Ku Fambisa Dyondzo Ya Le Kaya Ya Bibele

¹ Xana dyondzo ya le kaya ya Bibele yi fambisiwa hi ndlela yihi? Hi xihi xikombiso lexikulu lexi hi nga na xona? Xana matsalwa lama nga emhakeni leyi dyondziwaka ma nga hlanganisiwa hi ndlela yihi? I mani la faneleke ku hlaya tindzimana? Ku tlhandlekela eka ndlela yo fambisa dyondzo, i yini xin’wana lexi lavekaka ku pfuna xichudeni leswaku xi endla ntiyiso wu va wa xona? Hi swihi swihinga leswi faneleke ku papalatiwa?

² Ndlela Yo Fambisa Dyondzo: Hi laha ku tolovelekeke, dyondzo ya le kaya ya Bibele yi fana ni Dyondzo ya Xihondzo xo Rindza. Ku rhanga ku hlayiwa ndzimana leyi nga ta hlanganisiwa. Kutani loyi a fambisaka dyondzo a vutisa xivutiso lexi tsariweke xa ndzimana yoleyo, kutani a yimela xichudeni xi hlamula. Loko xichudeni xi kanakana, mufambisi u fanele a lunghekela ku vutisa swivutiso swin’wana leswi nga ta endla xichudeni xi ehleketa hi mhaka yoleyo ivi xi fikelela makumu lama faneleke.

³ Hlamusela ndlela leyi matsalwa ma tirhaka ha yona eka mhaka leyi nga endzimaneni. Komba xichudeni ndlela yo vona matsalwa lama tshahiweke ivi u kombisana na xona hi ndlela leyi ma tirhaka ha yona. Loko matsalwa ma kombisiwile kambe ma nga tshahiwanga, i swinene ku ma languta eBibeleni, loko ma nga lehanga ngopfu. Kutani u nyika xichudeni xi ma hlaya, xi tlhela xi hlamusela ndlela leyi ma seketelaka ni ku hlamusela leswi vuriwaka endzimaneni.

⁴ Pfuna Xichudeni Xi Endla Ntiyiso Wu Va Wa Xona: Khutaza swichudeni ku lunghiselela dyondzo hi ndlela leyinene. Kandziyisa leswaku ku hlaya i swa nkoka leswaku munhu a dyondza. Xichudeni xi vuyeriwa ngopfu loko xi hlaya mhaka yo tala leyi dyondziwaka ni ku anakanyisisa hi yona. Vafambisi van’wana va tshika xichudeni xi hlaya tindzimana hinkwato hi nkarhi wa dyondzo ya Bibele. Van’wana va siyerisana ni xichudeni eku hlayeni ka tindzimana. U fanele ku tirhisa mianakanyo leyinene, u tsundzuka nhluvuko wa moya wa xichudeni.

⁵ Ku hlanganisa mhaka hi ndlela yo dyondzisa hi swikombiso swi nga pfuna xichudeni xi va ni vutivi, kambe xana wa swi pfumela leswi a swi dyondzaka? Leswaku a endla ntiyiso wu va wakwe, u fanele a vona ndlela leyi mhaka yi n’wi khumbaka ha yona yena n’wini. Xana u titwisa ku yini hi leswi a swi dyondzaka? Xana a nga swi tirhisa njhani leswi a swi dyondzeke? Tirhisa swivutiso leswi nga ta fikelela mbilu ya xichudeni.

⁶ Papalata Swihinga: Ku ni swihinga leswi u faneleke ku swi papalata loko u fambisa dyondzo ya Bibele. Loko ku tlakuka timhaka leti ti nga fambisaniki ni mhaka leyi dyondziwaka, hakanyingi i swinene ku bula ha tona emakun’wini ya dyondzo kumbe siku rin’wana. Nakambe, i swa nkoka leswaku xichudeni xi nyika tinhlamulo hi marito ya xona ematshan’wini yo hlaya ebukwini. Leswi swi ta pfuna wena mufambisi leswaku u vona loko xichudeni xi yi twisisa mhaka.

⁷ Hikwalaho ka yini u nga tiendleli pakani yo fambisa dyondzo ya Bibele hambi ko va yin’we? A hi ntirho wo nonon’hwa loko u tshembela eka Yehovha ni ku landzela ndlela ya xisekelo ya Dyondzo ya Xihondzo xo Rindza. Ndlela leyi humelelaka swinene ya ku dyondzisa van’wana ntiyiso ni ku endla vadyondzisiwa i ku fambisa dyondzo ya le kaya ya Bibele. Hi ku endla leswi, na wena u nga kuma ntsako lowu tisiwaka hi ku hlanganyela hi xitalo eku hetisiseni ka xileriso xa Yesu lexi nga eka Matewu 28:​19, 20.