Bokisi Ra Swivutiso

◼ Xana muhuweleri wa xisati u fanele a ambala xo funengeta nhloko loko a famba ni muhuweleri wa xinuna eka dyondzo ya Bibele leyi a yi fambisaka a yime enyangweni?

Loko muhuweleri wa xisati a fambisa dyondzo ya Bibele leyi hleriweke, leyi fambisiwaka nkarhi na nkarhi naswona muhuweleri wa Mfumo wa xinuna a ri kona, u fanele a ambala xo funengeta nhloko. (1 Kor. 11:3-10) Xihondzo xo Rindza xa July 15, 2002, tluka 27, xi te: “Lexi i xiyenge xa dyondzo leyi hleriweke ka ha ri ni nkarhi, laha kahle-kahle loyi a fambisaka dyondzo a rhangelaka. Ehansi ka swiyimo leswi, dyondzo yi fana ni nhlangano wa vandlha. Loko wansati la nga Mbhoni leyi khuvuriweke a fambisa dyondzo yoleyo ku ri ni wanuna la nga Mbhoni leyi khuvuriweke, swo boha leswaku a ambala xo funengeta nhloko.” Leswi swi ta va tano niloko a famba ni muhuweleri wa xinuna loyi a nga khuvuriwangiki. Leswi swi tano hambiloko dyondzo yi fambiseriwa ekaya, enyangweni kumbe endhawini yin’wana.

Kasi hi hala tlhelo, loko dyondzo ya Bibele leyi fambisiwaka ku yimiwe enyangweni yi nga si simekiwa, a swi bohi leswaku makwerhu wa xisati a ambala xo funengeta nhloko loko a ri ni muhuweleri wa Mfumo wa xinuna, hambiloko xikongomelo xa riendzo ro vuyela ku ri ku komba n’wini wa muti ndlela leyi dyondzo ya Bibele yi fambisiwaka ha yona kumbe a bula na yena hi ku tirhisa yin’wana ya minkandziyiso leyi ku dyondziwaka ha yona. Tanihi leswi hakanyingi tidyondzo leti fambisiwaka ku yimiwe enyangweni ti simekiwaka hakatsongo-tsongo, hi maendzo yo vuyela lama endlaka nhluvuko lama endliwaka hi ku phindha-phindha, vahuweleri va fanele va anakanyisisa hi xiyimo naswona va anakanyela loko va ri karhi va xiya leswaku xo funengeta nhloko xi nga ambariwa rini.