Xana U Nga Cinca Nkarhi Wa Wena Wa Nsimu Leswaku Wu Pfumelelana Ni Swiyimo?
1. Ha yini hi fanele hi cinca nkarhi wa hina wo chumayela leswaku wu pfumelelana ni swiyimo?
1 Tanihi Vakreste va ntiyiso, hi amukele xirhambo xo va “vaphasi va vanhu.” (Mat. 4:19) Ku fana ni vaphasi va tinhlampfi hi ta kota ku phasa vanhu loko hi hlela nkarhi wa hina leswaku hi chumayela laha vanhu va kumekaka kona. Nindzhenga ni nimadyambu vanhu vo tala va va va ri emakaya. Hi xitalo va va va tiwiserile kutani va tala ku amukela vaendzi. Xana u nga hlela xiyimiso xa wena leswaku u kota ku chumayela hi nkarhi wolowo?—1 Kor. 9:23.
2. Hi tihi tindlela tin’wana leti hi nga fikelelaka vanhu vo tala hi mahungu lamanene?
2 Ku Chumayela Nimadyambu: Ku hlela ka ha ri ni nkarhi leswaku hi kota ku chumayela nimadyambu swi nga hi pfuna leswaku hi kota ku chumayela mahungu lamanene eka vanhu vo tala. (Swiv. 21:5) Vantshwa va nga ya ensin’wini loko va vuya exikolweni. Kasi vamakwerhu lavan’wana va nga ya ensin’wini loko va vuya entirhweni. Mintlawa yin’wana ya dyondzo ya buku yi nga hlela ku chumayela awara yin’we yi nga si ya edyondzweni ya buku.
3. Hi tihi tindlela leti u nga ti tirhisaka ku chumayela nindzhenga ni nimadyambu ensin’wini ya ka n’wina?
3 Ku chumayela nindzhenga kumbe nimadyambu hi yindlu ni yindlu swi ta endla leswaku hi chumayela vanhu lava hi xitalo hi nga va kumiki emakaya. Etindhawini tin’wana, ntirho wa le xitarateni ni tindlela tin’wana to chumayela swi nga endliwa hambi ku ri madyambu. Nakambe vo tala va kuma nkarhi wa nimadyambu wu faneleka kahle ku endla maendzo yo vuyela ni ku sungula tidyondzo ta Bibele.
4. Ha yini swi ri swa nkoka ku tirhisa vutlhari ni ku va la anakanyelaka loko u ri karhi u chumayela nimadyambu?
4 Ku Laveka Vutlhari: Ku chumayela nimadyambu swi lava vutlhari. Hi ntolovelo swa antswa ku endzela vanhu ra ha ku pela ku ri ni ku va endzela loko se va lava ku ya eku etleleni. (Filp. 4:5) Loko u gongondza, yima laha va nga ta ku vona naswona u vula leswaku hi wena mani. Hatlisa u vula mhaka leyi u teke ha yona. Loko u fike hi nkarhi lowu nga riki wunene, wo fana niloko ndyangu wu ri eku dyeni, va byele leswaku u ta ta siku rin’wana. Minkarhi hinkwayo va na la anakanyelaka.—Mat. 7:12.
5. Hi nga swi papalata njhani swiyimo leswi nga ni khombo loko hi ri karhi hi chumayela?
5 Nakambe hi fanele hi xiya swiyimo leswi nga hi hoxaka ekhombyeni. Loko u chumayela se ri phumerile, i swinene ku famba ni un’wana kumbe mi ri ntlawa. Fambani laha ku nga ni timboni naswona mi nga fambeli ekule ni vanhu. Chumayelani ntsena laha mi titwaka mi sirhelelekile. Papalatani tindhawu leti dumeke hi vugevenga loko se ri perile.—Swiv. 22:3.
6. Hi byihi vuyelo lebyi vaka kona hi ku chumayela nindzhenga ni nimadyambu?
6 Ku chumayela nindzhenga ni nimadyambu swi ta hi pfuna leswaku hi tirha ni maphayona ya nkarhinyana ni ya nkarhi hinkwawo. (Rhom. 1:12) Xana u nga hlela xiyimiso xa wena leswaku u kota ku chumayela hi nkarhi lowu?