Ku Chumayela Hi Riqingho Swi Nga Va Ni Vuyelo Lebyinene
1. Ha yini ku chumayela hi riqingho hi fanele hi swi teka swi ri xiphemu xa ntirho wa hina wo chumayela?
1 Ha yini hi fanele hi chumayela hi riqingho ensin’wini ya hina? Xivangelo hileswaku leyi hi yin’wana ya tindlela leti hi nga ti tirhisaka leswaku hi pfuna vanhu van’wana leswaku va kuma vutivi lebyi kongomeke lebyi nga ta va pfuna leswaku va ponisiwa. (2 Pet. 3:9) Hambileswi xikongomelo-nkulu xa hina ku nga ku chumayela mahungu lamanene ya Mfumo wa Xikwembu hi yindlu ni yindlu, hi tirhisa ni tindlela tin’wana leswaku hi fikelela vanhu lava swi nga oloviki ku va kuma emakaya.—Mat. 24:14; Luka 10:1-7; Nhlav. 14:6.
2. Ku chumayela hi riqingho swi fanele swi hleriwa njhani?
2 Ndlela Leyi Wu Hleriwaka Ha Yona: Tanihi leswi vahuweleri va nyikiwaka nsimu leyi va faneleke va yi tirha hi yindlu ni yindlu, swi tano ni hi ku chumayela hi riqingho, vahuweleri va fanele va nyikiwa nsimu leyi va nga ta yi tirha. Ku chumayela hi riqingho u nga swi endla u ri wexe kumbe mi ri hi ntlawa wa vanhu vambirhi kumbe vanharhu. Leswi swi fanele swi endleriwa endlwini leyi nga riki na pongo kumbe swilo leswi kavanyetaka. Vanhu vo tala va swi vone swi pfuna ku tshama etafuleni ni swilo hinkwaswo leswi va swi tirhisaka loko va chumayela hi yindlu ni yindlu.
3. I yini leswi hi faneleke hi swi tsundzuka loko hi chumayela hi riqingho?
3 Ndlela Yo Chumayela Hi Riqingho: Loko hi chumayela hi riqingho, xingheniso xa hina xi fanele xi twala leswaku hi le ku buleni. Van’wana lava ha ku sungulaka ku chumayela va nga ha hlayela n’wini wa muti xingheniso xa vona, kambe va swi endla hi ndlela yo bula. Swingheniso leswi nga ebukwini leyi nge Ku Hlamulana, eka Vutirheli Bya Hina Bya Mfumo ni le ka xiphephana lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? swi nga pfuna swinene. Loko u tiendlela xingheniso xa wena, vana ni nhloko-mhaka leyi u nga ta bula ha yona, tihlawulele xivutiso lexi u nga ta xi vutisa n’wini wa muti naswona u hlawula ni matsalwa lawa u nga ta n’wi hlayela wona leswaku ma n’wi nyika nhlamulo. Nkandziyiso lowu u nga ta n’wi fambisela wona ku ta va ku ri lowu fambisiwaka hi yindlu ni yindlu n’hweti yoleyo. Tsundzuka tinhla leti landzelaka: Ntshunxeka naswona u nga vulavuli hi ku hatlisa. Loko munhu a vulavula hi riqingho i swa nkoka leswaku a kombisa vumunhu, a lehisa mbilu ni ku va ni xinghana. Rhiya ndleve loko n’wini wa muti a vulavula naswona u n’wi bumabumela. U nga n’wi byeli hi lunghiselelo ra munyikelo, hikuva leswi swi nga endla leswaku vanhu va ehleketa leswaku hi le ku hlengeleteni ka minyikelo yo karhi.
4. Ku chumayela hi riqingho swi nga hi pfuna leswaku hi endla yini ensin’wini leyi hi nga averiwa yona?
4 Munhu loyi u nga ta va u vulavula na yena eriqinghweni swi nga ha endleka leswaku i xilema, wa vabya kumbe xiyimiso xakwe xa ntirho xi endla leswaku swi nga olovi ku va hi n’wi kuma loko hi chumayela hi yindlu ni yindlu. Ku ni vanhu lava tshamaka etindhawini leti swi nga oloviki ku nghena eka tona. Kutani leswaku hi hetisisa vutirheli bya hina hi xitalo, hi fanele hi ri tirhisa swinene lunghiselelo leri ro chumayela hi riqingho.