Ku Lavisisa Lava Swi Va Fanelaka

¹ Xileriso xa Yesu xo endla ntirho wo chumayela xi nga ha va ntlhontlho. U te: “Emutini kumbe eximutanini xin’wana ni xin’wana lexi mi nga ta nghena eka xona, lavisisani loyi swi n’wi fanelaka.” (Mat. 10:11) Tanihi leswi namuntlha vanhu va nga taliki ku kumeka ekaya, xana hi nga va lavisisa njhani hi ndlela leyi humelelaka?

² Kambisisa Nsimu Ya Ka N’wina: Xo sungula kambisisa nsimu ya ka n’wina. Hi wihi nkarhi lowu vanhu va talaka ku kumeka ha wona ekaya? Xana va nga kumiwa kwihi ninhlikanhi? Xana ku ni siku ro karhi evhikini kumbe nkarhi wo karhi esikwini lowu ha wona va nga swi kotaka ku yingisela munhu loyi a va endzeleke? Ku cinca nkarhi wa vutirheli bya wena wu fambisana ni swiyimo swa vanhu va le nsin’wini ya ka n’wina swi nga endla leswaku u va ni vuyelo lebyinene.—1 Kor. 9:23, 26.

³ Vahuweleri vo tala va kume swi vuyerisa ku ya ensin’wini nimadyambu. Vini va miti van’wana va va va tiketlile naswona va tala ku yingisela hi nkarhi wolowo. Tanihi leswi hi nkarhi wa xixika ri hatlaka ri pela, ku nyikela vumbhoni hi riqingho (laha swi pfumeleriwaka) nimadyambu swi nga pfuna. Ku nyikela vumbhoni etindhawini ta mabindzu ni le tindhawini ta mani na mani i tindlela tin’wana to fikelela vanhu hi mahungu lamanene.

⁴ Hi n’hweti ya ntirho wo hlawuleka, vandlha rin’wana ri hlele ku ya nyikela vumbhoni hi Mugqivela ni Sonto hi nkarhi wa mpimavayeni kutani hi Ravunharhu ni Ravuntlhanu wun’wana ni wun’wana va chumayela nimadyambu. Va tlhele va hlela ku nyikela vumbhoni hi riqingho ni ku tirha endhawini ya mabindzu. Malunghiselelo lawa ma endle leswaku vandlha ri yi hisekela swinene nsimu lerova ri hlela ku ya emahlweni ni malunghiselelo lawa.

⁵ Hisekela Ku Endla Maendzo Yo Vuyela: Loko swi tika ensin’wini ya ka n’wina ku kuma vanhu ekaya loko u endla maendzo yo vuyela, ringeta ku veka nkarhi lowu u nga ta tlhela u vuya ha wona u nga si suka emutini wolowo hambi ku ri eka riendzo ro sungula. Kutani, tiyiseka leswaku u fika hi nkarhi lowu mi twananeke ha wona. (Mat. 5:37) Loko swi fanela, u nga kombela nomboro ya riqingho ra n’wini wa muti. Leswi swi nga ku pfuna leswaku u kota ku tlhela u vulavurisana na yena.

⁶ Matshalatshala ya hina yo lavisisa lava swi va fanelaka ni ku tlhelela eka lava kombiseke ku tsakela, Yehovha u ta ma katekisa hakunene.—Swiv. 21:5.