leswaku u tekelela Yehovha hi ku khathalela van’wana swinene.—Ringanisa Vafilipiya 2:20.