Ku Humelela Eku Nyikeleni Ka Vumbhoni Hi Riqingho

¹ Xikongomelo xa hina tanihi Timbhoni ta Yehovha a hi ku hlanganyela eku chumayeleni ka mahungu lamanene ntsena kambe ni ku fikelela vanhu hinkwavo hi rungula ra Mfumo. (Mint. 10:42; 20:24) Hambileswi ntirho wa yindlu ni yindlu wu hambetaka wu ri yona ndlela leyikulu ya ku fikelela vanhu, ha swi xiya leswaku a hi swi koti ku fikelela vanhu hinkwavo loko hi tirha hi yindlu ni yindlu. Hikwalaho, leswaku hi ‘hetisisa vutirheli bya hina hi xitalo,’ hi tirhisa tindlela tin’wana—ku katsa ni ku nyikela vumbhoni hi riqingho—leswaku hi kuma vanhu lava fanaka ni tinyimpfu.—2 Tim. 4:5.

² Etindhawini to tala, vanhu va tshama emiakweni leyi swi tikaka ku nghena eka yona, leyi ku tshamaka mindyangu yo tala kumbe leyi tinyangwa ta kona ti tshamaka ti gogiwile, laha swi tikaka ku fikelela vanhu loko hi ri entirhweni wa hina lowu tolovelekeke wa yindlu ni yindlu. Hambi ku ri ensin’wini leyi hi nga tirhaka hi yindlu ni yindlu, ku ni nhlayo ya vanhu vo tala lava va nga riki kona emakaya. Hambiswiritano, vahuweleri vo tala va humelela kahle eku fikeleleni ka vanhu volavo hi riqingho.

³ Xana wa kanakana ku chumayela hi riqingho evutirhelini bya wena? Makwerhu un’wana u ri: “A ndzi swi rhandzi loko munhu a ndzi bela riqingho ekaya a ringeta ku ndzi xavisela swo karhi, hikwalaho muxaka lowu wa ku nyikela vumbhoni a ndzi twanani na wona.” Kambe, endzhaku ko chumayela hi riqingho kambirhi ntsena, u te: “Ndza swi rhandza! A ndzi nga ehleketi leswaku sweswo swi nga koteka, kambe sweswi ndza swi tsakela! Vanhu va va va ntshunxekile eriqinghweni naswona a swi lavi matshalatshala lamakulu. Ndlela leyi ya tirha swinene!” Makwerhu un’wana wa xisati na yena u titwe hi ndlela leyi fanaka: “Kahle-kahle a ndzi nga swi rhandzi ku nyikela vumbhoni hi riqingho. Ku vula ntiyiso a ndzi nga lavi ni ku swi ringeta. Kambe ndzi swi ringetile kutani ndzi kuma swi ri ni vuyelo lebyinene. Ndzi ni maendzo yo vuyela ya 37 lawa ndzi ma kumeke hi ku nyikela vumbhoni hi riqingho naswona tidyondzo leti ndzi nga na tona a ndzi swi koti ku ti fambisa hinkwato!” Loko wo tiyimisela ku ringeta ku nyikela vumbhoni hi riqingho, na wena u ta humelela.

⁴ Ku Hlela Ku Nyikela Vumbhoni Hi Riqingho: Ntirho wa ku nyikela vumbhoni evandlheni wu le hansi ka nkongomiso wa mulanguteri wa ntirho. Loko xilaveko xi ri kona, huvo ya vakulu yi nga hlawula nkulu un’wana kumbe nandza wa vutirheli la fanelekaka leswaku a tirhisana ni mulanguteri wa ntirho, va hlela ku nyikela vumbhoni hi riqingho. Makwerhu la khathalelaka nsimu na yena u fanele ku katseka hikuva u ta ava nsimu ni ku hlayisa tirhekhodo ti ri enkarhini. Mulanguteri wa xifundzha na yena u ta tsakela ku vona lunghiselelo leri ri tswala mihandzu.

⁵ Loko nsimu ya ka n’wina yi ri ni tindhawu leti swi nga oloviki ku ti fikelela hi ku chumayela hi yindlu ni yindlu, ku fanele ku endliwa malunghiselelo ya ku chumayela eka tona hi riqingho. Makwerhu la averiweke ntirho lowu u fanele ku endla nxaxamelo wa tiadirese ta miti leyi nga ta chumayeriwa hi riqingho, naswona masimu lawa ma fanele ma tshama ma ri matsongo leswaku ma ta tirhiwa nkarhi na nkarhi. Mimepe hinkwayo leyi nga ni masimu lawa yi fanele ku funghiwa, ku kombisiwa nsimu leyi chumayeriwaka hi riqingho.

⁶ Xana u nga ti kuma kwihi tinomboro ta tinqingho? Sweswo swi nga va ntlhontlho. Mavandlha man’wana ma hlayisa nxaxamelo wa tinomboro ta tinqingho hi ku kuma buku leyi tolovelekeke ya tinomboro ta tinqingho. Loko muako lowu swi tikaka ku nghena eka wona wu ri ni buku ya wona ya tinomboro ta tinqingho, kumbexana u nga kuma tinomboro eka yona. Loko yi nga ri kona, u nga ha kopa mavito ya vaaki ebukwini ya mavito leyi nga laha vaendzi va fikelaka kona, ivi u ya ma lava ebukwini ya tinomboro ta tinqingho. Ku nga khathariseki leswaku hi yihi ndlela leyi u nga ta yi tirhisa ku kuma tinomboro ta tinqingho, tiyiseka leswaku yi le nawini. Loko ku ri leswaku u ta kombela nomboro ya riqingho eka muakelani, swi nga va swinene leswaku u nga vuli laha u yi kumeke kona.

⁷ Vakulu va nga kombisa ku wu tsakela swinene ntirho lowu hi ku endla malunghiselelo ya leswaku lava nga ni ntokoto wa ku nyikela vumbhoni hi riqingho va letela lava nga riki na wona, kumbexana hi ku tirhisa nongonoko wa Maphayona ma Pfuna Van’wana. Nkarhi na nkarhi, ku nga ha tirhisiwa nkulumo ya swilaveko swa vandlha eka Nhlangano wa Ntirho leswaku ku antswisiwa ku humelela ka ndlela leyi ya ku nyikela vumbhoni.

⁸ Loko vakulu va endla maendzo ya vurisi eka lava va vabyaka va ri ekaya kumbe lava lamaleke, va nga ha xalamukela ku va khutaza ku hlanganyela eku nyikeleni ka vumbhoni hi riqingho. Kumbexana nkulu a nga bela vanhu vo hlayanyana riqingho loko a ri kwalaho, muhuweleri a ri karhi a yingisile. Kutani muhuweleri u ta tsakela ku endla tano na yena. Vahuweleri vo tala lava sunguriseke xisweswo, va heta timinete ti nga ri tingani siku ni siku entirhweni lowu va wu rhandzaka hakunene.

⁹ Swiringanyeto Leswi Nga Pfunaka Leswaku U Humelela: Loko Yesu a rhuma vadyondzisiwa va yena ku ya chumayela, u va rhumele hi “vambirhi-mbirhi.” (Luka 10:1) Ha yini? A a swi tiva leswaku loko va tirha swin’we va ta dyondzisana ni ku khutazana. Swi tano ni hi ku nyikela vumbhoni hi riqingho. Hi ku tirha mi ri vambirhi, mi nga dyondzisana, mi bula hi vuyelo bya kona ni ku nyikana swiringanyeto leswi nga tirhisiwaka eka bulo leri landzelaka. Hambiloko un’wana a ri eriqinghweni, mi nga ha pfunana ku kuma rungula leri faneleke. Ku ringanyetiwa leswaku vahuweleri va tirha va ri vambirhi loko va nyikela vumbhoni hi riqingho ku fana ni loko va endla ntirho lowu tolovelekeke wa ku chumayela hi yindlu ni yindlu.

¹⁰ Leswaku u hlakulela ndlela leyinene ya ku ehleketa ni ku nyikela nyingiso, tshama laha u nga kotaka ku andlala tibuku ta wena kahle—ku nga Bibele, buku leyi nge Ku Hlamulana, broxara leyi nge Leswi Xi Swi Languteleke, timagazini ni swin’wana. Swin’wana swa swingheniso swa wena swi tsale ehansi kutani u swi veka laha u swi vonaka kahle. Lunghekela ku tsala ni ku hlayisa rungula leri kongomeke ni leri heleleke, ku katsa siku ni nkarhi lowu u faneleke ku bula ni munhu yoleyo ha wona, leswaku u ta swi tsundzuka loko u tlhela u n’wi bela riqingho.

¹¹ Hakanyingi vanhu a va ntshunxeki loko va twa rito leri va nga ri tolovelangiki eriqinghweni. Hikwalaho, vana ni musa ni vunakulobye naswona u va ni vuxiyaxiya. N’wini wa muti u kota ku ku tiva hi rito ra wena leswaku u munhu wa njhani. Ntshunxeka naswona u vulavula swi suka embilwini. U nga vulavuli hi ku tsutsuma naswona leswi u swi vulaka a swi twale, rito ra wena ri twakala kahle. Nyika n’wini wa muti nkarhi wa ku vulavula. N’wi byele vito ra wena hi ku helela naswona u n’wi byela leswaku u tshama kwala mugangeni. A hi lavi leswaku vanhu va hi teka hi ri lava xavisaka swilo hi riqingho. Ematshan’weni yo vula leswaku u ba riqingho eka vaaki hinkwavo va muako wo karhi, vula leswaku u bele yena riqingho hi ku kongoma.

¹² Swingheniso Swa Riqingho: Swo tala swa swingheniso leswi nga eka tluka 9-15 ebukwini leyi nge Ku Hlamulana, swi nga tirhisiwa eku nyikeleni ka vumbhoni hi riqingho. U nga ha ku: “Ndzi ku bela riqingho hikuva a ndzi swi koti ku ta ndzi ta ku vona hi xiviri. Xikongomelo xa mina hi leswaku ndzi lava ku twa vonelo ra wena eka xivutiso lexi xo tsakisa.” Kutani u n’wi vutisa xivutiso xa kona.

¹³ Xingheniso xo sungula ehansi ka nhloko-mhaka leyi nge “Vugevenga/Vuhlayiseki” xi nga ha tirhisiwa hi ndlela leyi: “Xewani. Hi mina_____. Ndzi tshama kwala mugangeni. U nga chavi, a ndzi le ku xaviseni ka nchumu kumbe ku endla nkambisiso wo karhi. Ndzi ku bele riqingho hileswi ndzi karhatekeke hi mhaka ya vuhlayiseki bya vanhu. Hi rhendzeriwe hi vugevenga byo tala naswona byi khumba vutomi bya hina. Xana u ehleketa leswaku wu ta kala wu fika nkarhi lowu vanhu hinkwavo va nga ta swi kota ku famba exitarateni ni vusiku kambe va titwa va hlayisekile? [N’wi nyike nkarhi wa ku angula.] Ndzi kombela ku ku hlayela leswi Xikwembu xi tshembisaka leswaku xi ta swi endla.”

¹⁴ Ku byela munhu hi ku kongoma leswaku u nga n’wi fambisela dyondzo ya Bibele loko u bula ra yena hi riqingho, swi ve ni vuyelo lebyinene. U nga tirhisa timinete ti nga ri tingani ku kombisa ndlela leyi dyondzo yoleyo yi fambisiwaka ha yona. Kombela ku endzela munhu yoleyo ekaya rakwe leswaku u ta yisa dyondzo yoleyo emahlweni, kumbe, loko munhu wa kona a kanakana, n’wi byele leswaku u ta yisa dyondzo yoleyo emahlweni hi riqingho siku rin’wana.

¹⁵ Loko u gimeta bulo, anakanya hi nchumu wo karhi lowu nga endlaka leswaku u kota ku endzela munhu yoleyo ekaya rakwe kumbe u n’wi rhumelela buku yo karhi. Loko munhu yoloye a kanakana ku ku nyika adirese ya yena, kombela ku tlhela u n’wi bela riqingho. Swi nga ha lava leswaku u n’wi bela riqingho ko talanyana kukondza a titwa a ntshunxekile ku ku rhambela ekaya rakwe.

¹⁶ Ku Teka Goza Ku Sungula: Makwerhu un’wana wa xisati la nga ni malembe ya 15 hi vukhale u sungule ntirho wa yena wa nsimu nimixo hi ku ba riqingho. U vulavule ni wansati la pfumeleke ku amukela buku leyi nge Vutivi. Loko makwerhu wa xisati a yisa buku ekaya ra wansati loyi, u lave ku tiva leswaku u yi kumise ku yini nomboro ya yena ya riqingho, hikuva vito ra yena a ri kona enxaxamelweni wa mavito. Makwerhu wa xisati a a yi be hi xihoxo! Wansati loyi u pfumele ku dyondzeriwa kutani sweswi i muhuweleri la nga khuvuriwangiki.

¹⁷ Makwerhu un’wana wa xisati u nyikiwe nsimu leyi chumayeriwaka hi riqingho kambe u tshame mavhiki manharhu a nga yi tirhi hikwalaho ka ku chava. I yini lexi n’wi tiyiseke nhlana leswaku a yi tirha? U tsundzuke xihloko xa Xalamuka! ya January 22, 1997 (hi Xinghezi), lexi nge “Loko Ndzi Tsanile Hi Kona Ndzi Nga Ni Matimba.” A xi vulavula hi Mbhoni yin’wana leyi hambileswi yi lamaleke, yi nyikelaka vumbhoni hi riqingho. Makwerhu loyi wa xisati u te: “Ndzi khongele Yehovha leswaku a ndzi tiyisa. Ndzi n’wi kombele leswaku a ndzi nyika marito lama faneleke lawa ma nga ta va xingheniso xa mina.” Xana byi ve byihi vuyelo bya siku ra yena ro sungula loko a nyikela vumbhoni hi riqingho? U ri: “Yehovha u hlamule xikhongelo xa mina. Vanhu va ndzi yingisile naswona ndzi endle malunghiselelo ya ku tlhelela eka vona.” Endzhaku ka sweswo, ku nyikela ka yena vumbhoni ku tswale dyondzo ya Bibele. U gimeta hi ku: “Yehovha u ndzi dyondzisile nakambe leswaku ndzi n’wi tshemba, ndzi nga titshembi.”—Swiv. 3:5.

¹⁸ Ku nyikela ntiyiso hi riqingho ku ve ndlela leyi humelelaka ya ku chumayela mahungu lamanene. Lunghiselela kahle u tlhela u hlanganyela hi mbilu hinkwayo. U nga heli matimba loko u nga humeleli eku sunguleni. Khongelela nkongomiso wa Yehovha naswona u ringanisa ndlela leyi u yi tirhisaka ni leyi tirhisiwaka hi van’wana lava chumayelaka hi ndlela leyi yi tsakisaka. Onge hi nga endla vutirheli bya hina hi xihatla ni hi rixaladza, hi ri karhi hi navela ku ka hi nga siyi munhu ni un’we ensin’wini ya ka hina.—Rhom. 10:13, 14.