Tilunghiselele Hi Ku Helela Leswaku U Ta Dyondzisa
1. Loko hi fambisa dyondzo ya Bibele, i yini leswi hi faneleke hi lwela ku swi fikelela?
1 Loko hi fambisa dyondzo ya Bibele, hi fanele hi ti lunghiselela hi ku helela leswaku hi ta kota ku pfuna xichudeni leswaku xi tirhela Yehovha. Hi fanele hi tikarhata, hi lwela ku xi pfuna leswaku xi swi tlangela swinene leswi xi swi dyondzaka eBibeleni. Leswi swi ta xi khutaza. (Det. 6:5; Swiv. 4:23; 1 Kor. 9:26) Xiya ndlela leyi sweswo hi nga swi endlaka ha yona.
2. Ha yini ku khongela swi ri swa nkoka loko hi lunghiselela ku ya fambisa dyondzo ya Bibele?
2 Khongela Loko U Lunghiselela: Leswi Yehovha ku nga yena la pfunaka xichudeni leswaku xi twisisa ntiyiso, i swa nkoka leswaku loko hi lunghiselela hi xi katsa exikhongelweni xa hina naswona hi boxa ni swilo leswi hi navelaka leswaku xi swi fikelela. (1 Kor. 3:6; Yak.1:5) Xikhongelo xo tano xi nga hi pfuna ku vona leswaku i yini swin’wana leswi hi nga swi endlaka leswaku hi xi pfuna xi kuma “vutivi lebyi kongomeke” lebyi nga ta xi pfuna leswaku xi endla ku rhandza ka Yehovha.—Kol. 1:9, 10.
3. Loko hi lunghiselela, i yini leswi hi nga swi endlaka ku komba leswaku hi anakanya hi xichudeni xa hina?
3 Anakanya Hi Xichudeni Xa Wena Loko U Ri Eku Lunghiseleleni: Yesu a a swi tiva leswaku loko u lava ku pfuna vayingiseri va wena u fanele u anakanya ha vona. Munhu un’wana u tshame a vutisa Yesu xivutiso lexi nge: “Xana ndzi nga endla yini leswaku ndzi kuma ndzhaka ya vutomi lebyi nga heriki?” Endzhaku ka masiku ma nga ri mangani un’wana u tlhele a n’wi vutisa xivutiso lexi fanaka, kambe Yesu a nga va hlamulanga hi ndlela leyi fanaka. (Luka 10:25-28; 18:18-20) Loko hi lunghiselela hi fanele hi anakanya ngopfu hi xichudeni xa hina. Eka matsalwa lama nga eka tindzimana leti, hi wahi lawa ndzi nga ta xi hlayela wona? Hi nga hlaya rungula ro tanihi hi kwihi? Eka dyondzo leyi, hi tihi tinhla leti ti nga ta xi tikela ku ti twisisa kumbe ku ti amukela? Ku anakanyisisa hi swin’wana swa swivutiso leswi xichudeni xi nga ha swi vutisaka, swi ta hi pfuna leswaku hi xi nyika tinhlamulo leti enerisaka.
4. Xana ku lunghiselela kahle swi katsa yini?
4 Pfuxeta Rungula Leri Mi Nga Ta Ri Dyondza: Ku nga khathariseki leswaku wena se u ri dyondze kangani rungula ra kona, tsundzuka leswaku ku ta va ku ri ro sungula u ri dyondza ni xichudeni xa wena. Loko hi lava ku fikelela mbilu ya xona i swa nkoka ku lunghiselela dyondzo yin’wana ni yin’wana. Leswi swi vula leswaku hi fanele hi endla leswi hi xi khutazaka leswaku xi swi endla. Pfuxeta rungula leri mi nga ta ri dyondza ku katsa ni matsalwa lama kombisiweke, u ri karhi u anakanya hi xichudeni naswona u khwatihata tinhla-nkulu.—Rhom. 2:21, 22.
5. Hi nga n’wi tekelela njhani Yehovha?
5 Yehovha wa tsaka loko swichudeni swa hina swi dyondza swo tala hi Bibele ni hi nhlengeletano yakwe. (2 Pet. 3:9) Loko hi tinyika nkarhi wo lunghiselela hi nga si ya dyondza ni swichudeni swa hina, hi kombisa leswaku ha khathala ha swona ku fana na Yehovha.