Ndyangu Wa Vukreste Wu Pfuna Vadyuhari

“U nga nḍi tšukumeti nkarini wa ku dyuhala ka mina, u nga nḍi ṭhiki loko matimba ya mina ma ta hela!”—PISALEMA 71:9.

1. Vadyuhari va khomiwa njhani ematikweni yo tala?

“VULAVISISI byi kombisa leswaku kwalomu ka vadyuhari va tsevu eka nkombo (86%) a va khomiwi kahle hi mindyangu ya vona,” hi ku vula ka The Wall Street Journal. Magazini lowu nge Modern Maturity wu te: “Ku khomiwa hi ndlela yo biha ka vadyuhari i [nyimpi ya ndyangu] leya ha ku paluxiwaka sweswinyana hi ku tsariwa eka maphepha-hungu ya tiko.” Ina, vadyuhari ematikweni yo tala va khomiwa hi ndlela yo biha swinene ni ku honisiwa. Entiyisweni vo tala enkarhini wa hina hi ‘lava tirhandzaka, lava nga riki na ku nkhensa, lava nga tshembekiki, ni lava pfumalaka rirhandzu ra ntumbuluko.’—2 Timotiya 3:1-3.

2. Hi ku ya hi Matsalwa ya Xiheveru, Yehovha u va languta njhani vadyuhari?

² Kambe yoleyo a hi yona ndlela leyi vadyuhari a va fanele ku khomiwa ha yona eIsrayele wa khale. Nawu a wu ku: “U ta yima e mahlweni ka misisi le’ya timpfu, u šišima nkulukumba, u tšhav̌a Šikwembu ša wena. Hi mina Yehova.” Buku ya swivuriso swa vutlharhi leswi huhuteriweke ya hi tsundzuxa: “Yingisa tata wa wena l’a ku v̌elekeke, u nga monyi mana wa wena loko a dyuharile.” Ya hi laya: “Ṅwana nga, yingisa dyonḍo ya tata wa wena, u nga fulareli ku laya ka mana wa wena.” Nawu wa Muxe a wu dyondzisa ku xixima vadyuhari va xinuna ni va xisati hi ku fanana. Entiyisweni, Yehovha u lava leswaku vadyuhari va xiximiwa.—Levhitika 19:32; Swivuriso 1:8; 23:22.

Ku Khathalela Vadyuhari eMinkarhini Ya Ku Tsariwa Ka Bibele

3. Yosefa u wu kombise njhani ntwela-vusiwana eka tata wakwe la dyuhaleke?

³ Xichavo a xi nga fanelanga ku kombisiwa hi marito ntsena, kambe na hi swiendlo swo ehleketelela van’wana. Yosefa u kombise ntwela-vusiwana lowukulu eka tata wakwe la dyuhaleke. U lave leswaku Yakobo a teka riendzo ro suka eKanana a ya aEgipta, laha ku nga mpfhuka lowu tlulaka tikhilomitara ta 300. Kutani Yosefa u rhumele Yakobo “e timbongolo ta khume, ti rwele le’ŝo saseka ŝa tiko ra Egipta, ni khume ra timbongolo ta matŝele, ti rwele koro ni ŝinkwa ni timbuv̌a ta tata wa yena ta ndlela.” Loko Yakobo a fika eGoxeni, Yosefa u n’wi hlanganisile, “a wela nhaṅwini ya yena, a rila a hlwela e nhaṅwini ya yena.” Yosefa a a n’wi rhandza swinene tata wakwe. Lexi i xikombiso lexi khutazaka swonghasi xa ku khathalela vadyuhari!—Genesa 45:23; 46:5, 29.

4. Ha yini Rhuti ku ri xikombiso lexinene lexi nga tekeleriwaka?

⁴ Un’wana loyi a nyikeleke xikombiso lexinene xa ku va ni tintswalo eka vadyuhari, lexi faneleke ku landzeriwa i Rhuti. Hambi leswi a a ri wa Tiko rimbe, u namarhele Nahumi, n’wingi wakwe wa noni ya Muyuda loyi a a dyuharile. U siye vanhu va ka vona, a tihoxa ekhombyeni ro ka a nga ha kumi nuna un’wana. Loko Nahumi a n’wi sindzisile leswaku a tlhelela eka rikwavo, Rhuti u hlamule hi man’wana ya marito lamanene swonghasi eBibeleni, a ku: “U nga ṭhuki u nḍi sinḍisa leŝaku nḍi ku siya, nḍi ku fularela; hikuv̌a nḍi ta ya laha u yaka kona, nḍi ta ṭhama laha u nga ta ṭhama kona; tiko ra wena ri ta v̌a tiko ra mina, Šikwembu ša wena ši ta v̌a Šikwembu ša mina. Laha u nga ta fa kona, nḍi ta fa, nḍi lahliwa kona. Yehovha a a nḍi endle hi matimba ku tlurisa loko nḍi hambana na wena loko ku nga ri hi ku fa.” (Rhuti 1:16, 17) Rhuti nakambe u kombise timfanelo letinene loko a tiyimisele ku tekana na Bowazi hi ku landza lunghiselelo ra vukati byo teka nsati wa makwavo loko a file.—Rhuti, tindzima 2 ku ya ka 4.

5. Yesu u kombise timfanelo tihi eku hanyisaneni kakwe ni vanhu?

⁵ Yesu u veke xikombiso lexi fanaka loko a tirhisana ni vanhu. A a ri ni mbilu yo leha, ntwela-vusiwana, musa, naswona a a phyuphyisa. U kombise nkhathalelo lowukulu eka wanuna wa xisiwana loyi a a ri ni malembe ya 38 a lamarile, a nga koti ku famba, kutani a n’wi horisa. A a anakanyela tinoni. (Luka 7:11-15; Yohane 5:1-9) Hambi ku ri enkarhini wa maxangu ya rifu rakwe leri hlomulaka mbilu emhandzini ya nxaniso, u tiyisekise leswaku ku khathaleriwa mana wakwe, loyi kumbexana a a ri ni malembe lama tlulakanyana 50. Eka vanhu hinkwavo, handle ka valala vakwe va vukanganyisi, Yesu a a ri munhu la phyuphyisaka. Hi xikombiso, u te: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’win[a] yi ta kuma ku wisa.”—Matewu 9:36; 11:28, 29; Yohane 19:25-27.

I Vamani Lava Faneleke Ku Khathaleriwa?

6. (a) I vamani lava faneleke ku khathaleriwa hi ndlela yo hlawuleka? (b) I swivutiso swihi leswi hi nga tivusaka swona?

⁶ Tanihi leswi Yehovha Xikwembu ni N’wana wakwe, Yesu Kreste, va vekeke swikombiso swo tano leswinene emhakeni ya ku khathalela van’wana, swi fanerile leswaku Vakreste lava tinyiketeleke va tekelela xikombiso xa vona. Exikarhi ka hina ku na van’wana lava nga ni malembe yo tala va karhateka ni ku tikeriwa—vamakwerhu lava dyuhaleke, lava se ti dyaka ti ya emagoveni. Van’wana kumbexana i vatswari kumbe vakokwa wa hina. Xana a hi na mhaka na vona? Xana hi va tekela ehansi? Kumbe xana ha wu tlangela swinene ntokoto ni vutlharhi bya vona lebyikulu? I ntiyiso, van’wana va nga ha ringa ku lehisa ka hina timbilu hi ku karhata ni ku tsana loku tolovelekeke eka vadyuhari. Kambe tivutise, ‘Mina a ndzi ta va ndzi hambane na vona hi mpimo wihi loko a ndzi ri exiyin’weni lexi vona va nga eka xona?’

7. I yini lexi kombisaka xilaveko xo va ni ntwela-vusiwana eka vanhu lava dyuhaleke?

⁷ Ku ni mhaka leyi khumbaka mbilu leyi endlekeke eMiddle East malunghana ni ntwela-vusiwana wa nhwanyana un’wana lontsongo lowu a wu kombiseke mudyuhari. Kokwa wakwe wa xisati a a ri karhi a pfuna ekhixini ivi a wisa puleti, yi fayeka. Kokwana a a karhatekile hikwalaho ka vusopfa bya yena n’wini; n’wana wa xisati wa kokwana, a bava a khalakhasa. Kutani u vitane n’wana wakwe lontsongo, a n’wi rhuma evhengeleni ra kwalaho leswaku a ya xavela kokwa wakwe ndyelo ya pulanga leyi nga ta ka yi nga fayeki. Nhwanyana loyi u vuye ni tindyelo timbirhi. Mana wakwe u n’wi vutisile hi ku hlundzuka: “Ha yini u xave tindyelo timbirhi?” Ntukulu u hlamule hi ku nghanghamela a ku: “Yin’wana i ya kokwana, kasi leyin’wana yi ta va ya wena manana loko u dyuharile.” Ina, emisaveni leyi hinkwerhu ha dyuhala. Xana a wu nga ta swi tlangela ku lehiseriwa mbilu ni ku khomiwa hi ndlela ya tintswalo?—Pisalema 71:9.

8, 9. (a) Hi fanele ku va khomisa ku yini vadyuhari lava nga exikarhi ka hina? (b) Van’wana lava ha ku amukelaka Vukreste va fanele ku tsundzuka yini?

⁸ U nga tshuki u rivala leswaku vo tala va vamakwerhu wa hina lava dyuhaleke va ni rhekhodo yo leha ya ntirho wa Vukreste lowu va wu endleke hi ku tshembeka. Kunene, hi fanele ku va xixima ni ku va anakanyela, naswona hi fanele ku va pfuna hi musa ni ku va khutaza. Wanuna wa vutlharhi u tiyisile loko a ku: “Misisi ya timpfu i hari ya šitšhav̌o, yi kumeka e ndleleni ya ku lulama.” Kutani misisi yoleyo ya timpfu, hambi i ya wanuna kumbe ya wansati, yi fanele ku xiximiwa. Van’wana va vavanuna ni vavasati lava va dyuhaleke va ha tirha tanihi maphayona lama tshembekaka, naswona vavanuna vo tala va hambeta va tirha tanihi vakulu lava tshembekaka emavandlheni; van’wana va veka xikombiso lexinene hi ku tirha tanihi valanguteri lava famba-fambaka.—Swivuriso 16:31.

⁹ Pawulo u tsundzuxe Timotiya a ku: “U nga holoveli munhu nkulukumba, kambe n’wi khongotele tanihi tata wa wena; vavanuna lavantshwa u fanele ku va khoma tanihi vamakwenu va xinuna. Vavasati lavakulu u va languta tanihi vamanana, ni vavasati lavantshwa tanihi vamakwenu va xisati, hi ndlela ya ku tenga matlhelo hinkwawo.” (1 Timotiya 5:1, 2) Lava va ha ku humaka emisaveni leyi yi nga riki na xichavo, va nghena evandlheni ra Vukreste va fanele ku anakanyisisa swinene hi marito ya Pawulo, lama sekeriweke erirhandzwini. N’wina vantshwa, mi nga tshuki mi tekelela malangutelo layo biha lawa kumbexana mi ma voneke exikolweni. Mi nga ali xitsundzuxo lexinene xa Timbhoni leta khale. (1 Vakorinto 13:4-8; Vaheveru 12:5, 6, 11) Hambi swi ri tano, loko vadyuhari va lava mpfuno hikwalaho ka swiphiqo swa rihanyo kumbe swa timali, i mani loyi a nga ni vutihlamuleri lebyikulu byo va pfuna?

Vutihlamuleri Bya Ndyangu Byo Khathalela Vadyuhari

10, 11. (a) Hi ku ya hi Bibele, i vamani lava fanelaka ku rhangela eku khathaleleni ka vadyuhari? (b) Ha yini swi nga olovi minkarhi yin’wana ku khathalela vadyuhari?

¹⁰ Evandlheni ro sungula ra Vukreste, ku tlhekeke swiphiqo ehenhleni ka ku khathaleriwa ka tinoni. Xana muapostola Pawulo u kombise leswaku swilaveko swo tano swi fanele ku khathaleriwa hi ndlela yihi? “Xixima tinoni leti nga ta xiviri. Loko wansati wa noni a ri ni vana kumbe vatukulu, a va rhange va dyondza tifanelo ta vona ta vukhongeri hi tlhelo ra ndyangu wa ka vona, va endla swin’wana ku nkhensa vatswari va vona, hikuva hi swona leswi amukelekaka emahlweni ka Xikwembu. Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.”—1 Timotiya 5:3, 4, 8.

¹¹ Loko ku ri ni xilaveko, swirho swa ndyangu swa le kusuhi swi fanele ku va swo rhanga eku pfuneni ka vadyuhari.a Hi ndlela leyi, vana lava kuleke va nga kombisa ku tlangela vatswari va vona hikwalaho ka malembe yo tala lama va ma heteke va va kombisa rirhandzu, va va tirhela ni ku va khathalela. Leswi swi nga ha nonon’hwa. Loko vanhu va dyuhala, hi ntolovelo va sungula ku tsana, naswona van’wana swi fika ni laha va nga ha kotiki ku endla nchumu. Van’wana va nga ha sungula ku va ni manyunyu ni ku karhata, kumbexana ni ku swi xiya va nga swi xiyi. Kambe nkarhi lowu a ha ha ri vana, xana na hina a hi nga ri na wona manyunyu naswona hi karhata? Naswona xana vatswari va hina a va nga tikarhati hi matimba leswaku va hi pfuna? Sweswi se va nga dyuhala swilo se swi cincile. Kutani ku laveka yini ke? Ku laveka ntwela-vusiwana ni ku lehisa mbilu.—Ringanisa 1 Vatesalonika 2:7, 8.

12. Hi tihi timfanelo leti lavekaka eku khathaleleni ka vadyuhari—ni lavan’wana hinkwavo evandlheni ra Vukreste?

¹² Muapostola Pawulo u nyikele xitsundzuxo lexi kongomeke loko a tsala a ku: “Hikokwalaho, leswi mi nga vitaniwa hi Xikwembu ku va vahlawuriwa va xona lava rhandziwaka, ambalani moya wa tintswalo, ni vunene, ni ku titsongahata, ni ku rhula, ni ku leha mbilu. Amukelanani, kutani loko un’wana a vilela hi un’wana, a va rivalelane. Kukota leswi Hosi yi mi rivaleleke, na n’wina rivalelanani. Kutani ehenhla ka leswi hinkwaswo, ku laveka rirhandzu, ri nga rona leri ri bohaka swilo hinkwaswo swi twanana hi ku hetiseka.” Loko hi fanele ku kombisa ntwela-vusiwana ni rirhandzu ra muxaka lowu evandlheni, xana a hi fanelanga ku swi kombisa swinene endyangwini?—Vakolosa 3:12-14.

13. I vamani, handle ka vatswari lava dyuhaleke kumbe vakokwana, lava nga lavaka mpfuno?

¹³ Minkarhi yin’wana swi nga endleka leswaku mpfuno wa muxaka lowu wu nga laviwi hi vatswari kumbe vakokwa wa wena ntsena, kambe wu laviwa na hi maxaka man’wana lama dyuhaleke. Vadyuhari van’wana lava nga riki na vana va hete malembe yo tala va ri entirhweni wa vurhumiwa, ntirho wo famba-famba, ni mintirho yin’wana ya nkarhi hinkwawo. Va rhangise Mfumo hi xiviri evuton’wini bya vona hinkwabyo. (Matewu 6:33) Kutani xana a swi nga ta fanela ku va kombisa leswaku ha va khathalela? Entiyisweni hi ni xikombiso lexinene xa ndlela leyi Sosayiti ya Watch Tower yi swi khathalelaka ha yona swirho leswi dyuhaleke swa le Bethele. Le yindlu-nkulu ya Bethele le Brooklyn, ni le ka marhavi yo tala ya Sosayiti, vamakwerhu va nga ri vangani lava dyuhaleke va khathaleriwa siku na siku hi swirho leswi leteriweke leswi averiweke ku endla ntirho lowu. Va swi tsakela swinene ku khathalela vadyuhari lava, onge hi loko va ri vatswari kumbe vakokwa wa vona va xiviri. Hi nkarhi lowu fanaka, va dyondza swo tala eka ntokoto wa vadyuhari lava.—Swivuriso 22:17.

Vutihlamuleri Bya Vandlha Byo Khathalela

14. Hi rihi lunghiselelo leri a ri endleriwe vadyuhari evandlheni ro sungula ra Vukreste?

¹⁴ Matiko yo tala namuntlha ma ni malunghiselelo ya mudende, kun’we ni vutshunguri lebyi lunghiseleriweke vadyuhari hi Tiko. Vakreste va nga tirhisa malunghiselelo lawa swinene laha va nga ni mfanelo ya ku endla tano. Hambi swi ri tano, eka lembe xidzana ro sungula, malunghiselelo yo tano a ma nga ri kona. Hikwalaho, vandlha ra Vukreste ri teke goza leri faneleke leswaku ri pfuna tinoni leti nga evusiwaneni. Pawulo u te: “Wansati wa noni [loyi a fanelaka ku pfuniwa hi vandlha], a a tsarisiwe ntsena loko a ri ni malembe ya 60, naswona a tekiwile kan’we ntsena; naswona ú fanele ku va ni vumbhoni lebyi twalaka hi tlhelo ra mintirho leyinene ya yena, ku fana ni ku kurisa vana hi ndlela ya kona, ni ku tsakela vaendzi, ni ku hlantswa milenge ya vahlawuriwa va Xikwembu, ni ku pfuna lava xanisekaka, ni ku tshama a ri karhi a endla leswinene hi matlhelo hinkwawo.” Xisweswo, Pawulo u kombise leswaku vandlha na rona ri na vutihlamuleri byo pfuna vadyuhari. Vavasati lava tikarhatelaka swilo swa moya lava a va nga ri na vana lava nga vapfumeri a va wu fanelekela mpfuno wo tano.—1 Timotiya 5:9, 10.

15. I yini lexi nga endlaka leswaku ku laveka malunghiselelo yo kuma mpfuno wa Tiko?

¹⁵ Laha ku nga ni malunghiselelo ya Tiko ya vanhu lava dyuhaleke, leswi hakanyingi swi lava ntirho wo tata tifomo, lowu nga vonakaka wu heta matimba. Etimhakeni to tano swi fanerile leswaku valanguteri evandlheni va endla malunghiselelo yo karhi leswaku vadyuhari va ta endla xikombelo xa kona va ya va tekela, hambi ku ri ku wu antswisa. Minkarhi yin’wana ku hundzuka kun’wana ka swiyimo ku nga endla leswaku va kuma mali leyi engetelekeke ya mudende. Kambe ku na swilo swin’wana swo tala leswi kotekaka, leswi valanguteri va nga swi lunghiselelaka leswaku ku khathaleriwa vadyuhari. Swin’wana swa swona hi swihi ke?

16, 17. Hi nga kombisa moya wa ku amukela vadyuhari lava nga kona evandlheni hi tindlela tihi to hambana?

¹⁶ Ku amukela vaendzi i mukhuva lowu a wu endliwa ni le minkarhini ya ku tsariwa ka Bibele. Ku ta fikela namuntlha, ematikweni yo tala ya le Middle East, vanhu vambe va amukeriwa hi ku nyikiwa khapu ya tiya kumbe kofi. Kutani a swi hlamarisi leswi Pawulo a tsaleke a ku: “Pambulelani vahlawuriwa va Xikwembu loko va pfumala, mi gingirika eku amukeleni ka vaendzi.” (Varhoma 12:13) Rito ra Xigriki leri vulaka ku amukela vaendzi, leri nge phi·lo·xe·niʹa, hi ku kongoma ri vula “ku rhandza (ku tsakela, kumbe ku va ni tintswalo eka) vanhu vambe.” Loko Mukreste a fanele ku amukela vanhu vambe, xana a nga fanelanga ku va amukela swinene vapfumeri-kulobye? Loko a rhambiwa eswakudyeni, mudyuhari u titwa a phyuphyisiwile swinene. Loko mi lava ku twa marito ya vutlharhi ni ya ntokoto eswinkhubyanini swa n’wina, katsani ni vadyuhari.—Ringanisa Luka 14:12-14.

¹⁷ Ku ni tindlela to tala leti vadyuhari va nga khutaziwaka ha tona. Loko hi hlela ntlawa lowu hi fambaka na wona hi movha eHolweni ya Mfumo kumbe enhlengeletanweni, xana ha languta loko ku ri ni vadyuhari lava va nga swi tsakelaka ku famba na hina? U nga rindzeli leswaku va ta ku kombela. Tinyiketele ku famba na vona. Mpfuno wun’wana lowu hi nga swi kotaka ku wu endla i ku ya va xavela leswi va swi lavaka. Kumbe, xana hi nga famba na vona eku xaveni loko va swi kota? Kambe tiyiseka leswaku ti kona tindhawu leti va nga wisaka eka tona, va tiphyuphyisa loko swi laveka. Handle ko kanakana u ta fanela ku lehisa mbilu ni ku va ni tintswalo, kambe ku tlangela lokukulu ka mudyuhari ku nga va loku vuyerisaka.—2 Vakorinto 1:11.

Rifuwo Ra Risima eVandlheni

18. Ha yini vadyuhari va ri nkateko evandlheni?

¹⁸ I nkateko swonghasi ku vona misisi ya timpfi (ni tinhloko ta mpandla) evandlheni! Swi vula leswaku exikarhi ka vantshwa lava nga ni ntamu, hi ni vanhu lava nga riki vangani lava nga ni vutlharhi ni ntokoto—rifuwo ra xiviri eka vandlha rihi na rihi. Vutivi bya vona byi fana ni mati lama phyuphyisaka lama kiwaka exihlobyeni. Swi hi laha Swivuriso 18:4 yi swi vekaka ha kona: “Ku v̌ulav̌ula ka munhu i šidziv̌a ša mati; šihlov̌o ša v̌utlhari i nambu lo’wu pfelelaka.” Swa khutaza swonghasi eka vadyuhari loko va swi vona leswaku va rhandziwa ni ku tlangeriwa!—Ringanisa Pisalema 92:14.

19. Van’wana va tinyiketele njhani leswaku va pfuna vatswari lava dyuhaleke?

¹⁹ Van’wana lava nga entirhweni wa nkarhi hinkwawo va vone swi fanela ku tshika malunghelo ya vona, leswaku va tlhelela ekaya, va ya khathalela vadyuhari, vatswari lava vabyaka. Va tinyiketele ku pfuna lava va rhangeke va pfuna vona. Mpatswa wun’wana lowu khale a wu tirha ntirho wa vurhumiwa, ni lowu sweswi wa ha riki entirhweni wa nkarhi hinkwawo, wu tlhelele ekaya leswaku wu ya khathalela vatswari lava dyuhaleke. Se va ni malembe ya 20 va ri karhi va endla sweswo. Malembe ya mune lama hundzeke, mana wa nuna wa kona u boheke ku yisiwa ekaya ra vanhu lava nga swi kotiki ku titirhela. Wanuna loyi, loyi sweswi a nga ni malembe ya va-60, u endzela mana wakwe wa malembe ya 93 siku na siku. Wa hlamusela: “Xana ndzi nga n’wi cukumetisa ku yini? I mana wa mina!” Minkarhi yin’wana mavandlha ni vanhu va tinyiketele ku khathalela vadyuhari leswaku vana va vadyuhari lava va ta ya emahlweni ni swiavelo swa vona. Rirhandzu ro tano ro pfumala vutianakanyi na rona ri fanele ku bumabumeriwa swinene. Mhaka yin’wana ni yin’wana yi fanele ku tameriwa hi vukheta lebyikulu hikuva vadyuhari a va fanelanga ku honisiwa. Kombisa leswaku wa va rhandza vatswari va wena lava dyuhaleke.—Eksoda 20:12; Vaefesa 6:2, 3.

20. I xikombiso xihi lexi Yehovha a hi nyikeke xona malunghana ni ku khathalela vadyuhari?

²⁰ Kunene, vamakwerhu lava dyuhaleke va fana ni harhi yo xonga endyangwini kumbe evandlheni. Yehovha u te: “Nḍi ta v̌a tano e ku fika e ku dyuhaleni ka ṅwina; nḍi ta mi rwala e ku fika e timpfini ta ṅwina. Nḍi mi endlile, kutani nḍi ta ṭhama nḍi mi rwala; nḍi ta mi tiyisa, nḍi v̌a nḍi mi ponisa!” Onge hi nga kombisa ku lehisa mbilu ni nkhathalelo lowu fanaka eka vamakwerhu lava dyuhaleke endyangwini wa Vukreste.—Esaya 46:4; Swivuriso 16:31.

[Nhlamuselo ya le hansi]

Wa Tsundzuka Xana?

◻ Hi swihi swikombiso leswi hi nga na swona swa Bibele swa ku khathalela vadyuhari?

◻ Xana hi fanele ku va khomisa ku yini vadyuhari?

◻ Swirho swa ndyangu swi nga va khathalela njhani varhandziwa va swona lava dyuhaleke?

◻ Vandlha ri nga endla yini leswaku ri pfuna vadyuhari?

◻ Ha yini vadyuhari va ri nkateko eka hina hinkwerhu?

[Xifaniso lexi nga eka tluka 23]

Rhuti u kombise tintswalo ni xichavo eka Nahumi loyi a dyuhaleke

[Xifaniso lexi nga eka tluka 24]

Vadyuhari i swirho swa nkoka swinene evandlheni