Xana U Nga Swi Kota Ku Phayona Nkarhinyana?
1 Yesu u khutaze valandzeri vakwe ku tinyikela evutirhelini bya yena hi ku ntshunxeka, naswona u va tiyisekise leswaku ku landzela ndlela leyi a swi ta va tisela ntsako ni mikateko yo tala ya swilo swa moya. (Mat. 10:8b; Mintirho 20:35) Hi April n’wexemu vanhu lava tlulaka 6 000 va kume mintsako ya munhu hi xiyexe ya ntirho lowu engetelekeke tanihi maphayona yo pfuna. Xana wa swi kota ku hlanganyela eka mikateko leyi nan’waka hi ku tsarisa tanihi phayona ro pfuna hi March kumbe April, kumbexana hi tin’hweti leti hatimbirhi?—Ps. 34:8.
2 Ku Kambisisa Swiyimo Swa Wena: Loko u xiya mintokoto leyi nyikeriweke laha hansi, tivutise: ‘Xana ndza tivona eka xin’wana xa swikombiso leswi? Xana a ndzi ta yi endlisa ku yini mindzulamiso leyi faneleke leyi a yi ta ndzi pfulela ndlela leswaku ndzi phayona nkarhinyana?’
3 Makwerhu un’wana wa xisati u swi kotile ku phayona nkarhinyana hambi leswi a nga ni vana va ntlhanu ni leswi a tirhaka ntirho wo tihanyisa. Xana u hakerisiwe ku yini ke? Nuna wa yena ni vana va n’wi seketele swinene, naswona hikwalaho ka xikombiso lexinene xa makwerhu loyi, nuna u susumeteriwe ku va muhuweleri loyi a nga khuvuriwangiki en’hwetini leyi landzeleke.
4 Ebandlheni rin’wana vakulu hinkwavo ni malandza hinkwawo ya vutirheli va tirhe tanihi maphayona yo pfuna hi n’hweti yin’wana. Vo tala va vona a va ri ni mintirho yo tihanyisa, kambe a va khomeke swinene hi mintirho ya swilo swa moya hi mahelo-vhiki. Vurhangeri lebyinene lebyi va byi nyikeleke eku chumayeleni ni le ku hleleni ka ntirho wa nsimu byi pfune bandlha hinkwaro. Vahuweleri va 73 eka va 77 va hlanganyerile eka muxaka wo karhi wa ntirho wa vuphayona hi n’hweti yoleyo.
5 Nhwanyana loyi a ha riki exikolweni loyi a nga ni malembe ya 15 hi vukhale u tirhise nkarhi wa yena wo wisa wa mavhiki mambirhi leswaku a hlanganyela entirhweni wa vuphayona byo pfuna naswona u ri: “Hakunene ndza ku vona ku hambana, ngopfu-ngopfu ku antswisa ndlela yo bula ni vanhu. Ndzi swi kotile ku bula ni vanhu vo tala swinene emitini ya vona.”
6 Lava va tshikeke ntirho wa ku tihanyisa hikwalaho ka ku dyuhala hakanyingi va ni minkarhi leyinene leyi va pfulekeleke yo seketela swilaveko swa Mfumo. Endzhaku ka rifu ra nuna wa yena, makwerhu wa xisati wa malembe ya 84 hi vukhale u tsarile: “Vana va mina hinkwavo a va kurile naswona a va nghenele vukati ni ku va ni mindyangu. A va ndzi lahlanga, kambe maendzo ya vona a ma nga swi koti ku herisa mintlhaveko ya ku lahlekeriwa ni xivundza. Kutani un’wana wa vakulu ebandlheni ra hina u ringanyete leswaku ndzi ringeta ku phayona nkarhinyana. Ndzi kanakanile, kambe eku heteleleni ndzi endle xiboho xo swi ringeta. Mawaku ntsako lowonghasi! Ndzi anakanye leswaku Yehova u ndzi pfumelele ku hanya ku fikela eka malembe lawa leswaku ndzi ta kota ku phayona nkarhinyana. Ndzi hambetile tanihi phayona ra nkarhinyana n’hweti na n’hweti ku sukela kwalaho.”
7 Makwerhu loyi a xavisaka nhundzu leyikulu u lulamise xiyimiso xa yena xa ku navetisa tindlu leswaku a ta kuma nkarhi wa ntirho wa vuphayona. Van’wana hi ku fanana va lulamise mintirho ya vona yo tihanyisa leswaku va ta kuma nkarhi wa ntirho wo tano lowu engetelekeke.
8 Endla Makungu Ya Wena Sweswi: Ha yini u nga endli makungu lamanene sweswi leswaku u phayona nkarhinyana hi March na April? Leswaku u humelela, ku laveka ku kunguhata hi vukheta. Leswi swi vonaka eka mintokoto ya lava va swi koteke ku phayona nkarhinyana hambi loko va ri ni vutihlamuleri bya mindyangu, mintirho yo tihanyisa ya nkarhi hinkwawo ni mindzhwalo yin’wana ya Matsalwa. Vulavula ni van’wana lava phayoneke hi laha ku humelelaka leswaku u kuma mpfuno wa ntokoto wa vona. Nakambe, yana eka Yehova hi xikhongelo, u kombela mpfuno wa yena.—Esa. 40:29-31; Yak. 1:5.
9 A swi kanakanisi leswaku ku ni mintsako yo tala eka lava va lulamisaka timhaka ta vona leswaku va tirha tanihi maphayona ya nkarhinyana. Loko u nga si va entirhweni wa nkarhi hinkwawo, xana wa ri tsakela lunghelo leri? Loko u endla matshalatshala yo kurisa lunghelo ra wena ro avelana mahungu lamanene ni van’wana, Yehova u ta chululela mikateko leyi fuweke hakunene ehenhla ka wena.—Mal. 3:10.