Dyondzo 13

Xana U Nga Byi Kumisa Ku Yini Vukhongeri Bya Ntiyiso?

Xana Xikwembu xi tsakisiwa hi vukhongeri hinkwabyo, kumbe xi tsakisiwa hi byin’we ntsena? (1)

Ha yini ku ri ni vukhongeri byo tala swonghasi lebyi tivulaka bya Vukreste? (2)

Xana u nga va tiva njhani Vakreste va ntiyiso? (3-7)

1. Yesu u sungule vukhongeri byin’we bya ntiyiso bya Vukreste. Hikwalaho namuntlha ku fanele ku va ni nhlengeletano, kumbe ntlawa wun’we wa vagandzeri va ntiyiso va Yehovha Xikwembu. (Yohane 4:23, 24; Vaefesa 4:4, 5) Bibele yi dyondzisa leswaku i vanhu va nga ri vangani ntsena lava nga endleleni leyo khuma leyi yaka evuton’wini.—Matewu 7:13, 14.

2. Bibele yi vhumbe leswaku endzhaku ka rifu ra vaapostola, tidyondzo ta mavunwa ni swiendlo leswi nga riki swa Vukreste a swi ta nghena evandlheni ra Vukreste hakatsongo-tsongo. Vanhu a va ta tikokela vapfumeri leswaku va va landzela ematshan’weni yo landzela Kreste. (Matewu 7:15, 21-23; Mintirho 20:29, 30) Hi yona mhaka leyi hi vonaka vukhongeri byo tala swonghasi lebyi tivulaka bya Vukreste. Hi nga va tiva njhani Vakreste va ntiyiso?

3. Mfungho lowukulu swinene wa Vakreste va ntiyiso hi leswaku va rhandzana hi xiviri. (Yohane 13:34, 35) A va dyondzisiwi leswaku va tilanguta onge va antswa ku tlula vanhu va tinxaka tin’wana kumbe muvala wun’wana wa nhlonge. Naswona a va dyondzisiwanga ku venga vanhu va le matikweni man’wana. (Mintirho 10:34, 35) Hikwalaho a va hlanganyeli etinyimpini. Vakreste va ntiyiso va khomana tanihi vamakwavo va xinuna ni va xisati.—1 Yohane 4:20, 21.

4. Mfungho wun’wana wa vukhongeri bya ntiyiso hi leswaku swirho swa byona swi xixima Bibele hi ndlela leyi enteke. Va yi amukela tanihi Rito ra Xikwembu ni ku pfumela leswi yi swi vulaka. (Yohane 17:17; 2 Timotiya 3:16, 17) Va languta Rito ra Xikwembu tanihi leri nga ra nkoka swinene ku tlula mianakanyo ni mikhuva ya vanhu. (Matewu 15:1-3, 7-9) Va ringeta ku hanya hi Bibele evuton’wini bya vona bya siku na siku. Hikwalaho a va vuli nchumu wo karhi ivi va endla leswi hambaneke.—Tito 1:15, 16.

5. Vukhongeri bya ntiyiso byi fanele byi tlhela byi xixima rito ra Xikwembu. (Matewu 6:9) Yesu u byele van’wana vito ra Xikwembu, Yehovha. Vakreste va ntiyiso va fanele ku endla leswi faneleke. (Yohane 17:6, 26; Varhoma 10:13, 14) I vamani lava byelaka van’wana malunghana ni vito ra Xikwembu endhawini ya ka n’wina?

6. Vakreste va ntiyiso va fanele ku chumayela hi Mfumo wa Xikwembu. Yesu u swi endlile sweswo. Nkarhi na nkarhi a a vulavula hi Mfumo. (Luka 8:1) U lerise vadyondzisiwa vakwe ku chumayela rungula leri leri fanaka emisaveni hinkwayo. (Matewu 24:14; 28:19, 20) Vakreste va ntiyiso va pfumela leswaku i Mfumo wa Xikwembu ntsena lowu nga ta tisa ku rhula ka ntiyiso ni nsirhelelo emisaveni leyi.—Pisalema 146:3-5.

7. Vadyondzisiwa va Yesu va fanele va nga vi xiphemu xa misava leyi yo homboloka. (Yohane 17:16) A va katseki etimhakeni ta swa tipolitiki ta misava ni le ka madzolonga ya tiko. Va papalata mahanyelo, swiendlo ni malangutelo lama nga ni khombo lama tolovelekeke emisaveni. (Yakobo 1:27; 4:4) Xana wu kona ntlawa lowu u wu tivaka wa vukhongeri endhawini ya ka n’wina lowu nga ni mimfungho leyi ya Vukreste bya ntiyiso?

[Swifaniso leswi nga eka tluka 27]

Vakreste va ntiyiso va rhandzana, va xixima Bibele naswona va chumayela hi Mfumo wa Xikwembu