Yi Tirhise Kahle Buku Leyi Nge Leswi Bibele Yi Swi Dyondzisaka

Loko xichudeni xi dyondza leswi Bibele yi swi dyondzisaka hakunene naswona xi tlhela xi hanya ha swona, xi ta kula hi tlhelo ra moya. (Ps. 1:1-3) Hi nga pfuna xichudeni leswaku xi endla nhluvuko hi ku ri tirhisa kahle rungula leri nga eka buku leyi nge Leswi Bibele Yi Swi Dyondzisaka.

Swivutiso Leswi Nga Eku Sunguleni: Eku sunguleni ka ndzima yin’wana ni yin’wana ku ni swivutiso leswi hlamuriwaka eka dyondzo yoleyo. U nga ha vutisa swivutiso leswi hi ndlela leyi nga ta endla leswaku xichudeni xi lava ku twa tinhlamulo ta swona. Kumbe u nga ha xi kombela leswaku xi swi hlamula hi ku komisa. Loko tinhlamulo ta xona ti nga ri tona, a swi bohi ku xi lulamisa. Tinhlamulo ta xona ti ta ku pfuna leswaku u kota ku xiya tinhla leti mi nga dzikaka eka tona ni ku ti kandziyisa.—Swiv. 16:23; 18:13.

Xiengetelo: Loko xichudeni xi ri twisisa ni ku ri amukela rungula leri mi dyondzaka rona, u nga ha xi khutaza leswaku xi tihlayela rungula leri nga eka xiengetelo. Loko u tlhela u xi endzela leswaku mi ta dyondza, tirhisa nkarhi wutsongo mi pfuxeta leswi mi dyondzeke ha swona ku tiyiseka loko xi ri twisisile rungula ra kona. Kambe, loko swi ta xi pfuna, mi nga ha ri hlaya swin’we rungula ra xiengetelo hi nkarhi wa dyondzo kumbe xiyenge xo karhi xa xiengetelo, mi hlaya tindzimana ni ku xi vutisa swivutiso leswi u swi lunghiseleleke ka ha ri emahlweni.

Bokisi Ra Mpfuxeto: Bokisi ra mpfuxeto leri nga emakumu ka ndzima yin’wana ni yin’wana ri ni tinhlamulo ta swivutiso leswi nga eku sunguleni ka ndzima. Tirhisa bokisi leri, ku vona loko xichudeni xa wena xi swi twisisa niloko xi swi kota ku hlamusela tinhla ta nkoka. Ti hlayeni swin’we tinhlamulo ta kona ku katsa ni matsalwa lama fambisanaka na tona. Endzhaku kombela xichudeni leswaku xi tirhisa (ma)tsalwa ku hlamusela leswaku ha yini nhlamulo yoleyo yi ri ntiyiso.—Mint. 17:2, 3.