“Chumayela Rito Ra Xikwembu Hi Ku Hetiseka”

¹ Loko u tlangela nchumu wo karhi lowunene lowu u nyikiweke wona, xana a wu kombisi ku tlangela ka wena hi langutelo ra wena ni hi swiendlo swa wena? Kunene swi tano! Xiya ndlela leyi muapostola Pawulo a anguleke ha yona eka vunene ni musa wa rirhandzu lowu Yehovha a wu kombiseke vanhu. U te: “A ku nkhensiwe Xikwembu hikwalaho ka nyiko ya xona ya mahala leyi nga hlamuselekiki”! Xana ‘nyiko yoleyo ya mahala’ a yi katsa yini? A yi katsa hinkwawo “musa lowu nga faneriwiki lowukulu wa Xikwembu” lowu xi hi kombeke wona, lowu kombisiweke swinene hi ku nyikela N’wana wa xona leswaku a va xitlhavelo xa swidyoho swa hina.—2 Kor. 9:14, 15; Yoh. 3:16.

² Xana marito ya Pawulo a mo va ku nkhensa hi nomu ntsena? Nikatsongo! U kombise ku tlangela ka yena lokukulu hi tindlela to tala. A a karhatekile swinene hi vumoya bya Vakreste-kulobye naswona a a lava ku va pfuna leswaku va vuyeriwa hi ku helela eka musa wa rirhandzu wa Xikwembu. Malunghana na vona, Pawulo u te: “Hikwalaho ko va ni xinakulobye xa rirhandzu eka n’wina, leswi hi swi tsakeleke swinene a hi ku hundzisela mahungu lamanene ya Xikwembu ntsena eka n’wina, kambe ni mimoya-xiviri ya hina, hikuva mi ve lava rhandzekaka eka hina.” (1 Tes. 2:8) Ku engetela eku pfuneni lava ana se a va ri swirho swa vandlha leswaku va fanelekela ku ponisiwa, Pawulo u chumayele mahungu lamanene a nga karhali, a famba magidi ya tikhilomitara hi milenge ni le lwandle leswaku a ta kuma “lava a va ri ni mboyamelo lowunene eka vutomi lebyi nga heriki.” (Mint. 13:48) Ku nkhensa ka Pawulo hinkwaswo leswi Yehovha a n’wi endleleke swona ku n’wi susumetele ku “chumayela rito ra Xikwembu hi ku hetiseka.”—Kol. 1:25.

³ Xana ku tlangela ka hina hinkwaswo leswi Yehovha a hi endleleke swona, a ku hi susumeteli ku pfuna lava lavaka mpfuno wa moya evandlheni ra ka hina? (Gal. 6:10) Naswona, xana a hi susumeteleki ku hlanganyela hi xitalo hilaha hi nga kotaka hakona eku chumayeleni ka mahungu lamanene ya Mfumo, ensin’wini ya ka hina?—Mat. 24:14.

⁴ Lunghelo Ro Kombisa Ku Tlangela: Lembe ni lembe, Xitsundzuxo xa rifu ra Kreste xi hi nyika lunghelo ro hlawuleka ra ku kombisa ku tlangela ka hina leswi Yehovha na Yesu va hi endleleke swona. Lowu a ko va nhlangano wun’wana kumbe ku tsundzuka xiendlakalo xo karhi lexi nga vuriki nchumu. Yesu u te: “Tshamani mi ri karhi mi endla leswi leswaku mi ndzi tsundzuka.” (Luka 22:19) Xitsundzuxo xa rifu ra Kreste i xiendlakalo lexi hi tsundzuxaka leswi Yesu a nga swona. I nkarhi wa ku xiya leswaku namuntlha i munhu la hanyaka naswona u le ku tirheni, u nyikiwe ku dzuneka ni vuhosi hikwalaho ka vutshembeki ni ku tinyiketela ka yena. Nkhuvo lowu wu tlhela wu hi nyika lunghelo ra ku kombisa ku titsongahata ka hina eka vunhloko bya Kreste tanihi leswi ku nga yena la kongomisaka timhaka ni mintirho ya vandlha ra Vukreste. (Kol. 1:17-20) Vanhu va Xikwembu hinkwavo va fanele ku kombisa ku xixima Xitsundzuxo xa rifu ra Kreste hi ku va kona enkhubyeni lowu. Nan’wana xi ta tlangeriwa endzhaku ka ku pela ka dyambu hi Ravumune, March 28, 2002.

⁵ Hikwalaho ka matshalatshala lama endliweke emahlweni ko tlangeriwa ka Xitsundzuxo n’wexemu, hi ve ni nhlayo leyi tlakukeke ngopfu ya vanhu va 202 271 lava veke kona ematikweni lama nga ehansi ka rhavi ra Afrika Dzonga. I vangani lava nga ta va kona nan’waka? Swi ta titshega swinene hi ‘ku tirha hi matimba ni ku tikarhata’ ka hina leswaku hi pfuna vanhu vo tala hilaha hi nga swi kotaka hakona leswaku va va kona.—1 Tim. 4:10.

⁶ Ku engetela eka ku va kona eXilalelweni xa Hosi, hi nga andzisa ntirho wa hina wa nsimu. A swi kanakanisi leswaku makume ya magidi ya vamakwerhu va ta va maphayona ya nkarhinyana n’hweti yin’we kumbe ku tlula. Emalembeni ya ntlhanu lama hundzeke, hi ve ni xiringaniso xa lembe ni lembe xa maphayona ya nkarhinyana ya 17 788 hi nkarhi wa Xitsundzuxo, ku sukela hi March ku ya fika hi May. Xana nan’waka u nga lunghisa swiyimo swa wena leswaku u hlanganyela eka lunghelo leri tsakisaka ra ku va phayona ra nkarhinyana? Yoleyo yi ta va ndlela leyinene yo kombisa leswaku u ri tlangela hi mbilu hinkwayo lunghiselelo ra Xikwembu ra rirhandzu ra xitlhavelo xa Kreste. A swi kanakanisi leswaku Yehovha u ta ku katekisa, hilaha mintokoto leyi landzelaka yi kombisaka hakona.

⁷ Makwerhu wa xisati la tirhaka nkarhi hinkwawo, u tsale leswi landzelaka malunghana ni ntokoto lowu a veke na wona loko a ri phayona ra nkarhinyana hi March n’wexemu: “Vutirheli Bya Hina Bya Mfumo bya February 2001 byi khutaze un’wana ni un’wana loyi swiyimo swa yena swi n’wi pfumelelaka leswaku a va phayona ra nkarhinyana hi nkarhi wa Xitsundzuxo. Leswi n’hweti ya March yi nga ni Migqivela ya ntlhanu, yi pfumelelane ni xiyimiso xa mina. Kutani ndzi endle xiboho xa ku yisa xikombelo xa mina.” Loko n’hweti yi sungula, u tivekele pakani ya ku ringeta ku sungula dyondzo ya le kaya ya Bibele. Xana u humelerile? Ina, u humelerile hi awara ya yena ya vu-52 loko a ri eku chumayeleni hi n’hweti yoleyo! U gimete hi ku yini? U te: “Mikateko leyi tsakisaka yi lo vuya loko hi kulula hi n’watseka swi vonaka.”

⁸ Hi yihi mikateko leyi kumiwaka hi ndyangu lowu phayonaka swin’we? Ndyangu lowu nga ni swirho swa mune, lowu phayoneke swin’we hi April n’wexemu wu vule leswaku n’hweti yoleyo yi nge pfuki yi rivalekile. Manana wa kona u te: “Siku ni siku a hi tshama hi ri ni langutelo lerinene hikuva a hi va swin’we evutirhelini! Nkarhi wa swakudya a wu tsakisa swinene hikuva a hi bula hi vutirheli bya hina bya siku ni siku.” N’wana wa kona wa jaha u te: “Ndzi tsakele ku tirha nsimu na Tatana exikarhi ka vhiki, ku nga nkarhi lowu hi ntolovelo a va ka a ri entirhweni.” Tata wa kona u te: “Tanihi nhloko ya ndyangu, ndzi titwe ndzi enerisekile ku tiva leswaku hi tirhe swin’we entirhweni wa nkoka swinene enkarhini lowu hi hanyaka eka wona.” Xana ndyangu wa ka n’wina wu nga swi kota ku phayona swin’we? Ha yini mi nga burisani tanihi ndyangu, mi vona loko swi ta koteka leswaku ndyangu hinkwawo wu va maphayona ya nkarhinyana hi nkarhi lowu wa Xitsundzuxo?

⁹ Xana Hi Nga Endla March Yi Va N’hweti Yo Hlawuleka Ku Tlula Hinkwato? Emasungulweni ya lembe ra 2000, Vutirheli Bya Hina Bya Mfumo byi tlakuse xivutiso lexi nge: “Xana Hi Nga Endla April 2000 Yi Va N’hweti Yo Hlawuleka Ku Tlula Hinkwato?” Byi ve byihi vuyelo bya kona? Ku fikeleriwe tinhlohlorhi to hlayanyana letintshwa. Afrika Dzonga ri fikelele nhlohlorhi leyikulu eka hinkwato ya maphayona ya nkarhinyana ya 10 126 hi n’hweti yin’we. Ku engetela kwalaho, hi fikelele nhlohlorhi leyintshwa ya tiawara, ya ku fambisiwa ka timagazini, ya swibukwana, ya tibroxara, ya maendzo yo vuyela ni ya tidyondzo ta Bibele. Xana wa yi tsundzuka ndlela leyi vandlha ra ka n’wina ri gingiritekeke ha yona en’hwetini yoleyo yo hlawuleka hikwalaho ka mintirho yo tala ya moya? Xana hi nga tlhela hi endla leswi fanaka nan’waka kumbe leswi tlulaka sweswo? Loko hinkwerhu hi tirha swi vonaka, March 2002 yi nga va “Nh’weti Yo Hlawuleka Ku Tlula Hinkwato.” Ha yini ku hlawuriwa March?

¹⁰ Ku ni swivangelo swimbirhi leswi endlaka leswaku March yi va n’hweti yo endla ntirho wo hlawuleka. Xo sungula, Xitsundzuxo xi ta tlangeriwa loko March yi ya eku heleni, kutani sweswo swi ta hi nyika nkarhi wo tala emasungulweni ya n’hweti leswaku hi rhamba vanhu vo tala hilaha hi nga kotaka hakona leswaku va va kona. Xa vumbirhi, nan’waka, March yi ni mahelo-vhiki ya ntlhanu, kutani sweswo swi ta endla leswaku lava tirhaka kumbe lava nghenaka xikolo swi va olovela ku va maphayona ya nkarhinyana. Ha yini u nga nambi u tshama hansi u endla xiyimiso lexi nga ku olovelaka, hi ku tirhisa khalendara leyi nga eka xiengetelo lexi? Ku va phayona ra nkarhinyana swi nga olova ku tlula ndlela leyi u ehleketaka ha yona. Hi xikombiso, hi ku hlela ku tirha tiawara ta 8 hi mahelo-vhiki man’wana ni man’wana lawa ya ntlhanu, u ta boheka ku engetela tiawara ta 10 eka masiku laman’wana ya n’hweti leswaku u fikelela tiawara ta 50 leti lavekaka.

¹¹ I yini lexi vakulu va nga xi endlaka ku pfuna hinkwavo evandlheni leswaku va “chumayela rito ra Xikwembu hi ku hetiseka”? Tinkulumo ta vona ni ndlela leyi va bulaka ni van’wana ha yona swi fanele ku va khutaza ku endla tano. Vafambisi va Dyondzo ya Buku ya Vandlha ni vapfuneti va vona va nga ha teka goza ra ku bula ni lava va averiweke emintlaweni ya vona, kutani va va pfuna hi ku kongoma. A ku laveki swo tala handle ka marito ma nga ri mangani lama khutazaka kumbe swiringanyeto leswi pfunaka. (Swiv. 25:11) Vo tala va ta xiya leswaku va nga swi kota ku hlanganyela eka lunghelo leri ra ku va phayona ra nkarhinyana, hi ku endla mindzulamiso yi nga ri yingani eka swiyimiso swa vona. Emavandlheni yo hlayanyana, vakulu vo tala ni malandza ya vutirheli ku katsa ni vasati va vona, minkarhi yin’wana hinkwavo, va veka xikombiso lexinene hi ku nghenela vuphayona bya nkarhinyana swin’we hi nkarhi wa Xitsundzuxo. Leswi swi khutaze vahuweleri vo tala leswaku va hlanganyela na vona. Swi nga ha endleka leswaku vahuweleri van’wana va nga swi koti ku phayona hikwalaho ka swiphiqo swo karhi swa miri kumbe swiyimo swin’wana, kambe va nga khutaziwa ku kombisa ku tlangela ka vona hi ku endla swo tala evutirhelini swin’we ni vandlha, hilaha va nga kotaka hakona.

¹² Leswaku vakulu va kota ku humelela, va fanele ku hlela swilo hi vukheta lebyikulu. Minhlangano ya ntirho wa nsimu yi fanele yi hleleriwa ku khomiwa hi minkarhi leyi fanelekaka evhikini hinkwaro. Loko swi koteka, mulanguteri wa ntirho u ta avela vamakwerhu lava fanelekaka ka ha ri ni nkarhi, leswaku va fambisa minhlangano hinkwayo ya ntirho wa nsimu. Swi ta lava ku lunghiselela kahle leswaku minhlangano yoleyo yi nga tluli 10 ku ya eka 15 wa timinete, ku katsa ni ku ava vanhu, ku va komba nsimu ni ku pfala hi xikhongelo. (Vona Bokisi Ra Swivutiso eka Vutirheli Bya Hina Bya Mfumo bya September 2001.) Vandlha ri fanele ku hlamuseriwa kahle hi xiyimiso xa ndlela leyi ku nga ta tirhiwa ha yona en’hwetini yoleyo naswona xi fanele ku namekiwa ebodweni ya switiviso.

¹³ Ku fanele ku hleriwa leswaku ku va ni nsimu leyi ringaneke. Mulanguteri wa ntirho u fanele ku hlangana ni makwerhu la tamelaka masimu leswaku va endla malunghiselelo ya ku tirha masimu lawa ma nga tirhiwiki minkarhi hinkwayo. Ku fanele ku kandziyisiwa mhaka ya ku tirha makaya lawa ku nga kumiwangiki vanhu eka wona, ku chumayela eswitarateni ni le switolo swin’we ni ku chumayela nimadyambu. Laha swi faneleke, vahuweleri van’wana va nga pfuniwa leswaku va chumayela hi riqingho.

¹⁴ Va Pfune Va Tlhela Va Hlanganyela eNtirhweni: Xana va kona ensin’wini ya vandlha ra ka n’wina lava nga ha chumayeriki mahungu lamanene? Vanhu volavo va ha ri swirho swa vandlha naswona va lava mpfuno. (Ps. 119:176) Leswi makumu ya misava leyi ya khale ma tshineleke swonghasi ni misava leyintshwa yi nga kwala nyongeni, hi ni xivangelo lexinene xa ku endla matshalatshala ya ku pfuna lava holeke. (Rhom. 13:11, 12) Emalembeni ya ntlhanu lama hundzeke, vanhu lava tlulaka 1 400 lembe ni lembe va amukele ku pfuniwa kutani va sungula ku chumayela nakambe. I yini lexi hi nga xi endlaka ku pfuna vanhu lava engetelekeke leswaku va tlhela va pfurhetela rirhandzu ni ntshembo leswi a va ri na swona eku sunguleni?—Hev. 3:12-14.

¹⁵ Huvo ya vakulu yi fanele ku bula hi ndlela leyi yi nga va pfunaka ha yona lava holeke emalembeni ma nga ri mangani lama hundzeke. (Mat. 18:12-14) Matsalana u fanele ku kambela makhadi ya Congregation’s Publisher Record kutani a tsala mavito ya hinkwavo lava holeke. Ku fanele ku endliwa matshalatshala yo hlawuleka yo va pfuna hi lunghiselelo ra maendzo ya vurisi. Nkulu a nga ha rhandza ku endzela muhuweleri wo karhi hi leswi va nga tshama va tolovelana ni ku va vanghana, kumbe ku komberiwa vahuweleri van’wana leswaku va pfuna. Loko ku ri leswaku vahuweleri volavo va tshame va dyondza ni loyi sweswi a holeke, va nga tsakela lunghelo ra ku n’wi pfuna hi ku hlawuleka sweswi ku nga ni xilaveko. Hi ni ntshembo wa leswaku vo tala lava holeke va ta susumeteleka ku tlhela va sungula ku chumayela rito ra Xikwembu. Loko va faneleka, nkarhi lowunene lowu va nga sungulaka ha wona i nkarhi lowu wa Xitsundzuxo!—Leswaku u kuma rungula leri engetelekeke, vona Bokisi Ra Swivutiso eka Vutirheli Bya Hina Bya Mfumo bya November 2000.

¹⁶ Xana Ku Ni Van’wana Lava Fanelekelaka Ku Chumayela? Yehovha u hambeta a katekisa vanhu va yena hi ku tisa “swilo leswi navelekaka swa matiko hinkwawo.” (Hag. 2:7) Lembe ni lembe, vanhu va magidi va faneleka ku va vahuweleri lava nga khuvuriwangiki. I vamani vanhu volavo? I vana va Timbhoni ta Yehovha ni swichudeni swa Bibele leswi endlaka nhluvuko. Hi swi tivisa ku yini leswaku va faneleka ku va vachumayeri va mahungu lamanene?

¹⁷ Vana Va Timbhoni Ta Yehovha: Vana vo tala se va hete malembe yo tala va ri karhi va famba ni vatswari va vona eku chumayeleni hi yindlu ni yindlu, hambileswi va nga si vaka vahuweleri lava nga khuvuriwangiki. March yi nga ha va n’hweti leyinene leswaku va sungula ku chumayela. U swi tivisa ku yini loko n’wana wa wena a faneleka? Buku leyi nge Ku Hleleriwa Ku Hetisisa Vutirheli Bya Hina eka tluka 100 yi vula leswaku u ta swi tiva hi “loko n’wana a ri xikombiso [lexinene] emahanyelweni ya yena naswona a swi kota ku phofula ripfumelo ra yena hi yexe hi ku vulavula ni van’wana hi mahungu lamanene, a susumeta hi mbilu ku endla tano.” Loko u vona onge n’wana wa wena wa faneleka, vulavula ni un’wana wa vakulu lava nga swirho swa Komiti ya Ntirho ya Vandlha.

¹⁸ Swichudeni Swa Bibele Leswi Fanelekaka: Endzhaku ka loko se ku hundze nkarhinyana xichudeni xa Bibele xi ri karhi xi nghenisa vutivi ni ku va kona eminhlanganweni, xi nga ha tsakela ku va muhuweleri wa Mfumo. Loko ku ri wena u dyondzelaka xichudeni xo tano, tivutise swivutiso leswi landzelaka: Xana xi endla nhluvuko lowu pfumelelanaka ni vukhale swin’we ni vuswikoti bya xona? Xana se xi sungurile ku byela van’wana hi xitshuketa hi ripfumelo ra xona? Xana xi karhi xi ambala “vumunhu lebyintshwa”? (Kol. 3:10) Xana xa swi fikelela swilaveko swa lava fanelekaka ku va vahuweleri lava nga khuvuriwangiki, leswi xaxametiweke eka matluka 97-9 ebukwini leyi nge Ku Hleleriwa? Loko swi ri tano, u fanele ku tivisa Komiti ya Ntirho ya Vandlha leswaku ku ta endliwa malunghiselelo ya leswaku vakulu vambirhi va hlangana na wena ni xichudeni xexo. Loko xi faneleka, vakulu lavambirhi va ta xi tivisa leswaku xi nga sungula ku chumayela erivaleni.

¹⁹ Ku Vuriwa Yini Hi April Na May? Tin’hweti leti na tona ti ta va leti hlawulekeke leswaku ku endliwa ntirho lowu engetelekeke evutirhelini bya nsimu. Vo tala lava veke maphayona ya nkarhinyana hi March va nga tlhela va phayona hi April na hi May kumbe hi yin’wana eka tona. Hi April na May, hi ta yisa nyingiso eku fambiseni ka magazini wa Xihondzo xo Rindza ni wa Xalamuka! evutirhelini. Ti ve ni vuyelo lebyinene eka lava va ti hlayeke! Timagazini leti ti hoxe xandla swinene leswaku ku va ni ku andza loku hlamarisaka loku hi ku voneke emisaveni hinkwayo. Ku ta endliwa matshalatshala yo hlawuleka hi April na May leswaku vanhu vo tala va fambiseriwa timagazini leti hilaha swi nga kotekaka hakona. Kunguhata ka ha ri sweswi leswaku u ta hlanganyela hi xitalo.

²⁰ Leswi ku hleriweke ntirho lowu engetelekeke wa ku chumayela, xana u fanele ku andzisa nhlayo ya timagazini leti u ti kumaka evandlheni? Lembe ra ntirho hinkwaro, hi fambisa Xihondzo xo Rindza na Xalamuka! hi Mugqivela wun’wana ni wun’wana, ku nga rona Siku ra hina ra Timagazini leri vekeriweke etlhelo. Kambe, leswi vo tala va nga ta va va ri maphayona ya nkarhinyana nileswi hinkwerhu hi nga ta heta tin’hweti timbirhi hi ri karhi hi fambisa timagazini, swi nga va swinene leswaku u andzisa xikombelo xa wena xa timagazini evandlheni. Loko u fanele ku xi andzisa, hi kombela u hatla u tivisa la tamelaka timagazini evandlheni ra ka n’wina. Hi nkarhi lowu fanaka, la tamelaka tibuku u fanele ku tiyiseka leswaku ku ni mphakelo lowu ringaneke wa xiphephana lexi nge Xana U Lava Ku Tiva Swo Tala Hi Bibele? leswaku hinkwavo va ta xi tirhisa.

²¹ Vo tala va tate marito yo nkhensa xiyenge lexi nge “Leswi U Nga Swi Vulaka Hi Timagazini” lexi kumekaka eka Vutirheli Bya Hina Bya Mfumo. Xana se u ri tirhisile lunghiselelo leri hi ku tirhisa swikombiso leswi swa swingheniso swo fambisa timagazini? Ha yini mi nga tirhisi nkarhi wo karhi edyondzweni ya n’wina ya Bibele ya ndyangu leswaku mi ti toloveta swingheniso sweswo?

²² Wu Tirhise Hi Xitalo Nkarhi Lowu Wa Xitsundzuxo: Ku fana na muapostola Pawulo, a hi kombiseni Yehovha ndlela leyi hi yi tlangelaka ha yona “nyiko leyi nga hlamuselekiki,” hi ku hlanganyela hi xitalo emintirhweni ya swa moya leyi hleleriweke nkarhi lowu wa Xitsundzuxo. Sweswo swi katsa (1) ku hlanganyela hi xitalo eka Siku ra Timagazini ro hlawuleka hi March 2, 2002; (2) ku va kona eka xiendlakalo xa nkoka ku tlula hinkwaswo elembeni, ku nga Xilalelo xa Hosi hi Ravumune, March 28, 2002; (3) ku pfuna lava holeke leswaku va pfurhetela “rirhandzu leri a [va] ri na rona eku sunguleni” (Nhlav. 2:4; Rhom. 12:11); (4) ku pfuna vana va hina ni swichudeni swa Bibele leswaku va faneleka ku va vahuweleri lava nga khuvuriwangiki; ni (5) ku katseka hi xitalo hilaha hi nga kotaka hakona entirhweni wa ku chumayela, hambi ku ri ku va maphayona ya nkarhinyana hi March ni tin’hweti leti landzelaka.—2 Tim. 4:5.

²³ Hi khongela hi mbilu hinkwayo leswaku hinkwerhu hi hlanganyela hi xitalo eku chumayeleni ka mahungu lamanene ya Mfumo hi nkarhi lowu wa Xitsundzuxo, hi ndlela yoleyo hi ta va hi kombisa leswaku hi swi tlangela hi mbilu hinkwayo hinkwaswo leswi Yehovha a hi endleleke swona. 

[Bokisi leri nga eka tluka 6]

Xiyimiso Xa Wena N’wini Xa Ntirho Wa Nsimu Hi March 2002

1 2

3 4 5 6 7 8 9

10 11 12 13 14 15 16

17 18 19 20 21 22 23

24 25 26 27 28 29 30

DYAMBU

31

Xana u nga hlela ku tirha tiawara ta 50 leswaku u ta va phayona ra nkarhinyana hi March?