Ku Sungula Tidyondzo Hi Broxara Leyi Nge Leswi Xi Swi Languteleke
1 Swiviko leswi humaka emisaveni hinkwayo swi kombisa leswaku broxara leyi nge I Yini Leswi Xikwembu Xi Swi Languteleke Eka Hina? i xitirho lexi nga ni matimba eku dyondziseni ka vanhu ntiyiso. Tidyondzo ta Bibele ta magidi ta sunguriwa vhiki rin’wana ni rin’wana hi ku tirhisa broxara leyi. Xana u humelerile eku sunguleni ni le ku fambiseni ka dyondzo ya Bibele hi ku tirhisa broxara leyi nge Leswi Xi Swi Languteleke?
2 Hambiloko vo tala swi va olovela ku fambisa broxara leyi, van’wana a va swi tivi leswi va nga swi vulaka leswaku va sungula dyondzo. Hi tihi tindlela leti van’wana va kumeke leswaku ta humelela eku sunguleni ka tidyondzo ta Bibele hi ku tirhisa broxara leyi nge Leswi Xi Swi Languteleke? Swiringanyeto leswi landzelaka swi nga ku pfuna.
3 Kombela Ku Kombisa Ndlela Leyi Dyondzo Yi Fambisiwaka Ha Yona: Loko hi endla riendzo ro sungula kumbe ro vuyela, ematshan’weni ya ku byela n’wini wa muti leswaku hi nga n’wi fambisela dyondzo ya Bibele, hi nga n’wi kombisa ndlela leyi dyondzo ya Bibele yi nga ta fambisiwa ha yona. Leswi swi nga ha susa mianakanyo ni ku karhateka loku vini va miti vo tala va nga na kona loko va byeriwa hi rito “dyondzo.” Loko ho kota ku kombisa ndlela leyi dyondzo yi fambisiwaka ha yona, hi ta kuma leswaku hi ku tirhisa xingheniso xo olova, hi nga swi kota ku sungula dyondzo hi ku kongoma.
4 Ku Lunghiselela Swa Pfuna: Ku hisekela ka hina ku sungula tidyondzo ta Bibele ku fambisana kahle ni ndlela leyi hi lunghiseleleke ha yona. Ku lunghiselela ka ha ri emahlweni ku ta hi pfuna leswaku hi hlula ku kanakana kwihi ni kwihi loku hi nga vaka hi ri na kona malunghana ni ku hlanganyela entirhweni wa ku fambisa tidyondzo ta Bibele. Hi ku titoloveta swinene xingheniso xa hina, hi ta swi kota ku burisana ni vanhu, hi tiphofula hi ndlela ya ntumbuluko naswona hi marito ya hina vini. Leswi a swi nge pfuni hina ntsena leswaku hi ntshunxeka kambe swi ta pfuna ni n’wini wa muti.
5 Loko u ri karhi u titoloveta, swa pfuna leswaku u pima nkarhi wa xingheniso xa wena leswaku u ta byela n’wini wa muti leswaku u ta heta nkarhi wo tanihi kwihi eku kombiseni ka ndlela leyi dyondzo yi fambisiwaka ha yona. Endzhaku ka loko a titivisile, makwerhu un’wana u veka mhaka hi ndlela leyi: “Ndzi hundza hilaha ka wena leswaku ndzi ta ku kombisa nongonoko wa dyondzo ya mahala ya Bibele. Swi teka kwalomu ka ntlhanu wa timinete ku kombisa ndlela leyi yi khomiwaka ha yona. Xana u na tona timinete ta ntlhanu?” Dyondzo 1 ya broxara leyi nge Leswi Xi Swi Languteleke yi nga kombisiwa hi timinete ta kwalomu ka ntlhanu. Ina, i matsalwa lama hlawuriweke ntsena lama nga hlayiwaka hi xinkarhana lexi, kambe hi ku heta dyondzo yo sungula hi timinete ti nga ri tingani, n’wini wa muti a nga va ni dyondzo yakwe yo sungula. Kutani n’wi tivise leswaku loko u vuya mi ta dyondza Dyondzo 2 hi 15 wa timinete ntsena.
6 Xingheniso lexi landzelaka xa humelela:
◼ “Ndzi tsakela ku ku kombisa ndlela yo fambisa dyondzo ya le kaya yo olova swinene ya Bibele, leyi hlanganisiwaka hi nkarhinyana wutsongo hi ku tirhisa broxara leyi nge I Yini Leswi Xikwembu Xi Swi Languteleke Eka Hina? Vo tala va kume leswaku hi nkarhinyana wa kwalomu ka 15 wa timinete hi vhiki ku ringana mavhiki ya 16, va kume tinhlamulo ta Matsalwa leti enerisaka ta swivutiso leswi swa nkoka swa Bibele.” Hi ku komisa n’wi kombise tluka ra leswi nga endzeni. Loko u ya eka Dyondzo 1, u nga ku: “Loko wo hi nyika kwalomu ka ntlhanu wa timinete, hi nga tsakela ku ku kombisa ndlela leyi dyondzo leyi yi fambisiwaka ha yona. Dyondzo 1 yi ri ‘Ndlela Leyi U Nga Kumisisaka Ha Yona Leswi Xikwembu Xi Swi Languteleke.’” Kutani hlaya swivutiso swinharhu u tlhela u hlamusela hi tinomboro leti nga endzeni ka swiangi. Hlaya ndzimana 1 u tlhela u kombisa n’wini wa muti ndlela yo kuma nhlamulo. U nga ha kombela n’wini wa muti ku hlaya ndzimana 2. Kutani u ku: “Hi ku tirhisa rungula leri, u nga xi hlamula njhani xivutiso lexi? [Tlhela u hlaya xivutiso nakambe ivi u nyika n’wini wa muti nkarhi wo hlamula.] U ta swi xiya leswaku ku ni matsalwa lama eka ndzimana yin’wana ni yin’wana. Ma yisa nyingiso wa hina eka nhlamulo ya Bibele ya swivutiso leswi. Hi xikombiso, a hi hlaye 2 Timotiya 3:16, 17, ivi hi vona loko yi seketela nhlamulo leyi u yi nyikeleke malunghana ni mutsari wa Bibele.” Endzhaku ka ku hlaya ndzimana 3 ni ku hlamula xivutiso kun’we ni ku hlaya Yohane. 17:3, kambela vutivi lebyi n’wini wa muti a byi kumeke hi ku pfuxeta Dyondzo 1. Loko mi fike laha u nga pfula Dyondzo 2 ivi mi hlaya xivutiso xo hetelela lexi nge, “Xana hi tihi tindlela timbirhi leti hi nga dyondzaka hi Xikwembu ha tona?” Kutani vutisa xivutiso lexi: “Hi rini laha u nga ta va ni kwalomu ka 15 wa timinete leswaku hi ta dyondza Dyondzo 2 ivi hi kuma nhlamulo?”
7 I swa nkoka ku va u endla bulo ri olova naswona u bumabumela n’wini wa muti laha swi faneleke. Loko u kunguhata riendzo rin’wana, ematshan’weni ya ku n’wi vutisa loko a swi tsakela ku ya emahlweni, n’wi khutaze leswaku a tirhisa endlelo leri fanaka eka dyondzo leyi landzelaka. N’wi byele leswaku u ta tlhela u vuya. Vahuweleri van’wana va tinyiketele ku khoma dyondzo hi ku tirhisa riqingho loko ku vuyela swi nga koteki. Nakambe u nga khutaza xichudeni leswaku xi veka broxara endhawini leyi hlayisekeke leswaku yi ta kumeka hi ku olova loko u tlhela u vuya.
8 Tiyimisele: Hambiloko xilotlelo xa ku humelela ku ri ku lunghiselela, swa fanela leswaku hi tiyimisela ku tlhelela. Ku fambisa dyondzo hi timinete ti nga ri tingani swi nga ha tika, hikwalaho tiyimisele ku titoloveta swinene xingheniso lexi hilaha swi nga kotekaka hakona leswaku u ta vulavula hi ku rhelela loko u kombisa ndlela leyi dyondzo yi fambisiwaka ha yona. Ringeta ku kombisa ndlela leyi dyondzo yi fambisiwaka ha yona eka un’wana ni un’wana loyi u n’wi kumaka ekaya, loko u nyikela vumbhoni bya xitshuketa ni le ku nyikeleni ka vumbhoni hi riqingho. Loko swi ku tikela ku sungula dyondzo ya Bibele, u nga heli matimba. Ku humelela eku sunguleni ka tidyondzo ta Bibele swi lava ku tiyimisela ni ku swi navela hi mbilu hinkwayo ku dyondzisa van’wana ntiyiso.—Gal. 6:9.
9 Hi ku tirhisa swiringanyeto leswi, na wena u nga va ni lunghelo ra ku pfuna un’wana leswaku a nghena endleleni leyi yisaka evuton’wini, hi ku sungula ni ku fambisa dyondzo ya Bibele hi broxara leyi nge Leswi Xi Swi Languteleke.—Mat. 7:14.