Maendzo Yo Vuyela Ma Endla Leswaku Ku Va Ni Tidyondzo Ta Bibele

1. Ha yini ntirho wo endla maendzo yo vuyela wu ri wa nkoka?

¹ Yesu a nga byelanga vadyondzisiwa va yena leswaku va chumayela ntsena kambe ni leswaku va ‘endla vadyondzisiwa. . . va va dyondzisa.’ (Mat. 28:19, 20) Muchumayeri wa twarisa kambe mudyondzisi u endla leswi engetelekeke. Wa letela, a hlamusela a tlhela a nyikela vumbhoni byo seketela leswi a swi vulaka. Ndlela yin’wana leyi hi nga dyondzisaka van’wana ha yona i ku endla maendzo yo vuyela eka vanhu lava kombiseke ku tsakela, hi ri ni xikongomelo xo sungula dyondzo ya Bibele na vona.

2. Hi fanele hi tlhelela eka vamani?

² I vamani lava u faneleke u tlhelela eka vona? Tiyiseka leswaku wa tlhelela eka hinkwavo lava amukeleke minkandziyiso kumbe eka lava va kombiseke ku tsakela kutsongo eka mahungu lamanene. Loko munhu la tsakelaka u n’wi kume endhawini ya mani na mani, ringeta ku kuma adirese ni riqingho ra yena, leswaku u kota ku n’wi endzela. Vana ni langutelo lerinene malunghana ni ku sungula tidyondzo ta Bibele. Yana emahlweni u lavisisa lava nga amukelaka ku fambiseriwa dyondzo ya Bibele naswona u nga va kuma.—Mat. 10:11.

3, 4. I yini leswi katsekaka eku endleni ka maendzo yo vuyela lama humelelaka?

³ Kombisa Leswaku Wa Va Rhandza: Ku lunghiselela ku endla maendzo yo vuyela hi ndlela leyi humelelaka, swi sungula hi nkarhi wa riendzo ro sungula. Vachumayeri lava humelelaka va xiya leswi tsakisaka n’wini wa muti kutani va tirhisa swona enkarhini lowu taka. Van’wana va kuma swi vuyerisa ku vutisa xivutiso loko va gimeta bulo ra vona, sweswo swi endla leswaku n’wini wa muti a lunghekela ku endzeriwa enkarhini lowu taka. Ku rhandza ka hina vanhu hi mbilu hinkwayo ku endla leswaku hi tshama hi anakanya ha vona hambiloko hi fambile naswona swi hi endla leswaku hi nga hlweli ku tlhelela eka vona. Loko swi koteka, ringeta ku tlhelela a ha swi tsakela—hambi wo tlhelela endzhaku ka siku rin’we kumbe mambirhi.

⁴ Loko u endla maendzo yo vuyela ringeta ku aka ehenhla ka bulo ra n’wina ro sungula. Swi endle swi va pakani ya wena leswaku nkarhi na nkarhi u hlamusela Tsalwa rin’we hi ndlela leyi akaka naswona u n’wi yingisa loko a vulavula. Tiyimisele ku tiva n’wini wa muti ku antswa. Kutani eka riendzo leri landzelaka, vulavula na yena hi ntiyiso wa Rito ra Xikwembu lowu hlamulaka mivilelo yakwe hi ku kongoma.

5. Hi yihi ndlela yo olova leyi nga tirhisiwaka eku sunguleni ka tidyondzo ta Bibele?

⁵ Xalamukela Tindlela To Sungula Dyondzo Ya Bible: Endla maendzo yo vuyela hi xikongomelo xo sungula dyondzo ya Bibele. Xana leswi swi nga endliwa njhani? Vula leswaku u rhandza ku n’wi hlamusela mhaka yo karhi leyi tsakisaka, kutani u pfula buku leyi nge Vutivi kumbe broxara leyi nge Leswi Xi Swi Languteleke eka ndzimana leyi u vonaka onge a nga yi tsakela. Hlaya ndzimana, u kambisisa ni xivutiso xa yona u tlhela u hlamusela tsalwa rin’we kumbe mambirhi eka lawa ma kombisiweke kwalaho. Leswi swi nga endliwa hi timinete ta ntlhanu ku ya eka ta khume. Gimeta hi ku vutisa xivutiso xin’wana kutani u endla malunghiselelo yo bula hi xona enkarhini lowu taka.

6. Xana hi nga swi kombisa njhani leswaku hi swi teka swi ri swa nkoka ku endla maendzo yo vuyela?

⁶ Ku tlhelela eka vanhu hinkwavo lava kombiseke ku tsakela i swa nkoka entirhweni wa hina wa nsimu. Hikwalaho, tivekele nkarhi wo endla maendzo yo vuyela exiyimisweni xa wena xa vhiki ni vhiki. Loko u endla tano u ta humelela entirhweni wa nsimu naswona swi ta ku tisela ntsako wa xiviri.