Xi Hlayise

Ku Fambisa Tidyondzo Ta Bibele Leti Endlaka Nhluvuko

Xiengetelo lexi xi tamele tinhla-nkulu leti tekiweke eka swihloko leswi tlhandlamanaka swa ku fambisa tidyondzo ta Bibele leti endlaka nhluvuko leswi kumekaka eka Vutirheli Bya Hina Bya Mfumo. Hinkwerhu hi khutaziwa leswaku hi xi hlayisa naswona hi xi tirhisa loko hi fambisa tidyondzo ta Bibele. Ku engetela kwalaho, tinhla leti humaka eka xiengetelo lexi ti nga ha kandziyisiwa hi nkarhi wa nhlangano wa ntirho wa nsimu, naswona valanguteri va ntirho va nga ha ti tirhisa tanihi xisekelo xa tinkulumo ta vona loko va endzela mintlawa ya tidyondzo ta buku.

Xiyenge 1: Dyondzo Ya Bibele I Yini?

Loko u tshamela ku va ni bulo ra Bibele, hambiloko ri komile, u ri karhi u tirhisa Bibele ni yin’wana ya tibuku leti ku fambisiwaka ha tona dyondzo, u va u ri eku fambiseni ka dyondzo ya Bibele. Dyondzo yi nga vikiwa loko se yi fambisiwe kambirhi endzhaku ka loko u ta va u kombe munhu wa kona ndlela leyi ku dyondziwaka ha yona niloko u ri ni ntshembo wa leswaku mi ta hambeta mi dyondza.—km-TS 7/04 tl. 1.

Tibuku Leti Nga Tirhisiwaka

◼ I Yini Leswi Xikwembu Xi Swi Languteleke Eka Hina?

◼ Vutivi Lebyi Yisaka eVuton’wini Lebyi Nga Heriki

◼ Gandzela Xikwembu Xi Ri Xin’we Xa Ntiyiso

◼ U Nga Va Munghana Wa Xikwembu! yi nga ha tirhisiwa ku fambisa tidyondzo ni vanhu lava nga dyondzangiki kumbe lava nga kotiki ku hlaya.

Xiyenge 2: Ku Lunghiselela Ku Ya Fambisa Dyondzo

Hi fanele hi hlamusela rungula rero hi ndlela leyi nga ta khumba mbilu ya xichudeni. Leswi swi lava leswaku hi lunghiselela hi rixaladza hi ri karhi hi anakanya hi xichudeni xexo.—km-TS 8/04 tl. 1.

Ndlela Yo Lunghiselela

◼ Hlaya xihloko, swihlokwana ni swifaniso.

◼ Kuma tinhlamulo ta swivutiso leswi nga ebukwini, u fungha marito-nkulu ntsena ni swivulwa-nkulu.

◼ Ehleketisisa leswaku hi wahi matsalwa lawa u nga ta ma hlaya loko mi ri karhi mi dyondza. Tsala marito yo karhi emakumu ka tluka ra buku yoleyo yi dyondziwaka.

◼ Hlela tinhla-nkulu leti mi nga ta ti pfuxeta.

Yi Endle Onge I Dyondzo Ya Wena:

◼ Khongelela xichudeni xa wena ni leswi lavekaka eka xona.

◼ Anakanya ka ha ri emahlweni hi tinhla leti nga ha tikelaka xichudeni ku ti twisisa kumbe ku ti amukela.

◼ Tivutise: Hi swihi leswi xi faneleke xi swi twisisa kumbe leswi xi faneleke xi swi cinca evuton’wini bya xona leswaku xi ta kula emoyeni? Xana ndzi nga yi fikelela njhani mbilu ya xona?

◼ Loko swi fanerile lunghiselela xikombiso xo karhi, nhlamuselo yo karhi, kumbe nxaxamelo wa swivutiso leswaku u pfuna xichudeni xi twisisa yinhla yo karhi kumbe tsalwa ro karhi.

Xiyenge 3: Ku Tirhisa Matsalwa Hi Ndlela Leyinene

Xikongomelo xa hina xo fambisa tidyondzo ta Bibele i ku ‘endla vanhu vadyondzisiwa,’ hi ku va pfuna leswaku va twisisa va tlhela va amukela tidyondzo ta Rito ra Xikwembu kutani va ti tirhisa evuton’wini bya vona. (Mat. 28:19, 20; 1 Tes. 2:13) Hikwalaho, leswi hi swi dyondzisaka swi fanele swi sekeriwa eMatsalweni.—km-TS 11/04 tl. 4.

Dyondzisa Leswi Humaka eRitweni Ra Xikwembu

◼ Komba xichudeni ndlela yo pfula Matsalwa eBibeleni ya xona.

◼ Pfula Matsalwa lama kombaka leswaku tidyondzo leti hi ti pfumelaka ti sekeriwe eBibeleni u tlhela u ma hlamusela.

◼ Tirhisa swivutiso. Ematshan’weni yo hlamusela xichudeni Matsalwa, kombela xona leswaku xi ku hlamusela wona.

◼ Olovisa. U nga ringeti ku hlamusela yinhla yin’wana ni yin’wana ya tsalwa. Hlamusela ntsena leswi lavekaka leswaku u veka yinhla erivaleni.

◼ Hlamusela lomu matsalwa ma tirhaka kona. Pfuna xichudeni leswaku xi vona ndlela leyi Matsalwa ma xi khumbaka ha yona.

Xiyenge 4: Letela Swichudeni Ku Lunghiselela

Xichudeni lexi hlayaka dyondzo ka ha ri emahlweni ivi xi fungha tinhlamulo, kutani xi anakanya hi ndlela leyi xi nga ta tiphofula ha yona hi marito ya xona n’wini, a xi hlweli ku endla nhluvuko hi tlhelo ra moya. Hikwalaho, loko dyondzo yi sunguriwile, lunghiselela na xona u ri karhi u xi komba ndlela yo lunghiselela. Swichudeni swo tala swa vuyeriwa loko mi lunghiselela swin’we ndzima kumbe dyondzo hinkwayo.—km-TS 12/04 tl. 1.

Ku Fungha Tinhlamulo Ni Ku Tsala Tinhla Etlhelo Ka Tluka Ra Buku

◼ Hlamusela ndlela yo kuma tinhlamulo leti kongomeke ta swivutiso leswi nga ebukwini.

◼ Komba xichudeni buku ya wena leyi u nga fungha marito kumbe swiga swa nkoka ntsena.

◼ Pfuna xichudeni xi tiva leswaku tsalwa rin’wana ni rin’wana leri nga tshahiwangiki ri yi seketela njhani yinhla leyi nga endzimaneni, u tlhela u xi komba ndlela yo tsala tinhla to koma etlhelo ka tluka ra buku ya xona.

Nkambisiso Ni Mpfuxeto

◼ Komba xichudeni ndlela yo kambisisa ndzima kumbe xihloko xa dyondzo, swihlokwana ni swifaniso xi nga si sungula ku lunghiselela hi vuenti.

◼ Khutaza xichudeni leswaku xi pfuxeta tinhla-nkulu loko xi heta ku lunghiselela.

Xiyenge 5: Pima Leswaku U Ta Hlanganisa Rungula Ro Tanihi Kwihi

Rungula leri nga ta dyondziwa ri ta ya hi vuswikoti ni hi swiyimo swa xichudeni ni mudyondzisi.—km-TS 1/05 tl. 1.

Aka Ripfumelo Leri Tiyeke

◼ U nga tsutsumisi nkarhi lerova xichudeni xi nga ri twisisi kahle Rito ra Xikwembu.

◼ Heta nkarhi lowu ringaneke leswaku u pfuna xichudeni xi twisisa ni ku amukela leswi xi swi dyondzaka.

◼ Heta nkarhi lowu ringaneke u ri karhi u xi hlamusela matsalwa-nkulu lama hlamuselaka xisekelo xa leswi u xi dyondzisaka swona.

Tshama Eka Nhloko-mhaka Leyi Dyondziwaka

◼ Loko xichudeni xi rhandza ku nghenisa ngopfu timhaka ta xona n’wini, hi nga ha xi byela leswaku hi ta bula ha tona loko hi heta ku dyondza.

◼ U nga vulavuli ngopfu hi nkarhi wa dyondzo. A hi fanelanga hi hoxa tinhla to tala kumbe hi rungula mintokoto yo leha lerova xichudeni xi nga ha koti ku kuma vutivi lebyi kongomeke bya tidyondzo ta Bibele.

Xiyenge 6: Loko Xichudeni Xi Vutisa Xivutiso Xo Karhi

Loko dyondzo ya Bibele yi sungurile, i swinene ku dyondzisa xichudeni tidyondzo ta Bibele hi ku landzelelana ka tona ematshan’weni yo ti tlovatlova. Leswi swi ta pfuna xichudeni leswaku xi aka masungulo ya vutivi lebyi kongomeke ni ku endla nhluvuko hi tlhelo ra moya.—km-TS 2/05 tl. 8.

Xalamuka

◼ Swivutiso leswi fambisanaka ni dyondzo leyi mi nga eka yona swi nga hlamuriwa xikan’we-kan’we.

◼ Swivutiso leswi nga fambisaniki ni rungula leri dyondziwaka kumbe leswi nga ta lava leswaku ku endliwa ndzavisiso, swi nga vekeriwa nkarhi wun’wana. Swi nga ha va swinene ku tsala swivutiso sweswo ehansi.

◼ Loko xichudeni swi xi tikela ku pfumela dyondzo yo karhi, kambisisa rungula rin’wana leri yi hlamuselaka hi vuenti dyondzo ya kona.

◼ Loko xichudeni xi nga si khorwiseka, swa antswa mhaka ya kona u yi vekela nkarhi wun’wana ivi mi ya emahlweni ni dyondzo ya n’wina.

Ringanisela

◼ Loko u nga yi tivi nhlamulo ya xivutiso xo karhi, papalata ku byela xichudeni mavonelo ya wena.

◼ Komba xichudeni hakatsongo-tsongo ndlela leyi xi nga endlaka ndzavisiso ha yona.

Xiyenge 7: Ku Khongela Ni Xichudeni Xa Wena

Leswaku swichudeni swa Bibele swi endla nhluvuko hi tlhelo ra moya ku laveka mpfuno wa Yehovha. Hikwalaho, loko se u sungule dyondzo ni munhu wo karhi swi fanerile ku yi sungula ni ku yi gimeta hi xikhongelo.—km-TS 3/05 tl. 4.

Ndlela Yo Hlamusela Nkoka Wa Xikhongelo

◼ Eka vanhu lava rhandzaka vukhongeri, minkarhi yo tala hi nga khongela eka siku ro sungula loko hi sungula dyondzo.

◼ Kasi eka swichudeni swin’wana, swi nga ha lava leswaku hi rhanga hi vona loko se swi fanerile ku khongela.

◼ U nga ha tirhisa Pisalema 25:4, 5 na 1 Yohane 5:14, ku hlamusela xivangelo xa ku va swi fanerile ku khongela.

◼ Yohane 15:16 u nga yi tirhisa ku komba leswaku hi fanele hi khongela eka Yehovha hi vito ra Yesu Kreste.

Leswi Nga Katsiwaka eXikhongelweni

◼ Swi fanerile ku dzunisa Yehovha tanihi leswi ku nga yena Xihlovo xa ndzetelo wolowo.

◼ Komba xichudeni xa wena leswaku u xi rhandza ngopfu.

◼ Phofula ndlela leyi u yi tlangelaka ha yona nhlengeletano leyi Yehovha a yi tirhisaka.

◼ Kombela Yehovha leswaku a katekisa matshalatshala lawa xichudeni xi ma endlaka leswaku xi tirhisa leswi xi swi dyondzaka.

Xiyenge 8: Ku Kongomisa Swichudeni eNhlengeletanweni

Pakani ya hina loko hi fambisa tidyondzo ta Bibele a hi ku dyondzisa hi ta ripfumelo ra hina ntsena kambe i ku pfuna swichudeni leswaku swi va swirho swa vandlha ra Vukreste. Xi hlamusele yinhla yo karhi hi ta nhlengeletano ya Yehovha kan’we hi vhiki.—km-TS 4/05 tl. 8.

Minhlangano Ya Vandlha

◼ Hlamusela minhlangano ya vandlha ha wun’we-wun’we. Rhambela swichudeni eminhlanganweni ma ha ku sungula ku dyondza.

◼ Swi rungulele tinhla leti tsakisaka leti u ti kumeke eminhlanganweni.

◼ Swi endle leswaku swi navela ku va kona eXitsundzuxweni, etinhlengeletanweni ni loko ku ri vhiki ra mulanguteri wa xifundzha.

◼ Tirhisa swifaniso leswi nga eminkandziyisweni ya hina ku swi pfuna leswaku swi vona leswi humelelaka eminhlanganweni.

◼ Swi khutaze ku hlaya broxara leyi nge Timbhoni Ta Yehovha—I Vamani Xana? Ti Pfumela Yini Ke?

Tirhisa Tivhidiyo Leswaku U Pfuna Swichudeni Swi Tlangela Nhlengeletano

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Xiyenge 9: Pfuna Xichudeni Leswaku Xi Lunghekela Ku Chumayela Hi Xitshuketa

Loko swichudeni swa Bibele swi sungula ku va ni ripfumelo eka leswi swi swi dyondzaka, swi titwa swi lava ku vulavula ha swona.—km-TS 5/05 tl. 1.

Swi Khutaze Ku Chumayela

◼ Xana swi ni vanghana kumbe vandyangu lava swi nga va kombelaka leswaku va va kona loko mi ri karhi mi dyondza?

◼ Xana va kona lava tsakelaka mahungu lamanene entirhweni, exikolweni kumbe van’wana lava xi va toloveleke?

Swi Letele Ku Byela Van’wana Hi Ta Ripfumelo Ra Swona

◼ Minkarhi yin’wana loko mi ri eku dyondzeni, vutisa xichudeni u ku: “Xana u nga yi tirhisa njhani Bibele ku hlamusela vandyangu wa wena ntiyiso lowu?”

◼ Pfuna xichudeni leswaku xi twisisa xivangelo xa ku va ni xichavo ni musa loko xi vulavula ni van’wana hi Xikwembu ni hi swikongomelo swa Xona.

◼ Swichudeni swi nga tirhisa broxara leyi nge Timbhoni Ta Yehovha—I Vamani Xana? Ti Pfumela Yini Ke? leswaku swi pfuna vanghana ni swirho swa ndyangu leswaku swi twisisa tidyondzo ta hina leti sekeriweke eBibeleni.

Xiyenge 10: Letela Swichudeni Ku Chumayela Hi Yindlu Ni Yindlu

Xichudeni xa Bibele xi nga sungula ku huma nsimu swin’we ni vandlha loko vakulu va tiyiseka leswaku se xa faneleka ku va muhuweleri la nga khuvuriwangiki.—km-TS 6/05 tl. 1.

Ku Lunghiselela Swin’we

◼ Komba muhuweleri lontshwa leswaku swingheniso swi kumeka kwihi.

◼ N’wi pfune a hlawula xingheniso xo olova lexi tirhaka ensin’wini ya n’wina.

◼ N’wi khutaze to ho suka leswaku a tirhisa Bibele loko a ri ensin’wini.

◼ Lunghiselela na yena. N’wi kombe ndlela ya vutlhari yo hlamula eka leswi vanhu va le nsin’wini ya n’wina va angurisaka xiswona.

Ku Chumayela Swin’we

◼ Byela xichudeni leswaku xi ku yingisela loko u ri karhi u tirhisa xingheniso lexiya mi xi lunghiseleleke swin’we.

◼ Anakanyela vumunhu ni vuswikoti bya xona. Minkarhi yin’wana, swi nga va swinene leswaku muhuweleri lontshwa a sungula kumbe a vula swo karhi eka xingheniso xexo.

◼ Pfuna muhuweleri lontshwa leswaku a tiendlela xiyimiso xa ku huma nsimu nkarhi hinkwawo.

Xiyenge 11: Ku Pfuna Swichudeni Ku Endla Maendzo Yo Vuyela

Masungulo ya riendzo ro vuyela ma endliwa eka riendzo ro sungula. Khutaza xichudeni leswaku xi tsakela vanhu lava xi vulavulaka na vona. Hambeta u xi letela leswaku xi endla vini va miti va tiphofula, naswona xi rhiya ndleve loko va ri karhi va vulavula, nileswaku xi tsala swilo leswi va karhatekaka ha swona.—km-TS 7/05 tl. 1.

Ku Lunghiselela Riendzo Ro Vuyela

◼ Pfuxetani leswi mi buleke ha swona eka riendzo ro sungula, ivi u komba muhuweleri lontshwa ndlela yo hlawula yinhla leyi nga ta tsakisa n’wini wa muti.

◼ Lunghiselelani swin’we xingheniso xo koma, tsalwa rin’we ra Bibele kun’we ni ndzimana yin’we enkandziyisweni lowu a wu siyeleke n’wini wa muti.

◼ Lunghiselelani xivutiso lexi a nga ta xi vutisa n’wini wa muti loko a gimeta bulo leswaku a andlala masungulo ya riendzo leri landzelaka.

Hisekela Ku Endla Maendzo Yo Vuyela

◼ Khutaza xichudeni leswaku xi vuyela hi ku hatlisa eka hinkwavo lava tsakeleke rungula ra Mfumo.

◼ Pfuna xichudeni leswaku xi vona nkoka wa ku phikelela loko xi ri karhi xi ringeta ku kuma lava nga kumekiki hi ku olova.

◼ Komba muhuweleri lontshwa ndlela yo byela n’wini wa muti leswaku u ta tlhela a vuya rini, u tlhela u n’wi pfuna leswaku a twisisa xivangelo xo vuyela tanihi leswi a tshembiseke.

Xiyenge 12: Ku Pfuna Swichudeni Leswaku Swi Sungula Tidyondzo Ta Bibele Ni Ku Ti Fambisa

I swa nkoka leswaku u tekelela madyondziselo ya Yesu loko u ri ensin’wini hi ku va xikombiso lexinene. Loko xichudeni xa wena xi vona madyondziselo ya wena, xi ta swi twisisa leswaku xikongomelo xo endla maendzo yo vuyela i ku ya sungula tidyondzo ta Bibele.—km-TS 8/05 tl. 1.

Ku Byela N’wini Wa Muti Hi Ta Dyondzo Ya Bibele

◼ Hlamusela xichudeni leswaku hi ntolovelo a swi bohi leswaku hi hlamusela vuxokoxoko bya ndlela leyi dyondzo yi nga ta fambisiwa ha yona.

◼ Hakanyingi i swinene ku vhela u kombisa ndlela leyi dyondzo yi fambisiwaka ha yona hi ku tirhisa ndzimana yin’we kumbe timbirhi ta buku leyi ku dyondziwaka ha yona.

◼ Pfuxetani mi tlhela mi titoloveta xin’wana xa swiringanyeto swo sungula tidyondzo ta Bibele.—km-TS 8/05 tl. 8; km-TS 1/02 tl. 6.

Letela Swichudeni Leswaku Swi Va Vadyondzisi

◼ Khutaza swichudeni leswaku swi tsarisa eka Xikolo Xa Vutirheli Bya Le Tilweni.

◼ Hlela leswaku muhuweleri lontshwa a famba na wena eka tidyondzo ta wena ta Bibele, laha a nga ta hoxa xandla eku dyondziseni.