Xi hlayise

Swingheniso Leswi Ringanyeteriweke Ntirho Wa Le Nsin’wini

Matirhiselo Ya Xiengetelo Lexi

Swo tala swa swingheniso leswi landzelaka swi kona eka minkandziyiso ya nkarhi lowu hundzeke ya Vutirheli Bya Hina Bya Mfumo. Ringeta ku tirhisa swo tala hilaha u nga kotaka hakona loko u ri eku chumayeleni kutani u vona vuyelo bya kona. Hlayisa xiengetelo lexi kutani u xi tirhisa loko u lunghiselela ku ya ensin’wini.

Loko u hatla u ba nhloko ya mhaka, u ta endla leswaku munhu a tsakela ku twa Rito ra Xikwembu. N’wi vutise xivutiso lexi nga ta endla leswaku a tsakela, kutani u n’wi hlamula hi ku komisa hi ku n’wi hlayela Tsalwa. Ringeta swingheniso leswi:

“Loko u anakanya hi vumundzuku, xana u va ni ntshembo kumbe wa kanakana? [Yimela nhlamulo.] Bibele yi profete hi swiendlakalo leswi nga dyisiki byi rhelela, leswi hi swi vonaka namuntlha nileswaku swi ta helela kwihi.”—2 Tim. 3:1, 2, 5; Swiv. 2:21, 22.

“Vanhu vo tala namuntlha va karhatekile hi rihanyo ra vona. Xana a wu swi tiva leswaku Xikwembu xi tshembisa ku swi herisela makumu swiphiqo hinkwaswo swa rihanyo?”—Esa. 33:24; Nhlav. 21:3, 4.

“Xana a wu swi tiva leswaku Bibele yi profete leswaku ku ta hetelela ku ri na hulumendhe yin’we leyi nga ta fuma misava hinkwayo?”—Dan. 2:44; Mat. 6:9, 10.

“Xana u ehleketa leswaku swiyimo swi ta va njhani loko Yesu Kreste a fuma misava?”—Ps. 72:7, 8.

“Vanhu vo tala va languteriwa ehansi hikwalaho ka rimbewu, vukhongeri kumbe rixaka ra vona. Xana u vona onge Xikwembu xi titwa njhani hi xihlawuhlawu xo tano?”—Mint. 10:34, 35.

“Ha swi tiva leswaku Yesu Kreste u endle masingita yo tala hi nkarhi wa yena. Loko a wo kota ku n’wi kombela leswaku a tlhandlekela hi singita rin’wana, a ri ta va rihi singita ra kona?”—Ps. 72:12-14, 16.

“Vanhu vo tala se va karhele ku twa hi swiphiqo. Va lava ku twa hi ku tlhantlhiwa ka swona. Kambe, hi nga yi kuma kwihi mintlhantlho ya xiviri ya swiphiqo swa hina?”—2 Tim. 3:16, 17.

“Xana wa wu tiva Mfumo lowu u wu khongelelaka eka Xikhongelo Xa Hosi (kumbe lexi nge, Tata Wa Hina)?”—Nhlav. 11:15.

Tindlela To Sungula Bulo

Swivutiso leswi xaxametiweke laha hansi, leswi humaka eka tinhloko-mhaka ta buku leyi nge Ku Hlamulana, swi kombisa tluka ra laha nhlamulo yi kumekaka kona ebukwini:

Hikwalaho ka yini Xikwembu xi pfumelela vubihi? (104)

Xana Mfumo wa Xikwembu wu ta endla yini? (139)

Xana i mani la fumaka misava leyi—i Xikwembu kumbe i Sathana? (153)

Ha yini hi dyuhala hi tlhela hi fa? (223)

Xiyimo xa vafi hi xihi? (224)

Sathana i munhu wa matimba ku fikela kwihi emisaveni ya namuntlha? (240)

Xana vanhu hinkwavo lavanene va ya etilweni? (277)

Xana munhu u fanele a ya etilweni leswaku a va ni vumundzuku lebyi tsakisaka hakunene? (278)

Ha yini ku ri na vubihi byo tarisa xileswi? (323)

I yini lexi nga pfunaka ku antswisa vukati? (342)

Xana vukhongeri hinkwabyo bya amukeleka eka Xikwembu? (344)

Xana munhu a nga swi tivisa ku yini leswaku vukhongeri byo karhi i bya ntiyiso? (350)

Xana hi xihi xikongomelo xa vutomi bya munhu? (389)

Xana ku ni swivangelo leswi twalaka swo pfumela eka Xikwembu? (409)

Xana Xikwembu xi ni mhaka hakunene ni leswi humelelaka hina vanhu? (410)

Xana Xikwembu i munhu wa xiviri? (411)

Ha yini swi ri swa nkoka ku tiva ni ku tirhisa vito ra Xikwembu hi xoxe? (425)

Xana Yesu Kreste i Xikwembu hakunene? (430)

Swiringanyeto Swa Loko Ku Fambisiwa Broxara Leyi Nge Leswi Xi Swi Languteleke

“Ndza tshemba wa pfumela leswaku vanhu vo tala va kholwa eka Xikwembu. Hinkwavo lava pfumelaka eka xona va yima hi rito rin’we loko swi ta emhakeni ya leswaku Xikwembu xi langutele swo karhi eka hina. Kambe va hambana loko swi ta emhakeni ya leswaku I Yini Leswi Xikwembu Xi Swi Languteleke Eka Hina?” Kutani humesa broxara leyi nge Leswi Xi Swi Languteleke, u pfula eka dyondzo 1, ivi mi bula ha yona.

“Leswi ku nga ni swiphiqo swo tala emindyangwini namuntlha, xana u tshama u tivutisa leswaku hi xihi xilotlelo xo kuma ntsako endyangwini?” Loko a hlamurile, hlamusela leswaku eBibeleni, Xikwembu xi paluxa xilotlelo xa kuma ntsako wa xiviri endyangwini. Hlaya Esaya 48:17. Kutani pfula eka dyondzo 8 ya broxara leyi nge Leswi Xi Swi Languteleke, ivi u n’wi komba tin’wana ta tindzimana ta Bibele leti tshahiweke, leti nyikaka nkongomiso lowu tirhaka eka xirho xin’wana ni xin’wana xa ndyangu. Hlaya swivutiso leswi xaxametiweke emasungulweni ya dyondzo leyi. Vutisa munhu yoloye loko a ta swi rhandza ku kuma tinhlamulo ta swona.

“Broxara leyi yi tamele dyondzo leyi heleleke leyi hlanganisaka tidyondzo ta xisekelo ta Bibele. Eka tluka ha rin’we, u ta kuma tinhlamulo ta swivutiso leswi se ku hundzeke malembe-xidzana yo tala swi ri karhi swi karhata vanhu. Hi xikombiso, Hi Xihi Xikongomelo Xa Xikwembu Hi Misava?” Pfula eka dyondzo 5 kutani u hlaya swivutiso leswi nga emasungulweni ya dyondzo leyi. Vutisa n’wini wa muti leswaku hi xihi lexi a lavaka ku rhanga a hlamuleriwa xona, kutani u hlaya (ti-)ndzimana leyi xi hlamulaka, u hlaya ni matsalwa lama faneleke. Vula leswaku swivutiso leswin’wana swi nga hlamuriwa hi ndlela leyi enerisaka ku fana ni lexi mi hetaka ku xi hlamula. Kombela ku tlhela u vuya mi ta bula hi swivutiso leswin’wana.

“U ehleketa leswaku i yini lexi vangaka madzolonga hinkwawo lama humelelaka eswikolweni? Xana ma vangiwa hi leswi vatswari va tsandzekaka ku letela vana? Kumbe ma nga va ma vangiwa hi swilo swin’wana, swo fana ni minkucetelo ya Diyavulosi?” Yimela nhlamulo. Loko a vula leswaku ma vangiwa hi minkucetelo ya Diyavulosi, hlaya Nhlavutelo 12:9, 12. Kandziyisa leswi Diyavulosi a swi endlaka ku hlohlotela madzolonga emisaveni. Kutani pfula eka dyondzo 4 ya broxara leyi nge Leswi Xi Swi Languteleke, ivi u vutisa munhu yoloye loko a tshame a tivutisa leswaku Diyavulosi u huma kwihi. Yana emahlweni hi ku hlaya ni ku hlamusela tindzimana timbirhi to sungula. Loko munhu yoloye a vula leswaku madzolonga lama humelelaka eswikolweni ma vangiwa hi “leswi vatswari va tsandzekaka ku letela vana,” hlaya 2 Timotiya 3:1-3 ivi u kombisa mikhuva leyi swi nga lo dlaa, erivaleni leswaku yi vanga xiphiqo lexi. Kutani pfula eka dyondza 8 ya broxara leyi nge Leswi Xi Swi Languteleke, u hlaya ndzimana 5 naswona u ya emahlweni ni bulo.

“Xana u ehleketa leswaku swa twala ku langutela leswaku Muvumbi a hi nyika vutivi lebyi hi byi pfumalaka leswaku vutomi bya mindyangu ya hina byi humelela?” Loko a hlamurile, humesa broxara leyi nge Leswi Xi Swi Languteleke. Pfula eka dyondzo 8 kutani u vula leswaku yi tamele minkongomiso ya Bibele, leyi tirhaka eka xirho xin’wana ni xin’wana xa ndyangu. Kombela ku n’wi komba ndlela leyi a nga hlayaka broxara leyi ha yona a tirhisa Bibele leswaku a ta vuyeriwa swinene eka yona.

“Eka swiphiqo hinkwaswo leswi hi langutanaka na swona evuton’wini bya manguva lawa, u vona onge xikhongelo xi nga hi pfuna hakunene? [Yimela nhlamulo.] Vo tala va vula leswaku xikhongelo xa va tiyisa. [Hlaya Vafilipiya 4:6, 7.] Hambiswiritano, munhu a nga ha vona onge swikhongelo swa yena a swi hlamuriwi. [Pfula eka dyondza 7 ya broxara leyi nge Leswi Xi Swi Languteleke.] Broxara leyi yi hlamusela ndlela leyi xikhongelo xi nga hi pfunaka ha yona.”

“Hi vulavurisana ni vaakelani va hina hi leswaku ha yini ku ri ni vukhongeri byo tala swonghasi lebyi nga faniki emisaveni. Kambe, Bibele i yin’we ntsena. Hi ku ya hi wena, ha yini ku ri ni ku pfilunganyeka konghasi evukhongerini? [Yimela nhlamulo. Pfula eka dyondzo 13 ya broxara leyi nge Leswi Xi Swi Languteleke, kutani u hlaya swivutiso leswi nga emasungulweni ya dyondzo leyi.] U ta kuma tinhlamulo leti enerisaka ta swivutiso sweswo hi ku hlaya dyondzo leyi.”

Endzhaku ka loko u fambisele munhu magazini wa Xihondzo xo Rindza na Xalamuka!, n’wi kombele leswaku u n’wi hlayela ndzimana yin’we yo koma. Loko a pfumela, pfula eka dyondzo 5 ya broxara leyi nge Leswi Xi Swi Languteleke. N’wi kombe swivutiso leswi nga eku sunguleni ka dyondzo, ivi u n’wi kombela leswaku a rhiya ndleve ku twa nhlamulo ya xivutiso xo sungula loko u hlaya ndzimana yo sungula. Loko u hete ku hlaya ndzimana yoleyo, vutisa xivutiso kutani u twa leswaku u hlamurisa ku yini. N’wi fambisele broxara yoleyo, loko a yi amukela, hlela leswaku u tlhelela ku ya twa leswaku u swi hlamurisa ku yini swivutiso swimbirhi leswi landzelaka.

Swiringanyeto Swa Loko Ku Fambisiwa Buku Leyi Nge Vutivi

U khome Bibele hi voko, sungula bulo hi ku: “Hi hlayela un’wana ni un’wana wa vaakelani va wena tsalwa leri. Ri ri . . . ” Hlaya Yohane 17:3, kutani u tlakusa xivutiso: “Xana u swi xiyile leswi hi tshembisiwaka swona loko hi ri ni vutivi lebyi kongomeke? [Yimela nhlamulo.] Xana munhu a nga byi kuma kwihi vutivi byo tano?” Loko a hlamurile, n’wi kombe buku leyi nge Vutivi, kutani u ku: “Buku leyi yi paluxa vutivi lebyi yisaka evuton’wini lebyi nga heriki. Yi byi paluxa hi ku hlamula vunyingi bya swivutiso leswi vanhu va swi vutisaka malunghana ni Bibele.” N’wi kombe nxanxamelo wa leswi nga endzeni, kutani u n’wi vutisa loko a tshame a tivutisa hi yin’wana ya timhaka teto.

“Xana u tshama u tivutisa loko Xikwembu xi ri ni mhaka hakunene hi vuhomboloki ni ku xaniseka leswi hi langutanaka na swona kumbe leswi hi hlaselaka? [Yimela nhlamulo.] Bibele ya hi tiyisekisa leswaku Xikwembu xa hi rhandza nileswaku xi ta hi seketela loko hi langutane ni maxangu.” Hlaya tin’wana ta tindzimana ta Pisalema 72:12-17. Pfula eka ndzima 8 ebukwini leyi nge Vutivi, kutani u vula leswaku yi nyika nhlamulo leyi chavelelaka ya xivutiso lexi vanhu va timiliyoni va xi vutiseke lexi nge, Ha Yini Xikwembu Xi Pfumelela Ku Xaniseka? Loko swi koteka, hlamusela tinhla tin’wana ta Matsalwa leti hlanganisiwaka eka tindzimana 3 ku ya eka 5, kumbe u ti hlamusela loko u n’wi endzela nakambe.

“Vo tala va hina hi feriwe hi varhandziwa va hina. Xana u tshama u tivutisa loko hi ta tlhela hi va vona? [Yimela nhlamulo.] Yesu u kombisile leswaku varhandziwa va hina va nga pfuxiwa eku feni. [Hlaya Yohane 11:11, 25, 44.] Hambileswi xiendlakalo lexi xi endlekeke eka malembe-xidzana yo tala lama hundzeke, xi kombisa leswi Xikwembu xi tshembiseke ku hi endlela swona.” Pfula xifaniso lexi nga eka tluka 85, ebukwini leyi nge Vutivi, ivi u hlaya marito lama nga ehenhla ka xona. Kutani n’wi kombe xifaniso lexi nga eka tluka 86, naswona u xi hlamusela. Veka xisekelo xa ku tlhela u vuya hi ku tlakusa xivutiso lexi nge: “Xana u nga swi tsakela ku tiva leswaku ha yini vanhu va dyuhala va tlhela va fa?” N’wi endzele nakambe leswaku mi ta bula hi ndzima 6.

“Xana u tshama u tivutisa leswaku ha yini vanhu va navela ku hanya nkarhi wo leha?” Loko a hlamurile, pfula eka ndzima 6 ya buku leyi nge Vutivi, kutani u hlaya ndzimana 3. Hlamusela matsalwa lama kombisiweke. N’wi vutise leswaku a nge swi rhandzi ku titwela hi ta yena tinhlamulo ta swivutiso swimbirhi leswi nga emakumu ka ndzimana yoleyo. Loko a swi rhandza, hlamusela tindzimana ti nga ri tingani leti landzelaka.

“Hi vutisa vanhu loko va pfumelelana ni marito lawa . . . Hlaya Genesa 1:1 kutani u tlakusa xivutiso lexi nge: “Xana wa pfumelelana ni marito lawa?” Loko munhu yoloye a vula leswaku u pfumelelana na wona, vula u ku: “Na mina ndzi pfumelelana na wona. Kambe, loko ku ri Xikwembu lexi vumbeke swilo hinkwaswo, xana u ehleketa leswaku ni vubihi byi endliwe hi xona?” Endzhaku ko nkhensa nhlamulo ya yena, hlaya Eklesiasta 7:29. Pfula eka ndzima 8 ya buku leyi nge Vutivi, kutani u hlaya ndzimana 2. Loko a nga pfumelelani ni leswi Genesa 1:1 yi swi vulaka, n’wi kombele ku kambisisa vumbhoni bya ku va kona ka Muvumbi.—Vona buku leyi nge Ku Hlamulana, matluka 212-3.

“Xana wa pfumela leswaku leswi milawu ya mahanyelo ya namuntlha yi hohlokaka swonghasi, hi lava nkongomiso lowunene evuton’wini? [Yimela nhlamulo.] Hambileswi Bibele ku nga buku ya khale eka hinkwato, yi nyika ndzayo leyi pfunaka eka mahanyelo ya manguva lawa ni ku endla leswaku vutomi bya ndyangu byi tsakisa.” Kutani pfula eka ndzima 2 ya buku leyi nge Vutivi, ivi u hlaya ndzimana 10 ni xivulwa xo sungula xa ndzimana 11, ku katsa na 2 Timotiya 3:16, 17.

“Xana u nga rhandza ku tiva leswaku vumundzuku bya hina ni bya misava leyi byi ta va njhani? [Yimela nhlamulo.] Loko Bibele yi vulavula hi vumundzuku, yi tirhisa rito rin’we—ku nga Paradeyisi! Hi kona laha Xikwembu xi vekeke mpatswa wo sungula wa vanhu va nyama loko xi heta ku wu tumbuluxa. Twana leswaku vutomi bya kona a byi ri njhani.” Pfula tluka 8 ebukwini leyi nge Vutivi, ivi u hlaya ndzimana 9, ehansi ka xihlokwana lexi nge “Vutomi eParadeyisini.” Kutani hlamusela tinhla leti nga eka ndzimana 10, u hlaya ni tsalwa leri kombisiweke ra Esaya 55:10, 11. Kombela ku yisa bulo emahlweni, malunghana ni ndlela leyi vutomi byi nga ta va xiswona eParadeyisini leyi kondleteriweke, u hlanganisa tindzimana 11-16.

Loko u tlhelela eka lava u va fambiseleke magazini wa Xihondzo xo Rindza ni wa Xalamuka!, u nga ha ku:

“Loko ndzi ku endzerile enkarhini lowu hundzeke, ndzi tsakele ku ku siyela magazini wa Xihondzo xo Rindza. Ndza tshemba u swi xiyile leswaku vito leri heleleke ra magazini lowu ri ri Xihondzo xo Rindza Xi Huwelela Mfumo Wa Yehovha. Namuntlha ndzi lava ku ku hlamusela leswi Mfumo lowu wu nga swona nileswi wu nga ku endlelaka swona swin’we ni ndyangu wa wena.” Kutani pfula dyondzo 6 eka broxara leyi nge Leswi Xi Swi Languteleke, ivi u hlaya u tlhela u hlamusela swo tala hi ku ya hi nkarhi lowu munhu yoloye a nga vaka a ri na wona.

“Ndza ha ku ku endzela ku nga ri khale ivi ndzi ku siyela magazini wa Xihondzo xo Rindza na Xalamuka! Timagazini leti ti endla leswaku vanhu va xixima Bibele ni nkongomiso wa yona hi ta mahanyelo. Leswi ndzi voneke swi ri swa nkoka leswaku munhu un’wana ni un’wana a twisisa Rito ra Xikwembu, ndzi vuyile leswaku ndzi ta ku komba lexi nga ta ku pfuna ku endla tano.” N’wi kombe broxara leyi nge Leswi Xi Swi Languteleke kumbe buku leyi nge Vutivi, kutani u kombela ku n’wi fambisela dyondzo ya Bibele.

Loko u fambisa buku yihi ni yihi ya khale leyi nga ni matluka ya 192, u nga ha tirhisa xingheniso lexi:

“Ku yisiwe nyingiso lowukulu eka xilaveko xa ku va ni dyondzo ya xiyimo xa le henhla. Hi ku ya hi vonelo ra wena, i dyondzo ya muxaka muni leyi u faneleke u va na yona leswaku u kuma ntsako lowukulu u tlhela u humelela evuton’wini? [Yimela nhlamulo. Kutani hlaya Swivuriso 9:10, 11.] Buku leyi, [vula vito ra buku leyi u yi fambisaka] yi sekeriwe eBibeleni. Yi boxa xihlovo xa vutivi lebyi ku nga byona ntsena byi yisaka evuton’wini lebyi nga heriki.” Kombisa munhu yoloye xikombiso xin’we ebukwini yoleyo kutani u n’wi khutaza ku sala a yi hlaya.

Minkandziyiso Yin’wana

Swingheniso leswi ringanyeteriweke ku fambisa tibuku tin’wana ni tibroxara, swi nga kumeka eka Índice das Publicações da Torre de Vigia, ehansi ka laha ku nge:

Introduções

Lista por assunto

Swingheniso Leswi Kongomeke

Ringeta ku tirhisa xin’wana xa swingheniso leswi kongomeke, leswaku u sungula dyondzo ya Bibele:

“Xana a wu swi tiva leswaku hi timinete ti nga ri tingani, u nga kuma nhlamulo ya xivutiso xa nkoka lexi humaka eBibeleni? Hi xikombiso, . . . ” Tlakusa xin’wana xa swivutiso swo sungula eka dyondzo yin’wana ni yin’wana ya broxara leyi nge Leswi Xi Swi Languteleke ni lexi u vonaka leswaku xi ta endla leswaku munhu yoloye a tsakela.

“Ndzi ku endzerile leswaku ndzi ta ku komba ndlela leyi hi dyondzisaka vanhu Bibele ha yona mahala. Ndzi ta teka timinete ta ntlhanu ntsena ku ku komba. Xana u nga ndzi nyika ntlhanu wa timinete?” Loko a ku nyika, tirhisa dyondzo 1 ya broxara leyi nge Leswi Xi Swi Languteleke, ku n’wi kombisa ndlela leyi ku dyondziwaka ha yona, u hlaya tsalwa rin’we kumbe mambirhi lama u ma hlawuleke. Endzhaku ka sweswo, vutisa u ku: “Xana u ta ti kuma rini nakambe timinete ta 15 leswaku hi kota ku dyondza dyondzo leyi landzelaka?”

“Vanhu vo tala va ni Bibele kambe a va si swi xiya leswaku yi tamele tinhlamulo ta swivutiso swa nkoka, leswi hi tivutisaka swona hi vumundzuku bya hina. Hi ku tirhisa xipfuneta ku dyondza lexi [broxara leyi nge Leswi Xi Swi Languteleke kumbe buku leyi nge Vutivi] awara yin’we kumbe ku tlulanyana hi vhiki, u nga kuma tidyondzo ta xisekelo ta Bibele hi tin’hweti ti nga ri tingani. Ndzi nga tsakela ku ku kombisa ndlela leyi ku dyondziwaka ha yona.”

“Ndzi ku endzele leswaku ndzi ta ku nyika dyondzo ya mahala ya Bibele. Loko u ndzi pfumelela, ndzi ta tsakela ku teka timinete ti nga ri tingani ku ku kombisa ndlela leyi vanhu ematikweni ya kwalomu ka 200, va bulaka hi Bibele emakaya ya vona tanihi mindyangu. Bulo ra hina ri nga sekeriwa eka yin’wana ni yin’wana ya tinhloko-mhaka leti. [N’wi kombe nxaxamelo wa leswi nga endzeni ka buku leyi nge Vutivi.] Hi yihi leyi u yi tsakelaka?” N’wi nyike nkarhi wa ku hlawula. Pfula ndzima leyi a yi hlawuleke kutani u sungula dyondzo yoleyo hi ku hlaya ndzimana yo sungula.

“Ndzi dyondzisa vanhu Bibele mahala naswona ndzi na wona nkarhi wo dyondzisa vanhu lava engetelekeke, lava lavaka ku dyondza. Buku leyi hi dyondzisaka vanhu Bibele ha yona hi leyi. [N’wi kombe buku leyi nge Vutivi.] Dyondzo ya kona yi teka tin’hweti ti nga ri tingani naswona yi hlamula swivutiso swo tanihi leswi nge: Ha yini Xikwembu xi pfumelela ku xaniseka? Ha yini hi dyuhala hi tlhela hi fa? Xana ku humelela yini hi varhandziwa va hina lava feke? Ni lexi nge, hi nga tshinela njhani eka Xikwembu? Xana ndzi ku komba ndlela leyi ku dyondziwaka ha yona?”

Loko u kume xingheniso lexi endlaka leswaku vanhu va tsakela, hambeta u xi tirhisa! Endla leswaku xi fambisana ni nkandziyiso lowu fambisiwaka en’hwetini yoleyo.