Xalamukela Mintirho Leyi Hlamarisaka Ya Xikwembu
1 Hi hete masiku manharhu yo nandziha hi hlanganile eNtsombanweni wa Muganga wa “Vaendli Va Rito Ra Xikwembu.” Hi tshike ku karhateka hi swiphiqo swa siku ni siku kutani hi yisa nyingiso wa hina eka mintirho yo hlamarisa ya Yehovha. Nongonoko a wu lunghiseleriwe ku kurisa ripfumelo ra hina eka Xikwembu ni le Ritweni ra xona, ku tiyisa vuxaka bya hina na xona ni ku tiyisa ku hiseka ka hina evutirhelini. Xana swilo leswi hi swi dyondzeke swi hi vuyerisa hi ndlela yihi?—Yoh. 13:17.
2 Mindyangu Yi Yingisa Rito Ra Xikwembu: Nxaxamelo lowu a wu ri ni xihloko lexi nge “Yingisa Rito Ra Xikwembu,” wu hi pfune ku kambisisa xiyimo xa moya xa mindyangu ya hina. Vana va swi rhandza ku dyondza. Hikokwalaho, vatswari lava chavaka Xikwembu va khutaziwe ku tirhisa dyondzo ya Bibele ya ndyangu leswaku yi va xisekelo xa ku tiyisa vumoya bya swirho swa mindyangu ya vona. Tinhloko to tala ta mindyangu ti bula ni vana va tona hi broxara leyintshwa leyi nge U Nga Va Munghana Wa Xikwembu! Sweswo swi ta endla leswaku va aka vuxaka lebyi tsakisaka ni lebyi sirhelelekeke na Yehovha. Vatswari, dyondzisani vana va n’wina ku xalamukela ndlela leyi Xikwembu xi titwaka ha yona. Kombisani leswaku ma xi rhandza naswona mi rhandza swiendlo swa xona. (Ps. 103:2) Pfunanani ku fikelela tipakani ta moya ta ku tirhela Yehovha hi ku helela.
3 Rito Ra Xikwembu Ri Voninga Ndlela Ya Hina: A hi nga tikoti hi ntsako loko hi amukela buku leyintshwa leyi nge Vuprofeta Bya Esaya—I Rivoningo Eka Vanhu Hinkwavo I. Se u fike kwihi hi ku hlaya vholumo leyi yo sungula? Buku ya Esaya yi nyikela vuprofeta bya ku avanyisiwa loku nga tsakisiki ka vanhu lava nga xi chaviki Xikwembu swin’we ni vuprofeta bya switshembiso leswi tsakisaka swa Mfumo eka vanhu va Xikwembu. (Esa. 34:2; 35:10) Yi tlhela yi aka ripfumelo ni ntshembo eka Yehovha ni ndlela leyi a endlaka swilo ha yona.—Esa. 12:2-5.
4 Loko u ri karhi u hlaya buku ya Vuprofeta Bya Esaya I, u swi vona ta ha suka leswaku Esaya u tshame a tshembekile eka Yehovha hambileswi a a hanya exikarhi ka vuhomboloki. Loko Xikwembu xi lava munhu loyi xi nga n’wi rhumaka, Esaya u te: “Hi mina loyi! Ndzi rhume.” (Esa. 6:8) Ku anakanyisisa hi moya wakwe wa ku tinyiketela, swi ta ku susumetela ku hambeta u chumayela mahungu lamanene, u hlanganyela hi xitalo eku nyikeleni ka “vumbhoni ematikweni hinkwawo.”—Mat. 24:14.
5 Ku va lava xalamukeleke mintirho ya Yehovha swi ta endla leswaku vukulu bya yena byi tiviwa. Hikwalaho, a hi tlangeleni lunghelo ra ku va vaendli va rito ra Xikwembu!