Tekelela Vululami Bya Yehovha
1 “Yehovha u rhandza vululami.” (Ps. 37:28) Hambileswi a hlambanyeke leswaku misava leyi yo homboloka yi ta lovisiwa, u hlele leswaku ku rhanga ku lemukisiwa vanhu. (Mar. 13:10) Leswi swi nyika vanhu nkarhi wa ku hundzuka leswaku va ta ponisiwa. (2 Pet. 3:9) Xana hi tikarhatela ku tekelela vululami bya Yehovha? Leswi vanhu va dyaka mbitsi va xeva hi nhlomulo, xana sweswo a swi hi susumeteli leswaku hi va byela hi ta ntshembo lowu Mfumo wu hi nyikaka wona? (Swiv. 3:27) Loko hi rhandza vululami byi ta hi susumetela leswaku hi hisekela ku chumayela.
2 U Nga Yi Hi Nghohe Loko U Chumayela: Loko hi twarisa xikongomelo xa Xikwembu eka un’wana ni un’wana naswona hi nga yi hi nghohe, hi va hi “kombisa vululami.” (Mik. 6:8) Hi fanele hi ala mboyamelo lowu vangiwaka hi ku nga hetiseki, wa ku ehleketelela leswi vanhu va nga ta angurisa xiswona hikwalaho ka leswi va langutekisaka xiswona. (Yak. 2:1-4, 9) Yehovha u ‘rhandza leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.’ (1 Tim. 2:4) Rito ra Xikwembu ra ntiyiso ri nga cinca vutomi bya vanhu hi ndlela leyi hlamarisaka. (Hev. 4:12) Loko hi tsundzuka mhaka leyi hi ta susumeteleka ku chumayela un’wana ni un’wana hi ri ni ntshembo wa leswaku u ta amukela rungula ra hina, hambi ku ri lava a va nga lavi ku twa nchumu eku sunguleni.
3 Makwerhu un’wana wa xisati la tirhaka exitolo a a chavisiwa hi ndlela leyi muxavi un’wana loyi a a tolovele ku xava exitolo xexo a a languteka ha yona. Hambiswiritano, siku rin’wana u ringete ku n’wi byela hi ta Paradeyisi leyi Xikwembu xi hi tshembiseke yona. Muxavi u vule hi ku kongoma leswaku yena a nga pfumeli eka mintsheketo, nileswaku yena i hipi naswona u godzomberiwe hi swidzidzirisi. Kambe makwerhu a nga helanga matimba. Siku rin’wana wanuna yoloye u vutise makwerhu leswaku u ri yini hi misisi ya yena leyo leha, hi vutlhari makwerhu u n’wi hlamusele leswi Bibele yi vulaka swona hi misisi. (1 Kor. 11:14) Hi xamundzuku xa kona makwerhu swi n’wi tsakisile loko a vona wanuna yoloye se a yi hungutile naswona a languteka. U kombele ku dyondzeriwa, kutani makwerhu un’wana wa xinuna u swi tsakerile ku fambisa dyondzo yoleyo, u endle nhluvuko kukondza a tinyiketela ivi a khuvuriwa. Ku fana ni wanuna loyi, vo tala lava tirhelaka Yehovha namuntlha va nkhensa va vuyelela hikwalaho ka matshalatshala lamakulu lama endliweke hi lava va va byeleke rungula ra Mfumo.
4 Ku nga ri khale Yehovha u ta herisa vuhomboloki hinkwabyo emisaveni. (2 Pet. 3:10, 13) Eka nkarhinyana lowa ha saleke, a hi tekeleleni vululami bya Yehovha hi ku vulavula ni vanhu hinkwavo leswaku na vona va kuma nkarhi wo pona ndzoviso lowu nga ta wela misava leyo homboloka ya Sathana.—1 Yoh. 2:17.