Tiyiseka Leswaku Wa Vuyela
1 Tanihi vatirheli va mahungu lamanene, hi lerisiwe ku endla vadyondzisiwa. (Mat. 28:19, 20) Ku endla maendzo yo vuyela i xiyenge xa nkoka xa ntirho wa hina wa ku endla vadyondzisiwa. Ha swi twisisa leswaku vutomi bya katseka, kutani hi lava ku endla matshalatshala lamakulu leswaku hi hlakulela ku tsakela ko sungula loku kombisiweke.
2 Hi fanele ku xiya munhu un’wana ni un’wana loyi hi n’wi fambiseleke buku tanihi loyi a faneriwaka hi riendzo ro vuyela. Kambe ku fambisa buku a ku fanelanga ku va xisekelo xi ri xoxe xo endla riendzo ro vuyela. Vo tala va swi rhandza ku bula hi rungula ra Bibele kambe va ala tibuku. Kutani loko hi vona leswaku munhu wa tsakela, hi fanele hi tikarhatela ku vuyela ni ku ringeta ku hlakulela ku tsakela koloko.
3 Ku Tlhelela Eka Lava Fambiseriweke Tibuku: Tanihi leswi nhlayo ya tibuku leti fambisiweke yi tlulaka swinene ya maendzo yo vuyela, swa koteka swinene ku swi antswisa. Phayona ri fambise buku kambe ri xiya ku tsakela loku nga nyawuriki ka n’wini wa muti. Ndzhenga wun’wana endzhaku ko endla maendzo ya yena man’wana hinkwawo, makwerhu loyi u ehlekete ku endzela munhu loyi. Dyondzo ya Bibele yi sunguriwile.
4 Makwerhu un’wana u fambisele wanuna un’wana timagazini timbirhi kambe a rivala hi yena, a ehleketa leswaku a a nga tsakeli hakunene. Masiku ma nga ri mangani endzhakunyana, wanuna loyi u tsalele bandlha ra kwalaho papila, a kombela ku khuvuriwa. Makwerhu wa xisati loyi a nga murhumiwa u vutisiwe leswaku i yini lexi a a ehleketa leswaku hi xona xivangelo lexikulu xo va a swi kotile ku pfuna vanhu va 74 leswaku va va vahuweleri. U te: “Hi endle ntirho wa timagazini swinene, naswona ndzi hambete ndzi endla maendzo yo vuyela eka vanhu lava amukeleke timagazini ku kondza ndzi kota ku sungula tidyondzo ta Bibele na vona.”
5 Minkarhi yin’wana hi nga kota ku siya xiphephana ntsena eka n’wini wa muti eka riendzo ro sungula. Hakanyingi, swiphephana swi nga tirhisiwa hi laha ku humelelaka eka riendzo ro vuyela ku kombisa dyondzo ya Bibele. Mulanguteri wa xifundza loyi a a tirha ni muhuweleri un’wana u siye xiphephana eka wansati un’wana. A ku ri riendzo ro koma swinene, kambe u khutaze makwerhu loyi wa xisati leswaku a vuyela. Makwerhu loyi u endle riendzo ro vuyela kutani hi ku hatlisa a sungula dyondzo ya Bibele.
6 Loko Ku Kombisiwa Ku Tsakela: Loko n’wini wa muti a nga teki tibuku eka riendzo ro sungula, leswi a hi minkarhi hinkwayo swi vulaka leswaku a nga tsakeli. Loko a endle riendzo ro vuyela eka mpatswa lowuntshwa, muhuweleri u kume leswaku ana se a va ri ni tin’wana ta tibuku ta hina naswona a va dyondza enkarhini lowu hundzeke. Va pfumele ku yisa dyondzo ya vona emahlweni hi ku olova. Phayona ro hlawuleka ri ehleketelele ku tsakela loku tumbeleke eka wansati, loyi nkarhi na nkarhi a a ala ku amukela timagazini. Phayona ri veke timagazini etlhelo, kutani wansati loyi u swi tsakerile ku bula hi tindzimana ti nga ri tingani eka xin’wana xa swibukwana. Endzhaku ka maendzo ma nga ri mangani lama engetelekeke, u ve ni dyondzo ya Bibele kambirhi hi vhiki.
7 Un’wana ni un’wana loyi a tinyiketelaka eka Yehova u fanele a titwa a ri ni vutihlamuleri byo hlanganyela entirhweni wo endla vadyondzisiwa. Loko hi vuyela nkarhi na nkarhi eka hinkwavo lava kombisaka ku tsakela, hi ta kuma mihandzu leyi nga ta tisa mikateko leyi fuweke eka hina ‘ni le ka lava va hi yingisaka.’—1 Tim. 4:16.