Bokisi Ra Swivutiso

◼ Xana nxaxamelo wa mavito ya Timbhoni ta Yehovha wu fanele wu tsarisiwa ku yini ebukwini ya nxaxamelo wa lava nga ni tinqingho?

Ku xiyiwe leswaku ku ni maxaxametelo yo hambana-hambana ya Timbhoni ta Yehovha etibukwini ta nxaxamelo wa lava nga ni tinqingho. Maxaxametelo man’wana a ya twisiseki, man’wana a ya nyiki rungula leri eneleke. I swa nkoka ku va na rungula leri eneleke ebukwini ya lava nga na tinqingho, swi ta olovela vanhu lava tsakelaka ni vamakwerhu leswaku va tihlanganisa ni vandlha ra kwalaho.

Hi leyi ndlela ya maxaxametelo leyi bumabumeriwaka: Jehovah’s Witnesses, (Doroba-nkulu kumbe Doroba), ku landzela adirese ya Holo ya Mfumo ni nomboro ya riqingho.

Emadorobeni lamakulu laha ku nga ni mavandlha yo tlula rin’we, hi bumabumela malongoloxelo lawa: Jehovah’s Witnesses, (Doroba-nkulu), ku landzela nxaxamelo wa ku landzelana ka maletere ya mavito, adirese ya Holo ya Mfumo, ni nomboro ya riqingho ra holo ya vandlha rin’wana ni rin’wana.