Huwelela Mahungu Lamanene Ya Mfumo Hi Tibroxara

¹ A hi ku tsakisa ka swona ku tiva ntiyiso ni ku va exikarhi ka lava huwelelaka mahungu lamanene hi ku hiseka! Vanhu lava nga riki enhlengeletanweni ya Xikwembu va ni torha ro lava ku twa mahungu lamanene ya Mfumo. Ntiyiso wa mayelana ni Mfumo wu hlamuseriwe hi ndlela yo olova eka broxara ya Tsakela Vutomi eMisaveni Hi Masiku!, “Vonani, Ndzi Endla Swilo Hinkwaswo Swi Va Leswintshwa”! ni leyi nge Hulumendhe Leyi Nga Ta Tisa Paradeyisi. Ti byi kombisa kahle vutomi emisaveni ehansi ka Mfumo wa Xikwembu, naswona ti kongomisa muhlayi eka swiendlakalo swa xiviri swa Mfumo leswi hlamuseriweke eRitweni ra Xikwembu. Kavula, ku fambisela munhu la tsakelaka broxara ko va masungulo ya ntirho wa hina. (1 Kor. 9:23) A hi tlheleleni hi xihatla eka lava hi va fambiseleke, hi xikongomelo xo sungula dyondzo hi ku tirhisa buku leyi nge Vutivi Lebyi Yisaka eVuton’wini Lebyi Nga Heriki. Xana leswi hi nga swi endlisa ku yini hi August?

² Broxara leyi nge “Tsakela Vutomi eMisaveni Hi Masiku!” yi nga ha fambisiwa hi ku tirhisa xingheniso xo koma swinene. Loko u ri karhi u kombisa xifunengeto xa yona, u nga ha ku: ◼“Ndzi tsakela ku ku komba nchumu wun’wana lowu nga ni rungula lerinene.” Pfula broxara leyi nge Vutomi eMisaveni, kutani u hlaya ndzimana yo sungula ya xingheniso. Kutani u ya emahlweni u ku: “Yi tlhela yi hlamula xivutiso lexi nge [pfula nhloko-mhaka leyi nga ehenhla ka xifaniso xa nomboro 8]: ‘Hikwalaho ka yini munhu a fa?’ Swi ta ku tsakisa ku languta swifaniso ni ku hlaya matsalwa lama nga eka broxara leyi. Loko u swi tsakela, ndzi nga ku siyela broxara leyi hi munyikelo wa R1,00.”

³ I yini leswi u nga ta swi vula loko u tlhelela laha u fambiseke kona broxara leyi nge “Vutomi eMisaveni”? U nga ringeta xingheniso lexi: ◼Kombisa xifaniso lexi nga eka nomboro 49 eka broxara leyi nge Vutomi eMisaveni kutani u vutisa, “Xana lexi a hi xifaniso xo saseka ke? [Yimela nhlamulo.] Xi kumeka eka broxara leyi ndzi ku siyeleke yona eriendzweni leri hundzeke. Ndzi tsakela ku ku vutisa xivutiso lexi nga eka tluka leri landzelaka.” Pfula xifaniso xa nomboro 50 ivi u hlaya xivutiso: “‘Xana wa swi tsakela ku hanya hi masiku eparadeyisini leyo xonga swonghasi?’ [Yimela nhlamulo.] Loko sweswo u swi tsakela, xiya leswi yi swi vulaka leswi u faneleke u swi endla: ‘Kutani dyondza swo tala leswi Xikwembu xi swi vulaka.’ [Hlaya Yohane 17:3.] Ndzi tsakela ku dyondza na wena Bibele mahala. Xana u nga swi tsakela?” N’wi byele nkarhi lowu faneleke lowu u nga ta vuya ha wona.

⁴ Loko u fambisa broxara leyi nge “Vonani, Ndzi Endla Swilo Hinkwaswo Swi Va Leswintshwa,”! u nga ha sungula hi ku kombisa xifaniso hinkwaxo xa xifunengeto kutani u vutisa: ◼“I yini leswi u ehleketaka leswaku swi ta laveka ku endla misava hinkwayo yi languteka hi ndlela leyi?” Yimela nhlamulo. Hlamusela swilo swin’wana leswi xiyekaka exifanisweni, leswi ku vulavuriwaka ha swona eka tluka 3. Kutani u ku: “Vanhu vo tala va vona onge a swi koteki ku endla misava yo fana ni leyi. Kambe Xikwembu xi nga swi kota. [Hlamusela tinhla leti nga eka ndzimana 43; kutani u hlaya Esaya 9:6, 7.] Xikwembu xi tshembise ku tisa misava leyintshwa laha vanhu va matiko hinkwawo va nga ta tiphina hi paradeyisi leyi hlamarisaka. Ndzi tsakela leswaku u hlaya broxara leyi. Yi ta ku komba ndlela leyi wena ni ndyangu wa wena mi nga tsakelaka vumundzuku lebyi hlamarisaka lebyi nga ta tisiwa hi Xikwembu.”

⁵ Eka riendzo ro vuyela, u nga ha tirhisa broxara leyi nge “Vonani” leswaku u hlamusela lexi endlaka ku va ni xilaveko xo dyondza swo tala hi Bibele. Kumbexana u nga kombisa xifunengeto nakambe kutani u ku: ◼“Loko ndzi ku komba xifaniso lexi ro sungula, hi pfumelelanile leswaku hi nga rhandza ku hanya emisaveni yo tano leyi hlamarisaka. Leswaku leswi swi koteka, ku ni swin’wana leswi hinkwerhu ka hina hi faneleke ku swi endla.” Pfula broxara leyi nge “Vonani” eka ndzimana 52; hlaya ndzimana ni tsalwa ra Yohane 17:3. Hlamusela rungula leri nga eka ndzimana 53 malunghana ni dyondzo leyinene ya Bibele, kutani u hlamusela leswaku Timbhoni ta Yehovha ti nyikela ndzetelo lowo tano ekaya mahala. Kombisa ndlela ya hina yo fambisa dyondzo, hi ku tirhisa buku leyi nge Vutivi.

⁶ Loko u fambisa broxara leyi nge “Hulumendhe Leyi Nga Ta Tisa Paradeyisi,” u nga ha ringeta ku vula leswi: ◼“Ndzi twe vanhu vo tala va vula leswaku va nga tsakela ku hanya ehansi ka hulumendhe leyi nga ta ololoxa swiphiqo leswi hi langutaneke na swona namuntlha. [Boxa swiphiqo swa kwala tikweni swo tanihi ku pfumaleka ka mintirho, ku andza ka vugevenga kumbe ku tirhisiwa loko biha ka swidzidzirisi.] Swilo leswi swi endla leswaku hi titwa hi nga sirhelelekanga malunghana ni vumundzuku bya hina ni bya varhandziwa va hina. Xana u anakanya leswaku yi ta va kona hulumendhe leyi nga ta ololoxa swiphiqo leswi? [Yimela nhlamulo.] Kumbexana u tshame u khongela Xikhongelo xa Hosi. Loko swi ri tano, xana a wu swi tiva leswaku entiyisweni u khongelela hulumendhe leyo lulama?” Pfula eka tluka 3 ra broxara leyi nge Hulumendhe, kutani u hlaya tindzimana timbirhi leto sungula. Fambisa broxara hi munyikelo wa R1,00.

⁷ Loko u fambise broxara leyi nge “Hulumendhe Leyi Nga Ta Tisa Paradeyisi,” u nga sungula bulo eka riendzo ro vuyela hi ku vula u ku: ◼“Eku sunguleni hi vulavule hi xilaveko xa hulumendhe leyo lulama leyi nga ta ololoxa swiphiqo swa vanhu. Broxara leyi ndzi ku siyeleke yona yi vulavula hi Mfumo wa Xikwembu tanihi ntshembo wa hina lowu nga woxe. Vanhu vo tala va tivutisa leswi hulumendhe yoleyo yi nga ta swi endla ku antswisa swiyimo swa hina. Bibele yi kombisa leswaku ana se Kreste u swi kombisile leswaku u ta swi kota ku endla leswi varhangeri va vanhu va tsandzekeke ku swi endla.” Pfula broxara leyi nge Hulumendhe eka tluka 29, ivi u hlaya tindzimana ta mune leto hetelela. Kutani u ku: “Xana byebyo a hi vumundzuku lebyi tsakisaka ke? Xana u nga tsakela ku byi vona?” Yimela nhlamulo. Hlaya Yohane 17:3. N’wi khutaze leswaku a dyondza swo tala hi ku tirhisa dyondzo ya le kaya ya Bibele.

⁸ Loko u tirhisa tibroxara tin’wana, u nga ha lunghiselela swingheniso swa wena n’wini, hi ku tirhisa swiringanyeto leswi nga laha henhla tanihi swikombiso. Hlayisa rhekhodo ya vanhu hinkwavo lava tsakelaka lava u va kumeke naswona u tiyiseka leswaku u tlhelela eka vona hi xihatla hilaha u nga kotaka hakona. Lunghiselela kahle naswona u kombela ku katekisiwa hi Yehovha loko u ri karhi u twarisa mahungu lamanene ya Mfumo.