Ku Tirhisa Vukhongeri Lebyi Tengeke Leswaku U Ta Pona
“Vukhongeri lebyi tengeke ni lebyi byi nga bya xiviri emahlweni ka Xikwembu Tatana, byi ta tikomba hi swilo swo tanihi . . . ku tihlayisa u nga thyakisiwi hi misava.”—YAKOBO 1:27, Phillips.
1. Xana vukhongeri byi hlamuseriwe njhani, naswona kahle-kahle, i mani loyi a nga ni mfanelo ya ku komba ku hambana exikarhi ka vukhongeri bya mavunwa ni bya ntiyiso?
VUKHONGERI byi hlamuseriwe tanihi “xikombiso xa ku pfumela ka munhu ni ku gandzela kakwe matimba yo tlula ya munhu lama xiyiwaka tanihi muvumbi ni mufumi wa misava hinkwayo.” Kutani ke, i mani loyi entiyisweni a nga ni mfanelo ya ku kombisa ku hambana exikarhi ka vukhongeri bya mavunwa ni vukhongeri bya ntiyiso? Entiyisweni ku fanele ku ri Loyi ku pfumeriwaka eka yena ni loyi a gandzeriwaka, Muvumbi. Yehova u boxe xiyimo xa yena hi laha ku twalaka eRitweni ra yena ehenhleni ka vukhongeri bya ntiyiso ni vukhongeri bya mavunwa.
Rito “Vukhongeri” eBibeleni
2. Xana tidikixinari ti ri hlamusela njhani rito leri humaka eka Xigriki leri hundzuluxeriweke va ku “xivumbeko xa ku gandzela” kumbe “vukhongeri,” naswona ri nga tirhisiwa eka mixaka yihi mimbirhi ya ku gandzela?
2 Rito ra Xigriki leri hundzuluxeriweke va ku “xivumbeko xa vugandzeri,” kumbe “vukhongeri,” i thre·skeiʹa. A Greek-English Lexicon of the New Testament yi hlamusela rito leri tanihi “vugandzeri bya Xikwembu, vukhongeri, ngopfu-ngopfu hi laha ri tihlamuselaka ha kona eka vutirheli kumbe tidyondzo ta vukhongeri.” Theological Dictionary of the New Testament yi nyikela vuxokoxoko lebyi engetelekeke, loko yi ku: “Matimu ya rito leri ka ha ri njhekanjhekisano; . . . vadyondzi va namuntlha va vula leswaku ri hlangana na therap- (‘ku tirhela’). . . . Ku hambana ka tinhlamuselo ta rito ku nga ha xiyiwa. Mongo lowunene i ‘ku hisekela vukhongeri’ . . . , ‘ku gandzela Xikwembu,’ ‘vukhongeri.’ . . . kambe ku na mongo wo biha, hi xikombiso, ‘ku hundzeleta vukhongeri,’ ‘vugandzeri byo homboloka.’” Xisweswo, thre·skeiʹa ri nga ha hundzuluxeriwa ri va “vukhongeri” kumbe ri va “xivumbeko xa vugandzeri,” lebyinene kumbe lebyo biha.
3. Xana muapostola Pawulo u ri tirhise njhani rito leri hundzuluxeriweke va ku “xivumbeko xa ku gandzela,” naswona i nhlamuselo yihi leyi tsakisaka leyi endliweke eka ma hundzuluxelelo ya Vakolosa 2:18?
3 Rito leri ri humelela minkarhi ya mune ntsena eka Matsalwa ya Vukriste ya Xigriki. Muapostola Pawulo u ri tirhise kambirhi loko a vulavula hi vukhongeri bya mavunwa. Eka Mintirho 26:5, u rhekhodiwa a ri karhi a vula leswaku, loko ndzi nga si va Mukriste, “ndzi hanyile ndzi ri wa ntlawa lowu nga ni milawu yo tiya ku tlula mintlawa yin’wana hinkwayo, evukhongerini bya ka hina, hi leswaku ntlawa wa Vafarisi.” Eka papila ra yena leri yaka eka Vakolosa, u tsundzuxile: “Munhu a nga tshuki a mi tekela hakelo ya n’wina, hi ku tsakela swo tilondla-londla ni ku gandzela tintsumi.” (Vakolosa 2:18) Ku gandzela koloko ka tintsumi swi vonaka onge a ku dumile le Ferjiya emasikwini wolawo, kambe a ku ri xivumbeko xa vukhongeri bya mavunwa.a Lexi tsakisaka, hambi leswi ku hundzuluxela kun’wana ka Tibibele ku hundzuluxelaka thre·skeiʹa ri va, “vukhongeri,” eka Vakolosa 2:18 to tala ta tona ti tirhisa rito “vugandzeri.” New World Translation minkarhi hinkwawo yi hundzuluxela thre·skeiʹa ri va, “xivumbeko xa vugandzeri,” nhlamuselo ya le hansi ya Reference Bible nkarhi na nkarhi yi boxa leswaku ku hundzuluxela kun’wana ka rito “vukhongeri” ka tirhisiwa eka ku hundzuluxela ka Xilatini.
“Lebyi Tengeke, Lebyi Nga Solekiki” Hi langutelo ra Xikwembu
4, 5. (a) Hi ku ya hi Yakobo, i xiyimo xa mani xa vukhongeri lexi nga xa nkoka swinene? (b) I yini lexi nga endlaka xivumbeko xa ku gandzela xa munhu xi va lexi nga pfuniki nchumu, naswona rito leri hundzuluxeriweke va ku “ku nga pfuni nchumu” ri vula yini?
4 Ku humelala kun’wana kumbirhi ka rito thre·skeiʹa ku le ka papila leri tsariweke hi muapostola Yakobo, xirho xa huvo leyi fumaka ya bandlha ra Vukriste ra lembe xidzana ro sungula. U tsarile: “Loko munhu a anakanya leswaku u ni vukhongeri, kambe a nga fumi ririmi ra yena, munhu loyi wa tixisa, vukhongeri bya yena a byi pfuni nchumu. Vukhongeri lebyi tengeke, lebyi nga solekiki emahlweni ka Xikwembu tatana, hi lebyi, ku endzela lava feriweke hi vatswari, ni ku endzela tinoni emaxangwini ya tona, ni ku papalata swilo leswi nyameke swa misava leyi.”—Yakobo 1:26, 27.
5 Ina, ku xiya xiyimo xa Yehova ehenhleni ka vukhongeri i swa nkoka loko hi lava ku amukeriwa hi yena ni ku ponela emisaveni leyintshwa leyi a yi tshembisaka. (2 Petro 3:13) Yakobo u kombisa leswaku munhu a nga ha vonaka a ri wa vukhongeri hakunene kambe xivumbeko xa vugandzeri bya yena xi ri lexi nga pfuniki nchumu. Rito ra Xigriki leri laha ri hundzuluxeriweke va ku: “Ku nga pfuni nchumu” nakambe ri nga ha vula “xa hava, lexi nga riki na nchumu, lexi nga riki na mihandzu, lexi nga tirhiki nchumu, lexi nga riki na matimba, lexi pfumalaka ntiyiso.” Leswi swi nga va tano eka munhu loyi a tivulaka Mukriste kambe a nga koti ku lawula ririmi ra yena leswaku a ri tirhisela ku dzunisa Xikwembu ni ku aka Vakriste-kulobye. U ta va a “xisa mbilu ya yena” naswona u ta va a nga endli “vukhongeri lebyi tengeke ni bya xiviri emahlweni ka Xikwembu.” (Phillips) I langutelo ra Yehova leri lavekaka.
6. (a) Xana xihloko xa papila ra Yakobo xi ri yini? (b) Hi xihi xilaveko xa vugandzeri lebyi tengeke lexi Yakobo a xi kandziyiseke, naswona i yini leswi Huvo leyi Fumaka ya namuntlha yi swi vuleke emhakeni leyi?
6 Yakobo a nga swi boxi hinkwaswo swilo leswi Yehova a swi lavaka mayelana ni vugandzeri lebyi tengeke. Mayelana ni xihloko lexi tolovelekeke xa papila ra yena, ku nga ripfumelo leri kombisiwaka hi mintirho ni xilaveko xo papalata vunghana ni misava ya Sathana, u kombisa timfanelo timbirhi ntsena. Yo sungula i “ku endzela lava feriweke hi vatswari, ni ku endzela tinoni emaxangwini ya tona.” Leswi swi katsa rirhandzu ra ntiyiso ra Vukriste. Yehova minkarhi hinkwayo u kombise nkhathalelo wa rirhandzu eka lava feriweke hi vatswari ni tinoni. (Deuteronom 10:17, 18; Malakia 3:5) Wun’wana wa mintirho yo sungula ya huvo leyi fumaka ya lembe xidzana ro sungula a yi khumba tinoni ta Vakriste. (Mintirho 6:1-6) Muapostola Pawulo u nyikele swiletelo hi vuxokoxoko, swo nyikela nkhathalelo wa rirhandzu eka tinoni leti dyuhaleke, leti pfumalaka, leti tikombiseke ti ri leti tshembekaka hi malembe yo tala naswona leti nga riki na ndyangu lowu nga ti pfunaka. (1 Timotiya 5:3-16) Huvo leyi Fumaka ya Timbhoni ta Yehova ya siku ra namuntlha hi ku fanana yi nyikela swiletelo leswi kongomeke swa “ku Khathalela Swisiwana,” yi ku: “Vugandzeri bya ntiyiso byi katsa ku khathalela lava tshembekaka lava nga ha vaka va ri ni xilaveko xa mpfuno wa leswi vonakaka.” (Vona buku leyi nge Organized to Accomplish Our Ministry, matluka 122-3.) Tihuvo ta vakulu kumbe Vakriste lava tikombisaka va honisa mhaka leyi, va honisa xiphemu xa nkoka eka xivumbeko xa vugandzeri lebyi baseke lebyi nga thyakisiwangiki, hi ku ya hi langutelo ra Xikwembu ni Tata wa hina.
“A Nga Ri Na Xivati Xa Misava”
7, 8. (a) Hi xihi xilaveko xa vumbirhi xa vukhongeri bya ntiyiso lexi Yakobo a xi boxeke? (b) Xana vafundhisi ni vaprista va xi fikelela xilaveko lexi ke? Ku nga vuriwa yini hi Timbhoni ta Yehova?
7 Xilaveko xa vumbirhi xa vukhongeri bya ntiyiso lexi boxiweke hi Yakobo a a ku ri ku va “[munhu a] tihlayisa a nga ri na xivati xa misava.” Yesu u te: “Mfumo wa mina a hi wa misava leyi”; ku ya emahlweni, valandzeri va yena va ntiyiso a va nga ta va “va misava.” (Yohane 15:19; 18:36) Xana leswi swi nga vuriwa eka vafundhisi kumbe vaprista va vukhongeri byihi na byihi bya misava leyi? Va seketela Nhlangano wa Matiko. Vo tala va varhangeri va byona va amukele xirhambo xa mupapa xo hlangana le Assisi, aItaly, hi October 1986 leswaku va hlanganisa swikhongelo swa vona swa ku humelela ka “Lembe Ra Ku Rhula Ra Matiko Hinkwawo” leri seketeriweke hi UN. Hambi swi ri tano, matshalatshala ya vona a ma humelelanga, swi kombisiwa hi timiliyoni leti dlayiweke etinyimpini ta lembe rero ni le ka malembe lama landzeleke. Vafundhisi hakanyingi i vanghana lavakulu va mintlawa ya tipolitiki leyi fumaka, kambe hi vukangayisi va endla mintwanano exihundleni ni mintlawa leyi kanetaka leswaku mani na mani la fumaka a va languta tanihi ‘vanghana.’—Yakobo 4:4.
8 Timbhoni ta Yehova ti tiendlele vito lerinene tanihi Vakriste lava tshamaka va ri na vukala-tlhelo etimhakeni ta tipolitiki ni le ka mimpfilumpfilu ya misava leyi. Va hlayise xiyimo lexi eka matiko-nkulu ni le tinxakeni hinkwato, hi laha swi tiyisekisiwaka ha kona hi swiviko swa maphepha ni tirhekhodo ta matimu ya manguva lawa eswiphen’wini hinkwaswo swa misava. Hakunene a va na “xivati xa misava.” Kambe xa vona i “vukhongeri lebyi tengeke ni bya xiviri emahlweni ka Xikwembu.”—Yakobo 1:27, BX.
Mimfungho Yin’wana Ya Vukhongeri Bya Ntiyiso
9. Hi xihi xilaveko xa vunharhu xa vukhongeri bya ntiyiso, naswona ha yini?
9 Loko vukhongeri byi ri “ku gandzela munhu wa le henhla-henhla wa matimba la xiyiwaka tanihi muvumbi ni mufumi wa misava hinkwayo,” xisweswo, vukhongeri bya ntiyiso byi fanele byi kongomisa vugandzeri bya byona eka Xikwembu xin’we xa ntiyiso, Yehova. A byi fanelanga byi siva ku twisisa ka vanhu Xikwembu hi ku dyondzisa tidyondzo ta vuhedeni to tanihi xikwembu xa vunharhu-un’we lexi eka xona Tatana a avelanaka matimba, ku kwetsima, vukona lebyi nga heriki bya xona ni vanhu van’wana vambirhi eka Vunharhu-un’we bya xihundla. (Deuteronoma 6:4; 1 Vakorinto 8:6) Nakambe byi fanele byi tivisa vito ra Xikwembu leri nga ringanisiwiki, Yehova, naswona byi xixima vito rero, entiyisweni byi byarha vito ra Xikwembu tanihi vanhu lava hlelekeke. (Psalma 83:18; Mintirho 15:14) Eka leswi, lava nga eka byona va fanele va landzelela xikombiso xa Kriste Yesu. (Yohane 17:6) I vanhu vahi van’wana namuntlha lava fikelelaka mfanelo leyi handle ka Timbhoni ta Yehova ta Vakriste?
10. Leswaku vukhongeri byi nyika ku ponela emisaveni leyintshwa ya Xikwembu, byi fanele byi endla yini, naswona ha yini?
10 Muapostola Petro u te: “Kutani ku ponisiwa a ku kumeki eka munhu un’wana, hikuva vanhu a va nyikiwanga vito rin’wana laha misaveni, ehandle ka vito ra Yesu, leri hi fanelaka ku ponisiwa ha rona.” (Mintirho 4:8-12) Hikwalaho, vukhongeri lebyi tengeke lebyi nga ta nyika ku ponela emisaveni leyintshwa ya Xikwembu byi fanele byi khutaza ku pfumela eka Kriste ni le ka nkoka wa gandzelo ra nkutsulo. (Yohane 3:16, 36; 17:3; Vaefesa 1:7) Ku tlula kwalaho, byi fanele byi pfuna vagandzeri va ntiyiso ku titsongahata eka Kriste tanihi Hosi ya Yehova leyi fumaka ni Muprista Lonkulu la totiweke.—Psalma 2:6-8; Vafilipiya 2:9-11; Vaheveru 4:14, 15.
11. Vukhongeri bya ntiyiso byi fanele byi seketeriwa eka yini, naswona hi xihi xiyimo xa Timbhoni ta Yehova emhakeni leyi?
11 Vukhongeri lebyi tengeke byi fanele byi sekeriwa eka ku rhandza ka Xikwembu xin’we xa ntiyiso loku paluxiweke, hayi eka mikhuva kumbe tifilosofi leti endliweke hi vanhu. A a hi nga ta tiva nchumu hi Yehova ni swikongomelo swa yena leswo saseka, hambi ku ri hi ta Yesu ni gandzelo ra nkutsulo, loko a ku nga ri Bibele. Timbhoni ta Yehova ti endla vanhu va yi tshemba swinene Bibele. Nakambe hi vutomi bya tona bya siku na siku ti kombisa leswaku ti pfumelelana ni marito ya muapostola Pawulo lama nge: “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, . . . leswaku mutirheli wa Xikwembu a va la hetisekeke, a tilulamisela ku endla ntirho wun’wana ni wun’wana lowunene.”—2 Timotiya 3:16, 17.
Vukhongeri Bya Ntiyiso—Ndlela Ya Vutomi
12. Ku engetela eka ripfumelo, i yini lexi nga xa nkoka leswaku vugandzeri byi va bya ntiyiso, naswona vukhongeri bya ntiyiso i ndlela ya vutomi hi tindlela tihi?
12 Yesu u te: “Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” (Yohane 4:24) Xisweswo, vukhongeri bya ntiyiso, kumbe xivumbeko xa ku gandzela, a hi xivumbeko xa le handle xo kombisa mikhuva, mihivahivana ya ku va la chavaka Xikwembu. Vugandzeri lebyi tengeke i bya moya, byi sekeriwe eripfumelweni. (Vaheveru 11:6) Hambi swi ri tano, ripfumelo rero ri fanele ri seketeriwa hi mintirho. (Yakobo 2:17) Vukhongeri bya ntiyiso byi lahla mikhuva leyi tolovelekeke. Byi namarhela mimpimanyeto ya Bibele ya mahanyelo ni ya ku vulavula loku baseke. (1 Vakorinto 6:9, 10; Vaefesa 5:3-5) Lava nga eka byona va tinyiketela hi ku tshembeka leswaku va humesa mihandzu ya moya wa Xikwembu evuton’wini bya mindyangu ya vona, emintirhweni ya ku tihanyisa, exikolweni, hambi ku ri eku tihungaseni. (Vagalatiya 5:22, 23) Timbhoni ta Yehova ti ringeta ku tsundzuka xitsundzuxo xa muapostola Pawulo lexi nge: “Hambi ma dya, hambi ma nwa, hambi mi endla yini na yini, endlani hinkwaswo ku dzunisa Xikwembu.” (1 Vakorinto 10:31) Vukhongeri bya tona a hi tidyondzo ta vukhongeri ntsena; ti hanya hi ku pfumelelana na tona.
13. Vugandzeri bya ntiyiso byi katsa yini, naswona ha yini ku nga vuriwaka leswaku Timbhoni ta Yehova i vanhu va vukhongeri hakunene?
13 Kavula, vukhongeri bya ntiyiso byi katsa mintirho ya moya. Yona yi katsa xikhongelo xa munhu hi xiyexe ni xa ndyangu, ku dyondza Rito ra Xikwembu ni swipfuno swa dyondzo ya Bibele nkarhi na nkarhi, ni ku hlanganyela minhlangano ya bandlha ya Vukriste bya ntiyiso. Leyi yi sunguriwa ni ku pfariwa hi tinsimu ta ku dzunisa Yehova ni swikhongelo. (Matewu 26:30; Vaefesa 5:19) Tinhloko-mhaka leti akaka ta moya ta kambisisiwa hi ku tirhisa tinkulumo ni mabulo ya swivutiso ni tinhlamulo ta rungula leri tsariweke leri hinkwavo va nga na rona. Minhlangano yo tano yi khomeriwa eka Tiholo ta Mfumo leti baseke kambe leti nga bombisiwangiki ngopfu, leti tirhiseriwaka timhaka ta vukhongeri ntsena: minhlangano ya nkarhi na nkarhi, micato, mintirho ya switsundzuxo. Timbhoni ta Yehova ti xixima Tiholo ta tona ta Mfumo ni Tiholo letikulu ta Tinhlengeletano tanihi tindhawu leti nyikeriweke vugandzeri bya Yehova. Ku hambana ni tikereke to tala ta Vujagana, Tiholo ta Mfumo a hi ndhawu yo tlangela ka yona.
14. Xana vugandzeri a a byi vula yini eka vanhu lava a va vulavula Xiheveru, naswona i ntirho wihi lowu hlawulaka Timbhoni ta Yehova namuntlha?
14 Hi swi vonile eku sunguleni leswaku vadyondzi va hlanganisa rito ra Xigriki leri hundzuluxeriweke va ku “xivumbeko xa ku gandzela” kumbe “vukhongeri” ni riendli “ku tirhela.” Lexi tsakisaka, rito leri fanaka ra Xiheveru’ ‛avo·dhahʹ, ri nga ha hundzuluxeriwa ri va “ntirho” kumbe “ku gandzela.” (Ringanisa nhlamuselo ya le hansi eka Eksoda 3:12 na 10:26, NW.) Eka Vaheveru, vugandzeri a a byi vula ntirho. Naswona leswi hi leswi swi vulaka swona eka vagandzeri va ntiyiso namuntlha. Mfungho lowu xiyekaka swinene wa vukhongeri bya ntiyiso hi leswaku, hinkwavo lava nga eka byona va hlanganyela entirhweni wa Xikwembu wa ku chumayela “evhangeli leyi ya mfumo . . . emisaveni hinkwayo, leswaku yi va vumbhoni eka vanhu va matiko hinkwawo.” (Matewu 24:14; Mintirho 1:8; 5:42) I vukhongeri byihi emisaveni hinkwayo lebyi tiviwaka hi ku nyikela ka byona vumbhoni hi Mfumo wa Xikwembu tanihi ntshembo wu ri woxe wa vanhu?
Matimba Lama Tirhaka, Lama Hlanganisaka
15. Hi xihi xivumbeko lexi xiyekaka xa vukhongeri bya ntiyiso?
15 Vukhongeri bya mavunwa bya hambanisa. Byi vange, rivengo ni ku halatiwa ka ngati naswona ni sweswi bya ha swi vanga. Ku hambana ni sweswo, vukhongeri bya ntiyiso byi ni vun’we. Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Rirhandzu leri hlanganisaka Timbhoni ta Yehova ri herisa mindzilakana hinkwayo ya vutiko, swiyimo swa vanhu, swiyimo swa timali, ni ya rixaka leyi hambanisaka vanhu hinkwavo. Timbhoni ta Yehova ti ‘yima ti tiyile emoyeni wun’we, hi moya-xiviri wun’we ti lwela ku pfumela loku tisiwaka hi mahungu lamanene.’—Vafilipiya 1:27.
16. (a) I yini “evhangeli” leyi Timbhoni ta Yehova ti yi chumayelaka? (b) I vuprofeta byihi lebyi hetisekaka eka vanhu va Yehova, naswona i mikateko yihi leyi landzelaka?
16 “Evhangeli” leyi ti yi chumayelaka, hileswaku xikongomelo lexi xi nga hundzukiki xa Xikwembu xi ta hetisisiwa ku nga ri khale. Ku rhandza ka xona ku ta endliwa, “emisaveni tanihi hi loko ku endliwa tilweni.” (Matewu 6:10) Vito ra Yehova leri kwetsimaka ri ta kwetsimisisiwa, naswona misava yi ta hundzuka paradeyisi, laha vagandzeri va ntiyiso va nga ta kota ku hanya kona hi laha ku nga heriki. (Psalma 37:29) Hi ku kongoma timiliyoni ta vanhu ematikweni hinkwawo ti hlanganyela ni Timbhoni ta Yehova, hi ku hetisisa vuprofeta bya Bibele ti ri: “Hi ta ya na ṅwina, hikuv̌a hi twile leŝaku Yehova u na ṅwina.” (Zakaria 8:23) Yehova u katekisa vanhu va yena. Entiyisweni “lo’nṭongo ngopfu” u hundzuke “tiko lera matimba,” bandlha ra misava hinkwayo leri hlanganeke hi tindlela hinkwato—hi ku anakanya, hi ntirho, ni hi vugandzeri. (Esaya 60:22) Lowu i nchumu lowu vukhongeri bya mavunwa byi tsandzekeke ku wu endla.
Ku Hlula Ka Vukhongeri Lebyi Tengeke
17. I yini leswi nga ta wela Babilona Lonkulu, naswona leswi swi ta tisiwa hi ndlela yihi?
17 Rito ra Xikwembu ri vhumbe ku herisiwa ka mfumo wa misava wa vukhongeri bya mavunwa, lowu hi ku fanekisela wu vitaniwaka “Babilona [L]onkulu.” Nakambe Bibele yi fanekisela “tihosi,” kumbe vafumi va politiki va misava hi timhondzo ta xivandzana. Yi hi byela leswaku Xikwembu xi ta endla leswaku vafumi lava, va herisa nhlangano lowu fanaka ni nghwavava, wa Sathana Diyavulosi, hi ku helela.—Vona Nhlavutelo 17:1, 2, 5, 6, 12, 13, 15-18.b
18. I xivangelo xihi xa nkoka lexi Bibele yi xi nyikaka hi ku lovisiwa ka Babilona Lonkulu, naswona xana vukhongeri lebyi bya mavunwa byi yi sungule rini ndlela leyi yo chavisa?
18 Ha yini Babilona Lonkulu a faneriwa hi ndzoviso? Bibele ya hlamula: “Eka muti lowu, a ku kumiwa ngati ya vaprofeta, ni ya vahlawuriwa va Xikwembu, ni ya vaprofeta lava nga dlawa laha misaveni.” (Nhlavutelo 18:24) Ku komba leswaku nandzu lowu wa ngati lowu endliwaka hi vukhongeri bya mavunwa wu sungule khale na Babilona wu nga si va kona, Yesu u sole varhangeri va vukhongeri bya Xiyuda lebyi a byi tinamarhete eka Babilona Lonkulu, loko a ku: “N’wina tinyoka, vana va timhirhi, xana mi ta ponisa ku yini ku avanyiseriwa [Gehena] xana? . . . Sweswo swi ta endla leswaku mi va ni nandzu wa ku dlawa ka lavo lulama hinkwavo, ku sukela eku dlaweni ka Avele la lulameke.” (Matewu 23:33-35) Ina, vukhongeri bya mavunwa, lebyi sunguleke emisaveni enkarhini wa ku xandzuka le Edeni, byi fanele byi tihlamulela eka nandzu wa wona wa ngati lowu chavisaka.
19, 20. (a) Xana vagandzeri va ntiyiso va ta endla yini endzhaku ka ku avanyisiwa ka Babilona Lonkulu? (b) I yini lexi nga ta humelela endzhaku ka sweswo, naswona i ntshembo wihi lowu nga ta hetiseka eka vagandzeri hinkwavo va ntiyiso?
19 Endzhaku ka ku lovisiwa ka Babilona Lonkulu, vagandzeri va ntiyiso emisaveni va ta hlanganisa marito swin’we ni khwayere ya le tilweni leyi yimbelelaka yi ku: “Aleluya! [Xikwembu] xi avanyisile muoswi lonkulu . . . , kutani xi rihisele ngati ya malandza ya xona ehenhla ka yena. . . . Musi wa ku tshwa ka yena wu tuvikela henhla hi laha ku nga heriki.”—Nhlavutelo 19:1-3.
20 Kutani swiphemu leswin’wana swa nhlengeletano leyi vonakaka ya Sathana swi ta herisiwa. (Nhlavutelo 19:17-21) Endzhaku ka leswi, Sathana, musunguri wa vukhongeri hinkwabyo bya mavunwa, ni mademona ya yena va ta herisiwa. A va nge he swi koti ku xanisa vagandzeri va ntiyiso va Yehova. (Nhlavutelo 20:1-3) Vukhongeri lebyi tengeke byi ta va byi hlule bya mavunwa. Vavanuna ni vavasati lava tshembekaka lava hlayisaka xitsundzuxo xa Xikwembu xa ku huma eka Babilona Lonkulu sweswi, va ta va ni nkarhi wo pona ivi va nghena emisaveni leyintshwa ya Xikwembu. Kwalaho, va ta swi kota ku khongela hi ndlela ya ntiyiso ni ku tirhela Yehova hi ku n’wi gandzela hi laha ku nga heriki.
[Tinhlamuselo ta le hansi]
a Leswaku u kuma nhlamuselo ya vugandzeri bya tintsumi lebyi boxiwaka eka Vakolosa 2:18, vona The Watchtower, July 15, 1985, matluka 12-13.
b Leswaku u kuma nhlamuselo leyi heleleke ya vuprofeta lebyi, vona buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! leyi humesiweke hi Watchtower Bible and Tract Society of New York, Inc., tindzima 33-6.
Kambela Mianakanyo Ya Wena
◻ I xiyimo xa mani lexi nga xa nkoka evukhongerini, naswona ha yini?
◻ Hi swihi swilaveko swimbirhi swa vukhongeri bya ntiyiso leswi Yakobo a swi kandziyiseke?
◻ Hi swihi swilaveko swin’wana swa vugandzeri bya ntiyiso?
◻ I “evhangeli” yihi leyi Timbhoni ta Yehova ti yi chumayelaka?
◻ Xana vukhongeri bya ntiyiso byi ta hlula vukhongeri bya mavunwa hi ndlela yihi?
[Xifaniso lexi nga eka tluka 17]
Varhangeri va vukhongeri va hlengeletanile le Assisi, aItaly, hi October 1986
[Xifaniso lexi nga eka tluka 19]
Vukhongeri bya ntiyiso byi katsa ku hlengeletanela vugandzeri