“Vaendli Va Rito” Lava Tsakeke
“Mi amukela hi ku titsongahata rito leri byariwaka etimbilwini ta n’wina, leri kotaka ku mi ponisa. Mi va vaendli va rito, mi nga vi vatwi ntsena lava tixisaka.”—YAKOBO 1:21, 22.
1. Xana ndzimana ya hina ya lembe ya 1996 yi fanele yi langutiwa njhani?
“MI VA VAENDLI VA RITO.” Marito lawa yo olova ma khome rungula leri nga ni matimba swinene. Ma tekiwe “ePapileni Ra Yakobo” eBibeleni, naswona ma ta vekiwa eTiholweni ta Mfumo tanihi ndzimana ya lembe ya Timbhoni ta Yehovha hi 1996.
2, 3. I yini lexi endleke swi fanela leswaku Yakobo a tsala papila leri nga ni vito ra yena?
2 Yakobo, makwavo wa Hosi Yesu hi tatana, a a tiveka swinene evandlheni ro sungula ra Vukreste. Enkarhini wun’wana endzhaku ka ku pfuxiwa ka Yesu, Hosi ya hina yi humelerile hi yoxe eka Yakobo kutani yi ya humelela eka vaapostola hinkwavo. (1 Vakorinto 15:7) Endzhakunyana, loko muapostola Petro a ntshunxiwile ekhotsweni hi hlori, u byele ntlawa wa Vakreste lowu hlengeletaneke a ku: “Tivisani Yakobo ni vamakwerhu eHosini timhaka teto.” (Mintirho 12:17) Swa tikomba leswaku Yakobo, hambi leswi yena a a nga ri muapostola, u rhangerile enhlengeletanweni ya huvo leyi fumaka eYerusalema loko vaapostola ni vakulu va endle xiboho xa leswaku vanhu lava hundzukeke va Vamatiko a va fanelanga ku yimbisiwa. Yakobo u katsakanye timhaka, naswona xiboho lexi tiyisiweke hi moya lowo kwetsima xi rhumeriwe emavandlheni hinkwawo.—Mintirho 15:1-29.
3 Handle ko kanakana, mianakanyo leyi vupfeke ya Yakobo a yi ri ya nkoka swinene. Hambi swi ri tano, u pfumerile leswaku yena hi yexe wo va “nandza wa Xikwembu ni wa Hosi Yesu Kriste” ntsena. (Yakobo 1:1) Papila ra yena leri huhuteriweke ri tele hi tindzayo leti twalaka ni swikhutazo eka Vakreste namuntlha. Ri hetiwe kwalomu ka malembe ya mune emahlweni ka ku hlaseriwa ko sungula ka Yerusalema hi Varhoma lava rhangeriweke hi Ndhuna-nkulu Cestius Gallus, endzhaku ka loko mahungu lamanene ma twarisiwile swinene “eka swivumbiwa hinkwaswo leswi nge hansi ka tilo.” (Vakolosa 1:23) A yi ri minkarhi yo nonon’hwa, naswona malandza ya Yehovha a ma swi tiva kahle leswaku ku avanyisa ka Yena a ku ri kusuhi ni ku tisiwa ehenhla ka tiko ra Vayuda.
4. I yini lexi kombisaka leswaku Vakreste vo sungula a va ri tshemba swinene Rito ra Xikwembu?
4 Vakreste volavo ana se a va ri ni Matsalwa ya Xiheveru hinkwawo ni yo tala ya Matsalwa ya Xigriki. Hi laha swi kombisiweke ha kona hi ku kombetela ka vona hi minkarhi yo hlayanyana eka matsalwa yo sungula, vatsari va Bibele va Vakreste handle ko kanakana a va ri tshemba swinene Rito ra Xikwembu. Hi laha ku fanaka, na hina namuntlha hi fanele hi hlaya Rito ra Xikwembu hi mbilu hinkwayo hi tlhela hi ri tirhisa evuton’wini bya hina. Leswaku hi tiyisela, hi fanele hi kuma ntamu wa moya ni xivindzi, leswi Matsalwa lama Kwetsimaka ma swi nyikelaka.—Pisalema 119:97; 1 Timotiya 4:13.
5. Ha yini hi lava nkongomiso lowu hlawulekeke namuntlha, naswona hi ta wu kuma kwihi?
5 Namuntlha vanhu va yime ekusuhi ni ‘nhlomulo lowukulu lowu nga si tshamaka wu va kona hi mpfhuka misava yi tumbuluka ku ta fikela namuntlha, naswona a wu nge he vi kona ni siku ni rin’we.’ (Matewu 24:21, ringanisa NW.) Ku pona ka hina ku titshege hi ku va ni nkongomiso wa Xikwembu. Xana hi nga wu kuma njhani? Hi ku pfula timbilu ta hina leswaku ti amukela tidyondzo ta Rito ra Xikwembu leri huhuteriweke hi moya. Leswi swi ta hi endla leswaku hi “va vaendli va rito,” ku fana ni malandza lama tshembekeke ya Yehovha ya le minkarhini ya khale. Hi fanele hi hlaya ni ku dyondza Rito ra Xikwembu hi ku hiseka naswona hi ri tirhisa leswaku hi dzunisa Yehovha.—2 Timotiya 2:15; 3:16, 17.
Ku Tiyisela Hi Ntsako
6. Ha yini hi fanele hi tsaka loko hi hlangavetana ni miringo?
6 Loko a sungula papila ra yena, Yakobo u boxa ntsako, mbhandzu wa vumbirhi wa moya wa Xikwembu. Wa tsala: “Yi tekeni yi ri mhaka ya ku tsakisa swinene, vamakwerhu, loko mi hlangana ni miringo ya tinxaka-xaka, hikuva ma swi tiva leswaku loko ku pfumela ka n’wina ku tiya eku ringiweni, swi humesa ku tiyisela. Kambe ku tiyisela ka n’wina ku fanele ku tirha ntirho lowu hetisekeke, leswaku mi va lavo hetiseka ni ku lulama hi matlhelo hinkwawo, mi nga pfumali nchumu.” (Yakobo 1:2-4; Vagalatiya 5:22, 23) Xana ku nga vurisiwa ku yini leswaku swa “tsakisa swinene” ku hlangavetana ni miringo yo tala? Phela, hambi a ri Yesu eDyondzweni yakwe ya le Ntshaveni u vule leswaku: “Mi ta kateka loko va mi rhuketela, loko va mi xanisa ni ku mi lumbeta hi mavunwa layo tala hikwalaho ka mina. Tsakani, mi tsakisisa, hikuva hakelo ya n’wina i yikulu ematilweni.” (Matewu 5:11, 12) Ku ni ntsako lowu enerisaka loko hi vona Yehovha a katekisa matshalatshala ya hina loko hi ri karhi hi tirha hi matimba leswaku hi fikelela pakani ya hina ya vutomi lebyi nga heriki.—Yohane 17:3; 2 Timotiya 4:7, 8; Vaheveru 11:8-10, 26, 35.
7. (a) Xana hi nga pfuniwa njhani leswaku hi tiyisela? (b) Ku fana na Yobo xana hi nga hakeriwa njhani?
7 Yesu hi yexe u tiyiserile “hikwalaho ka ku tsaka loku vekiweke emahlweni ka yena.” (Vaheveru 12:1, 2) Hi ku landzelela swinene xikombiso xa xivindzi xa Yesu, na hina hi nga tiyisela! Hi laha Yakobo a boxaka ha kona loko a ya emakumu ka papila ra yena, Yehovha u hakela vahlayisi va vutshembeki hi laha ku fuweke. Yakobo u ri: “Langutani, lava hi vulaka leswaku va katekile, hi lava va tiyiseleke. Mi twile ta ku tiyisela ka Yobo, nakona mi vonile leswi Hosi a yi kongomile swona, ni hilaha Hosi yi taleke musa ni tintswalo hakona.” (Yakobo 5:11) Tsundzuka ndlela leyi vutshembeki bya Yobo byi hakeriweke ha yona loko a vuyeteriwile a va ni rihanyo lerinene, ni ku tlhela a tiphina hi vutomi lebyi teleke, lebyi tsakisaka ni varhandziwa va yena. Ku tiyisela hi ku tshembeka ku nga ku tisela ntsako lowu fanaka eParadeyisini leyi tshembisiweke ya misava leyintshwa ya Xikwembu, tanihi nhlohlorhi ya ntsako lowu hi wu kumaka hi ku tirhela Yehovha sweswi.
Ku Lava Vutlhari
8. Xana hi nga byi kuma njhani vutlhari bya xiviri, lebyi tirhaka, naswona i xiphemu xihi lexi xikhongelo xi xi hetisisaka emhakeni leyi?
8 Ku hlaya ka hina Rito ra Xikwembu hi ku hiseka, swin’we ni ku ri tirhisa hi laha ku twisisekaka, swi ta hi endla hi va ni vutlhari lebyi humaka eka Xikwembu, swi hi endla hi lunghela ku tiyisela miringo leyi nga kona exikarhi ka mafambiselo ya Sathana lama faka, yo homboloka. Xana hi nga tiyiseka njhani leswaku se hi byi kumile vutlhari byolebyo? Yakobo wa hi byela: “Loko un’wana wa n’wina a pfumala vutlhari, a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani ú ta nyikiwa byona. Ntsena, a a kombele hi ku pfumela, a nga kanakani, hikuva loyi a kanakanaka, ú fana ni gandlati ra lwandle leri biwaka ri yisiwa hala ni hala hi mheho.” (Yakobo 1:5, 6) Hi fanele hi khongela hi mbilu hinkwayo, hi ri ni ntshembo lowu tiyeke wa leswaku Yehovha u ta swi twa swikombelo swa hina ni leswaku u ta swi hlamula hi nkarhi wa yena ni hi ndlela ya yena leyi faneleke.
9. Xana Yakobo u byi hlamusela njhani vutlhari bya Xikwembu ni matirhiselo ya byona?
9 Vutlhari bya ku chava Xikwembu i nyiko leyi humaka ka Yehovha. Loko a hlamusela tinyiko toleto, Yakobo u ri: “Nyiko yin’wana ni yin’wana leyo saseka ni minkateko hinkwayo leyi hetisekeke, swi ta hi le henhla, swi xika hi le ka Muvumbi wa leswi voningaka, loyi ku nga hava ku hundzuka-hundzuka eka yena, kumbe ku fularhela munhu a sala exinyamini.” Endzhakunyana epapileni rakwe, Yakobo u hlamusela vuyelo bya ku kuma vutlhari bya ntiyiso loko a ku: “Exikarhi ka n’wina, ku nga va ni loyi a tlhariheke, la nga ni vutivi: A a kombe mintirho ya yena hi mahanyelo ya yena lamanene, lama nga ni vutlhari ni ku titsongahata. . . . Vutlhari byo ta hi le henhla, byi ni ku rhula, ni ku olova, ni ku yingisela, byi tele musa ni mihandzu leyinene; kambe ngopfu-ngopfu byi tengile; a byi yi hi nghohe, kumbe ku kanganyisa.”—Yakobo 1:17; 3:13-17.
10. Xana vukhongeri bya mavunwa byi hambana njhani ni bya ntiyiso?
10 Emfun’weni wa misava hinkwayo wa vukhongeri bya mavunwa, hambi hi le Vujaganini kumbe hi le matikweni man’wana, hakanyingi i ntolovelo leswaku vagandzeri va yimbelela tinsimu, va yingisela swikhongelo leswi phindha-phindhiwaka, kumbexana va twa ni nkulumo. Ku hava xikhutazo lexi nyikeriwaka mayelana ni ku huwelela rungula ra ntshembo, hikuva vukhongeri byo tala a byi na ntshembo lowu vangamaka hi nkarhi lowu taka. Ntshembo lowu vangamaka wa Mfumo wa Vumesiya wa Xikwembu a wu boxiwi kumbe a wu twisisiwi hi ku helela. Hi vuprofeta Yehovha u vula leswi hi valandzeri va Vujagana: “Tiko ra mina ri dyohile kambiri: v̌a nḍi ṭhikile, mina nḍi nga nseledyana ya mati la’ma pfelelaka, kambe v̌a titšyelele ŝihlov̌o, le’ŝi hanḍukeke, le’ŝi nga kotiki ku hlayisa mati.” (Yeremiya 2:13) A va ha ri na wona mati ya ntiyiso. Va pfumala vutlhari bya le tilweni.
11, 12. (a) Xana vutlhari bya Xikwembu byi fanele byi hi susumeta hi ndlela yihi? (b) Xana vutlhari bya Xikwembu byi hi tsundzuxa mayelana na yini?
11 Wa nga vona ndlela leyi swi hambaneke ha yona exikarhi ka Timbhoni ta Yehovha namuntlha! Hi matimba lama tirhaka lawa va nyikiweke wona hi Xikwembu, va tata misava hi mahungu lamanene ya Mfumo wa xona lowu taka. Vutlhari lebyi va vulavulaka ha byona byi sekeriwe hi laha ku tiyeke eRitweni ra Xikwembu. (Ringanisa Swivuriso 1:20; Esaya 40:29-31.) Hakunene, va byi tirhisa kahle vutivi bya ntiyiso ni ku twisisa, eku twariseni ka swikongomelo leswikulu swa Xikwembu ni Muvumbi wa hina. Ku fanele ku va ku navela ka hina leswaku hinkwavo evandlheni va “[tala] hi vutivi bya ku rhandza ka [Xikwembu], evutlharini hinkwabyo ni ku twisiseni hinkwako loku nyikiwaka hi Moya.” (Vakolosa 1:9) Hi ku va ni masungulo lawa, lavatsongo ni lava kuleke minkarhi hinkwayo va ta susumeteleka ku va “vaendli va rito.”
12 “Vutlhari byo ta hi le henhla” byi hi tsundzuxa hi swidyoho leswi nga vangaka leswaku hi nga amukeriwi hi Xikwembu. Yakobo u ri: “Tivani leswi, vamakwerhu lava rhandzekaka: Munhu un’wana ni un’wana a a hatlise ku twa, a hlwela ku vulavula, a hlwela ku kariha. Hikuva vukari bya munhu a byi yisi makungu layo lulama ya Xikwembu emahlweni.” Ina, hi fanele hi hatlisa, hi hiseka eku yingiseni ka ndzayo ya Xikwembu ivi hi yi tirhisa. Hambi swi ri tano, hi fanele hi tivonela ku tirhisa “xirho [xexo] lexitsongo” hi ndlela yo biha, ku nga ririmi. Hi ku tinyungubyisa, rihlevo lero biha kumbe ku vulavula hi ndlela leyi hundzeletiweke, ririmi ri nga hisa ‘nhova leyikulu’ hi ndlela yo fanekisela. Hikwalaho hi fanele hi hlakulela ku rhula ni ku tikhoma eka vunakulobye bya hina.—Yakobo 1:19, 20; 3:5.
13. Ha yini swi ri swa nkoka leswaku hi amukela “ku byariwa ka rito”?
13 Yakobo wa tsala: “Hikokwalaho, susani thyaka hinkwaro ni vubihi hinkwabyo lebyi hatlaka ku mila, kutani mi amukela hi ku titsongahata rito leri byariwaka etimbilwini ta n’wina, leri kotaka ku mi ponisa.” (Yakobo 1:21) Misava leyi ya makwanga, ni ku tinyungubyisa ka yona hi swilo leswi vonekaka ni langutelo ra vumina ni mahanyelo lama hohlokeke, yi le kusuhi ni ku hundza. “Kambe loyi a endlaka ku rhandza ka Xikwembu, ú tshama hilaha ku nga heriki.” (1 Yohane 2:15-17) Kutani, wa nga vona ndlela leyi swi nga swa nkoka ha yona, leswaku hi amukela “ku byariwa ka rito”! Vutlhari lebyi nyikiwaka hi Rito ra Xikwembu byi hambana swinene ni vubihi bya misava leyi leyi faka. A hi byi lavi vubihi byolebyo. (1 Petro 2:1, 2, NW) Hi fanele hi va ni rirhandzu ro rhandza ntiyiso ni ripfumelo leri tiyeke, leri byariweke etimbilwini ta hina, leswaku hi ta tiyimisela ku ka hi nga hambuki etindleleni letinene ta Yehovha. Kambe xana swi enerile ku twa Rito ra Xikwembu ntsena?
Ku Va “Vaendli Va Rito”
14. Xana hi nga va “vatwi” ni “vaendli” va Rito hi ndlela yihi?
14 Eka Yakobo 1:22, ha hlaya: “Mi va vaendli va rito, mi nga vi vatwi ntsena lava tixisaka.” “Mi va vaendli va rito”! Nhloko-mhaka leyi kahle-kahle yi kandziyisiwe epapileni ra Yakobo. Hi fanele hi yingisa, ivi hi “endlisa ŝeŝo”! (Genesa 6:22) Vanhu vo tala namuntlha va vula leswaku swi enerile ku twa dyondzo ntsena kumbe ku hlanganyela eka mukhuva wo karhi wa vugandzeri, kambe va nga endli swin’wana leswi engetelekeke. Va nga ha ehleketa leswaku tsendze loko va hanya ‘vutomi lebyinene’ hi ku ya hi mimpimanyeto ya vona, swi enerile. Kambe Yesu Kreste u te: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso, NW], kutani a ndzi landza.” (Matewu 16:24) Xiendlo xa ku tikarhata ni ku tiyisela eku landzeleleni ka ntila wa Yesu wa ku endla ku rhandza ka Xikwembu kahle-kahle hi xona xi lavekaka eka Vakreste va ntiyiso. Eka vona, ku rhandza ka Xikwembu namuntlha ka ha ri xileswi a ku ri xiswona eka lembe-xidzana ro sungula, loko Yesu la pfuxiweke a lerisile a ku: “Hikokwalaho, yanani eka vamatiko hinkwavo, mi va endla vadyondzisiwa va mina.” (Matewu 28:19) Xana u endlisa ku yini emhakeni leyi?
15. (a) Hi xihi xifaniso lexi Yakobo a xi nyikelaka, a kombisa ndlela leyi hi nga ha vaka “vaendli va rito” lava tsakeke ha yona? (b) Ha yini mukhuva ntsena wa vugandzeri wu nga enelanga?
15 Loko hi tshama hi kambisisa Rito ra Xikwembu, ri nga fana ni xivoni ri hi kombisa muxaka wa vanhu lava hi nga vona. Yakobo u ri: “Kambe loyi a kambisisaka Nawu lowu hetisekeke wa ku ntshunxeka, a tiyisela eka wona a nga ri mutwi loyi a rivalaka, kambe a ri muendli la tirhaka, ú ta kateka eka leswi a swi endlaka.” (Yakobo 1:23-25) Ina, u ta va ‘muendli wa rito’ la tsakeke. Tlhandlakambirhi, i swa nkoka leswaku hi va “vaendli” eka xilo xin’wana ni xin’wana xa vutomi bya Vukreste. A hi fanelanga hi tixisa hi ku ehleketa leswaku mukhuva wo karhi wa vugandzeri wu ringanile. Yakobo u hi tsundzuxa leswaku hi xiya swivumbeko swin’wana swa vugandzeri bya ntiyiso leswi hambi ku ri Vakreste lava hisekaka va nga ha vaka va swi rivarile. Wa tsala: “Vukhongeri lebyi tengeke, lebyi nga solekiki emahlweni ka Xikwembu Tatana, hi lebyi: Ku endzela lava feriweke hi vatswari, ni ku endzela tinoni emaxangwini ya tona, ni ku papalata swilo leswi nyameke swa misava leyi.”—Yakobo 1:27.
16. Xana Abrahama u ve “nakulobye wa Xikwembu,” hi tindlela tihi, naswona xana hi nga byi kumisa ku yini vunghana bya xona?
16 A swi enelanga ku vula ntsena leswaku, ‘ndzi pfumela eka Xikwembu,’ ivi u swi tshikisa sweswo. Hi laha Yakobo 2:19 yi vulaka ha kona: “Wena u pfumela leswaku ku ni Xikwembu xin’we ntsena. U endla swona. Hambi ma ri mademona ma pfumela sweswo, ma ri karhi ma rhurhumela.” Yakobo u kandziyisa leswaku “ku pfumela ku ri koxe, loko ku nga tikombi hi mintirho, ku file,” a tlhela a kombetela eka Abrahama, a ku: “Ku pfumela ka yena a ku seketeriwa hi mintirho ya yena, kutani ku pfumela ku endliwile loku hetisekeke hi mintirho.” (Yakobo 2:17, 20-22) Mintirho ya Abrahama yi katse ku ntshunxa xaka ra yena, ku kombisa malwandla, ku lunghiselela ku endla gandzelo hi Isaka ni ku ‘twarisa erivaleni’ ripfumelo leri nga tsekatsekiki eka switshembiso swa Xikwembu swa “muti lowu nga ni masungulo lamanene,” ku nga Mfumo wa Vumesiya wa nkarhi lowu taka. (Genesa 14:16; 18:1-5; 22:1-18; Vaheveru 11:8-10, 13, 14; 13:2) Hi laha ku fanelaka, Abrahama “ú vuriwile nakulobye wa Xikwembu.” (Yakobo 2:23) Na hina hi nga ha vuriwa ‘vanghana va Yehovha’ loko hi twarisa ripfumelo ni ntshembo wa hina wa Mfumo lowu taka wa ku lulama hi ku hiseka.
17. (a) Ha yini Rahava a “endliw[e] la lulameke,” naswona u hakeriwe hi ndlela yihi? (b) Hi wihi nxaxamelo wo leha lowu Bibele yi wu nyikelaka wa lava ‘veke vaendli va rito’? (c) Xana Yobo u hakeriwe hi ndlela yihi, naswona ha yini?
17 Lava “vaka vaendli va rito” hakunene va “endliwa la[va] lulameke emahlweni ka Xikwembu hi mhaka ya mintirho, ku nga ri hi ku pfumela ntsena.” (Yakobo 2:24) Rahava a a ri un’wana la engeteleke mintirho eka ripfumelo ra yena eka “rito” leri a ri tweke mayelana ni swiendlo swa Yehovha swa matimba. U tumbete tinhlori ta Vaisrayele a tlhela a ti pfuna leswaku ti baleka, kutani a hlengeleta vandyangu wa tata wa yena leswaku va hlayiseka. Mawaku ndlela leyi a nga ta tsaka ha yona eku pfukeni ka vafi loko a kuma leswaku ripfumelo ra yena, leri seketeriweke hi mintirho, ri endle leswaku a va kokwana wa xisati wa Mesiya! (Yoxuwa 2:11; 6:25; Matewu 1:5) Vaheveru ndzima 11 yi nyikela nxaxamelo wo leha wa van’wana lava ‘veke vaendli’ eku kombiseni ka ripfumelo ra vona, naswona va ta hakeriwa hi laha ku fuweke. A hi fanelanga hi rivala Yobo, loyi loko a ri ehansi ka ndzingo lowukulu a nga te: “A ku ḍunisiwe v̌ito ra Yehova.” Hi laha a na se hi swi voneke ha kona, ripfumelo ni mintirho ya yena swi endle leswaku a kuma vuyelo lebyikulu. (Yobo 1:21; 31:6; 42:10; Yakobo 5:11) Hi ku fanana, ku tiyisela ka hina namuntlha tanihi “vaendli va rito” swi ta hi tisela ku amukeriwa hi Yehovha.
18, 19. Xana vamakwerhu lava tshikileriweke nkarhi wo leha “va ve vaendli va rito” hi ndlela yihi, naswona i nkateko wihi lowu ntirho wa vona wu wu tiseke?
18 Exikarhi ka lava tiyiseleke malembe yo tala ku ni vamakwerhu va le Yuropa-Vuxa. Tanihi leswi sweswi swipimelo swo tala swi susiweke, entiyisweni va “hundzuke vaendli va rito” eswiyin’weni swa vona leswintshwa. Varhumiwa ni maphayona ya le matikweni ya le kusuhi, va rhurhele kona leswaku va ya pfuna hi ku dyondzisa ni ku hlela. Rhavi ra le Finland ni marhavi man’wana ya le kusuhi ya Sosayiti ya Watch Tower ma rhumele vatirhi lava nga ni vutshila eku akeni, naswona vamakwerhu lava hananaka va misava hinkwayo va hakelele ku akiwa ka tihofisi ta rhavi lerintshwa ni Tiholo ta Mfumo.—Ringanisa 2 Vakorinto 8:14, 15.
19 Mawaku ndlela leyi vamakwerhu volavo lava tshikileriweke nkarhi wo leha va hisekaka ha yona ensin’wini! Va ‘tirha swinene ni ku tikarhata’ leswaku va hakela, hi ndlela yo fanekisela, swilo leswi a swi nga koteki ku swi endla hi “nguva ya ku karhateka.” (1 Timotiya 4:10; 2 Timotiya 4:2, NW) Hi xikombiso, le Albania laha a va tshikileriwe hi tihanyi, hi April mphakelo hinkwawo wa Kingdom News leyi nge “Ha Yini Ku Ri Ni Swiphiqo Swo Tala Swonghasi eVuton’wini?” wu hangalasiwe hi masiku manharhu ntsena. Leswi a swi tlhandlamana kahle ni Xitsundzuxo xa rifu ra Yesu, laha a ku ri ni vanhu va 3 491—vanhu vo tala ku tlula vahuweleri va vona lava hisekaka va 538.
20. Xana nhlayo ya sweswinyana ya lava veke kona eXitsundzuxweni yi kombisa yini, naswona vo tala va nga pfuniwa hi ndlela yihi?
20 Matiko man’wana na wona ma ve ni xiphemu lexi xiyekaka eka nhlayo ya lava veke kona eXitsundzuxweni, leyi engetelekeke emalembeni ya sweswinyana, yi tlula 10 000 000. Etindhawini to tala, ripfumelo ra lava ha ku hlanganyelaka ri tiyisiwe hi ku va kona ni ku hlalela Xitsundzuxo, naswona “va va vaendli va rito.” Xana hi nga khutaza vo tala va vanghana lava lavantshwa leswaku va fanelekela lunghelo leri?
21. Hi ku twanana ni ndzimana ya hina ya lembe, hi yihi ndlela leyi hi faneleke hi yi landzelela, naswona hi ri ni pakani yihi?
21 Ku fana ni Vakreste volavo lava hisekeke va lembe-xidzana ro sungula, ni vo tala ku sukela hi nkarhi wolowo, a hi tiyimiseleni ku tikarhatela ku “tsutsuma [hi] kongomile [pakani, NW]” ya vutomi lebyi nga heriki, hambi ku ta va eMfun’weni wa le matilweni kumbe exivandleni xa wona xa laha misaveni. (Vafilipiya 3:12-14) Swi lava matshalatshala ya hina hinkwawo ku fikelela pakani yoleyo. Lowu a hi nkarhi wo tshama hi ri vatwi ntsena, kambe i nkarhi wo va ‘ni matimba ni ku tirha’ ku tlula rini na rini. (Hagayi 2:4; Vaheveru 6:11, 12) Leswi hi ‘amukeleke ku nghenisa rito,’ onge hi nga ‘va vaendli va rito lava tsakeke’ sweswi ni hi laha ku nga heriki.
A Wu Ta Hlamurisa Ku Yini?
◻ Xana hi nga tiyisela njhani hi ntsako?
◻ Xana “vutlhari byo ta hi le henhla” i yini, naswona hi nga byi kuma njhani?
◻ Ha yini hi fanele hi va “vaendli va rito, [hi] nga vi vatwi ntsena”?
◻ Hi swihi swiviko leswi faneleke swi hi susumetela ku va “vaendli va rito”?
[Xifaniso lexi nga eka tluka 17]
Onge na hina hi nga pfula timbilu ta hina hi amukela dyondzo ya Xikwembu
[Xifaniso lexi nga eka tluka 18]
Vutshembeki bya Yobo byi hakeriwe hi ku vuyeteriwa ka yena hi laha ku teleke evuton’wini lebyi tsakisaka ni varhandziwa va yena