Vumbhurhi Bya Misisi Leyo Basa

MAWAKU ku vulavula ni vavanuna ni vavasati vo tshembeka va khale! Ehleketa hi ku vulavula ni vavanuna vo tanihi Nowa, Abrahama, Muxe na Yohane Mukhuvuri, kun’we ni vavasati vo fana na Sara, Rahava, Rhuti na Debora! Xana a swi nge ku tsakisi ku va twa va ku rungulela timhaka ta swiendlakalo leswi va swi voneke hi mahlo ta leswi hlamarisaka leswi humeleleke eminkarhini ya khale?

Xana a wu nge swi tsakeli hambi ku ri namuntlha ku yingisela vanhu lava dyuhaleke va ku byela mintokoto ya vona hi ndlela leyi vona ni van’wana va hlayiseke vutshembeki eka Xikwembu ehansi ka minxaniso, ku katsa ni minsivelo, ku biwa ni ku khotseriwa vululami’? Swi le rivaleni! Rirhandzu ra hina eka Xikwembu ni ku va xixima ka hina swi ta kula loko va ri karhi va hi byela hi ndlela leyi va titwaka ha yona ngopfu-ngopfu ndlela leyi va tlangelaka nkhathalelo wa Yehovha ha yona hi timbilu ta vona.

Exikarhi ka vanhu va Xikwembu, vavanuna ni vavasati lava dyuhaleke va hambete va xiximiwa hikwalaho ka ntokoto, vutivi, ni vutlharhi lebyi va nga na byona. Entiyisweni, nawu lowu a wu ri kona ni le ka Nawu lowu Vaisrayele va nyikiweke hi Xikwembu: “U ta yima e mahlweni ka misisi le’ya timpfu, u šišima nkulukumba, u tšhav̌a Šikwembu ša wena. Hi mina Yehova.” (Levhitika 19:32) Rito ra Xiheveru ra ku va ni malembe kumbe ku dyuhala ri huma eka rimitsu leri vulaka “ku huma misisi yo basa” nakambe ri hundzuluxeriwa ri va “ku basa nhloko.” Kutani Vaisrayele a va fanele ku yimela munhu lonkulu tanihi xikombiso xa ku xixima, va swi endla hi xichavo lexikulu eka Xikwembu.

Xana langutelo rolero ra ku xixima ri kona ni namuntlha? Hi xikombiso, xana vantshwa va va pfulela vanhu lavakulu minyangwa hi ndlela ya xichavo? Xana vantshwa ni vanhu lava nga si kulaka ngopfu va tala ku nyizela munhu lonkulu a famba hi khexe (elevator) loko yi tele? Kumbe xana vantshwa va swi toloverile ku nyika munhu la dyuhaleke xitulu xa vona ebazini kumbe exitimeleni lexi teleke? Ku tsandzeka ku endla swilo sweswo swi voniwe ni le ka Vakreste.

Hambi swi ri tano, leswaku va tsakisa Yehovha Xikwembu, Vakreste va fanele va endla swilo hi ku twanana ni vonelo ra xona naswona va tshika mianakanyo, ku vulavula ni swiendlo swa lava ‘va tirhandzaka, lava nga yingisiki vatswari, lava nga khensiki ni lava nga swi rhandziki leswinene.’ (2 Timotiya 3:1-5) Kutani ke, xana Rito ra Xikwembu ri ri yini hi vuxaka bya vuntshwa loko byi pimanisiwa ni ku basa nhloko?

Matimba Ya Vuntshwa

Bibele yi xiya matimba ya vuntshwa ni leswi ya pfunaka ha swona, yi ku: “Ku kwetsima ka la’v̌antšha i matimba ya v̌ona.” (Swivuriso 20:29) Le Israyele wa khale matimba ya Valevhi lava nga vantshwa a ma tirhisiwa etempeleni, hakanyingi eka mintirho yo tika. Namuntlha, ntirho wo tala etifektri ta le makaya ya Bethele, ni le ka matsima ya ku aka ya Sosayiti ya Watch Tower wu endliwa hi majaha ni vanhwana lava va nyikeleke matimba ni vuswikoti bya vona leswaku va yisa swilaveko swa Mfumo emahlweni. (Matewu 6:33) Xisweswo va tiphina hi malunghelo lamanene entirhweni wa Xikwembu.

Xivuriso lexi xa ha ku tshahiwaka xi heta hi marito lama nge, “v̌ubombi bya ŝikoša i misisi le’yo basa.” Loko matimba ya vuntshwa ma hlanganisiwa ni ntokoto ni vutlharhi bya vona bya malembe yo tala, ku va ni mpfangano wo tiya swinene.

Hi xikombiso: Muvatli lontshwa loyi a nga xichudeni loyi a nga komberiwa ku ta belela khumbi u lava ku heta ntirho hi matimba ya vuntshwa. Muvatli la kuleke la nga ni ntokoto lowu engetelekeke u xiya leswaku hambi loko mupfuni loyi lontsongo a ri ni matimba, u belela xipikiri minkarhi yo hlayanyana xi nga si nghena. Mutirhi loyi a kuleke u kunguhata leswaku muntshwa loyi a khoma hamele emakumu ka mbhinyi, ku ri na ku khoma ekusuhi swinene ni nhloko ya yona ya nsimbi. Leswi swi endla leswaku muntshwa loyi a ba swipikiri hi matimba lama engetelekeke, a londzovota nkarhi ni matimba.

Hi ku fanana, wansati lontsongo wa migingiriko u ta sungula hi ku ringetela ku kondza a dyondza leswaku malapi man’wana ma nga onhaka loko ma nga hlantswiwi hi ku landzela swileriso. Hambi swi ri tano, wansati la nga ni ntokoto, wa wu tiva nkoka wa ku tinyika nkarhi wo hlawulela swiambalo, ni ku hlantswa swin’wana etlhelweni. Nakambe u dyondze leswaku a nga petsa swiambalo loko a swi susa edarateni kumbe emuchinini wo omisa, leswaku a nga ha swi ololi.

Ku dyondza eka vanhu lava nga ni ntokoto swi nga olovisa vutomi. Ku nga khathariseki sweswo, ku ni nkarhi lowu hambi ku ri munhu la nga ni ntokoto, a nga ta tsandzeka ku endla mintirho yin’wana leyi a a yi endla malembenyana ma nga ri mangani lama hundzeke. Mutsari un’wana u swi veke hi vutlharhi: “Mawaku ndlela leyi a swi ta va swinene ha yona loko vantshwa a va ri ni vutivi naswona lava kuleke va ri ni matimba.” Kambe mawaku ndlela leyi swi nga swinene ha yona loko vanhu lava kuleke va tlangela matimba ya vantshwa naswona va va avela ntokoto lowu va nga wu hlengeleta hi ku famba ka malembe—naswona vantshwa va amukela swiringanyeto hi ku titsongahata! Hi ndlela leyi, hinkwavo va pfuneka.

Ku Va Ni Vubombi

Ku dyuhala a swi enelanga. “A hi malembe la’yo tala la’ma tlharihisaka,” ku vule jaha Elihu. (Yobo 32:9; Eklesiasta 4:13) Leswaku a xiximiwa hi ku basa misisi, munhu lonkulu u fanele a va a endle swo tala hi vutomi bya yena ku ri na ku heta nkarhi wakwe a hlalela thelevhixini, a ya emintlangwini kumbe a titsakisa ntsena. Naswona hambi ku ri loko se a dyuhele, munhu lonkulu u fanele a ya emahlweni a dyondza.

Vanhu van’wana va tibuma hi ku va va endla swilo hi ndlela ya vona vini, kumbe va ku: “Swa antswa ku dyondza hi ku ringetela.” Kambe, Rito ra Xikwembu ra laya: “L’a tlhariheke, a a yingise, o tiengetela ku tiv̌a; L’a nga ni ku twisisa o ta tikumela mano.” (Swivuriso 1:5; ringanisa 1 Vakorinto 10:11.) Ku ringetela a hi minkarhi hinkwayo swi pfunaka, hikuva hi nga dyondza hi swihoxo swa van’wana hina hi nga kali hi swi endla swihoxo swo tano. Ku tlula kwalaho, Mukreste a nga ha boheka ku tsundzuka leswaku “misisi ya timpfu i hari ya šitšhav̌o, [loko yi kumiwa] e ndleleni ya ku lulama.” (Swivuriso 16:31) Vutomi lebyi hetiwaka munhu a tirhela Yehovha hi vutshembeki byi sasekile eka yena naswona byi lava leswaku van’wana va byi teka tanihi xikombiso lexinene. Ina, ku dyondza hi ta Xikwembu ni ku kuma ntokoto “e ndleleni ya ku lulama” swi nga sungula loko wa ha ri ntsongo naswona swi fanele swi nga tshikiwi.—Varhoma 11:33, 34.

Leswi swi nga kombisiwa hi ntokoto lowu katsaka mufana wa malembe ya nkombo le Sweden. U vutise mulanguteri wa Xikolo xa Vutirheli bya le Tilweni evandlheni leswaku xana a nga tsarisa exikolweni ke. Mulanguteri u n’wi vutisile, “Ha yini?” Loko a hlamula sweswo, muntshwa u te: “Phela munhu a nge tlangi vutomi hinkwabyo!” (Eklesiasta 12:1) Mawaku xikombiso lexinene eka lavantshwa ni lavakulu hi ku fanana!

Ku Xixima Misisi Leyo Basa

Ntolovelo lowu karhataka eka vanhu va manguva lawa i ku lava ngopfu ku va xitetemba, ku va xitsutsumi xa vuswikoti ni ku langutela lava dyuhaleke ehansi. Xana langutelo ra Vakreste ri fanele ri va rihi eka lava baseke tinhloko evandlheni ra vona?

Ematshan’wini ya ku langutela Vakreste lava dyuhaleke ehansi, hi fanele hi va ehleketelela naswona hi heta nkarhi na vona. Hi xikombiso, eminhlanganweni ya vhiki na vhiki ya Timbhoni ta Yehovha eHolweni ya Mfumo, xana wa tiboha leswaku u xeweta lava kuleke? Va swi tlangela hakunene ku xewetiwa hi lavantshwa ni van’wana. Naswona lava dyuhaleke va tsaka swinene ku va kona eka swinkhubyana swa vapfumeri lava nga swin’we va malembe yo hambana-hambana! Hambi leswi mpatswa lowuntshwa lowu tekaneke wu nga vaka wu rhandza swilo swo tala leswi fanaka ni swa vanhu van’wana lava tekaneke va tintangha ta vona, swi nga vuyerisa ku katsa lava dyuhaleke eka swinkhubyana swo tano leswi tsakisaka.—1 Vatesalonika 3:12; 5:15.

Hakunene i swa nkoka ku ehleketelela loko u vulavula ni lava dyuhaleke! Loko makwerhu la kuleke la nga ni malembe ya 40 evutirhelini bya Yehovha a vulavule ni un’wana wa vakulu hi leswaku xana yena a nga tirhisiwa ku endla yini evandlheni, munhu loyi lontshwa u hlamule a ku: “A ku na swilo swo tala leswi u nga swi endlaka.” Vona nhlamulo yo kala tintswalo swonghasi! Makwerhu loyi lonkulu a nga ha ri na wona matimba lawa a tshameke a va na wona, ndlela leyi a a hlanganyela ha yona evutirhelini bya nsimu a yi hungutekile hi ndlela yo karhi, naswona a swi ri erivaleni leswaku malunghelo yo karhi yo rhangela a nga ta ma kota hi matimba lawa a a ri na wona; kambe, a ku ri na swo tala leswi a ta swi endla. A ri na vutlharhi ni ntokoto lowu a wu kumeke hi ku famba ka malembe endleleni yo lulama. Hikwalaho ka leswi vanhu volavo lava dyuhaleke va tirheke swinene tanihi vachumayeri va Mfumo, va tiyisela minxaniso, va rhwala mindzhwalo yo tika ya vutihlamuleri bya Vukreste, ni ku letela van’wana, vanhu va Xikwembu sweswi va tiphina hi nhlengeletano leyi tiyeke leyi yi seketeriwaka hi moya wa yena. Xisweswo ke, onge hi nga xixima vanhu lava va dyuhaleke tanihi vatsundzuxi va vutlharhi, varisi va rirhandzu ni vadyondzisi lava humelelaka.

Nakambe ku na xivangelo lexinene xa ku anakanyela switsundzuxo leswi vanhu lava kuleke va swi endlaka. Hi xikombiso, makwerhu un’wana loyi a nga ni ntokoto u kunguhate leswaku nyangwa wa Holo yo karhi ya Mfumo wu nga vekiwi etlhelo ra muako ra le vupela-dyambu. Vamakwerhu lavanthwa lava a va langute ngopfu ndlela leyi muako a wu ta languteka wu saseke ha yona a va xi landzelanga xiringanyeto xa yena. Hambi swi ri tano, endzhaku ka malembe ma nga ri mangani, nyangwa luwa wu boheke ku susiwa hikwalaho ka moya ni mpfula leyi a yi huma hi le vupela-dyambu leyi a yi wu onha. Vutlharhi ni ntokoto lowu tirhaka a byi ri bya nkoka ku tlula swivumbeko leswo saseka. Loko vanhu lavantshwa va xixima lavakulu hi ku yingisa mavonelo ya vona ni vutlharhi bya vona lebyi tirhaka, leswi swi nga ha londzovota nkarhi ni mali. Hambi loko swiringanyeto swa vanhu lava kuleke swi nga yingisiwi, a nga xiximiwa hi ku n’wi byela leswaku swi kambisisiwile kambe hikwalaho ka swiyimo swin’wana ku endliwe xiboho lexi hambaneke.—Ringanisa Swivuriso 1:8.

Languta Emahlweni, Tshika Swa Le Ndzhaku

Vanhu van’wana lavakulu va ni langutelo leri: “Tolo a nga ha vuyi, loko ha ha ri majaha ni vanhwana.” Hambi swi ri tano, ematshan’wini ya ku anakanya hi minkarhi leyi hundzeke, vanhu vo tano lava kuleke va fanele va khutaziwa ku languta enkarhini lowu va nga ta kuma hakelo ya vona ya le tilweni kumbe va tlhela va kuma matimba ya vona ya vuntshwa ehansi ka Mfumo wa Xikwembu. Hi tlhelo, va fanele va xiya lomu va tsandzekaka kona hikwalaho ka leswi va nga dyuhala. Hambi loko munhu la kuleke a swi xiya leswi naswona a ri ni langutelo lerinene ra misavu a swi nge pfuni nchumu loko a tsoniwa malunghelo ya ntirho.

Hi xikombiso, makwerhu la dyuhaleke a nga ha va a a tolovele ku tirha eka swiyimiso swa mintsombano eka malembe lama hundzeke. Sweswi ku ni vakulu vo tala lava fanelekaka naswona ku ni vavanuna vo tala lava ku nga hlawuriwaka eka vona lava nga ni vuswikoti byo dyondzisa. Hambi loko va ri vatsongo, van’wana va vakulu va ku kombisile ku hiseka ni vuswikoti, naswona va swi kota ku dyondzisa kahle ni ku khutaza hi tintswalo, naswona va swi kota ku khutaza van’wana. (1 Vatesalonika 5:12, 13; 1 Timotiya 5:17) Hikwalaho ka sweswo, makwerhu la kuleke loyi a nga ha ngheniki eka xiyimiso xa ntsombano a nga ha titwa a tsongahatiwile naswona a nga ha karhateka hi leswaku malunghelo ya nyikiwe vakulu lavatsongo. Kambe, mianakayo yo tano leyo biha leyi tisiwaka hi ku nga hetiseki yi nga hluriwa. Entiyisweni, hinkwavo evandlheni va nga pfuna hi ku byela lavakulu leswaku va laveka, leswaku va rhandziwa hikwalaho ka ku tshembeka ka vona, ni leswaku malangutelo ya vona i ya nkoka.

I ntiyiso, munhu la kuleke u fanele a tsundzuka leswaku vagandzeri-kulobye va fanele va xiximiwa hi laha yena a lavaka ku xiximiwa ha kona. (Matewu 7:12; Varhoma 12:10) Ematshan’wini yo titwa va tshamisisiwa hikwalaho ka leswi va dyuhaleke ni ku karhatiwa hi ku va ni langutelo lero biha, vanhu lava kuleke va fanele va tsakela malembe ya vona ya ntirho wa vutshembeki. Naswona entiyisweni, hinkwerhu hi fanele hi tsakela leswaku hikwalaho ka mikateko ya Yehovha, ku ni ku andza ka valanguteri lava fanelekaka leswaku va hlanganyela entirhweni ni ku anakanya hi vutihlamuleri lebyi lavekaka loko mintshungu ya “tinyimpfu tin’wana” yi nghena enhlengeletanweni ya Vakreste.—Yohane 10:16; Esaya 60:8, 22; 2 Timotiya 2:2.

Hikwalaho ka switlhavi, rihanyo leri nga nyawuriki kumbe swivangelo swin’wana, lava misisi yo basa minkarhi yin’wana va nga karhateka. Leswi swi lava leswaku va twisisiwa ni ku lehiseriwa mbilu hi swirho leswin’wana swa ndyangu kumbe swa vandlha. Nakambe ku laveka leswaku lava kuleke va tikarhatela ku va ni langutelo lerinene, ni ku tshama va ri ni mbilu ni mianakanyo ya mavonelo lama ha riki mantshwa. Loko muntshwa loyi a a tshama ni xirho xa Huvo leyi Fumaka ya Timbhoni ta Yehovha a suka eBethele malembe ma nga ri mangani lama hundzeke, mukhalabye u n’wi kombele ku ringanyeta leswaku i mani loyi a a ta fanela leswaku a tshama na yena a tlhela a vula leswaku yena n’wini u lava munhu la ha riki ntsongo, makwerhu la vupfeke, loyi a ha riki ntsongo leswaku a ta n’wi pfuna ku tshama a ri muntshwa naswona a tiyile. Makwerhu loyi la kuleke la totiweke a a nga lavi ku tshama hansi kumbe ku nonoka, hikuva a ka ha ri na ntirho lowu a wu fanele wu endliwa. Mawaku xikombiso lexinene xa ku languta emahlweni naswona u ri ni langutelo lerinene!

A swi kanakanisi “Ku kwetsima ka la’v̌antšha i matimba ya v̌ona, V̌ubombi bya ŝikoša i misisi le’yo basa.” Hakunene i swinene loko vanhu lavantshwa va tirhisa matimba ya vona ni vanhu lavakulu va tirhisa vutlharhi bya vona loko va famba endleleni ya vululami! Vakreste lavakulu ni lavatsongo hi ku fanana va tsaka loko va ya emahlweni va kurisa vugandzeri bya ntiyiso bya Yehovha Xikwembu, “Nkulukumba wa masiku.”—Daniyele 7:13.

[Xifaniso lexi nga eka tluka 28]

Vakreste lava baseke misisi va nga endla swo tala leswaku va pfuna van’wana