Xana U Tshama U Ringeta Ku Nyikela Vumbhoni Nimadyambu?

¹ Hinkwerhu ka hina hi kuma ntsako loko hi veka mihandzu entirhweni wa hina. Hi hala tlhelo, loko hi nga swi koti ku vona vuyelo lebyinene, ntirho wu nga hundzuka nchumu wo hi heta matimba naswona wu nge hetisiseki. Ntirho lowu nga ni xikongomelo wona hi woxe wa vuyerisa, naswona i nkateko. (Ringanisa Eklesiasta 3:10-13.) Hi nga tirhisa nsinya lowu wa nawu entirhweni wa hina wo chumayela. Ha swi tiva leswaku loko hi famba hi yindlu na yindlu naswona hi kota ku vulavurisana ni vanhu hi mayelana ni Bibele, hi tlhelela ekaya hi phyuphyile emoyeni. Ha swi twa leswaku hi hetisise swo karhi.

² Etindhawini tin’wana se swa tika ku kuma vanhu ekaya eminkarhini yin’wana ya siku. Swiviko swi komba leswaku etindhawini to tala ku tlula 50 wa tiphesente ta vanhu va va va nga ri kona ekaya loko hi fika ni mixo. Mavandlha yo tala ya langutane ni xiphiqo lexi hi ku endla malunghiselelo ya ku veka vumbhoni nimadyambu, naswona ya humelele kahle. Vahuweleri va vika leswaku loko va endza nimadyambu, vanhu vo tala va va va ri kona ekaya, naswona hakanyingi vanhu va va va tiwiserile naswona va ri yingisela rungula ra Mfumo. Xana u tshama u ringeta ku nyikela vumbhoni nimadyambu ensin’wini ya ka n’wina?—Ringanisa Marka 1:32-34.

³ Vakulu Va Hlela Ku Nyikela Vumbhoni Nimadyambu: Etindhawini tin’wana minhlangano ya ntirho wa nsimu ya nindzhenga kumbe ya nimadyambu yi seketeriwe kahle. Ku fanele ku anakanyeriwa vahuweleri lavantshwa lava xikolo xa vona xi humaka nindzhenga ni lavakulu lava chayisaka entirhweni nimadyambu. Vahuweleri van’wana lava va nga swi kotiki ku huma nsimu hi mahelo-vhiki va kuma leswaku ku nyikela vumbhoni nimadyambu exikarhi ka vhiki i ndlela leyi tirhaka eka vona leswaku va hlanganyela entirhweni wo chumayela.

⁴ Ku ni mintirho ya tala leyi u nga hlanganyelaka eka yona hi ku nyikela vumbhoni nimadyambu. U nga nyikela vumbhoni hi yindlu na yindlu hi timagazini kumbe u tirhisa buku leyi fambisiwaka n’hweti yoleyo. Nimadyambu i nkarhi lowunene wo endzela vanhu lava a va nga ri kona emakaya loko vahuweleri va va endzerile ninhlikanhi kumbe hi mahelo-vhiki. Exitarateni ku nga ha va nsimu ya kahle yo nyikela vumbhoni, leswaku u kota ku vulavula ni vanhu lava yaka emakaya va huma emintirhweni. Vo tala va kuma leswaku nimadyambu i nkarhi lowunene wo endla maendzo yo vuyela eka lava va kombiseke ku tsakela.

⁵ Xalamuka Naswona U Tlhariha: Ku huma hi mpimavayeni kumbe loko ra ha ku pela swi nga va ni khombo etindhawini tin’wana. Ku ta va vutlhari ku famba mi ri vambirhi kumbe hi ntlawa eswitarateni leswi nga ni timboni naswona mi endzela makaya ni miako leyi mi tiyisekaka leswaku mi ta va mi hlayisekile. Loko mi gongondza enyangweni, yimani laha mi nga kotaka ku voniwa kahle, naswona mi titivisa kahle. Vanani lava twisisaka. Loko mi xiya leswaku mi fike hi nkarhi lowu nga fanelangiki, tanihi loko ndyangu wu ri karhi wu dya, va byeleni leswaku mi ta ta nkarhi wun’wana. Hi ntolovelo swa antswa ku hlela ku nyikela ka n’wina vumbhoni hi tiawara ta nimadyambu, ematshan’wini yo endza se byi ri vusiku, loko vini va miti va tilunghiselela ku ya lata rimbambu.

⁶ Madyambu yo leha ya ximumu i nkarhi lowunene ngopfu wo nyikela vumbhoni nimadyambu. Loko Xikwembu hi “xi tirhela vusiku ni nhlekanhi” Yehovha u ta katekisa matshalatshala ya hina hakunene.—Nhlav. 7:15.