Ndlela Yo Endla Vadyondzisiwa Hi Buku Leyi Nge Vutivi

¹ Pakani leyi naveriwaka hi Vakreste hinkwavo i ku dyondzisa van’wana ntiyiso ni ku endla vadyondzisiwa hi vanhu lava va “hlawuleriweke vutomi lebyi nga heriki.” (Mint. 13:48; Mt. 28:19, 20) Nhlengeletano ya Yehovha yi hi nyike xitirho lexinene lexi ha xona hi nga ta hetisisa pakani leyi—buku leyi nge Vutivi Lebyi Yisaka eVuton’wini Lebyi Nga Heriki. Vito ra yona ri kandziyisa nkoka wa tidyondzo ta Bibele, hikuva vutomi lebyi nga heriki byi titshege hi ku kuma vutivi bya Yehovha, Xikwembu xin’we xa ntiyiso, ni bya N’wana wa yena, Yesu Kreste.—Yoh. 17:3.

² Buku leyi nge Vutivi sweswi hi yona buku-nkulu ya Sosayiti leyi tirhisiwaka ku fambisa tidyondzo ta le kaya ta Bibele. Hi ku tirhisa yona, hi ta dyondzisa ntiyiso hi ku olova, wu va erivaleni naswona hi xinkarhana. Leswi swi ta pfuna ku fikelela timbilu ta lava dyondzisiwaka. (Lk. 24:32) Kavula, ku ni xilaveko xa ku va mufambisi a tirhisa tindlela ta vutlhari to dyondzisa. Hikwalaho ka xikongomelo xolexo, ku lunghiseleriwe xiengetelo lexi leswaku ku nyikeriwa swiringanyeto ni switsundzuxo swa mayelana ni madyondziselo lawa ma tikombeke ma humelela. Hi ku ya hi ku twisisa, na hi ku ya hi swiyimo swa munhu, mi nga swi kota ku tirhisa swiringanyeto leswi tsariweke laha hakatsongo-tsongo kumbe hinkwaswo ka swona. Hlayisani xiengetelo lexi, naswona mi xi kambisisa nkarhi na nkarhi. Tinhla to hambana-hambana leti nga eka xona ti nga ha mi pfuna leswaku mi humelela swinene eku tirhiseni ka buku leyi nge Vutivi leswaku mi endla vadyondzisiwa.

³ Fambisani Tidyondzo Ta Le Kaya Ta Bibele Leti Humelelaka: Kombisa ku tsakela xichudeni tanihi leswi xi nga ta va mudyondzisiwa wa Mukreste ni makwerhu wa moya. Vana ni xinghana naswona u gingiriteka. Hi ku va muyingiseri lonene, u ta kota ku tiva munhu yoloye—leswi a kuriseke xiswona ni xiyimo xa yena evuton’wini—leswi nga ta ku pfuna ku twisisa ndlela yo antswa leyi u nga n’wi pfunaka ha yona emoyeni. Tikarhatele xichudeni xa wena.—1 Tes. 2:8.

⁴ Loko dyondzo yi sunguriwile, swa antswa leswaku tindzima ta buku leyi nge Vutivi ti dyondziwa hi ku landzelelana ka tona. Leswi swi ta endla leswaku xichudeni xi twisisa ntiyiso hi ku landzelelana, tanihi leswi buku leyi yi hlamuselaka timhaka ta Bibele hi ku landzelelana ka tona. Olovisa dyondzo naswona u yi endla yi tsakisa leswaku yi va na vutomi naswona yi ya emahlweni. (Rhom. 12:11) Hi ku ya hi swiyimo na hi vuswikoti bya ntumbuluko bya xichudeni, to tala ta tindzimana u nga swi kota ku ti hlanganisa ha yin’we-yin’we hi awara kumbe ku tlula, handle ko hatlisisa dyondzo. Swichudeni swi ta kula ku antswa loko mudyondzisi na xichudeni va hlayisa nkarhi lowu va endzelanaka ha wona leswaku va dyondza vhiki na vhiki. Xisweswo, eka vanhu vo tala, swi nga ha koteka leswaku va heta tindzima ta 19 ta buku hi tin’hweti ta tsevu kumbe ku tlula.

⁵ Sungulani xiyenge xin’wana ni xin’wana hi tinhlamuselo to koma leti nga ta endla leswaku xi tsakela mhaka ya kona. Mi ta xiya leswaku xihloko xa ndzima yin’wana ni yin’wana i nhloko-mhaka ya yona, leyi faneleke ku kandziyisiwa. Xihlokwana xin’wana ni xin’wana xi hlamusela yinhla-nkulu, xi ku pfuna ku tshama u ri karhi u tsundzuka xihloko xa ndzima. Tivonele leswaku u nga vulavuli ngopfu. Ematshan’wini ya sweswo, ringeta ku endla leswaku xichudeni xi tiphofula. Vutisa swivutiso swo kambela ntwisiso wa xichudeni, leswi sekeriweke eka leswi ana se xi swi tivaka, swi ta xi pfuna leswaku xi anakanyisisa naswona xi fikelela eka makumu lama nga wona. (Mt. 17:24-26; Lk. 10:25-37; vona Buku Yo Letela Ya Xikolo, tluka 51, ndzimana 10.) Namarhela swinene eka rungula leri kandziyisiweke ebukwini leyi nge Vutivi. Ku nghenisa rungula rin’wana swi ta hunguta kumbe ku siva tinhla-nkulu ni ku lehisa dyondzo. (Yoh. 16:12) Loko ku vutisiwa xivutiso lexi nga riki kona emhakeni leyi dyondziwaka, hakanyingi u nga hlamula xivutiso xa kona emakumu ka dyondzo. Leswi swi ta ku pfumelela leswaku u hlanganisa dyondzo ya vhiki handle ko hambukisiwa. Hlamusela xichudeni leswaku eku heteleleni swivutiso swa xona swo tala swi ta hlamuriwa loko ku ri karhi ku yiwa emahlweni ni dyondzo.—Vona Buku Yo Letela Ya Xikolo, tluka 94, ndzimana 14.

⁶ Loko xichudeni xi pfumela eka Vunharhu-un’we hilaha ku tiyeke, eka ku nga fi ka moya-xiviri, ndzilo wa tihele, kumbe tidyondzo tin’wana to tano ta mavunwa, naswona leswi swi hlamuseriwaka ebukwini leyi nge Vutivi swi nga xi enerisi, u nga ha xi nyika buku leyi nge Ku Hlamulana kumbe buku yin’wana leyi vulavulaka hi timhaka toleto. Xi byele leswaku u ta bula hi mhaka ya kona na xona endzhaku ka loko xi anakanyisisile hi leswi xi swi hlayeke.

⁷ Ku sungula dyondzo ni ku yi gimeta hi xikhongelo xo kombela nkongomiso ni nkateko wa Yehovha swi endla xiendlakalo xexo xi xiximeka, swi veka munhu exiyin’weni xo anakanya leswi xiximekaka, naswona swi endla munhu a ehleketisisa hi Yehovha tanihi Mudyondzisi wa ntiyiso. (Yoh. 6:45) Loko xichudeni xa ha dzaha fole, eku heteleleni swi nga ha lava leswaku u xi byela hi nkarhi wa dyondzo leswaku xi ri tshika.—Mint. 24:16; Yak. 4:3.

⁸ Dyondzisa Hilaha Ku Humelelaka Hi Matsalwa, Hi Swifaniso Ni Hi Swivutiso Swa Mpfuxeto: Ku nga khathariseki leswaku mudyondzisi u yi dyondze kangani mhaka yoleyo, mudyondzisi la nga ni vutshila u ta lunghiselela dyondzo yin’wana ni yin’wana a ri karhi a anakanya hi xichudeni xo karhi. Leswi swi pfuna ku langutela swin’wana swa swivutiso swa xichudeni. Leswaku u dyondzisa hilaha ku humelelaka, swi lava u twisisa tinhla-nkulu ta ndzima ya kona. Languta matsalwa leswaku u vona ndlela leyi ma nghenaka ha yona emhakeni, kutani u hlawula lama nga ta hlayiwa hi nkarhi wa dyondzo. Anakanya hi ndlela leyi u nga dyondzisaka ha yona hi ku tirhisa swifaniso ni swivutiso swa mpfuxeto leswi nga emakumu ka ndzima.

⁹ Hi ku tirhisa matsalwa hilaha ku humelelaka, u ta pfuna xichudeni leswaku xi twisisa leswaku hakunene xi le ku dyondzeni ka Bibele. (Mint. 17:11) Loko u tirhisa bokisi leri nge “Tirhisa Bibele Ya Wena Swinene,” leri nga eka tluka 14 ra buku leyi nge Vutivi, n’wi dyondzise ndlela yo kuma matsalwa. N’wi kombe ndlela yo hambanisa tindzimana leti tshahiweke ebukwini. Loko nkarhi wu pfumela pfulani ivi mi hlaya matsalwa lama tsariweke kambe ma nga tshahiwanga. Kombela xichudeni leswaku xi hlamusela ndlela leyi ya seketelaka ndzimana kumbe ku humesela erivaleni leswi swi tsariweke endzimaneni ya kona. Kandziyisa swiyenge-nkulu swa tindzimana leswaku xi ta twisisa swivangelo swa tinhla-nkulu ta dyondzo. (Neh. 8:8) Hi ntolovelo, a ku na xilaveko xo va mudyondzisi a nghenisa matsalwa yo tala ebulwini ku tlula lama buku yi ma nyikeleke. Hlamusela nkoka wo tiva mavito ni ku landzelelana ka tibuku ta Bibele. Swi nga pfuna xichudeni loko xo hlaya matluka 27-30 ya Xihondzo xo Rindza xa June 15, 1991.

¹⁰ Dyondzo 34 ya Buku Yo Letela Ya Xikolo yi hlamusela leswaku swifaniso swi tlhontlha mianakanyo naswona swi endla swi olova ku khoma tidyondzo letintshwa. Swi koka vanhu hi mianakanyo ni mintlhaveko ya vanhu, leswaku rungula ri humesiwa hi ntamu ku nga leswi hakanyingi swi nga kotekiki loko swi vuriwa hi tinhlamuselo to olova. (Mt. 13:34) Buku leyi nge Vutivi yi na swifaniso swo tala leswi dyondzisaka leswi olovaka kambe swi ri ni ntamu. Hi xikombiso, xifaniso lexi tirhisiweke eka ndzima 17 xi aka ku tlangela ndlela leyi Yehovha hi tlhelo ra moya a phamelaka swakudya ha yona, swiambalo ni yindlu hi ku tirhisa vandlha ra Vukreste. Swifaniso leswo saseka leswi mpfampfarhutiweke swa buku leyi nge Vutivi swi nga tirhisiwa hilaha ku humelelaka leswaku swi pfuxa mintlhaveko. Ehansi ka xihlokwana lexi nga eka tluka 185, lexi nge “Ku Pfuxiwa Loku Tsakisaka,” vuyelo bya ndzimana 18 byi ta tiyisiwa hi ku va xichudeni xi languta exifanisweni lexi nga eka tluka 86. Leswi swi nga ha xi susumetela ku anakanya hi ku pfuxiwa ka vafi tanihi nchumu wa xiviri ehansi ka Mfumo wa Xikwembu.

¹¹ Swichudeni swa Bibele swi fanele swi endla nhluvuko emoyeni eka dyondzo yin’wana ni yin’wana. Hikwalaho ka leswi, u nga tsandzeki ku vutisa swivutiso swa mpfuxeto leswi nga ebokisini leri nge “Kambela Vutivi Bya Wena” leri kumekaka emakumu ka ndzima yin’wana ni yin’wana. U nga tsakisiwi hi nhlamulo leyi nga yona ntsena ya leswi dyondziweke. Swivutiso swo talanyana swa leswi swi endleriwe ku humesa leswi munhu a angurisaka xiswona hi yexe swi suka embilwini. Hi xikombiso, vona tluka 31, laha xichudeni xi vutisiwaka leswi: “Hi tihi timfanelo ta Yehovha Xikwembu leti u ti tsakelaka ngopfu?”—2 Kor. 13:5.

¹² Letela Swichudeni Leswaku Swi Lunghiselela Dyondzo: Xichudeni lexi hlayaka laha ku nga ta dyondziwa kona ka ha ri ni nkarhi, xi fungha tinhlamulo ni ku anakanya ndlela leyi xi nga ta hlamula ha yona hi marito ya xona n’wini, xi ta endla nhluvuko wa moya hi ku hatlisa. Hi xikombiso ni hi xikhutazo xa wena, u nga xi letela ku lunghiselela dyondzo. Xi kombe buku ya wena, leyi u nga yi fungha marito-nkulu ya swivulwa. Hlamusela ndlela yo kuma tinhlamulo leti kongomeke ta swivutiso leswi kandziyisiweke. Ku lunghiselela swin’we ndzima swi nga ha pfuna xichudeni. Xi khutaze leswaku xi hlamula hi marito ya xona n’wini. Hi kona laha u nga ta swi vona kahle loko xi yi twisisa mhaka kumbe xi nga yi twisisi. Loko xi hlaya nhlamulo ya xona ebukwini, u nga ha pfuxa mianakanyo ya xona hi ku xi vutisa ndlela leyi a xi ta hlamusela yinhla yoleyo eka un’wana hi marito ya xona ha yona.

¹³ Khutaza xichudeni leswaku xi languta matsalwa lama nga tshahiwangiki tanihi xiphemu xa ku lunghiselela ka xona ka vhiki na vhiki, tanihi leswi ku nga ta ka ku nga vi na nkarhi wo hlaya hinkwawo ka wona hi nkarhi wa dyondzo. Xi bumabumele hi matshalatshala lawa xi ya endlaka edyondzweni ya xona. (2 Pet. 1:5; vona Xihondzo xo Rindza xa August 15, 1993, matluka 13-14, leswaku u kuma swiringanyeto leswi engetelekeke swa mayelana ni leswi nga endliwaka hi mudyondzisi ni hi xichudeni leswaku mi ndlandlamuxa ku dyondza ka n’wina edyondzweni ya Bibele.) Hi ndlela leyi, xichudeni xi le ku leteriweni ku lunghiselela ni ku nyikela tinhlamulo leti akaka eminhlanganweni ya vandlha. Xi ta va xi dyondza mikhuva leyinene yo endla dyondzo ya munhu hi xiyexe leyi nga ta xi hlomisela ku hambeta xi endla nhluvuko entiyisweni endzhaku ka loko dyondzo ya xona ya Bibele hi buku leyi nge Vutivi yi herile.—1 Tim. 4:15; 1 Pet. 2:2.

¹⁴ Kongomisani Swichudeni eNhlengeletanweni Ya Yehovha: I vutihlamuleri bya muendli wa vadyondzisiwa ku kongomisa swilaveko swa xichudeni enhlengeletanweni ya Yehovha. Xichudeni xi ta kula hi ku hatlisa emoyeni loko xi tiva ni ku twisisa nhlengeletano naswona xi xiya xilaveko xo va xiphemu xa yona. Hi lava leswaku xi kuma ntsako hi ku hlanganyela ni vanhu va Xikwembu naswona xi langutela emahlweni leswaku xi va na hina eHolweni ya Mfumo, laha xi nga ta kuma nseketelo wa moya ni wa mintlhaveko lowu nyikeriwaka hi vandlha ra Vukreste.—1 Tim. 3:15.

¹⁵ Broxara leyi nge Timbhoni Ta Yehovha—Ti Endla Ku Rhandza Ka Xikwembu Hi Vun’we eMisaveni Hinkwayo yi kandziyiseriwe ku tolovetisa vanhu nhlengeletano leyi vonakaka leyi nga yona ntsena leyi Yehovha a yi tirhisaka namuntlha leswaku a hetisisa ku rhandza ka yena. Loko dyondzo ya ha ku sunguriwa, ha yini u nga nyiki xichudeni kopi ya xona? Ku sukela eku sunguleni, tshama u ri karhi u rhambela xichudeni eminhlanganweni. Hlamusela ndlela leyi minhlangano yi fambisiwaka ha yona. U nga ha xi byela nhloko-mhaka ya nkulumo ya le rivaleni leyi nga ta nyikeriwa kumbe u xi kombisa xihloko lexi ku nga ta dyondziwa xona eka Dyondzo ya Xihondzo xo Rindza. Kumbexana u nga ha xi teka u ya xi kombisa Holo ya Mfumo loko ku nga ri ku fambisiweni ka nhlangano leswaku u herisa ku chava kwihi na kwihi loku xa ha vaka na kona mayelana ni ku ya endhawini leyintshwa ro sungula. U nga ha xi kumela xo famba ha xona eminhlanganweni. Loko xi ta, xi endle xi titwa xi amukelekile naswona xi ri ekaya. (Mt. 7:12) Xi tivise eka Timbhoni tin’wana, ku katsa ni vakulu. Lexi tsakisaka, xi ta sungula ku languta vandlha ri ri ndyangu wa moya. (Mt. 12:49, 50; Mar. 10:29, 30) U nga ha xi vekela pakani, yo tanihi ku va kona enhlanganweni wun’we vhiki na vhiki, kutani hi ku famba ka nkarhi u engetela pakani ya kona.—Hev. 10:24, 25.

¹⁶ Loko dyondzo ya Bibele ya le kaya yi ya emahlweni hi ku tirhisa buku leyi nge Vutivi, kandziyisa swiyenge leswi kandziyisaka swilaveko leswi kombisaka nkoka wa ku va kona eminhlanganweni ya vandlha nkarhi na nkarhi. Ngopfu-ngopfu xiya matluka 52, 115, 137-9, 159, kun’we ni ndzima 17. Phofula mintlhaveko ya wena n’wini ya ku tlangela nhlengeletano ya Yehovha. (Mt. 24:45-47) Vula leswinene hi vandlha ra ka n’wina ni hi leswi u swi dyondzaka eminhlanganweni. (Ps. 84:10; 133:1-3) Swi ta va swinene loko xichudeni xo hlalela vhidiyo yin’wana ni yin’wana ya Sosayiti, xi sungula hi leyi nge Jehovah’s Witnesses—The Organization Behind the Name. Leswaku u kuma rungula leri engetelekeke ra ndlela leyi u nga endlaka leswaku xi tsakela nhlengeletano ha yona, vona Xihondzo xo Rindza xa November 1, 1984, matluka 11-15, na xiengetelo xa Vutirheli Bya Hina Bya Mfumo bya May 1993.

¹⁷ Khutazani Swichudeni Leswaku Swi Vula Vumbhoni Eka Van’wana: Pakani ya hina yo dyondza ni vanhu i ku va endla vadyondzisiwa lava vulaka vumbhoni hi Yehovha. (Esa. 43:10-12) Sweswo swi vula leswaku mudyondzisi u fanela a khutaza xichudeni leswaku xi vulavula ni van’wana hi leswi xi swi dyondzaka eBibeleni. Leswi swi nga endliwa hi ku olova hi ku vutisa ntsena u ku: “Xana u nga wu hlamusela njhani ntiyiso lowu eka vandyangu wa wena?” kumbe “I tsalwa rihi leri u nga ri tirhisaka ku kombisa ntiyiso wa leswi eka munghana wena?” Kandziyisa tinhla leti khutazaka ku vula vumbhoni ebukwini leyi nge Vutivi, to kota leti nga eka matluka 22, 93-5, 105-6, kun’we ni ndzima 18. Loko swi fanerile, xichudeni xi nga ha nyikiwa swiphephana swin’wana leswi xi nga ta swi tirhisa loko xi vula vumbhoni hi xitshuketa eka van’wana. Ringanyeta leswaku xi rhamba swirho swa ndyangu wa xona leswaku swi va kona hi nkarhi wa dyondzo. Xana xi ni vanghana lava na vona va tsakelaka ku dyondza? Xi kombele leswaku xi ku rhumela eka lava tsakelaka.

¹⁸ Hi ku va kona eXikolweni xa Vutirheli bya le Tilweni ni le ka Nhlangano wa Ntirho, mudyondzisiwa la languteriweke a nga kuma ndzetelo lowu engetelekeke ni lowu tsakisaka lowu nga ta n’wi pfuna ku va muhuweleri wa mahungu lamanene. Loko a vula leswaku u tsakela ku tsarisa exikolweni kumbe a va muhuweleri la nga khuvuriwangiki, misinya ya milawu leyi andlariweke eka matluka 98 na 99 ya buku leyi nge Vutirheli Bya Hina yi ta tirha. Loko swiyimo swakwe swa vutomi swi n’wi sivela ku faneleka, u nga ha lavisisa etibukwini ta Sosayiti leswaku u kuma rungula leri vulavulaka hi mhaka ya kona kutani u avelana mhaka ya kona na yena. Hi xikombiso, xichudeni xi nga ha va xi ri na xiphiqo xo hlula ku godzomberiwa hi fole kumbe hi swidzidzirisi swin’wana. Buku leyi nge Ku Hlamulana yi hlamusela swivangelo leswi tiyeke swa Matsalwa swa ku va Vakreste va papalata mikhuva yoleyo leyi onhaka, kutani eka tluka 257 yi andlala ndlela leyi tikombeke yi humelela eku pfuneni van’wana leswaku va tshika mukhuva wolowo. Khongela na yena hi mhaka leyi, u n’wi dyondzisa ku titshega swinene hi Yehovha leswaku a n’wi pfuna.—Yak. 4:8.

¹⁹ Endlelo leri faneleke ri landzeleriwa leswaku ku tiyisekiwa loko munhu wo karhi a fanelekela ku hlanganyela evutirhelini bya le rivaleni ri andlariwe eka Xihondzo xo Rindza xa January 15, 1996, tluka 16, ndzimana 6. Loko xichudeni xi faneleka, swi ta xi pfuna ku titoloveta na xona leswaku u xi lunghiselela siku ra xona ro sungula entirhweni wa nsimu. Xi hlamusele kahle hi n’wangulo wa vanhu ni nkaneto lowu tolovelekeke ensin’wini ya n’wina. Xi sungurise hi ntirho wa yindlu na yindlu loko swi koteka, kutani u ya emahlweni ni ku xi letela eka swiyenge swin’wana swa vutirheli. Loko u komisa xingheniso xa wena naswona u xi olovisa, swi ta xi olovela leswaku xi ku tekelela. Vana la akaka naswona u khutaza, u tsakela ntirho wa nsimu, leswaku xi ta tekelela moya wa wena ivi xi wu kombisa. (Mint. 18:25) Pakani ya mudyondzisiwa lontshwa yi fanele yi va ku va muhuweleri wa mahungu lamanene wa nkarhi hinkwawo la hisekaka. Kumbexana u nga n’wi pfuna ku tiendlela xiyimiso lexi tirhaka xa nsimu. Leswaku a ta endla nhluvuko eka vuswikoti bya yena byo vula vumbhoni eka van’wana, u nga ha ringanyeta leswaku a hlaya minkandziyiso ya Watchtower ya August 15, 1984, matluka 15-25; Xihondzo xo Rindza xa July 15, 1988, matluka 9-20; January 15, 1991, matluka 15-20; na January 1, 1994, matluka 20-5.

²⁰ Khutazani Swichudeni Leswaku Swi Tinyiketela Ni Ku Khuvuriwa: Swi fanele swi koteka eka xichudeni lexi nga ni mbilu leyinene ku dyondza leswi eneleke eka dyondzo ya buku leyi nge Vutivi leswaku xi tinyiketela eka Xikwembu ni ku fanelekela nkhuvulo. (Ringanisa Mintirho 8:27-39; 16:25-34.) Hambiswiritano, a nga si susumeteleka ku khuvuriwa, munhu u fanele a hlakulela ku tinyiketela eka Yehovha. (Ps. 73:25-28) Loko mi ri karhi mi dyondza, nkarhi na nkarhi lava minkarhi yo aka ku tlangela timfanelo ta Yehovha. Phofula mintlhaveko ya wena n’wini hi Xikwembu. Pfuna xichudeni leswaku xi anakanya hi ku hlakulela vuxaka lebyikulu na Yehovha. Loko se xi tiva Xikwembu ni ku xi rhandza, kutani xi ta xi tirhela hi ku tshembeka, hikuva ku tinyiketela eka Xikwembu swi fambisana ni ndlela leyi hi titwaka ha yona hi Yehovha tanihi munhu.—1 Tim. 4:7, 8; vona Buku Yo Letela Ya Xikolo, tluka 76, ndzimana 11.

²¹ Tikarhatele ku fikelela mbilu ya xichudeni. (Ps. 119:11; Mint. 16:14; Rhom. 10:10) Xi lava ku vona ndlela leyi ntiyiso wu ku khumbaka ha yona hi wexe ni ku hlawula leswi xi faneleke xi swi endla eka leswi xi swi dyondzeke. (Rhom. 12:2) Xana xa wu pfumela hakunene ntiyiso lowu xi byeriwaka wona vhiki na vhiki? (1 Tes. 2:13) Ku fikela kwalaho, u nga endla xichudeni xi tiphofula hi ku vutisa swivutiso swo kambela ntwisiso swa mavonelo ya xona, swo tanihi leswi: Xana u titwisa ku yini hi leswi? Xana u nga swi tirhisa njhani leswi evuton’wini bya wena? Leswi xi nga ta hlamurisa xiswona swi ta ku endla u twisisa laha ku lavekaka mpfuno lowu engetelekeke kona leswaku u fikelela mbilu ya xona. (Lk. 8:15; vona Buku Yo Letela Ya Xikolo, tluka 52, ndzimana 11.) Marito ya swifaniso leswi nga eka matluka 172 na 174 ya buku leyi nge Vutivi ya vutisa: “Xana u tinyiketerile eka Xikwembu hi xikhongelo?” na “I yini lexi ku sivelaka ku khuvuriwa?” Leswi swi nga susumetela xichudeni leswaku xi endla swo karhi hilaha ku humelelaka.

²² Endlelo leri faneleke ku landzeriwa loko muhuweleri la nga khuvuriwangiki a navela ku khuvuriwa ri andlariwe eka Xihondzo xo Rindza xa January 15, 1996, tluka 17, ndzimana 9. Buku leyi nge Vutivi yi tsariwe hi xikongomelo xo hlomisela munhu ku hlamula “Swivutiso Swa Lava Navelaka Ku Khuvuriwa,” leswi kumekaka eka xita-ndzhaku xa buku leyi nge Vutirheli Bya Hina, leswi vakulu va nga ta n’wi vutisa swona. Loko u kandziyise tinhlamulo ta swivutiso leswi tsariweke eka buku leyi nge Vutivi, xichudeni xi ta va xi hlomiseriwe swiyenge swa swivutiso leswi xi nga ta vutisiwa swona hi vakulu loko xi tilunghiselela nkhuvulo.

²³ Pfunani Lava Heteke Dyondzo Ya Le Kaya Ya Bibele: Ku fanele ku languteriwa leswaku loko munhu a heta ku dyondza buku leyi nge Vutivi, ku hiseka ka yena ni ku navela lokukulu ka ku tirhela Xikwembu swi ta va swi ri erivaleni. (Mt. 13:23) Hi yona mhaka leyi xihlokwana xo hetelela xa buku leyi xi vutisaka, “Xana Wena U Ta Endla Yini?” Tindzimana teto to hetelela ti pfuna xichudeni leswaku xi anakanya hi vuxaka lebyi xi faneleke xi byi hlakulerile eka Xikwembu, xilaveko xo tirhisa vutivi lebyi xi byi dyondzeke, ni xilaveko xo teka goza hi xihatla leswaku xi kombisa ku rhandza ka xona Yehovha. Ku hava lunghiselelo ro dyondza tibuku tin’wana ni lava va heteke buku leyi nge Vutivi. Hlamusela hi musa naswona swi va erivaleni eka xichudeni lexi xi tsandzekaka ku angula eka vutivi bya Xikwembu, u xi hlamusela leswi xi faneleke xi endla swona leswaku xi endla nhluvuko emoyeni. U nga ha vonana na xona nkarhi na nkarhi, u tshama u xi pfulele ndlela leswaku xi ta teka magoza lama yisaka evuton’wini lebyi nga heriki.—Ekl. 12:13.

²⁴ Mudyondzisiwa lontshwa loyi a amukelaka ntiyiso ivi a khuvuriwa u ta va na swo tala swo swi endla hi vutivi ni hi ku twisisa kakwe leswaku a ta tiya eripfumelweni. (Kol. 2:6, 7) Ematshan’wini yo yisa dyondzo ya Bibele ya le kaya emahlweni endzhaku ka loko mi hete buku leyi nge Vutivi, u nga ha tiendla u kumeka leswaku u xi pfuna laha xi lavaka mpfuno kona leswaku xi kula emoyeni. (Gal. 6:10; Hev. 6:1) Hikwalaho ka leswi, xi nga hetisisa ku twisisa ka xona hi ku hlaya Bibele siku na siku, hi ku tidyondzela Xihondzo xo Rindza ni tibuku tin’wana ta “nandza la tshembekaka,” hi ku lunghiselela minhlangano, ni ku bula hi ntiyiso ni vapfumeri-kulobye. (Mt. 24:45-47; Ps. 1:2; Mint. 2:41, 42; Kol. 1:9, 10) Ku hlaya ka xona buku leyi nge Vutirheli Bya Hina ni ku tirhisa leswi swi nga eka yona swi tlanga xiphemu xa nkoka leswaku xi va munhu wa moya la hlelekeke leswaku a hetisisa vutirheli bya yena hilaha ku heleleke.—2 Tim. 2:2; 4:5.

²⁵ Hlakulelani Vutshila Byo Dyondzisa: Hi lerisiwe ku “endla vadyondzisiwa . . . [h]i va dyondzisa.” (Mt. 28:19, 20) Leswi vutshila byo dyondzisa byi nga hambanangiki ni ku endla mudyondzisiwa, hi lava ku lwela ku endla nhluvuko tanihi vadyondzisi. (1 Tim. 4:16; 2 Tim. 4:2) Leswaku mi kuma swiringanyeto leswi engetelekeke swa vutshila byo dyondzisa, mi nga ha tsakela ku hlaya swihloko leswi nge: “Ku Antswisa Madyondziselo” na lexi nge “Ku Fikelela Mbilu Ya Vayingiseri Va Wena” eka Buku Yo Letela Ya Xikolo, tidyondzo 10 na 15; “Teacher, Teaching” eka Insight, Volume 2; ni swihloko swa Watchtower leswi nge “Ku Aka Hi Nhundzu Leyi Nga Tshwiki” na “Loko U Dyondzisa, Fikelela Mbilu,” August 1, 1984; swa Xihondzo xo Rindza leswi nge “Xana U Anakanyisisa Hi Ndlela Leyi Humelelaka Hi Matsalwa?,” March 1, 1986; na “Ndlela Yo Kuma Ntsako Eku Endleni Ka Vadyondzisiwa,” February 15, 1996.

²⁶ Loko mi ri karhi mi tiyimisela ku endla vadyondzisiwa, hi ku tirhisa buku leyi nge Vutivi, nkarhi na nkarhi khongelani leswaku Yehovha, la nga yena ntsena la “mirisaka,” a ta katekisa matshalatshala ya n’wina yo fikelela timbilu ta vanhu hi mahungu lamanene ya Mfumo. (1 Kor. 3:5-7) Onge u nga kuma ntsako wo dyondzisa van’wana leswaku va twisisa, va tlangela, ni ku endla xo karhi hi vutivi lebyi yisaka evuton’wini lebyi nga heriki!