Yana eMahlweni U Vulavula Hi Mintirho Ya Yehovha Yo Hlamarisa

1. Hi yihi yin’wana ya mintirho ya Yehovha yo hlamarisa leyi wena u yi tlangelaka swinene?

¹ A nga kona la fanaka na Yehovha Xikwembu xa hina! Davhida u tsarile a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena.” (Ps. 40:5) Mintirho ya Yehovha yo hlamarisa yi katsa ku tumbuluxa vuako hinkwabyo, Mfumo wa Mesiya, musa wa rirhandzu lowu a wu kombisaka vanhu vakwe ni tsima ro chumayela emisaveni hinkwayo. (Ps. 17:7, 8; 139:14; Dan. 2:44; Mat. 24:14) Ku rhandza Yehovha ni ku tlangela hinkwaswo leswi a swi endleke, swi hi susumetela leswaku hi byela van’wana ha yena. (Ps. 145:5-7) Hi March, April, na May hi ta kuma nkarhi wo endla leswi hi xitalo. Emalembeni lama hundzeke vo tala va nghenele vuphayona bya nkarhinyana hi March na April, tanihi leswi ti nga ni masiku yo tala, ngopfu-ngopfu n’hweti ya March.

2. Xana hina hi vuyeriwa njhani hi ku nghenela vuphayona bya nkarhinyana?

² Tanihi Phayona Ra Nkarhinyana: Xana u nga swi kota ku hlela xiyimiso xa wena leswaku u ta kota ku heta tiawara ta 50 ensin’wini n’hweti yin’we kumbe ku tlula eka tin’hweti leti to hlawuleka? U ta va u endle nchumu lowunene ngopfu loko wo endla tano. (Efe. 5:16) Vo tala va kume leswaku vuphayona bya nkarhinyana byi endla leswaku ntirho wa vona wa nsimu wu antswa. Va va ni xivindzi loko va vulavula ni vanhu naswona va yi tirhisa swinene Bibele. Ku va ni nkarhi wo tala wo ya ensin’wini swi endla leswaku u oloveriwa ku ya eka vanhu lava kombiseke ku tsakela naswona van’wana lava a va nga ri na yona dyondzo ya Bibele, va swi kotile ku yi sungula loko va nghenele vuphayona bya nkarhinyana. Mhaka ya leswaku vuphayona bya nkarhinyana byi katsa ku tirhisa nkarhi wa hina leswaku hi pfuna van’wana, yi endla leswaku byi va ntirho wo tsakisa.—Mint. 20:35.

3. Xana van’wana va swi kotise ku yini ku nghenela vuphayona bya nkarhinyana hambiloko swiyimo swa vona swi tika?

³ U nga tshuki u hatlisela ku tibyela leswaku swiyimo swa wena a swi ku pfumeleli leswaku u nghenela vuphayona. Nkulu un’wana loyi a ngheneleke vuphayona n’wexemu u ni vana vambirhi kasi hi hala tlhelo u ni ntirho wa ku tihanyisa. Xana makwerhu loyi u swi endlise ku yini? Leswi exikarhi ka vhiki a tirhaka, u hlele ku heta nkarhi wo leha a ri ensin’wini hi mahelo-vhiki, a sungula hi ku chumayela exitarateni hi 7:00 a.m. hi Mugqivela. Van’wana vo hlayanyana evandlheni lava nga ni swiyimo swo fana ni swakwe na vona a va phayona, kutani a va seketelana ni ku khutazana. Eka vandlha rin’wana, makwerhu wa xisati la nga ni malembe ya 99 hi vukhale u nghenele vuphayona hi May hikwalaho ka leswi a komberiweke hi n’wana wakwe wa xisati leswaku va phayona swin’we. Van’wana evandlheni va pfune makwerhu loyi la dyuhaleke hi ku susumeta xitulu xakwe xa mavhilwa leswaku a kota ku famba hi yindlu ni yindlu ni ku ya eka tidyondzo ta Bibele. Minkarhi yin’wana a a chumayela hi riqingho, a chumayela exitarateni ni ku tsala mapapila. Wa khorwiseka leswaku leswi a nga swi endlanga hi matimba ya yena n’wini kambe u swi endle hi ku pfuniwa hi Yehovha.—Esa. 40:29-31.

4. Hi swihi swilo leswi hi nga ha swi tsundzukaka loko hi endla xiyimiso xo nghenela vuphayona bya nkarhinyana?

⁴ Ringeta ku endla xiyimiso lexi xi pfumelelanaka ni swiyimo swa wena. Swiyimiso leswi ringanyetiweke laha swi nga pfuna. Xana wa tirha kumbe u nghena xikolo? Xiyimiso lexi katsaka swinene mahelo-vhiki xi nga ha va xinene eka wena. Loko u nga tiphini emirini naswona u ri hava matimba yo heta nkarhi wo leha u ri ensin’wini, xiyimiso lexi ku pfumelelaka leswaku u heta nkarhi wutsongo siku ni siku xi nga va xinene eka wena. Byela van’wana leswaku u navela ku nghenela vuphayona bya nkarhinyana. Kumbexana na vona va nga ha tivekela pakani ya ku byi nghenela.

5. Hi tihi tipakani leti vantshwa va nga tivekelaka tona hi March, April na May?

⁵ Minkarhi Leyi Vantshwa Va Nga Byi Nghenelaka Ha Yona: Yehovha wa tsaka loko vantshwa va byela van’wana hi mintirho yakwe yo hlamarisa. (Ps. 71:17; Mat. 21:16) Loko u rintsongo naswona u khuvuriwile, kumbexana u nga nghenela vuphayona bya nkarhinyana hi minkarhi leyi mi pfalaka ha yona exikolweni. Loko u nga ta swi kota ku nghenela vuphayona bya nkarhinyana, xana u tivekela tipakani to karhi to engetela ntirho wa wena wa nsimu etin’hwetini leti? Loko ku ve a wu ri karhi u ya ensin’wini ni vatswari va wena kambe u nga si va muhuweleri la nga khuvuriwangiki, sweswi ku nga ha va ku ri wona nkarhi wo tikarhatela ku faneleka. U nga anakanyi leswaku u fanele u va nghwazi eku hlamuleni ka swivutiso swa Bibele kumbe leswaku u fanele u va ni vutivi byo fana ni bya vanhu lavakulu lava khuvuriweke. Xana wa ti twisisa tidyondzo ta xisekelo ta Bibele? Xana wa yi namarhela milawu ya Bibele ya ku tikhoma? Xana wa swi lava ku tiviwa tanihi un’wana wa Timbhoni ta Yehovha? Loko swi ri tano, byela vatswari va wena. Va nga ha hlela leswaku mi ya eka vakulu, va ta ku kambela loko u faneleka.—Vona buku leyi nge Vutirheli, matluka 98-9.

6. Xana hi nga swi pfuna njhani swichudeni swa Bibele leswaku swi va vahuweleri va mahungu lamanene?

⁶ Ku Pfuna Van’wana Leswaku Va Chumayela: Swichudeni swa Bibele leswi endlaka nhluvuko swi nga va vahuweleri leswaku swi ta chumayela na hina eka tin’hweti to hlawuleka leti taka. Loko u ri ni xichudeni xa Bibele lexi endlaka nhluvuko, kombela mpfuno eka mulanguteri wa dyondzo ya buku kumbe eka mulanguteri wa ntirho wa nsimu. Un’wana wa vona a nga ha famba na wena loko u ya dyondza ni xichudeni lexi, leswaku a ta vona nhluvuko wa xona. Loko xichudeni xi faneleka naswona xi swi navela ku va muhuweleri, mulanguteri la ungamelaka u ta hlela leswaku vakulu vambirhi va vonana na wena swin’we ni xichudeni lexi. (Vona Xihondzo xo Rindza xa November 15, 1988, tluka 17.) Loko xichudeni xi kumeke xi faneleka, sungula ku xi letela entirhweni wa nsimu, u nga ha yimayimi.

7. Xana vahuweleri lava pfaka va nga viki ni lava holeke, va nga pfuniwa njhani?

⁷ Mulanguteri wa dyondzo ya buku u fanele a khathalela munhu wihi na wihi entlaweni wa yena, la holeke kumbe la pfaka a tlula ku vika ntirho wa nsimu. Va rhambe leswaku va famba na wena ensin’wini. Loko se va ri ni nkarhi wo leha va horile, i swinene leswaku vakulu vambirhi va rhanga va vulavula na vona ku vona loko va ha faneleka. (Vona Bokisi Ra Swivutiso eka Vutirheli Bya Hina Bya Mfumo bya November 2000.) Ku hiseka ka vandlha etin’hwetini leti ta ntirho wo hlawuleka ku nga ha ri khutaza leswaku ri hamba ri huma nsimu.

8, 9. I yini lexi vakulu va nga xi endlaka leswaku va khutaza vandlha ku nghenela ntirho lowu wo hlawuleka?

⁸ Lunghiselela Sweswi Leswaku U Ta Endla Ntirho Lowu Engetelekeke: Vakulu, sungulani sweswi ku endla vandlha ri byi langutela hi mahlo-ngati vuphayona bya nkarhinyana. Leswi mi nga swi endla hi ku va khutaza hi marito ni hi xikombiso xa n’wina lexinene. (1 Pet. 5:3) Hi yihi nhlayo leyikulu ya maphayona ya nkarhinyana leyi vandlha ra ka n’wina ri tshameke ri va na yona? Xana mi nga yi tlula nhlayo leyi lembe leri? Valanguteri va dyondzo ya buku ni vapfuni va vona va fanele va lava tindlela to khutaza hinkwavo entlaweni wa vona leswaku va engetela ntirho wa vona. Valanguteri va ntirho wa nsimu va nga ha hlela leswaku ku va ni minhlangano leyi engetelekeke ya ntirho wa nsimu. Tivisani vandlha ka ha ri emahlweni hi malunghiselelo lama endliweke. Tiyisekani leswaku mi avela vahuweleri lava fanelekaka leswaku va rhangela ni leswaku minhlangano ya ntirho wa nsimu yi sungula ni ku hela hi nkarhi. (Vona Bokisi Ra Swivutiso eka Vutirheli Bya Hina Bya Mfumo bya September 2001.) Mulanguteri wa ntirho wa nsimu u fanele a endla malunghiselelo ya leswaku ku va ni nsimu, timagazini ni tibuku leti eneleke.

⁹ N’wexemu vakulu va vandlha rin’wana va swi hisekerile kutani va sungula ka ha ri ni nkarhi ku khutaza vandlha leswaku ri nghenela vuphayona bya nkarhinyana, naswona vo hlayanyana va ti tatile tifomo. Va hlele leswaku ku va ni minhlangano leyi engetelekeke ya ntirho wa nsimu—wun’wana hi 5:30 a.m. ku chumayeriwa exitarateni, wun’wana hi 3:00 p.m. wa lava va humaka exikolweni naswona wa vunharhu a wu khomiwa hi 6:00 p.m. wa lava humaka entirhweni. Nakambe a ku tlhela ku va ni minhlangano yinharhu ya nsimu hi Migqivela. Vandlha leri ri ve ni vanhu va 66 lava tsariseke ku nghenela vuphayona bya nkarhinyana hi April!

10. Xana mindyangu yi nga endla yini leswaku yi lunghiselela ku engetela ntirho lowu yi wu endlaka?

¹⁰ Eka dyondzo ya n’wina ya ndyangu leyi landzelaka, ha yini u nga veki nkarhi wo bula hi tipakani leti mi nga ti vekelaka tona eka tin’hweti leti landzelaka? Loko mi khomisana ni ku hlela swilo kahle, van’wana kumbe hinkwenu endyangwini mi nga swi kota ku nghenela vuphayona bya nkarhinyana. Loko sweswo swi nga koteki, tivekeleni tipakani to engetela nkarhi lowu mi wu hetaka ensin’wini kumbe mi huma nsimu minkarhi leyi engetelekeke. Khongelani hi mhaka leyi tanihi ndyangu. Tiyisekani leswaku Yehovha u ta ma katekisa matshalatshala ya n’wina.—1 Yoh. 3:22.

11. (a) Hi swihi swilo leswinene leswi gandzelo ra Kreste ri swi hetisiseke? (b) Xana Xitsundzuxo xa vandlha ra ka n’wina xi ta va hi nkarhi muni naswona xi ta khomeriwa kwihi?

¹¹ Ntirho Wa Xikwembu Lowu Hlamarisaka Swinene: Xikombiso lexikulu xa rirhandzu ra Yehovha i ku hanana ka yena hi N’wana wakwe leswaku a va nkutsulo eka hina. (1 Yoh. 4:9, 10) Gandzelo ra nkutsulo ri endla swi koteka leswaku vanhu va kutsuriwa ximfumo eka xidyoho ni rifu. (Rhom. 3:23, 24) Ngati ya Yesu leyi halatiweke yi endle leswaku ku va ni ntwanano lowuntshwa, lowu endlaka swi koteka leswaku vanhu lava nga hetisekangiki va va vana va Xikwembu hi ntshembo wa ku ya fuma eMfun’weni wa matilo. (Yer. 31:31-34; Mar. 14:24) Xa nkoka swinene, ku yingisa ka Yesu loku hetisekeke ku endle leswaku vito ra Yehovha ri kwetsimisiwa. (Det. 32:4; Swiv. 27:11) Hi Sonto, April 4, endzhaku ka ku pela ka dyambu, ku ta tlangeriwa Xitsundzuxo xa ku fa ka Kreste emisaveni hinkwayo.

12. Xana vanhu lava tsakelaka va nga pfuneka njhani hi ku va kona loko ku tlangeriwa Xilalelo xa Hosi?

¹² Ku tlangeriwa ka Xilalelo xa Hosi ku endla leswaku mintirho ya Yehovha leyinene yi va erivaleni. Nkulumo ya kona yi endla leswaku hi swi tlangela leswi Yehovha a swi endleke, ku nga ku hi nyika nkutsulo. Vanhu lava tsakelaka lava nga kona va ta swi kota ku vona mintirho yin’wana yo hlamarisa ya Xikwembu. Va ta vona vun’we ni rirhandzu leri Yehovha a ri dyondziseke vanhu va yena. (Efe. 4:16, 22-24; Yak. 3:17, 18) Ku va kona eka xiendlakalo lexi xa nkoka ku nga yi khumba swinene ndlela leyi munhu a anakanyaka ha yona, hi yona mhaka leyi hi lavaka leswaku vanhu vo tala va va kona.—2 Kor. 5:14, 15.

13, 14. I vamani lava hi nga va rhambaka eXitsundzuxweni naswona hi nga swi endlisa ku yini?

¹³ Ku Rhamba Van’wana Leswaku Va Va Kona: Sungula ku lunghiselela ka ha ri sweswi hi ku endla nxaxamelo wa lava u nga ta va rhamba. Nxaxamelo wa wena wu fanele wu katsa swirho swa ndyangu leswi nga riki vapfumeri, vaakelani, vatirhi-kuloni kumbe lava u nghenaka na vona xikolo, swichudeni swa Bibele leswi u tshameke u dyondza na swona ni leswi u dyondzaka na swona sweswi ni vanhu hinkwavo lava va nga maendzo yo vuyela. Valanguteri va dyondzo ya buku, eka nxaxamelo wa vona va nga katsa vahuweleri hinkwavo lava holeke.

¹⁴ Tirhisa xiphephana xa xirhambo xa Xitsundzuxo leswaku u tsala nkarhi ni ndhawu ya Xitsundzuxo. Kumbe u nga ha tsakela ku tirhisa xirhambo lexi nga eka tluka ro hetelela ra Xihondzo xo Rindza xa March 15, 2004 kumbe xa Xalamuka! ya April 8, 2004. Loko siku ra April 4 ri tshinela, tsundzuxa lava va nga enxaxamelweni wa wena, u nga ha ya hi xiviri kumbe u vulavula na vona hi riqingho.

15. Xana hi nga wu kombisa njhani moya wo amukela vaendzi hi nkarhi wa Xitsundzuxo?

¹⁵ Hi Nkarhi Wa Xitsundzuxo: Ringeta ku fika ka ha ri ni nkarhi eXitsundzuxweni. Kombisa moya wo amukela vaendzi hi ku pfuxela vanhu lava va sungulaka ku ta. (Rhom. 12:13) I vutihlamuleri bya wena ku khathalela vanhu lava u va rhambeke. Va endle va titwa va ri ekaya naswona u va tivisa eka van’wana evandlheni. Kumbexana u nga ha va kumela ndhawu yo tshama ekusuhi ni laha u tshameke kona. Loko ku ri ni lava va nga riki na Bibele kumbe risimu, hlela leswaku va languta eka ya wena kumbe eka ya un’wana. Endzhaku ka nhlangano, vana ekusuhi na vona, u hlamula swivutiso leswi va nga ha vaka va ri na swona. Loko van’wana ku ri ro sungula va ta, va vutise loko va swi tsakela ku tiva leswi engetelekeke hi Rito ra Xikwembu ni swikongomelo swa xona. Va byele leswaku u nga swi tsakela ku va fambisela dyondzo ya le kaya ya Bibele.

16. I yini lexi nga endliwaka leswaku ku pfuniwa vanhu lava a va ri kona leswaku va endla nhluvuko hi tlhelo ra moya?

¹⁶ Hambetani Mi Pfuna Lava A Va Ri Kona: Eka mavhiki lama landzelaka Xitsundzuxo, lava va veke kona va nga ha lava ku ya emahlweni va pfuniwa. Leswi swi katsa ni vanhu lava va tshameke va va kona eminhlanganweni kambe sweswi se va xwaka swinene. Vakulu va fanele va tiyiseka leswaku vanhu lava a va honisiwi, va nga ha kumisisa lexi xi va endleke va tshika ku endla nhluvuko hi tlhelo ra moya. Mi va tsundzuxa hi ku biha ka minkarhi. (1 Pet. 4:7) Pfunani hinkwavo va vona ndlela leyi swi pfunaka ha yona ku yingisa xitsundzuxo xa Matsalwa xa leswaku hi hamba hi hlengeletana swinene ni vanhu va Xikwembu.—Hev. 10:24, 25.

17. Ha yini hi fanele hi hambeta hi byela vanhu hi mintirho ya Yehovha leyi hlamarisaka?

¹⁷ Mintirho ya Yehovha yi tele swinene lerova a hi nge swi koti ku yi tiva hinkwayo hambiloko ho hanya hi laha ku nga heriki. (Yobo 42:2, 3; Ekl. 3:11) Hikwalaho, a hi nge heleriwi hi swilo swo n’wi dzunisa ha swona. Eka nguva leyi ya Xitsundzuxo, hi nga kombisa leswaku ha yi tlangela mintirho ya Yehovha yo hlamarisa hi ku endla matshalatshala lama engetelekeke leswaku hi tirha swinene ensin’wini.

[Chati leyi nga eka tluka 5]

Xana U Nga Nghenela Vuphayona Bya Nkarhinyana Hi Ku Tirhisa Xin’wana Xa Swiyimiso Leswi?

Masiku Mambirhi 0 5 0 5 0 0 0 50

Masiku Mambirhi 0 0 0 0 5 5 0 50

Masiku Mambirhi 0 5 0 0 0 0 5 50

* Nthanu eN’hwetini