Xana Wa Yi Tirhisa Broxara Leyi Nge Leswi Xi Swi Languteleke Ku Sungula Tidyondzo Ta Bibele Ha Yona?
1 Xana a wu swi tiva leswaku loko u hambeta u bula ni munhu la tsakelaka, hi ndlela leyi hlelekeke, mi bula hi rungula leri humaka eka yin’wana ya minkandziyiso leyi ku fambisiwaka tidyondzo ha yona, hambiloko bulo ra kona ri komile, u va u fambisa dyondzo ya Bibele? Ina, yoleyo i dyondzo hambiloko u bula na munhu mi yime hi milenge kumbe mi bula hi riqingho. Ha yini u nga endli matshalatshala yo hlawuleka hi May na hi June yo sungula dyondzo hi ndlela yoleyo, u tirhisa broxara leyi nge Leswi Xi Swi Languteleke?
2 Lunghiselela Leswaku U Ta Humelela: Loko u fambisa broxara leyi nge Leswi Xi Swi Languteleke, swi tive kahle leswi u lavaka ku bula ha swona. Loko u tlhelela eka munhu, anakanya hi leswi mi buleke ha swona enkarhini lowu hundzeke. Tivutise: ‘Hi tihi tindzimana ta broxara leyi leti ndzi nga ndlandlamuxaka bulo ra mina ha tona leswaku ndzi hetelela ndzi dyondza na yena Bibele?’ Loko u famba hi yindlu ni yindlu anakanya hi rungula leri nga ta tsakisa n’wana wa kondlo-a-ndzi-dyi, munhu la kuleke, wanuna kumbe wansati. Languta tinhloko-mhaka ta broxara kutani u hlawula leyi nga pfuxaka ku tsakela. Loko se u hlawule xingheniso lexi u nga ta xi tirhisa, titolovete xona ko hlayanyana. Leyi i yin’wana ya tindlela ta nkoka leswaku u kota ku humelela.
3 Xiengetelo xa Vutirheli Bya Hina Bya Mfumo bya January 2002 xi nyika nhungu wa “Swiringanyeto Swa Loko Ku Fambisiwa Broxara Leyi Nge Leswi Xi Swi Languteleke.” Bokisi leri nge “Swingheniso Leswi Kongomeke” ri kombisa ndlela leyi broxara leyi yi nga tirhisiwaka leswaku ku sunguriwa tidyondzo ha yona. U nga ha cinca xingheniso xo sungula xi va hi ndlela leyi:
◼ “Xana a wu swi tiva leswaku hi timinete ti nga ri tingani, u nga kuma nhlamulo ya xivutiso xa nkoka lexi humaka eBibeleni? Hi xikombiso, xana u tshama u tivutisa leswaku ha yini ku ri ni vukhongeri byo tala lebyi tivulaka Vakreste?” Loko munhu yoloye a hlamurile, pfula eka dyondzo 13 kutani u hlamusela tindzimana timbirhi to sungula. Loko nkarhi wu pfumela, hlaya u tlhela u hlamusela tsalwa rin’we kumbe mambirhi. Kutani hlaya xivutiso xo hetelela enxaxamelweni wa swivutiso swa dyondzo ivi u ku: “Dyondzo leyi hinkwayo yi kandziyisa swilo swa ntlhanu leswi kombisaka vukhongeri bya ntiyiso. Ndzi nga tsakela ku tlhela ndzi vuya leswaku hi ta bula ha swona.”
4 Phikelela: Tirhisa nkarhi wun’wana ni wun’wana ku kombisa ndlela leyi dyondzo ya Bibele yi nga fambisiwaka ha yona hi broxara leyi nge Leswi Xi Swi Languteleke. Kombela mikateko ya Yehovha. (Mat. 21:22) Loko u phikelela ematshalatshaleni ya wena, u ta kuma ntsako lowu tisiwaka hi ku pfuna munhu leswaku a amukela mahungu lamanene!