Vadyuhari Va Chumayela Handle Ko Karhala

¹ Loko vanhu va ri karhi va dyuhala, vo tala va vona va langutele ku wisa ku tirha entirhweni wa vona wa ku tihanyisa ni ku tiphina hi vutomi lebyi ntshunxekeke emalembeni ya vona yo hetelela. Va nga ha vona onge va tirhile swi ringene, kutani sweswi va faneriwa hi ku wisa. Kumbe va nga ha lava ku tiphina hi vutomi, lebya ha saleke.—Lk. 12:19.

² Tanihi malandza ya Yehovha lama tinyiketeleke, hi ni langutelo leri hambaneke hi vutomi. Ha swi tiva leswaku a ku na ku wisa entirhweni wa Xikwembu. Hi ni langutelo lerinene hikuva hi tshama hi ri karhi hi ‘langutele vutomi lebyi nga heriki.’ (Yuda 21) Loko munhu a heta malembe yo tala a ri karhi a hlengeleta vutivi ni ntokoto swi nga ha antswisa ku twisisa kun’we ni vutlhari bya yena. Leswi swi ta pfuna munhu leswaku a va ni vutlhari swinene ni ku va la ringaniselaka swinene ni ku kombisa ku tlangela lokukulu hi vutomi. Timfanelo leti hinkwato ti pfuna munhu leswaku a va mutirheli wa mahungu lamanene.

³ Ku dyuhala a hi ku kula emirini ntsena; ku tlhela ku katsa ni xiyimo xa mianakanyo ya munhu. Loko u langutele ku hanya nkarhi wo leha naswona u tikarhatela ku tshama u languteka wa ha ri ntsongo, u nga ti kuma tindlela to endla tano. Vadyuhari va nga fuwisa vutomi bya vona hi ku engetela vutivi bya vona hi tlhelo ra moya ni ku byi avela van’wana.—1 Kor. 9:23.

⁴ Swikombiso Swa Vanhu Va Xiviri: Loko a ri ni malembe ya 86 hi vukhale, makwerhu un’wana wa xisati u te: “Loko ndzi languta endzhaku emalembeni ya 60 lama hundzeke ku sukela loko ndzi dyondze ntiyiso, xitshembiso xa Xikwembu lexi khutazaka xa khapa-khapa embilwini ya mina. Ina, Yehovha loyi ku nga yena la nga ta endla hi ku tshembeka eka lava tshembekaka u endla leswaku hi tshovela ntsako lowukulu.” (Ps. 18:25) Makwerhu un’wana la dyuhaleke u tsundzuka ndlela leyi rifu ra nsati wakwe ri n’wi tshoveke mbilu ha yona, laha endzhaku ka sweswo rihanyo rakwe ri tsaneke swinene. U te: “Kambe hikwalaho ka tintswalo ta Yehovha leti nga fanelangiki, ndzi hlakarherile swinene laha ndzi koteke ni ku nghenela ntirho wa vuphayona endzhaku ka malembe mambirhi. Vona ndlela leyi ndzi nkhensaka Yehovha ha yona leswi rihanyo ra mina ri antsweke hikwalaho ka ku engetela ntirho wa mina wa ku chumayela!”

⁵ Vona ndlela leyi swi bumabumeriwaka ha yona leswi vanhu vo tala lava dyuhaleke va tiyimiseleke ku hambeta va chumayela hilaha rihanyo ra vona ni matimba ya vona swi va pfumelelaka hakona—handle ko karhala! Swa va fanela ku vula va ku: “Oho Šikwembu! u nḍi dyonḍisile ku sungula v̌untŝheni bya mina, kutani ku fika ŝeŝi, nḍi ṭhama nḍi v̌ula ŝihlamariso ŝa wena.”—Ps. 71:17.