Tirhisa Tibroxara To Hambana-hambana eVutirhelini Bya Wena
1 Namuntlha vanhu va tsakela timhaka to hambana-hambana. Loko u ya entirhweni wa nsimu hi July, u nga famba ni tibroxara to tala to hambana-hambana, u tirhisa leyi nga ta tsakisa vanhu ensin’wini. Kumbexana u nga tsakela ku ringeta xin’wana xa swingheniso leswi:
2 Loko u fambisa broxara leyi nge “Hulumendhe Leyi Nga Ta Tisa Paradeyisi,” u nga ha vutisa u ku:
◼ “Xana u ehleketa leswaku misava a yi ta va njhani loko Xikwembu a xi fuma xi ri xoxe? [Yimela nhlamulo.] Leswaku Xikwembu xi teka vulawuri laha misaveni, sweswo hi swona leswi hi swi kombelaka loko hi khongela Xikhongelo xa Hosi, kumbe xa Tata wa Hina, lexi Yesu Kreste a hi dyondziseke xona. [Pfula eka tluka 3, kutani u hlaya ndzimana yo sungula, leyi tshahaka Matewu 6:10.] Loko u lava ku hanya emisaveni yo fana ni yoleyo, u fanele ku hlaya broxara leyi.” Yi fambise hi munyikelo wa R1,00.
3 Broxara leyi nge “Loko U Feriwa Hi Loyi U N’wi Rhandzaka” yi nga fambisiwa hi ndlela leyi:
◼ “Xana u anakanya leswaku ri ta kala ri va kona siku leri hi nga ta ka hi nga ha feriwi hi loyi hi n’wi rhandzaka? [Yimela nhlamulo.] Broxara leyi leyi tsariweke hi ndlela yo xonga yi chavelele timiliyoni hi ntshembo lowu tiyeke wa Bibele wa leswaku siku lero tano ri ta fika ku nga ri khale. [Pfula eka tluka 5, kutani u hlaya ndzimana ya vuntlhanu, kun’we na 1 Vakorinto 15:21, 22. Kutani pfula xifaniso lexi nga eka tluka 30.] Laha mumpfampfarhuti u kombise ntsako lowu hi nga vaka na wona loko hi amukela varhandziwa va hina lava feke eku pfuxiweni ka vafi. Kambe xana xivono xolexo lexi tsakisaka xi ta humelela kwihi? Broxara leyi yi ta ku nyika nhlamulo ya Bibele ya xivutiso xexo.” Loko broxara yi amukeriwa, u nga ha engetela u ku: “Ndzi tsakela ku tlhela ndzi vuya hi ta yisa mhaka leyi emahlweni.”
4 U nga ha fambisa broxara leyi nge “Vonani, Ndzi Endla Swilo Hinkwaswo Swi Va Leswintshwa”! hi ku tirhisa xingheniso lexi kongomeke leswaku u sungula dyondzo ya Bibele:
◼ “Vanhu vo tala va ni swivutiso malunghana ni Bibele. U nga ha va u tivutise hi nhlamulo ya xin’wana xa swona. [Pfula eka tluka 30.] Xivutiso lexi xo hetelela xi pfuxe ku tsakela ka vo tala: ‘U nga tilunghisela vutomi lebyi nga heriki eParadeyisini hi ndlela yihi?’” Loko u hlamusela tindzimana 57-8 eka matluka 29-30 kutani u hlaya na Nhlavutelo 21:3, 4, u ta va u endle masungulo ya dyondzo ya Bibele. Gimeta hi ku siya broxara ni ku endla malunghiselelo ya riendzo ro vuyela laha mi nga ta bula hi swivutiso leswin’wana.
5 U nga ha tsakela ku ringeta xingheniso lexi xo olova hi ku tirhisa broxara leyi nge “Vito Ra Xikwembu Leri Nga Ta Tshama Hi Masiku”:
◼ “Xin’wana xa swilo swo sungula leswi ndzi swi dyondzeke eBibeleni i vito ra Xikwembu. Xana wa swi tiva leswaku i mani? [Yimela nhlamulo.] U nge ndzi ku komba. Ri kumeka laha eBibeleni eka Pisalema 83:18. [Hlaya.] Broxara leyi yi kombisa ndlela leyi vito ra Xikwembu, Yehovha, ri humelelaka ha yona eka tindzimi to tala to hambana-hambana. [Kombisa bokisi leri nga eka tluka 8.] Loko u lava ku dyondza swo tala malunghana na Yehovha ni swikongomelo swa yena, u fanele ku hlaya broxara leyi.” Nyika n’wini wa muti broxara.
6 Leswi hi nga ni tibroxara to hambana-hambana letinene to ti tirhisa, hakunene hi hlomisiwe kahle “ku byela ŝisiwana e mahungu ya ku saseka.”—Esa. 61:1.