Pakani Ya Nkoka Eka Lembe Lerintshwa Ra Ntirho

1. Hi yihi pakani leyi hi nga ehleketaka ha yona eka lembe lerintshwa ra ntirho?

¹ Hi fanele hi tivekela tipakani loko hi lava ku endla nhluvuko hi tlhelo ra moya. Hi tihi tipakani ta wena n’wini leti u ti vekeleke tona eka lembe lerintshwa ra ntirho? Pakani leyinene ngopfu i ku va phayona ra nkarhinyana, n’hweti yin’we kumbe to hlayanyana. Tanihi leswi ntirho lowu, lowu tsakisaka wu lavaka leswaku u lunghiselela ka ha ri ni nkarhi, lowu hi wona nkarhi lowunene wo sungula ku endla sweswo. Ha yini u tivekela pakani yo va phayona ra nkarhinyana?

2. Hi swihi swivangelo leswi hi nga anakanyaka ha swona leswaku hi ta tivekela pakani yo va maphayona ya nkarhinyana?

² Swivangelo Swo Va Phayona Ra Nkarhinyana: Ku va phayona ra nkarhinyana swi hi endla leswaku hi kota ku tsakisa Tata wa hina la nge matilweni “hi xitalo swinene” hi ku heta nkarhi wo tala hi ri ensin’wini. (1 Tes. 4:1) Loko hi ri karhi hi kambisisa leswi Yehovha a hi endleleke swona, timbilu ta hina ti hi susumetela ku byela van’wana ha yena. (Ps. 34:1, 2) Yehovha wa swi vona naswona wa swi tlangela leswi hi tikarhatelaka ku swi endla leswaku hi heta nkarhi wo tala hi ri ensin’wini. (Hev. 6:10) Swi hi tsakisa ngopfu ku tiva leswaku Yehovha wa tsaka hi ku tikarhata ka hina.—1 Tikr. 29:9.

3, 4. Xana ku va phayona ra nkarhinyana swi hi vuyerisa njhani?

³ Hi ntolovelo nchumu lowu u tshamelaka ku wu endla wu ya wu olova naswona wa tsakisa. Loko u heta nkarhi wo tala u ri ensin’wini u ta ya u tolovela ku chumayela hi yindlu ni yindlu. U ta ya u va ni vutshila byo sungula mabulo ni byo tirhisa Bibele. Ripfumelo ra wena ri ta ya ri tiya loko u tshamela ku bula hi leswi u swi pfumelaka. Vo tala lava a va nga ri na dyondzo ya Bibele va kote ku yi sungula loko se va ri maphayona ya nkarhinyana.

⁴ Nakambe vuphayona bya nkarhinyana byi nga pfuxeta vumoya bya wena. Makwerhu un’wana loyi a tshameke a va phayona ra nkarhi hinkwawo u xiye leswaku nkarhi wa yena wo tala u wu heta a ri entirhweni wo tihanyisa, hiloko a kunguhata ku heta n’hweti a ri phayona ra nkarhinyana. U ri: “Ndzi hlamale ngopfu ndlela leyi vumoya bya mina byi akekeke ha yona hi n’hweti yoleyo yin’we! Ndzi kunguhate ku ya emahlweni ndzi ri phayona ra nkarhinyana ra tin’hweti leti nga pimiwangiki kutani ndzi hetelela ndzi ri phayona ra nkarhi hinkwawo.”

5. Xana hi nga swi kotisa ku yini ku hlula moya wa ku titwa hi nga faneleki?

⁵ Hlula Swihinga: Van’wana va nga ha kanakana ku va maphayona ya nkarhinyana hikwalaho ka leswi va tivonaka va nga ri na vutshila byo chumayela. Loko u vona onge xihinga lexi hi xona xi ku tlheriselaka endzhaku, Yehovha a nga ku pfuna hilaha a pfuneke Yeremiya hakona. (Yer. 1:6-10) Hambileswi Muxe a a ‘vulavula hi ku nonoka ni ririmi ra yena ri nonoka,’ Yehovha u n’wi tirhisile leswaku a hetisisa ku rhandza ka Yena. (Eks. 4:10-12) Loko u tivona u nga faneleki, kombela Yehovha leswaku a ku nyika xivindzi.

6. Xana u nga swi kota njhani ku va phayona ra nkarhinyana hambiloko u ri ni swiphiqo swa rihanyo kumbe xiyimiso xa wena xi nga ku nyiki nkarhi?

⁶ Xana u chava ku va phayona ra nkarhinyana hikwalaho ka mavabyi kumbe hikwalaho ka leswi u tshamaka u khomekile? Loko u ri ni vuvabyi lebyi ngo va tshamela-maxelo u nga swi kota ku va phayona ra nkarhinyana hi ku tirha nkarhi wo koma kambe u hlela xiyimiso xa wena leswaku loko n’hweti yi hela u kota ku hlanganisa tiawara leti lavekaka. Loko ku ri leswaku u tshama u khomekile, swa antswa leswaku mintirho yin’wana leyi nga riki ya nkoka u yi vekela n’hweti leyi taka. Van’wana lava pfukelaka entirhweni siku ni siku va swi kotile ku xava nkarhi wo va maphayona ya nkarhinyana hi ku teka masiku yo karhi yo wisa.—Kol. 4:5.

7. Ha yini swi vuyerisa ku khongela hi mhaka ya ku lava ku va phayona ra nkarhinyana?

⁷ Leswi U Nga Swi Endlisaka Xiswona: Khongela hi ta ku navela ka wena ku va phayona ra nkarhinyana. Kombela Yehovha leswaku a katekisa matshalatshala ya wena yo tirha nsimu hi xitalo. (Rhom. 12:11, 12) A nga ku pfuna leswaku u endla swiboho swa vutlhari malunghana ni ndlela leyi u nga xi cincaka ha yona xiyimiso xa wena. (Yak. 1:5) Loko mhaka ya ku va phayona yi nga si ku fikelela mbilu, kombela Yehovha a ku pfuna leswaku u rhandza ntirho wo chumayela.—Luka 10:1, 17.

8. Xana ku tirhisa tsalwa ra Swivuriso 15:22 swi nga ku pfuna njhani leswaku u va phayona ra nkarhinyana?

⁸ Bulani tanihi ndyangu hi pakani ya ku va maphayona ya nkarhinyana. (Swiv. 15:22) Kumbexana xirho xin’we xa ndyangu xi nga va phayona ra nkarhinyana loko xi seketeriwa hi swirho leswin’wana. Bula ni van’wana evandlheni hi ta ku navela ka wena ku va phayona, ngopfu-ngopfu lava swiyimo swa vona swi fanaka ni swa wena. Leswi swi nga hlanganyetela ndzilo wa ku hisekela ka wena vuphayona bya nkarhinyana.

9. Hi tihi tin’hweti leti u nga ha hlawulaka ku va phayona ra nkarhinyana ha tona?

⁹ Loko u ri karhi u hlela xiyimiso xa wena xa nsimu xa lembe lerintshwa ra ntirho, xana u nga swi kota rini ku va phayona ra nkarhinyana? Loko u thoriwile kumbe u nghena xikolo, u nga ha ehleketisisa hi tin’hweti leti nga ni tiholideyi kumbe leti nga ni Migqivela kumbe Tisonto ta ntlhanu. Hi xikombiso September, December, March na August i tin’hweti leti nga ni mahelo-vhiki ya ntlhanu. N’hweti ya May yi ni Migqivela ya ntlhanu kasi ya June yi ni Tisonto ta ntlhanu. Loko u ri ni swiphiqo swa rihanyo, ehleketisisa hi tin’hweti leti nga ni maxelo lamanene. Nakambe u nga ha kunguhata ku phayona hi n’hweti leyi mulanguteri wa xifundzha a nga ta va a endzele vandlha ra n’wina. Hi nkarhi wa riendzo ra yena, wena u ta va ni lunghelo ro hlanganyela eka xiphemu xo sungula xa nhlangano lowu a wu khomaka ni maphayona ya nkarhi hinkwawo. Tanihi leswi haxawa Xitsundzuxo xi nga ta va hi March 22, n’hweti ya March, April na May ti ta va tin’hweti ta kahle ta ku phayona. Loko se u hlawule n’hweti kumbe tin’hweti leti u nga ta phayona ha tona, vhela u sungula ku tsala xiyimiso lexi nga ta ku pfuna ku fikelela tiawara leti lavekaka.

10. Xana u nga endla yini loko swi nga koteki leswaku u va phayona ra nkarhinyana?

¹⁰ Hambiloko u vona onge a wu nge swi koti ku va phayona ra nkarhinyana eka lembe leri taka ra ntirho, u nga ha hiseka ku fana ni maphayona. Hambeta u endla hinkwaswo leswi u nga swi kotaka ensin’wini, u ri ni ntshembo wa leswaku Yehovha wa tsaka hi ku tinyiketela ka wena ku n’wi tirhela hi moya-xiviri hinkwawo. (Gal. 6:4) Seketela van’wana, naswona khutaza lava va kotaka ku va maphayona ya nkarhinyana. Kumbexana u nga ha cinca xiyimiso xa wena leswaku u ta tirha nsimu swin’we ni maphayona siku rin’wana evhikini.

11. Ha yini hi fanele hi xalamukela nkarhi lowu hi hanyaka eka wona?

¹¹ Vanhu va Yehovha va swi tiva leswaku nkarhi a wa ha ri kona. Ku ni ntirho lowu wu faneleke wu endliwa—ku nga ntirho wo chumayela mahungu lamanene. Vutomi bya vanhu byi le khombyeni naswona nkarhi lowu saleke wu komile. (1 Kor. 7:29-31) Ku rhandza Xikwembu ni vaakelani swi ta hi susumetela ku endla hinkwaswo leswi nga ematimbeni ya hina ensin’wini. Loko ho endla matshalatshala hi tlhela hi hlela kahle hi nga swi kota ku va maphayona ya nkarhinyana kumbexana n’hweti yin’we eka lembe lerintshwa ra ntirho—hakunene leyi i pakani ya risima!