Ku Hlakulela Ku Tsakela Rungula Ra Mfumo
1 Ku hundze nkarhinyana—kumbexana siku rin’we kumbe mambirhi, kumbexana vhiki rin’we—ku sukela loko u vulavule ni munhu la kombiseke ku tsakela rungula ra Mfumo. Ku nga khathariseki leswaku u teke buku ya Bibele kumbe a nga yi tekanga, i swa nkoka ku hlakulela ku tsakela kun’wana ni kun’wana hi ku hatlisa hi laha swi kotekaka ha kona.
2 Pfuxeta tinhla leti u ti tsaleke hi vukheta endzhaku ka riendzo ro sungula. Kutani, loko u longa bege ya wena yo ya ensin’wini, tiyiseka leswaku u nghenisa kopi ya buku leyi u yi fambiseke leswaku u languta eka yona eka riendzo ro vuyela.
Loko u fambise broxara leyi nge “Vonani,” u nga ha ku:
◼ “Ndzi tsakela ku tlhela ndzi ku vona. Nkarhi lowu hundzeke loko hi vulavula, ndzi ku kombe tluka ro sungula ra broxara leyi ivi hi hlaya tsalwa eBibeleni ro kombisa leswaku hi Mfumo wa xona, Xikwembu xi ta nyika un’wana ni un’wana ndhawu yo tshama eka yona ni ntirho. Kambe Xikwembu xi tshembise ni leswaku xi ta herisa vuvabyi, ku dyuhala hambi ku ri rifu. Xana swa tika ku pfumela sweswo? [Yimela nhlamulo ya n’wini wa muti.] Xiya yinhla leyi, eka ndzimana 4 ya broxara leyi ndzi ku siyeleke yona.” Hlaya ndzimana kutani u hlaya tsalwa rin’we kumbe mambirhi ya lama xaxametiweke ehansi ka tluka leri. Dyondzo ya Bibele ya sungula hi ndlela yoleyo!
3 Leswaku u pfula ndlela ya riendzo ra nkarhi lowu taka, u nga ha gimeta bulo hi ku vula u ku:
◼ “Kavula, xin’wana ni xin’wana lexi hi vulavuleke ha xona xi le Bibeleni, kambe vanhu vo tala va tivutisa leswaku xana va nga swi pfumela leswi Bibele yi swi vulaka. Nkarhi lowu taka loko ndzi ta, ndzi lava ku tirhisa timete ti nga ri tingani ndzi kambisisa na wena mhaka leyi.” Loko u vuyela ku ya hlakulela ku tsakela, sungula bulo eka xihlokwana lexi nge “Buku Leyi Hlamuselaka Paradeyisi,” u sungula eka ndzima 5 ya broxara leyi.
4 Emasin’wini Lawa Ku Fambisiwaka Tibuku Titsongo: Rungula leri fanaka leri tolovelekeke ri nga tirhisiwa loko hi endzela vanhu lava kombiseke ku tsakela ko karhi kambe va nga tekanga buku. U nga ha kombetela eka broxara leyi u yi nyikeleke eka bulo ra nkarhi lowu hundzeke. Swi nga ha lava leswaku u endla maendzo yo tala u tirhisa Bibele ni broxara ya wena n’wini, n’wini wa muti a nga si teka broxara. Loko u fambise minkandziyiso ya Xihondzo xo Rindza ya July 1 kumbe July 15, kombetela etimhakeni leti yelanaka na tona eka broxara leyi nge “Vonani” loko u vuyela ku ya hlakulela ku tsakela.
5 Maendzo yo vuyela lamanene lama yisaka eka dyondzo ya Bibele hi broxara leyi nge Hulumendhe ma nga ha lunghiseleriwa emhakeni leyi nga eka matluka 154-6 ya buku leyi nge Reasoning. Kumbe dyondzo ya Bibele yi nga sunguriwa hi ku vutisa xivutiso lexi: “Xana a wu swi tiva leswaku Bibele yi ni mintshembo yimbirhi? Wun’wana i wa ku hanya hi masiku emisaveni. Broxara leyi yi hlamusela ndlela leyi leswi swi nga ta endleka ha yona.” Kutani u pfula eka tluka 15 ra broxara leyi, ivi u hlaya matsalwa manharhu lama tshahiweke.
6 Loko u fambise timagazini timbirhi, buku leyikulu kumbe broxara kumbe u ve ni bulo ro tsakisa ra Bibele ni munhu wo karhi, u ni vutihlamuleri byo hlakulela ku tsakela. Hi mi khutaza hinkwenu ku veka nkarhi etlhelo wa ku hlanganyela entirhweni lowu wu ponisaka vutomi, hi July.—1 Tim. 4:16.