Xiyenge 12: Ku Pfuna Swichudeni Leswaku Swi Sungula Tidyondzo Ta Bibele Ni Ku Ti Fambisa
Ku Fambisa Tidyondzo Ta Bibele Leti Endlaka Nhluvuko
1 Loko swichudeni swa hina swa Bibele swi sungula ku huma nsimu, swi nga ha chava loko swi ehleketa hi mhaka yo sungula tidyondzo ta Bibele ni ku ti fambisa. Xana hi nga swi pfuna njhani leswaku swi va ni xivindzi xo endla ntirho lowu wa risima?—Mat. 24:14; 28:19, 20.
2 Loko xichudeni xa Bibele xi va muhuweleri la nga khuvuriwangiki, hakanyingi xi va se xi tsarisile eka Xikolo Xa Vutirheli Bya Le Tilweni. Ndzetelo lowu xi wu kumaka loko xi ri karhi xi lunghiselela ni loko xi veka nkulumo ya xona, wu ta xi pfuna leswaku xi antswisa vuswikoti bya xona byo dyondzisa lebyi lavekaka eka ‘mutirhi la nga riki na nchumu wo khomiwa hi tingana ha wona, la ri tamelaka khwatsi rito ra ntiyiso.’—2 Tim. 2:15.
3 Xi Dyondzise Hi Ku Xi Vekela Xikombiso: Yesu u letele vadyondzisiwa vakwe hi ku va nyika ndzetelo lowu nga erivaleni a tlhela a va vekela xikombiso. U te: “Un’wana ni un’wana loyi a leteriwaka hi ku hetiseka u ta fana ni mudyondzisi wakwe.” (Luka 6:40) I swa nkoka leswaku u tekelela madyondziselo ya Yesu loko u ri ensin’wini. Loko xichudeni xa wena xi vona madyondziselo ya wena, xi ta swi twisisa leswaku xikongomelo xo endla maendzo yo vuyela i ku ya sungula tidyondzo ta Bibele.
4 Hlamusela xichudeni leswaku loko hi byela munhu hi ta dyondzo ya Bibele, hi ntolovelo a swi bohi leswaku hi hlamusela vuxokoxoko bya ndlela leyi dyondzo yi nga ta fambisiwa ha yona. Hakanyingi i swinene ku vhela u kombisa ndlela leyi dyondzo yi fambisiwaka ha yona hi ku tirhisa ndzimana yin’we kumbe timbirhi ta buku leyi ku dyondziwaka ha yona. Swiringanyeto swo sungula dyondzo swi kumeka eka tluka 8 ra Vutirheli Bya Hina Bya Mfumo lebyi u byi khomeke ni bya January 2002, tluka 6.
5 Loko swi fanerile, xichudeni a xi fambe na wena eka tidyondzo ta wena kumbe xi famba ni muhuweleri un’wana la nga ni ntokoto wo fambisa tidyondzo ta Bibele. Xi nga ha hlamusela ndzimana kumbe tsalwa ro karhi. Xisweswo, xi ta dyondza swo tala hi ku xiya ndlela leyi tidyondzo ta Bibele ti fambisiwaka ha yona leswaku ti endla nhluvuko. (Swiv. 27:17; 2 Tim. 2:2) Xi bumabumele u tlhela u bula na xona hi ndlela leyi xi nga antswisaka ha yona.
6 Loko hi letela vahuweleri lavantshwa leswaku va va vadyondzisi va Rito ra Xikwembu, sweswo swi ta va hlomisela ku endla ‘ntirho lowunene’ wa ku sungula tidyondzo ta Bibele ni ku ti fambisa. (2 Tim. 3:17) Swi tsakisa ngopfu ku tirha swin’we na vona entirhweni wo twarisa xirhambo xa musa lexi nge: “Mani na mani la swi navelaka a a nwe mati ya vutomi mahala”!—Nhlav. 22:17.