Ku Twarisa Mahungu Lamanene

Hi Minkarhi Ya Madyambu

1 Van’wana va vadyondzisiwa vo sungula va Yesu Kriste va byeriwile hi muprista lonkulu wa Vayuda a ku: “Mi tatile Yerusalema hi dyondzo ya n’wina.” (Mintirho 5:28) Entiyisweni, vamakwerhu a va endle ntirho lowunene wa ku nyikela vumbhoni etikweni rero naswona handle ko kanakana va tirhe hi ku gingiriteka leswaku va fikelela un’wana ni un’wana ensin’wini ya ka vona. Va ye emahlweni va nyikela vumbhoni kwalaho ni kun’wana.—Mintirho 8:25.

2 Etindhawini to tala namuntlha, hi tatile nsimu ya hina hi dyondzo ya ntiyiso. Ku ve na ku andza lokunene ka vahuweleri ni ku andza loku fanaka eka nhlayo ya mabandlha. Tinsimu ti ye ti va tintsongo naswona ta karhi ta hlanganisiwa hi xihatla. Swi ve leswi fanelaka leswaku hi andzisa nsimu ya hina leswaku hi fikelela vanhu lava engetelekeke hi mahungu lamanene.

MIMPFUNO YA KU NYIKELA VUMBHONI NI MADYAMBU

3 Entiyisweni, vahuweleri vo tala va kume leswaku va nga andzisa nsimu ya vona hi ku endzela makaya hi minkarhi ya madyambu. Enkarhini wolowo va swi kota ku vulavurisana ni vini va miti vo tala lava hakanyingi va nga riki kona ekaya ni nhlikanhi. Vahuweleri va vike leswaku va kuma munhu ekaya rin’wana ni rin’wana ensin’wini ya ka vona loko va endza ni madyambu. A ku na vanhu vo tala ntsena ekaya kambe lava kumiwaka hakanyingi va kumiwa va tiwiserile naswona va tsakela ku yingisa rungula ra hina. Valanguteri va xifundza va swi kotile ku pfuna mabandlha yo tala ku hlela malunghiselelo ya ku nyikela vumbhoni ni madyambu. Vahuweleri hinkwavo va khutaziwa ku seketela lunghiselelo leri ra nkarhi na nkarhi hi Ravunharhu ni madyambu hi nkarhi wa riendzo ra mulanguteri wa xifundza.

4 Xana u tshame u ringeta ku nyikela vumbhoni hi nkarhi wa madyambu ensin’wini ya ka n’wina? Hambi leswi tiawara ta ni nhlikanhi ti nga tintsongo swinene hi tin’hweti ta vuxika, hi nga ha swi kota ku tirhisa tiawara to sungula ta ni madyambu ku nyikela vumbhoni hi yindlu na yindlu. Hi ximumu hi na nkarhi wo tshamanyana ehandle ku tlula leswi hi endlisaka swona minkarhi yin’wana. Xiphemu xa ni madyambu xi nga tirhiseriwa ku nyikela vumbhoni hi yindlu na yindlu kumbe ku endzela lava nga kumiwangiki emakaya. Kutani kumbexana endzhakunyana ni madyambu, hi nga endla maendzo yo vuyela kumbe hi fambisa tidyondzo ta Bibele. Kavula, hi fanele hi tirhisa moya wa mianakanyo ya ku titsongahata ni ku tirhisa ku avanyisa lokunene, ngopfu-ngopfu loko hi nyikela vumbhoni etindhawini leti nga ha vaka ti nga hlayisekanga ni madyambu.

VANA NI NKHATHALELO

5 Leswaku hi humelela eku nyikeleni ka vumbhoni ni madyambu, hi fanele hi tsundzuka tinhla tin’wana ta xisekelo. Hi xikombiso, tanihi leswi vanhu van’wana etindhawini tin’wana va nga ha chavaka hikwalaho ka vaendzi lava nga languteriwangiki lava taka ni madyambu, hi fanele hi va ni rirhandzu ni xinghana eka swingheniso swa hina naswona hi hatlisa hi veka xikongomelo xa riendzo ra hina erivaleni. Loko hi hundzisela nkhathalelo wa xiviri eka vuhlayiseki bya vini va miti, kumbexana va ta titwa va ntshunxekile naswona va nga ha voyamela ngopfu eku tiphofuleni hi xitalo.

6 Eka tindhawu tin’wana, vini va miti va teke magoza yo rindza vuhlayiseki bya vona. Leswi swi nga ha lava leswaku hi tirhisa intercom kumbe n’wini wa muti a nga ha vulavula na hina hi ku tirhisa nyangwa lowu pfariweke kumbe a lava ku hi vona hi ku tirhisa mbhovo wa le nyangweni. Hi ku xixima malunghiselelo lawa n’wini wa muti a nga na wona, a nga ha pfumela ku yingisa mintirho leyi hi lavaka ku avelana yona na yena.

7 Mabandlha yo tala ma hlele ku nyikela vumbhoni hi ntlawa, madyambu man’we kumbe mambirhi evhikini. Leswi swi nyike vahuweleri nkarhi wo tala wo hlanganyela evutirhelini, lava va nga entirhweni wo tihanyisa hi nkarhi lowu taleke naswona va tirha ni vahuweri van’wana lava va nga si tshamaka va tirha na vona emahlweni hikwalaho ka swiyimiso leswi kavanyetaka swa ntirho. Ku nyikela vumbhoni ni madyambu swi endle swi koteka eka vahuweleri van’wana ku engetela nkarhi lowu va wu hetaka evutirhelini bya nsimu, naswona leswi hi ku fanana, swi vangele leswaku va va lava humelelaka swinene eku avelaneni ka mahungu lamanene ni van’wana. Nakambe, tidyondzo to tala ta Bibele ti sunguriwile hikwalaho ka ku vulavurisana ni vanhu lava nga si tshamaka va yingisela Timbhoni ta Yehova emahlweni.

8 Xana swi nga ha koteka eka wena leswaku u hlanganyela eku nyikeleni ka vumbhoni ni madyambu naswona u tsakela nkarhi lowu wu engetelekeke wo “tirha ntirho wa muvuri wa rito”? (2 Tim. 4:5) Loko vo tala va hina va swi kota ku hlamula xivutiso xexo hi ndlela leyinene, kumbexana na hina hi ta va hi endla ntirho wo antswa wa ku tata nsimu ya hina hi ntiyiso.