Twarisa Vito Ra Yehovha Ni Ndlela Leyi A Tirhisanaka Na Hina Ha Yona
1 “Nkhensani Yehovha, vitanani vito rakwe, tivisani vanhu ndlela leyi a tirhisanaka na vona ha yona. . . . Timbilu ta lava va lavaka Yehovha a ti tsake.” (Ps. 105:1, 3) Mupisalema la tsaleke marito lawa u kume ntsako lowukulu hi ku byela van’wana hi Yehovha ni “ndlela leyi a tirhisanaka” na hina ha yona. Hi yihi ndlela ya kona? A swi kanakanisi leswaku yi yelana ni vuhosi lebyi vangamaka bya Xikwembu ni “mahungu lamanene ya ku ponisiwa ha yena.”—Ps. 96:2, 3; 145:11, 12.
2 Leswi hi tshinelaka eka nguva ya Xitsundzuxo xa 2001, hi ni swivangelo swo tala swa ku tsaka hi ndlela leyi Yehovha a tirhisanaka na hina ha yona. Hi ndlela yihi? Handle ko kanakana, Xilalelo xa Hosi i nkhuvo lowukulu wa lembe eka Vakreste hinkwavo va ntiyiso. A xi kona xiendlakalo xin’wana lexi nga xa nkoka ku fana na xona, lexi nga ni xikongomelo xo fana na xona ni lexi tlangeriwaka ku fana na xona. Wolowo i nkarhi wa leswaku hinkwerhu hi tsundzuka leswi Yehovha na Yesu va hi endleleke swona leswaku hi kuma ndlela ya ku ponisiwa. Hikwalaho a swi hlamarisi leswi hi ntolovelo hi nguva ya Xitsundzuxo hi languteleke ku tirha swinene ensin’wini, hi twarisa “mahungu lamanene ya ku ponisiwa”!
3 Xana U Ta Va Phayona Ra Nkarhinyana? Hi April n’wexemu vanhu va 10 126 va tsarise ku va maphayona ya nkarhinyana eAfrika Dzonga. (EBotswana ku ve ni maphayona ya nkarhinyana ya 173, eLesotho a ma ri 237, eNamibia a ma ri 92, eXihlaleni xa St. Helena a ma ri 11 kasi eSwaziland a ma ri 286.) Xana nan’waka, hi nga endla leswaku March na April ti va tinh’weti to hlawuleka ta ku tirha swi nyawula evutirhelini? March yi ni Migqivela ya ntlhanu kasi April yi ni Tisonto ta ntlhanu naswona Siku ra hina ro hlawuleka ra Timagazini ri ta va hi April 7. Hi ku kunguhata ku tirha swi nyawula hi mahelo-vhiki, vahuweleri vo tala lava tirhaka ntirho wa ku tihanyisa siku ni siku, va kume leswaku va nga swi kota ku va maphayona ya nkarhinyana. Leswaku phayona ra nkarhinyana ri fikelela tiawara leti lavekaka ta 50 hi n’hweti, hi xiringaniso ri fanele ku tirha tiawara ta 12 hi vhiki. Xiyisisa swiyimiso leswi ringanyetiweke, leswi nga ebokisini eka tluka 4. Xana xin’wana xa swona xi ta pfumelelana ni swiyimo swa wena? Loko swi nga pfumelelani, kumbexana u nga ha tiendlela xiyimiso xa wena lexi nga ta ku pfumelela ku va phayona ra nkarhinyana hi March na April.
4 Vakulu va fanele ku sungula sweswi ku tshivelela ku hisekela ntirho lowu engetelekeke evutirhelini ni ku wu seketela. N’wexemu, evandlheni rin’wana leri vakulu hinkwavo ni malandza ya vutirheli va tsariseke ku va maphayona ya nkarhinyana, vahuweleri va 64 eka va 121 va ve maphayona hi April! Vandlha ri tlhele ri tsaka loko ri vona tsevu wa vahuweleri lava nga khuvuriwangiki va sungula ku vika hi March na April. Kunene, wolowo i nkarhi lowu faneleke wa leswaku vana ni vanhu lava ha ku sungulaka ku tsakela va vutisa vakulu loko va fanelekela ku sungula ntirho wa ku nyikela vumbhoni erivaleni.
5 Matshalatshala Lama Engetelekeke Ma Tisa Mikateko: Mavandlha lama vekaka tipakani to hlawuleka ma tlhela ma endla matshalatshala lama engetelekeke, ma kuma mikateko yo tala. Mavandlha man’wana ma nga ha lwela ku hlanganisa nsimu leyi nga tirhiwiki minkarhi hinkwayo, ma yisa nyingiso etindleleni tin’wana ta ku nyikela vumbhoni kumbe ma kandziyisa mhaka ya ku nyikela vumbhoni hi riqingho—ku nga ndlela leyi humelelaka ya ku kuma vanhu lava nga riki kona emakaya ni ku fikelela makaya lawa swi tikaka ku nghena eka wona.
6 Xana vuvabyi ni vudyuhari swi fanele ku heta munhu matimba leswaku a nga hlanganyeli hi xitalo evutirhelini? A swi vi tano eka swiyimo hinkwaswo. Hi xikombiso, makwerhu wa xisati la dyuhaleke, la nga ni malembe ya 86 hi vukhale, la khomiweke hi vuvabyi bya khensa u ve phayona ra nkarhinyana hi April n’wexemu, hambileswi milenge ya yena yi pfimbeke. Ku nyikela vumbhoni hi riqingho ku endle leswaku a swi kota ku hlanganyela hi xitalo evutirhelini, a ndlandlamuxa ndlela leyi a dzunisaka Yehovha ha yona. Sweswo swi ve ni vuyelo lebyi tsakisaka eka yena ni le vandlheni.
7 Lunghekela Xitsundzuxo: Nan’waka Xitsundzuxo xi ta va hi April 8. Leswi siku leri ku nga Sonto, swi ta olova leswaku vo tala va va kona. Loko (1) ho va kona hi tlhela hi (2) rhamba van’wana leswaku va hlanganyela na hina eXitsundzuxweni, hi nga va ni nhlayo leyikulu swinene ya lava nga ta va kona. Hi fanele ku rhamba vamani?
8 Kambisisa tirhekhodo ta wena ta ntirho wa le nsin’wini ku vona loko ku nga ri na mavito ya lava va kombiseke ku tsakela ntiyiso, hambiloko ku ri leswaku a wu va endzeli minkarhi hinkwayo. Tiyiseka leswaku u endzela vanhu lava hinkwavo ka ha sele mavhiki mambirhi kumbe manharhu emahlweni ka Xitsundzuxo, u va nyika xirhambo xa Xitsundzuxo. Loko swiyimo swa wena swi ku pfumelela, lava va lavaka ku ta, va byele leswaku u ta va lunghiselela xo famba ha xona.
9 Emavandlheni man’wana, swirhambo swa Xitsundzuxo a swi tirhisiwi hinkwaswo. Vamatsalana va mavandlha va fanele ku tiyiseka leswaku swirhambo swi kumeka ka ha ri ni nkarhi leswaku vahuweleri va ta swi fambisa hinkwaswo. U nga ha thayipa kumbe u tsala swi vonaka emakumu ka xirhambo, malunghana ni nkarhi ni ndhawu leyi Xitsundzuxo xi nga ta khomeriwa eka yona. Kumbe u nga ha katsa xirhambo lexi kombisaka adirese ya Holo ya Mfumo loko ku ri leswaku mi ta khomela Xitsundzuxo eka yona. Tsundzukani leswaku hi ntolovelo swirhambo swa Xitsundzuxo swi fanele ku nyikiwa vini va miti hi xiviri.
10 Tsundzuka Vanhu Lava Holeke: Swa tsakisa loko xichudeni xa Bibele xi tinyiketela eka Yehovha kutani xi kombisa ku tinyiketela ka xona hi ku khuvuriwa. Kambe, lembe ni lembe, van’wana exikarhi ka hina va tshika ku hlanganyela na hina naswona va tshika ku byela van’wana hi Yehovha ni ndlela leyi a tirhisanaka na hina ha yona. Swi fanerile leswaku hi karhateka. Hambileswi vunyingi bya lava holeke va nga wu fularhelangiki ntiyiso, swi nga ha endleka va tshike ku chumayela hikwalaho ka ku hela matimba, swikarhato swa munhu hi yexe kumbe mivilelo yin’wana ya vutomi. (Mat. 13:20-22) Lava va tsaneke emoyeni va lava ku pfuniwa ku tlhelela evandlheni va nga si mitiwa hi xiyimiso lexi xa Sathana. (1 Pet. 5:8) Hi nguva leyi ya Xitsundzuxo hi lava ku endla matshalatshala yo hlawuleka ya ku pfuna hinkwavo lava holeke leswaku va tlhela va hlanganyela eku chumayeleni ka mahungu lamanene, loko va ha faneleka.
11 Matsalana wa vandlha u fanele ku tivisa vafambisi va tidyondzo ta buku hi vanhu lava holeke, lava nga vaka va ri kona emintlaweni ya vona. Komiti ya Ntirho ya Vandlha yi fanele ku teka goza ra ku endla malunghiselelo ya maendzo ya vurisi eka hinkwavo lava holeke. Loko ko kumeka leswaku munhu yoloye a nga vuyeriwa hi ku fambiseriwa dyondzo ya Bibele, mulanguteri wa ntirho u ta vonana ni swirho leswin’wana swa komiti ya ntirho va tiyisekisa leswaku i mani loyi a nga fanelekaka ku antswa leswaku a fambisa dyondzo yoleyo. Hambileswi dyondzo yoleyo yi nga fanelangiki yi fambisiwa nkarhi wo leha, loyi a averiweke ku yi fambisa a nga vika nkarhi, maendzo ya ku vuyela ni dyondzo yoleyo ya Bibele.
12 Hi April n’wexemu, makwerhu wa xisati loyi a a ri entirhweni wa yindlu ni yindlu, u fambise timagazini eka jaha rin’wana exitarateni. Ri vule leswaku nsati wa rona i Mbhoni leyi holeke. Ri vutise laha Holo ya Mfumo yi nga kona kutani ri rhamba makwerhu wa xisati leswaku a va endzela, rona ni nsati wa rona. Hikwalaho ka sweswo, mpatswa lowu wu ve kona enhlanganweni lowu landzelaka kutani wu pfumela ku dyondzeriwa Bibele.
13 Lunghekela Ntirho Lowu Engetelekeke! Mupisalema la vuleke leswaku hi fanele ku twarisa vito ra Yehovha ni ndlela leyi a tirhisanaka na hina ha yona u engeterile: “N’wi yimbeleleleni, n’wi yimbeleleleni miloti, ehleketisisani hi mintirho yakwe hinkwayo yo hlamarisa. Tibumeni hi vito rakwe ro kwetsima.” (Ps. 105:2, 3) A hi kombiseni ku khathala hi vito ra Yehovha lerikulu ni hi “mintirho yakwe yo hlamarisa,” hi ku tikarhata swinene evutirhelini, hi endla leswaku nguva leyi ya Xitsundzuxo yi va leyikulu swinene eka leti nga tshama ti va kona!
[Bokisi leri nga eka tluka 4]
Tindlela To Hambana-hambana To Tirha Tiawara Ta 12 Hi Vhiki Leswaku U Va Phayona Ra Nkarhinyana
Siku Tiawara
Musumbhunuku 1 2 − −
Ravumbirhi 1 − 3 −
Ravunharhu 1 2 − 5
Ravumune 1 − 3 −
Ravuntlhanu 1 2 − −
Mugqivela 5 4 3 5
Sonto 2 2 3 2
Ntsengo: 12 12 12 12
Xana xin’wana xa swiyimiso leswi xi nga ku pfuna? Loko ku ri leswaku a xi nge ku pfuni, ha yini u nga tiendleli xa wena?