Ku Hlanganisa Xingheniso Xa Hina Ni Buku
1 Loko u lunghiselela rungula ra wena n’hweti leyi, u nga ha rhanga hi ku xiya swiphiqo-nkulu leswi vanhu va langutaneke na swona endhawini ya ka n’wina ivi u hlawula marito eka timagazini ta sweswinyana kumbe eka broxara, lama kombisaka ntlhantlho lowu tirhaka wa Matsalwa.
2 Eka tindhawu ta le kusuhi, vanhu va nga ha va va karhatiwa hi ku pfumaleka ka ntirho loku kulaka ni ku tika ka vutomi. Loko u kuma xiyimo xi ri tano, u nga ha boxa xiphiqo lexi hi ku kongoma exinghenisweni xa wena.
U nga ha ku:
◼ “Hi vulavurisana ni vaakelani va hina mayelana ni leswi nga endliwaka, ku tiyiseka leswaku ntirho ni tiyindlu swi kumiwa hi un’wana ni un’wana. Xana u ehleketa leswaku swa twala ku langutela leswaku tihulumendhe ta vanhu ti ta swi endla leswi? [Yimela nhlamulo ya n’wini wa muti.] U kona un’wana loyi a swi tivaka ku ololoxa swiphiqo leswi; vona xitshembiso xakwe lexi tiyisekisaka eka Esaya 65:21-23. [Hlaya.] Muvumbi wa hina u tsale xitshembiso lexi leswaku xi hi khutaza, naswona hinkwerhu ka hina hi lava xikhutazo xexo enkarhini lowu wo nonon’hwa, a swi tano ke?”—rs, tl. 11.
3 Kutani sweswi eka rungula ra wena, u nga hlanganisa mhaka leyi humaka eka timagazini ta sweswinyana kumbe eka broxara. Loko u hlanganyela entirhweni wa timagazini, u nga ha hlawula yinhla leyi faneleke eka xihloko lexi nge “Ntshembo Wu Hlula Ku Hela Matimba!” enkandziyisweni wa Xihondzo xo Rindza wa July 1. Loko u nyikela broxara leyi nge “Vonani,” ha yini u nga kombisi ndlela leyi mhaka ya tiyindlu ni ntirho yi kombisiwaka ha kona eka swifunengeto swa le mahlweni ni le ndzhaku, swa broxara leyi. U nga ha yi pfula leswaku n’wini wa muti a ta vona xifaniso hinkwaxo hi nkarhi wun’we.
4 Emasin’wini lawa vini va miti va karhatiwaka hi swilo swo tala, ku cinca-cinca xingheniso swi ta va leswi pfunaka. U nga ha ringeta xingheniso xa vumbirhi lexi tsariweke ebukwini leyi nge Reasoning ehansi ka “Kingdom.”
U nga ha ku:
◼ “Yesu u hi dyondzise ku khongelela Mfumo wa Xikwembu leswaku wu ta ni leswaku ku rhandza ka xona ku endliwa emisaveni tanihi le tilweni. Xana u ehleketa leswaku loko ku rhandza ka Xikwembu ku ta endliwa misava yi ta va paradeyisi hakunene?” Endzhaku ka loko n’wini wa muti a hlamurile, n’wi byele hi tsalwa ra Nhlavutelo 21:3-5 ivi u ri hlaya.
Kutani, loko u fambisa broxara leyi nge Hulumendhe, hlaya swiphemu leswi hlawuriweke swa ndzimana yo sungula eka tluka 3. Xiya marito lawa: “Hi ku tirhisa Mfumo, ku nga ri kungani Xikwembu xi ta herisa tinyimpi, ndlala, vuvabyi, ni vugevenga.” Vutisa n’wini wa muti leswaku exikarhi ka swiphiqo leswi hi xihi lexi a vonaka xi ri xikulu ngopfu.
Loko u fambisa “Xihondzo xo Rindza” xa July 15, u nga ha ku:
◼ “Vanhu vo tala va nga pfumela leswaku xitshembiso lexi xi ta hetiseka, kambe a va tiyiseki leswaku Bibele i xikongomisi xo tshembeka. Ndza tshemba leswaku xihloko lexi nge, ‘Xana Bibele Ya Tikaneta?,’ xi ta ku tiyisa ripfumelo.”
5 Vantshwa na vona va nga nyikela rungula ra Mfumo, hambi ku ri eka vanhu lavakulu.
Loko va vulavula hi Esaya 65:21-23, vahuweleri lavantshwa va nga ha ku:
◼ “Tanihi munhu-nkulu ndza swi tiva leswaku u ni ntokoto swinene evuton’wini ku tlula mina, kambe tsalwa leri ra hi chavalela hinkwerhu.”
6 Tiyiseka leswaku u swi tsala kahle leswi u swi fambiseke, ku katsa ni broxara kumbe magazini wo karhi lowu fambisiweke. U ta ri lava rungula leri loko u vuyela, u ya hlakulela ku tsakela.