Tshemba Yehovha Leswaku A Kurisa Swilo
1 “Ntokoto wa mina wo sungula a wu ri ku kuma ntsako lowukulu hi ku pfuneta eku simekiweni ka vandlha lerintshwa. Leswi swi hete malembe mambirhi ya ku tirha hi ku gingiriteka, ku hambeta ndzi khongela ni ku tshemba Yehovha la ‘kurisaka swilo.’” Sweswo swi tsale hi phayona leri nga ni vukheta leri dyondzeke xilaveko xo titshega hi Yehovha leswaku ri kurisa swilo. (1 Kor. 3:5-9) Eku lavisiseni ka hina vanhu lava rhandzaka swilo swa moya, na hina hi lava ku seketeriwa hi Xikwembu leswaku vutirheli bya hina byi ta tswala mihandzu.—Swiv. 3:5, 6.
2 Leswaku Swilo Swi Kula Swi Lava Ku Hlakuleriwa: Mbewu ya ntiyiso yi lava ku hlakuleriwa leswaku yi ta kula. Ku tlhelela endzhaku ka siku rin’we kumbe mambirhi ya riendzo ro sungula hakanyingi swi humesa vuyelo lebyinene. Kombisa rirhandzu ni xinghana. Endla leswaku munhu lon’wana a titwa a ntshunxekile. U nga vulavuli u ri wexe. N’wi pfumelele a ku tiva, naswona u n’wi kombisa leswaku wa n’wi tsakela tanihi munhu.
3 Hi July ku ya fika eka August, hi ta va hi fambisa tibroxara to hambana-hambana eka vanhu lava hi hlanganaka na vona. Hambiswiritano, na hina hi fanele hi landzela ku tsakela loku hi ku kumaka ni ku tlhelela lomu hi fambiseke kona tibuku. Hi endla swilo leswi hi ku endla maendzo yo vuyela ni ku fambisa tidyondzo ta Bibele. (Mt. 28:19, 20) Kutani, ku nga ha sunguriwa tidyondzo hi ku tirhisa broxara leyi nge Leswi Xi Swi Languteleke. U nga ha kuma swiringanyeto leswi landzelaka swa mune swi ri leswi pfunaka.
4 Loko u vulavule ni munhu la karhatekaka malunghana ni ndlela leyi swiyimo swa misava swi yaka swi biha ha yona, u nga ha pfuxeta bulo hi ku vula u ku:
◼ “Ndza tshemba leswaku u karhateke ku fana na mina malunghana ni ku hohloka ka mahanyelo exikarhi ka vanhu. Hi twa swiviko leswi hetaka matimba swa madzolonga ya le kaya, lama vangaka ku khomiwa ka vana, vatswari ni vatekani hi ndlela yo biha. Naswona swi languteka onge vanhu vo tala a va tivoni nandzu hikwalaho ka ku hemba kumbe ku yiva leswaku va enerisa ku navela ka vona. Xana u ehleketa leswaku Xikwembu xi na mhaka ni ndlela leyi vanhu va hanyaka vutomi bya vona ha yona? [Yimela nhlamulo.] Xikwembu xi simeke mimpimanyeto yo karhi leswaku munhu a hanya ha yona, naswona a yi hi tikeli nikatsongo.” Hlaya 1 Yohane 5:3. Kutani humesa broxara leyi nge Leswi Xi Swi Languteleke, ivi u pfula eka dyondzo 10. Hlaya ndzimana yo sungula. Kombisa marito ni swiga leswi tsariweke hi ku voyama eku sunguleni ka tindzimana 2-6, ivi u vutisa n’wini wa muti leswaku i mukhuva wihi lowu yena a vonaka wu ri ni khombo swinene eka vanhu. Hlaya ndzimana leyi vulavulaka hi mukhuva wa kona ivi u pfula tsalwa rin’we kumbe mambirhi loko nkarhi wu pfumela. Gimeta hi ku hlaya ndzimana 7, kutani u endla malunghiselelo yo tlhelela leswaku u ta yisa bulo emahlweni.
5 Eka lava u va kumeke va karhateka hi mindyangu ya vona, u nga vula swin’wana swo fana ni leswi:
◼ “Xana u vona swi twala ku langutela leswaku Muvumbi a hi nyika switirho leswi lavekaka swa ku aka vutomi bya ndyangu hi ndlela leyi humelelaka?” Yimela nhlamulo. Humesa broxara leyi nge Leswi Xi Swi Languteleke, ivi u pfula eka dyondzo 8, kutani u hlamusela leswaku yi ni misinya ya milawu ya Bibele leyi khumbaka xirho xin’wana ni xin’wana xa ndyangu. N’wi kombise ndlela yo tirhisa broxara leyi ni Bibele leswaku a vuyeriwa swinene eka yona. Landzela swiletelo leswi kumekaka eka tluka 2 ra broxara leyi. Endla malunghiselelo yo tlhelela u ya yisa dyondzo leyi emahlweni, kumbe loko u yi hetile, u hundzela eka dyondzo yin’wana leyi n’wini wa muti a yi hlawuleke eka broxara leyi.
6 Hi lexi xingheniso lexi kongomeke lexi u nga ha xi tirhisaka leswaku u hlamusela nongonoko wa hina wa dyondzo ya Bibele. N’wi kombise broxara leyi nge “Leswi Xi Swi Languteleke,” kutani u ku:
◼ “Broxara leyi yi ni dyondzo leyi anameke swinene leyi hlanganisaka tidyondzo ta xisekelo ta Bibele. Eka tluka rin’wana ni rin’wana, u ta kuma tinhlamulo ta swivutiso leswi karhateke vanhu hi malembe-xidzana layo tala. Hi xikombiso, Hi xihi xikongomelo xa Xikwembu hi misava?” Pfula eka dyondzo 5, ivi u hlaya swivutiso leswi nga eku sunguleni ka dyondzo. Vutisa n’wini wa muti leswaku i xivutiso xihi lexi n’wi tsakisaka swinene, ivi u hlaya (ti)ndzimana leti fambisanaka na xona, u pfula ni matsalwa lama faneleke. Hlamusela leswaku tinhlamulo leti enerisaka ta swivutiso swin’wana ti nga kumeka hi ku olova ku fana ni leti. N’wi byele leswaku u ta tlhela u vuya leswaku mi ta burisana hi xivutiso xin’wana ni nhlamulo ya xona.
7 Kumbe u nga ha tsakela ku ringeta xingheniso xo olova swinene leswaku u sungula dyondzo ya Bibele hi ku vula u ku:
◼ “Xana a wu swi tiva leswaku hi ku tirhisa timinete ti nga ri tingani ntsena, u nga kuma nhlamulo ya xivutiso xa nkoka xa Bibele? Hi xikombiso, . . .” Kutani vutisa xivutiso lexi kumekaka eku sunguleni ka yin’wana ya tidyondzo eka tibroxara leti u ehleketaka leswaku ti ta tsakisa n’wini wa muti. Leswaku u kuma swivutiso swin’wana leswi u nga ha swi vutisaka, vona tindzimana 15 na 16 eka xiengetelo xa Vutirheli Bya Hina Bya Mfumo bya March 1997, lexi nge: “Vana Ni Xivindzi Xo Endla Maendzo Yo Vuyela.”
8 Ku amukela ntlhontlho wo endla maendzo yo vuyela ni ku fambisa tidyondzo ta Bibele hi ntsako i xiphemu xa ku va “vatirhi-kuloni eka Xikwembu.” (1 Kor. 3:9) Loko hi ri karhi hi tirha hi matimba leswaku hi hlakulela ku tsakela loku hi ku kumaka ni ku tshemba Yehovha la endlaka leswaku swilo swi kula, hi ta kuma ku eneriseka ka xiviri loku nga tisiwiki hi ntirho wun’wana.