Xana U Byi Kumile Vukhongeri Bya Ntiyiso?

“Vukhongeri lebyi tengeke, lebyi nga solekiki emahlweni ka Xikwembu Tatana, hi lebyi.”—YAKOBO 1:27.

1, 2. (a) Hi ku anakanya ka vanhu vo tala, i yini lexi vulaka loko vukhongeri bya vona byi ri bya ntiyiso kumbe e-e? (b) I yini leswi faneleke swi kambisisiwa swinene eku hlahluvisiseni ka vukhongeri?

HI HANYA eka nguva leyi eka yona vanhu vo tala va enerisekaka hi ku katseka switsonga etimhakeni ta vukhongeri, evuton’wini bya vona. Va nga ha ya emihlanganweni ya vukhongeri nkarhi wun’wana, kambe a hi vangani lava yaka mikarhi hinkwayo. Vanhu vo tala a va na yona mianakanyo ya leswaku vukhongeri lebyin’wana hinkwabyo byi hoxile, i bya vona ntsena lebyi lulameke. Va nga ha vona onge eka vona lebyi hi byona vukhongeri lebyi va lulameleke.

² Hikwalaho ka leswi, xana xivutiso lexi nge, Xana u byi kumile vukhongeri bya ntiyiso? xo vula ntsena leswaku, Xana u kume vukhongeri lebyi u byi rhandzaka? I yini leswi ku endlaka u rhandza xanchumu? Xana i ndyangu wa wena? I vanghana va wena? I mintlhaveko ya wena? Xana u ri kambisise ku fikela kwihi langutelo ra Xikwembu hi mhaka leyi?

Xana Hi Nga Ri Tivisa Ku Yini Langutelo Ra Xikwembu?

3. (a) Leswaku hi tiva langutelo ra Xikwembu, i yini lexi hi faneleke hi va na xona? (b) I swivutiso swihi leswi hi faneleke hi swi vutisa, malunghana ni leswaku ha yini hi pfumela leswaku Bibele yi huma eka Xikwembu?

³ Loko hi ta tiva leswi Xikwembu hi xoxe xi swi anakanyaka, ku fanele ku va ni swo karhi leswi xi swi paluxeke. Bibele i buku ya khale swinene leyi vulaka leswaku yi huhuteriwe hi Xikwembu. (2 Timotiya 3:16, 17) Kambe xana i ntiyiso ku vula leswaku buku leyi, ku hambana ni letin’wana hinkwato, hi yona yi khomeleke vanhu rungula ra Xikwembu? Xana u nga xi hlamurisa ku yini xivutiso lexi, naswona hikwalaho ka yini? Xana hi leswi vatswari va wena a a va pfumela sweswo? Xana swi vangiwa hi langutelo ra vanghana va wena? Xana u byi kambisisile vumbhoni hi wexe? Ha yini u nga endli sweswo sweswi, u tirhisa tindlela leti landzelaka ta mune ta vumbhoni?

4. Mayelana ni ku kumeka ka yona, i yini lexi kombisaka leswaku Bibele yi huma eka Xikwembu, ku hambana ni tibuku letin’wana?

⁴ Ku kumeka: Rungula leri hakunene ri humaka eka Xikwembu naswona ri ri ra ndyangu hinkwawo wa vanhu, kutani vanhu va fanele va kota ku ri kuma. Xana sweswo swi tano hi Bibele? Xiya leswi: Bibele, sweswi yi kandziyisiwa hi tindzimi to tlula 2 000 yi helerile kumbe xiphemu xa yona. Hi ku ya hi Vandla ra Bibele ra le Amerika, kwalomu ka malembe ya khume lama hundzeke, tindzimi leti Bibele a yi kandziyisiwa ha tona, ti endle leswaku yi kumeka eka vaaki va tiphesente ta kwalomu ka 98 va misava hinkwayo. Hi laha swi vuriweke ha kona hi buku leyi nge Guinness Book of World Records, ku ta fikela sweswi, Bibele hi yona “buku leyi hangalasiwaka swinene ku tlula hinkwato emisaveni.” Leswi hi swona hi nga swi langutelaka hi rungula leri humaka eka Xikwembu, leri tsaleriweke vanhu va tinxaka hinkwato, va matiko hinkwawo ni va tindzimi hinkwato. (Ringanisa Nhlavutelo 14:6.) A yi kona buku leyi nga ni vumbhoni byo fana ni bya yona.

5. Ha yini masungulo ya Bibele hi tlhelo ra matimu, ma ri lama xiyekaka?

⁵ Ntiyiso wa matimu: Nkambisiso wa vukheta wa timhaka ta Bibele, wu paluxa ndlela yin’wana leyi Bibele yi hambaneke ha yona ni tibuku tin’wana leti ku vuriwaka leswaku ta kwetsima. Bibele yi tamele mintiyiso ya matimu, ku nga ri mintsheketo yo pfumala vumbhoni. Irwin Linton, loyi a a ri qgweta, a a tolovele ku kambisisa leswi lavekaka eku nyikeleni ka vumbhoni ehubyeni ya nawu, u tsale a ku: “Hambi loko switori, mintsheketo ni vumbhoni bya mavunwa swi ri na vukheta eku andlaleni ka swiendlakalo leswi runguriwaka endhawini yo karhi ya le kule ni swa nkarhi wa khale swinene, . . . vatsari va Bibele vona va hi nyika nkarhi ni ndhawu ya swilo leswi runguriwaka hi ku pakanisa loku xiyekaka.” (Hi xikombiso, vona 1 Tihosi 14:25; Esaya 36:1; Luka 3:1, 2.) Eka vanhu lava lavaka vukhongeri leswaku va kuma ntiyiso ku nga ri ku balekela ntiyiso, leyi yi fanele yi va mhaka ya nkoka.

6. (a) Kahle-khale, xana Bibele yi n’wi pfunisa ku yini munhu ku langutana ni swiphiqo swa vutomi? (b) Hi tihi tindlela tinharhu leti Bibele yi pfunaka munhu ha tona leswaku a langutana ni mintiyiso yo vava ya vutomi?

⁶ Ku pfuna ka yona: Lava va kambisisaka Bibele hi ku tiyimisela, hi ku hatlisa va swi xiya leswaku swileriso ni misinya ya yona ya milawu a swi endleriwanga ku va vavisa. Ematshan’weni ya sweswo, yi andlala ndlela yo hanya ha yona leyi nga ta pfuna lava va yi namarhelaka swinene. (Esaya 48:17, 18) Nchavelelo lowu yi wu nyikelaka eka lava nga ni gome a hi wa hava, a wu sekeriwanga eka tifilosofi ta mavunwa. Ematshan’weni ya sweswo, yi pfuna vanhu leswaku va langutana ni swiphiqo leswi vavaka swa vutomi. Njhani? Hi tindlela tinharhu: (1) hi ku nyikela xitsundzuxo lexinene malunghana ni ndlela yo langutana ni swiphiqo, (2) hi ku hlamusela ndlela yo kuma nseketelo wa rirhandzu lowu Xikwembu xi wu nyikaka malandza ya xona sweswi, na (3) hi ku paluxa vumundzuku lebyi hlamarisaka lebyi Xikwembu xi byi vekeleke lava va xi tirhelaka yi nyikela swivangelo leswi twalaka swo tshemba switshembiso swa xona.

7. (a) Hi ku tirhisa matsalwa lama kombisiweke eka xikombo xa le hansi, hlamusela nhlamulo ya Bibele eka yin’wana ya timhaka letikulu leti karhataka vanhu namuntlha. (b) Kombisa ndlela leyi ndzayo ya Bibele yi hi sirhelelaka ha yona kumbe yi hi pfunaka ha yona leswaku hi langutana ni swiyimo swo tika.

⁷ Hambi leswi ndzayo ya Bibele hakanyingi yi nga rhandziwiki eka lava nga wu laviki nawu ni lava hlongorisaka ntsako, vo tala va swi xiyile leswaku vutomi byo tano a byi va nyikanga ntsako wa xiviri. (Vagalatiya 6:7, 8) Bibele yi nyikela tinhlamulo leti kongomeke malunghana ni timhaka leti khumbaka ku susa khwiri, ku dlaya vukati ni vusodoma. Ndzayo ya yona i xisirhelelo eku tirhiseni ko biha ka swidzidzirisi ni xihoko ni le ku khomiweni hi vuvabyi bya AIDS, lebyi kumekaka engatini leyi nga na byona kumbe hi ku tikhoma ko biha hi tlhelo ra rimbewu. Yi hi komba ndlela yo va ni mindyangu leyi tsakeke. Yi nyikela tinhlamulo leti pfunaka munhu leswaku a langutana ni swiyimo swo tika swinene evuton’wini, hambi ku ri ku lan’wiwa hi vandyangu, vuvabyi lebyi nga ni khombo swinene ni ku feriwa hi murhandziwa. Yi hi pfuna leswaku hi vona swilo leswi rhangaka emahlweni, leswaku vutomi bya hina byi va ni xikongomelo ku nga ri ku tshamela ku tisola.a

8, 9. (a) Hi byihi vuprofeta lebyi ku tsakisaka wena hi wexe, lebyi kombisaka leswaku Bibele yi huhuteriwile? (b) Xana vuprofeta lebyi nga eBibeleni byi kombisa yini malunghana ni leswaku byi huma kwihi?

⁸ Vuprofeta: Bibele i buku ya vuprofeta, leyi tivekaka, i buku leyi vulaka leswi nga ta humelela enkarhini lowu taka naswona yi swi vula hi vuxokoxoko swinene. Yi vhumbhe ku onhiwa ka Tiri wa khale, ku wa ka Babilona, ku pfuxetiwa ka Yerusalema, ku yima ni ku wa ka tihosi ta Medo-Persia na Greece, ni swiendlakalo swo tala evuton’wini bya Yesu Kreste. Nakambe yi tlhele yi vhumbha swiyimo swa misava leswi humeleleke eka lembe xidzana leri, yi tlhela yi nyikela nhlamuselo ya swona. Yi kombisa ndlela leyi swiphiqo leswi tsandzaka vafumi lava nga vanhu, swi nga ta tlhantlhiwa ha yona, yi tlhela yi boxa Mufumi la nga ta tisa ku rhula loku nga heriki ni nsirhelelo wa xiviri eka vanhu.b—Esaya 9:6, 7; 11:1-5, 9; 53:4-6.

⁹ Lexi tsakisaka, ku kombisa leswaku yi huma eka Xikwembu, Bibele yi na vuswikoti byo vhumbha vumundzuku hi ndlela leyi pakanisaka. (Esaya 41:1–46:13) Loyi a endlaka sweswo kumbe loyi a swi kotaka ku huhutela van’wana leswaku va endla leswi, a hi xifaniso lexi nga hanyiki. A hi munhu la tinyiketeleke ntsena. I Xikwembu xa ntiyiso, naswona buku leyi nga ni vuprofeta byo tano i Rito ra xona.—1 Vatesalonika 2:13.

Xana Hinkwavo Lava Tirhisaka Bibele Va Dyondzisa Ntiyiso?

10, 11. Hi laha Yesu a kombiseke ha kona, hambi loko mufundhisi o tirhisa Bibele, i yini lexi endlaka vukhongeri lebyi a byi seketelaka byi va bya hava?

¹⁰ Xana swa twala—ku tlula kwalaho, xana swi fambisana ni Matsalwa—ku gimeta hi leswaku, mintlawa hinkwayo ya vukhongeri leyi tivulaka leyi tirhisaka Bibele, yi dyondzisa vukhongeri bya ntiyiso? Xana un’wana ni un’wana la tamelaka kumbe loyi a tshahaka Bibele, u dyondzisa ntiyiso?

¹¹ Vafundhisi vo tala, hambileswi va nga na yona Bibele, va tirhisa vukhongeri leswaku va tidzunisa. Va lunga mintiyiso leyi tengeke hi ndhavuko ni tifilosofi ta vanhu. Xana vugandzeri bya vona bya amukeleka eka Xikwembu? Malunghana ni varhangeri va vukhongeri va le Yerusalema wa lembe xidzana ro sungula, lava a va endla sweswo, Yesu Kreste u tirhise nkongomiso wa Xikwembu hi ku pakanisa, lowu tsariweke hi muprofeta Esaya, a ku: “Vanhu lava va ndzi xixima hi nomo, kambe timbilu ta vona ti le kule na mina. Va tikarhata ntsena hi ku ndzi nkhinsamela, tidyondzo leti va ti dyondzisaka i milawu ya vanhu ntsena.” (Matewu 15:8, 9; 23:5-10) Hakunene, vukhongeri bya muxaka lowu a hi vukhongeri bya ntiyiso.

12, 13. (a) Xana ndlela leyi swirho swa kereke swi tikhomaka ha yona, yi nga n’wi pfunisa ku yini munhu ku vona loko vukhongeri byakwe byi ri bya ntiyiso? (b) Xana Xikwembu xi ta byi languta njhani vugandzeri bya hina loko hi tihlanganisa ni vanhu lava xi va alaka? (2 Tikronika 19:2)

¹² Ku vuriwa yini loko mihandzu leyi humesiwaka hi tidyondzo ta vukhongeri byo karhi, leyi kombisiwaka hi vutomi bya swirho swa byona leswi amukeriwaka, yi borile? Eka Dyondzo yakwe ya le Ntshaveni, Yesu u tsundzuxile a ku: “Tivoneleni eka vaprofeta va mavunwa . . . Mi ta va tiva hi mintirho ya vona. . . . Murhi lowunene wu tswala mihandzu leyo nandziha, ni murhi lowo biha wu tswala mihandzu leyo biha.” (Matewu 7:15-17) Ina, vanhu va dyoha, naswona va fanele ku soriwa. Kambe a swi fani ni loko swirho swa kereke, swin’we ni vafundhisi, va endla vuoswi ni vumbhisa, va nghenela madzolonga ni vudakwa, makolo, ku hemba, vungoma, ku gandzela swifaniso—xin’wana xa swona kumbe hinkwaswo—kambe va nga soriwi, naswona lava yaka emahlweni va endla leswi va nga susiwi evandlheni. Bibele yi swi veka erivaleni leswaku lava va endlaka swilo swa muxaka lowu, va fanele va hlongoriwa evandlheni; a va nge vi na ndhawu eMfun’weni wa Xikwembu. (Vagalatiya 5:19-21) Vugandzeri bya vona a byi xi tsakisi Xikwembu, ni vugandzeri bya hina a byi nge xi tsakisi Xikwembu loko hi titoloveta ni lava xi va alaka.—1 Vakorinto 5:11-13; 6:9, 10; Nhlavutelo 21:8.

¹³ Swi le rivaleni leswaku a hi mintlawa hinkwayo leyi tivulaka leyi tirhisaka Bibele, leyi dyondzisaka ntiyiso lowu hlamuseriwaka eka yona. Kutani ke, i yini leswi Bibele yi swi vulaka leswaku swi ta va mfungho wa vukhongeri bya ntiyiso?

Mimfungho Yo Vona Vukhongeri Bya Ntiyiso

14. (a) Xana tidyondzo hinkwato ta vukhongeri bya ntiyiso ti sekeriwe kwihi? (b) Xana tidyondzo ta Vujagana malunghana ni Xikwembu ni moya-xiviri ti vonaka ti sekeriwe kwihi?

¹⁴ Tidyondzo ta byona ti sekeriwe swinene eMatsalweni lama huhuteriweke. “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku sola, ku ololoxa swilo.” (2 Timotiya 3:16, NW) Kambe, hi kwihi laha Bibele yo Kwetsima yi vulavulaka kona hi Vunharhu-un’we bya Vujagana? Naswona hi kwihi laha Bibele yi dyondzisaka kona leswaku vanhu va ni moya-xiviri lowu ponaka rifu ra miri wa nyama, hi laha vafundhisi va vulaka ha kona? Xana u tshama u n’wi kombela mufundhisi leswaku a ku komba tidyondzo leti eBibeleni ya wena? The New Encyclopædia Britannica yi ri: “Rito leri nge Vunharhu-un’we kumbe dyondzo leyi heleleke ya byona, a swi humeleli eka Testamente Leyintshwa.” (1992, Micropædia, Vholumo 11, tluka 928) Naswona New Catholic Encyclopedia yi ri: “Eka Vatatana lava hanyeke endzhakunyana ka Vaapostola, a xi kona nikatsongo lexi kombaka leswaku a a va ri na yona mianakanyo yo tano.” (1967, Vholumo XIV, tluka 299) Malunghana ni dyondzo ya Vujagana ya leswaku moya-xiviri wu hambana ni miri eku feni, swidyondzi swa kereke swa pfumela leswaku mianakanyo leyi swi yi kume eka filosofi ya Magriki. Hambi swi ri tano, vukhongeri bya ntiyiso a byi wu bakanyeli tlhelo ntiyiso wa Bibele, ivi byi wu siva hi tifilosofi ta vanhu.—Genesa 2:7; Deteronoma 6:4; Ezekiyele 18:4; Yohane 14:28.

15. (a) Xana Bibele yi ri i mani Loyi ku nga yena ntsena a faneleke ku gandzeriwa? (b) Xana vagandzeri va ntiyiso va titwisa ku yini hi mhaka ya ku titshineta eka Yehovha?

¹⁵ Vukhongeri bya ntiyiso byi khutaza ku gandzeriwa ka Xikwembu xi ri xin’we xa ntiyiso, Yehovha. (Deteronoma 4:35; Yohane 17:3) Loko a katsakanya Deteronoma 5:9 na 6:13, Yesu Kreste u te: “U ta gandzela Hosi, Xikwembu xa wena u tirhela xona ntsena.” (Matewu 4:10) Ku pfumelelana ni sweswo, Yesu u tivise vito ra Tata wakwe eka vadyondzisiwa. (Yohane 17:26) Xana vukhongeri bya wena byi ku dyondzisile leswaku u gandzela Yehovha? Xana se wa n’wi tiva N’wini wa vito rero—swikongomelo swakwe, mintirho yakwe, timfanelo takwe—lerova u nga kota ku titshineta eka yena, hi ku n’wi tshemba? Loko vukhongeri bya wena byi ri ntiyiso, nhlamulo ya wena i ina.—Luka 10:22; 1 Yohane 5:14.

16. Xana ku va ni ripfumelo eka Kreste swi vula yini eka lava dyondzisaka ntiyiso?

¹⁶ Xiphemu xa nkoka xa vugandzeri lebyi tsakisaka Xikwembu i ku pfumela eka N’wana wa xona, Yesu Kreste. (Yohane 3:36; Mintirho 4:12) Leswi a swi vuli ku pfumela ntsena leswaku u tshame a va kona kumbe leswaku a a ri munhu la xiyekaka. Swi katsa ku tlangela leswi Bibele yi swi dyondzisaka malunghana ni ntikelo wa gandzelo ra vutomi bya Yesu, lebyi hetisekeke, ni ku xiya xikhundlha xa yena tanihi Hosi ya le matilweni namuntlha. (Pisalema 2:6-8; Yohane 3:16; Nhlavutelo 12:10) Loko u hlanganyela ni vanhu lava va nga evukhongerini bya ntiyiso, wa swi tiva leswaku evuton’wini bya vona bya siku na siku va endla matshalatshala lamakulu yo yingisa Yesu, ku tekelela xikombiso xakwe lexinene, ni ku hlanganyela hi xiviri na hi ku hiseka entirhweni lowu a wu aveleke vadyondzisiwa vakwe. (Matewu 28:19, 20; Yohane 15:14; 1 Petro 2:21) Loko lava u hlanganyelaka na vona va nga swi endli sweswo, u fanele u ya ringeta kun’wana.

17. Hikwalaho ka yini vagandzeri va ntiyiso va lwela ku tshama va nga ri na xivati xa misava, naswona sweswo swi katsa yini ke?

¹⁷ Vugandzeri bya ntiyiso a byi thyakisiwi hi ku katseka eka tipolitiki ni le ka minkwetlembetano ya misava. (Yakobo 1:27) Hikwalaho ka yini? Hikuva Yesu u vule leswi malunghana ni valandzeri vakwe: “A hi va misava, tanihi leswi na mina ndzi nga riki wa misava.” (Yohane 17:16) Yesu a a nga ti ngheneli tipolitiki, naswona u alele valandzeri vakwe ku tirhisa matlhari ya nyama. (Matewu 26:52) Lava va yingisaka leswi Rito ra Xikwembu ri swi vulaka, ‘a va ha dyondzi ku lwa nyimpi.’ (Esaya 2:2-4) Loko ku ri ni vukhongeri byo karhi lebyi u byi tsakelakanyana, kambe byi nga pfumelelani ni nhlamuselo leyi, sweswi i nkarhi wo hambana na byona.—Yakobo 4:4; Nhlavutelo 18:4, 5.

18. (a) Xana Yohane 13:35 yi ri hi yini mfanelo leyi xiyekaka ya vukhongeri bya ntiyiso? (b) Xana u nga n’wi pfunisa ku yini munhu leswaku a kota ku vona leswaku hi wihi ntlawa lowu pfumelelanaka na Yohane 13:35?

¹⁸ Vukhongeri bya ntiyiso byi dyondzisa, byi tlhela byi kombisa rirhandzu ro pfumala vutianakanyi. (Yohane 13:35; 1 Yohane 3:10-12) Rirhandzu ra muxaka lowu a ko vulavuriwa hi rona ntsena eka tinkulumo. Entiyisweni ri hlanganisa vanhu va tinxaka hinkwato, va rifuwo leri nga faniki, va tindzimi hinkwato ni va matiko hinkwawo, va va vamakwavo va xiviri. (Nhlavutelo 7:9, 10) Byi endla Vakreste va ntiyiso va hambana ni vanhu lava tshamaka na vona. Loko u nga si swi endla sweswo, hlanganyela mihlangano eHolweni ya Mfumo ya Timbhoni ta Yehovha, ku ni mintsombano ya vona leyikulu. Hlalela loko va ri karhi va tirha swin’we, va aka yin’wana ya Tiholo ta vona ta Mfumo. Xiya ndlela leyi va khomaka vadyuhari ha yona (ni tinoni) ni vantshwa (ku katsa ni lava nga ni mutswari un’we kumbe lava nga hava mutswari ni un’we). (Yakobo 1:27) Pimanisa leswi u swi xiyeke ni leswi u swi voneke eka vukhongeri byin’wana. Kutani u tivutisa xivutiso lexi, ‘I vamani va dyondzisaka ntiyiso?’

19. (a) Hi wihi ntlhantlho wa swiphiqo swa vanhu lowu vukhongeri bya ntiyiso byi wu tivisaka? (b) Xana swirho swa ntlawa lowu nga ni vukhongeri bya ntiyiso, swi fanele swi va swi ri karhi swi endla yini?

¹⁹ Vukhongeri bya ntiyiso byi tlakusa Mfumo wa Xikwembu tanihi lowu nga wona ntsena wu nga ta tlhantlha swiphiqo swa vanhu hinkwavo hi ku helela. (Daniyele 2:44; 7:13, 14; 2 Petro 3:13; Nhlavutelo 21:4, 5) Xana yi kona eka tikereke ta Vujagana leyi endlaka sweswo? U hetelele rini ku twa mufundhisi a hlamusela Mfumo wa Xikwembu ni leswi Matsalwa ma kombisaka leswaku wu ta swi endla? Xana nhlengeletano leyi u nga eka yona ya ku khutaza leswaku u byela van’wana hi Mfumo wa Xikwembu, loko swi ri tano, xana swirho swa yona hinkwaswo swa hlanganyela eku endleni ka sweswo? Yesu u byi nyikerile vumbhoni byo tano; vadyondzisiwa va yena vo sungula na vona va byi nyikerile. Na wena u nga va na rona lunghelo ro va ni xiphemu entirhweni lowu. I ntirho wa nkoka ku tlula hinkwayo leyi endliwaka emisaveni namuntlha.—Matewu 24:14.

20. Ku tlhandlekela eku voneni ka vukhongeri bya ntiyiso, hi fanele hi endla yini?

²⁰ Hambi leswi ku nga ni vukhongeri bya magidi-gidi, hi ku hatlisa Bibele ya hi pfuna ku bakanya mpfilungano lowu leswaku hi kota ku vona bya ntiyiso. Kambe a hi fanelanga hi hetelela hi ku byi vona ntsena. I ntiyiso leswaku hi hanya hi ku pfumelelana na byona. Leswaku leswi swi vula yini swi ta kambisisiwa hi vuenti eka xihloko xa hina lexi landzelaka.

[Tinhlamuselo ta le hansi]

U Nga Hlamula Njhani?

◻ Eku hlawuleni ka vukhongeri bya ntiyiso, i langutelo ra mani leri nga ra nkoka?

◻ Hi tihi tinhla ta mune leti kombisaka leswaku Bibele i Rito ra Xikwembu?

◻ Hikwalaho ka yini vukhongeri byin’wana byi nga amukeleki eka Xikwembu hambi loko byi tirhisa Bibele?

◻ Hi yihi mimfungho ya tsevu leyi hlawulaka vukhongeri byin’we bya ntiyiso?

[Bokisi leri nga eka tluka 10]

Timbhoni Ta Yehovha . . . 

◆ Ti sekela tidyondzo ta tona hinkwato eBibeleni.

◆ Ti gandzela Xikwembu xi ri xin’we ntsena xa ntiyiso, Yehovha.

◆ Ti hanya hi ku pfumelelana ni ripfumelo ra tona eka Yesu Kreste.

◆ A ti hlanganyeli eka tipolitiki kumbe eka minkwetlembetano ya misava.

◆ Ti lwela ku kombisa rirhandzu ro pfumala vutianakanyi evuton’wini bya siku na siku.

◆ Ti tivisa leswaku Mfumo wa Xikwembu, hi wona ntlhantlho-nkulu wa swiphiqo swa vanhu.

[Xifaniso lexi nga eka tluka 9]

BIBELE—xana i yini lexi kombisaka leswaku yi khomele vanhu hinkwavo rungula leri humaka eka Xikwembu?