Ku Dyondzisa Vanhu Hi Ku Tirhisa Broxara Leyi Nge Mahungu Lamanene
1. Broxara leyi nge Mahungu Lamanene yi endliwe njhani?
1 Hilaha swi hlamuseriweke hakona eka Vutirheli Bya Hina Bya Mfumo bya July, xitirhisiwa xin’wana xa nkoka lexi hi faneleke hi va na xona eka nkwama lowu hi wu tirhisaka loko hi dyondzisa i broxara leyi nge Mahungu Lamanene Lama Humaka Eka Xikwembu! Matsalwa lama kombisiweke a ma tshahiwanga leswaku vini va miti va ta ma hlaya eBibeleni hi ku kongoma. Hambileswi minkandziyiso ya hina yo tala leyi hi yi tirhiselaka ku dyondza na vanhu yi tsariweke hi ndlela leyi nga endlaka leswaku muhlayi a kota ku tihlayela yona, broxara leyi yi endleriwe leswaku muhlayi a ta yi tlhuvutsa ni munhu loyi a n’wi dyondzelaka. Hikwalaho, loko hi yi fambisa, hi fanele hi ringeta ku kombisa n’wini wa muti ndlela leyi yi dyondziwaka ha yona leswaku a ta vona ndlela leyi swi tsakisaka ha yona ku twa mahungu lamanene lama humaka eBibeleni.—Mat. 13:44.
2. Hi nga yi tirhisa njhani broxara leyi nge Mahungu Lamanene eka riendzo ro sungula?
2 Eka Riendzo Ro Sungula: U nga ha ku: “Ndzi ku endzerile hi leswi vanhu va karhatekaka hi vumundzuku bya vanhu. Xana u anakanya leswaku swiyimo swi ta kala swi antswa? [Yimela nhlamulo.] Bibele yi ni mahungu lamanene lama nga hi nyikaka ntshembo. Hi leswi swivutiso swin’wana leswi Bibele yi swi hlamulaka.” Nyika n’wini wa muti broxara kutani u n’wi kombela ku hlawula xivutiso eka xifunengeto xa le ndzhaku. Endzhaku ka sweswo n’wi kombise ndlela leyi dyondzo yi fambisiwaka ha yona u tirhisa ndzima yo sungula ya dyondzo leyi a yi hlawuleke. Ndlela yin’wana leyi u nga yi tirhisaka i ku vutisa n’wini wa muti xivutiso lexi tlhontlhaka mianakanyo lexi sekeriweke eka dyondzo leyi u yi hlawuleke, ivi u n’wi kombisa ndlela leyi broxara yoleyo yi nga n’wi pfunaka ha yona ku kuma nhlamulo ya le Bibeleni. Loko dyondzo yoleyo yi fambisana ni vhidiyo leyi nga eka jw.org, vahuweleri van’wana va yi tlanga loko va ri karhi va endla xingheniso xa vona.
3. Hlamusela ndlela leyi dyondzo yi nga fambisiwaka ha yona hi ku tirhisa broxara leyi nge Mahungu Lamanene.
3 Ndlela Yo Fambisa Dyondzo: (1) Vutisa xivutiso lexi nga ni nomboro lexi tsariweke hi marito yo dzwihala leswaku u pfuna n’wini wa muti a dzikisa mianakanyo eka yinhlankulu. (2) Hlayani ndzimana. (3) Hlayani matsalwa lama tsariweke hi marito yo voyama, kutani u vutisa swivutiso hi vutlhari leswaku u pfuna n’wini wa muti ku vona ndlela leyi matsalwa ma xi hlamulaka ha yona xivutiso lexi tsariweke nomboro. (4) Loko ehansi ka xivutiso ku ri na ndzimana yo tlula yin’we, tirhisa goza 2 na 3. Loko vhidiyo yi fambisana ni xivutiso naswona u nga si tshama u yi tlangela n’wini wa muti, n’wi tlangele yona hi nkarhi wa dyondzo yoleyo. (5) Xo hetelela, kombela n’wini wa muti a hlamula xivutiso lexi nga ni nomboro leswaku u tiyiseka loko a twisisa leswi a swi dyondzaka.
4. I yini lexi nga ta hi pfuna ku tirhisa xitirhisiwa lexi xa nkoka hi vutshila?
4 Xi tive kahle xitirhisiwa lexi xa nkoka. Xi tirhise nkarhi wun’wana ni wun’wana loko swi fanerile. Loko u nga si ya dyondza ni xichudeni, anakanya ha xona ni hi ndlela leyinene yo burisana na xona, u tirhisa matsalwa lama nga le ka dyondzo yoleyo. (Swiv. 15:28; Mint. 17:2, 3) Loko u ya u va ni ntokoto ni vuswikoti, u nga ha teka broxara leyi tanihi xin’wana xa switirhisiwa leswi u swi rhandzaka ngopfu leswi u swi tirhiselaka ku dyondzisa vanhu ntiyiso.