Vana Ni Xivindzi Xo Endla Maendzo Yo Vuyela

¹ Xana wa swi tsakela ku endla maendzo yo vuyela? Vahuweleri vo tala va swi tsakela. Kumbexana a wu chava eku sunguleni, ngopfu-ngopfu loko u tlhelela eka vini va miti lava kombiseke ku tsakela kutsongo loko va endzeriwa ro sungula. Kambe loko u ya u va ni ‘xivindzi hi ku pfuniwa hi Xikwembu xa hina leswaku u vulavula hi mahungu lamanene’ hi ku endla maendzo yo vuyela, u nga ha hlamala ku kuma ndlela leyi ntirho lowu wu olovaka ni ku vuyerisa ha yona. (1 Tes. 2:2) Swi nga va tano hi ndlela yihi?

² Entiyisweni, ku ni ku hambana ka nkoka eka riendzo ro vuyela ni le ka riendzo ro sungula. Riendzo ro vuyela ri endliwa eka munhu loyi u n’wi tivaka, ku nga ri eka munhu lontshwa, naswona hi ntolovelo swa olova ku vulavula ni munhu loyi u n’wi tivaka ku tlula munhu loyi u nga n’wi tiviki. Malunghana ni vuyelo lebyi fuweke lebyi vaka kona hi ku hlanganyela entirhweni lowu, maendzo yo vuyela ma nga humesa tidyondzo ta le kaya ta Bibele leti humelelaka.

³ Loko hi tirha hi yindlu na yindlu, hi va endzela hi ku phindha-phindha vanhu lava a va nga tsakeli loko hi va endzela ro sungula. Hikwalaho, ha yini hi hambeta hi endzela vanhu? Ha swi xiya leswaku swiyimo swa vanhu swa cinca ni leswaku vanhu lava a va vonaka va nga tsakeli kumbe hambi ku ri ku kaneta eriendzweni leri nga hundza va nga ha tsakela enkarhini lowu taka loko hi va endzela. Hi ri na sweswo emianakanyweni, hi lunghiselela kahle ni ku khongelela ku katekisiwa hi Yehovha leswaku leswi hi swi vulaka enkarhini lowu swi ta endla leswaku munhu a tsakela.

⁴ Loko, entirhweni wa yindlu ni yindlu, hi tiyimisele ku chumayela vanhu lava eku sunguleni va nga kombisangiki ku tsakela nikatsongo, xana a hi fanelanga hi tiyimisela ku tlhelela eka mani na mani la kombiseke ku tsakelanyana eka rungula ra Mfumo?—Mint. 10:34, 35.

⁵ Vo tala va hina hi le ntiyisweni namuntlha hikwalaho ka leswi hi ku lehisa mbilu muhuweleri a endleke maendzo yo vuyela eka hina. Loko u ri un’wana wa vona, u nga ha tivutisa: ‘Xana ndzi ve ni langutelo rihi eku sunguleni eka muhuweleri yoloye? Xana ndzi amukele rungula ra Mfumo xikan’we-kan’we loko ndzi ri twa ro sungula? Xana ndzi vonake ndzi nga tsakeli?’ Hi fanele hi tsaka hikwalaho ka leswi muhuweleri yoloye la tlheleleke a hi languteke hi ri lava faneriwaka hi riendzo ro vuyela ni leswi a ‘veke ni xivindzi hi ku pfuniwa hi Xikwembu,’ a tlhelela, ni ku hambeta a hi dyondzisa ntiyiso. Ku vuriwa yini hi vanhu lavayani va kombiseke ku tsakelanyana eku sunguleni kambe endzhakunyana va sunguleke ku hi papalata? Langutelo lerinene i ra nkoka, hilaha ntokoto lowu landzelaka wu kombisaka hakona.

⁶ Loko va ri eku nyikeleni ka vumbhoni exitarateni mixo wun’wana, vahuweleri vambirhi va hlangane ni wansati la susumetaka n’wana hi pureme. Wansati loyi u amukele magazini ivi a rhamba vamakwerhu va xisati leswaku va n’wi endzela ekaya eka Sonto leyi landzelaka. Va fike hi nkarhi lowu vekiweke, kambe n’wini wa muti u va byele leswaku a nga na nkarhi wo vulavula. Hambiswiritano, u tshembise leswaku u ta kumeka eka vhiki leri landzelaka. Vamakwerhu va xisati a va kanakana loko a ta hlayisa xitshembiso xakwe, kambe wansati loyi a va languterile loko va fika. Ku sunguriwe dyondzo, naswona nhluvuko wa wansati loyi a wu hlamarisa. Hi xinkarhana, u sungule ku hlanganyela minhlangano nkarhi na nkarhi ni ku hlanganyela entirhweni wa nsimu. Sweswi u khuvuriwile.

⁷ Veka Masungulo Eka Riendzo Ro Sungula: Masungulo ya riendzo ro vuyela leri humelelaka hakanyingi ma vekiwa eka riendzo ro sungula. Yingisela tinhlamuselo ta n’wini wa muti hi vukheta. Xana ti ku byela yini? Xana u namarhele vukhongeri? Xana wa karhateka hi timhaka ta ntshamisano? Xana u tsakela sayense? matimu? mbango? Emakumu ka riendzo, u nga ha tlakusa xivutiso lexi tlhontlhaka mianakanyo ivi u tshembisa ku nyikela nhlamulo ya Bibele loko u tlhelela.

⁸ Hi xikombiso, loko n’wini wa muti a tsakela xitshembiso xa Bibele xa misava ya paradeyisi, bulo leri landzelaka ra mhaka leyi ri nga ha va ri fanerile. U nga si famba, u nga ha vutisa: “Xana hi nga tiyiseka njhani leswaku Xikwembu xi ta hetisisa xitshembiso xa xona?” Kutani u engetela u ku: “Kumbexana ndzi nga hundza ndzi ku vona loko ndyangu hinkwawo wu ri kona laha kaya, kutani ndzi ta ku kombisa nhlamulo ya Bibele ya xivutiso lexi.”

⁹ Loko n’wini wa muti a nga kombisanga ku tsakela eka mhaka yihi na yihi, u nga ha tlakusa xin’wana xa swivutiso leswi nga eka swingheniso leswi nga eka tluka ra le ndzhaku ra Vutirheli Bya Hina Bya Mfumo ivi u xi tirhisa tanihi xisekelo xa bulo ra wena leri landzelaka.

¹⁰ Hlayisa Tirhekhodo Leti Tsariweke Kahle: Rhekhodo ya wena ya yindlu na yindlu yi fanele yi tsariwa kahle naswona yi helerile. Tsala vito ni adirese ya n’wini wa muti loko u huma emutini. U nga vhumbi nomboro ya yindlu kumbe vito ra xitarata—xiyisisa ku vona loko rungula ri ri rona naswona ri helerile. Tsala xiyimo xa munhu wa kona. Tsala nhloko-mhaka leyi mi buleke ha yona, matsalwa lawa u ma hlayeke ni buku yihi na yihi leyi u yi siyeke, ni xivutiso lexi u nga ta xi hlamula loko u tlhelela. Tsala siku ni nkarhi wa riendzo ro sungula ni siku ni nkarhi lowu u vuleke leswaku u ta vuya ha wona. Sweswi tanihi leswi rhekhodo ya wena yi nga helela, u nga yi lahli! Yi veke endhawini leyi hlayisekeke leswaku u ta yi tirhisa endzhakunyana. Tshama u ri karhi u ehleketa hi munhu loyi ni ndlela leyi u nga ta vulavula ha yona enkarhini lowu taka.

¹¹ Tiva Leswi Swikongomelo Swa Wena Swi Nga Swona: Xo sungula, hi ku va ni rirhandzu ni xinghana, endla leswi u nga swi kotaka leswaku n’wini wa muti a titwa a ntshunxekile. Kombisa leswaku wa n’wi tsakela tanihi munhu, kambe u nga endli onge mi tivana ngopfu. Xa vumbirhi, n’wi tsundzuxe hi xivutiso xihi na xihi lexi u xi tlakuseke eriendzweni leri hundzeke. Yingisela mavonelo yakwe hi vukheta, ivi u phofula ku tlangela lokukulu ka tinhlamuselo takwe. Kutani, kombisa ndlela leyi langutelo ra Bibele ri nga ra nkoka ha yona. Loko swi koteka, n’wi kongomise eka yinhla leyi fambisanaka na swona ebukwini leyi nge Vutivi Lebyi Yisaka eVuton’wini Lebyi Nga Heriki. Tsundzuka leswaku xikongomelo xa wena lexikulu xo endla maendzo yo vuyela i ku sungula dyondzo ya Bibele.

¹² Ndlela leyi buku leyi nge Vutivi yi kongomeke ha yona yi susumetele vo tala va hina ku ‘va ni xivindzi’ etidyondzweni ta Bibele leswaku hi khutaza swichudeni leswaku swi va kona eminhlanganweni ni ku tihlanganisa ni nhlengeletano ya Yehovha. Enkarhini lowu nga hundza, a hi ri ni mboyamelo wo rindza kukondza vanhu va dyondza nkarhi wo leha hi nga si va rhambela ku hlanganyela na hina. Sweswi, swichudeni swo tala swi va kona eminhlanganweni hi ku hatlisa endzhaku ko sungula ku dyondza, naswona hikwalaho ka sweswo swi endla nhluvuko hi xihatla.

¹³ Mpatswa wun’wana wu nyikele vumbhoni eka mutirhi-kulobye hi xitshuketa. Loko a kombise ku tsakela ntiyiso, va n’wi rhambele ku va ni dyondzo ya Bibele hi ku tirhisa buku leyi nge Vutivi. Hi nkarhi lowu fanaka, va n’wi byele leswaku u fanele a va kona eminhlanganweni, laha swivutiso swakwe swo tala swi nga ta hlamuriwa kona. Hi ku tirhandzela wanuna loyi a nga amukelanga xirhambo xa vona ntsena xo dyondza, kambe u tlhele a dyondza kambirhi hi vhiki ni ku sungula ku ya eminhlanganweni eHolweni ya Mfumo nkarhi na nkarhi.

¹⁴ Tirhisa Broxara Leyi Nge I Yini Leswi Xikwembu Xi Swi Languteleke Eka Hina?: EMintsombanweni ya Muganga ya “Varhumiwa Va Ku Rhula Ka Xikwembu,” hi kume broxara leyi nge I Yini Leswi Xikwembu Xi Swi Languteleke Eka Hina? Broxara leyi ya pfuna swinene eku sunguleni ka tidyondzo ta Bibele ni vanhu lava chavaka Xikwembu ku nga khathariseki leswaku va ni dyondzo yo tanihi kwihi. Yi ni tidyondzo leti hlanganisaka swilo swo tala, leswi nga tidyondzo ta xisekelo ta Bibele. Broxara leyi yi ta va xitirhisiwa lexinene ngopfu eku nyikeleni ka vutivi bya Xikwembu. Yi hlamusela ntiyiso hi ndlela leyi twisisekaka swinene ni leyi nga erivaleni lerova un’wana ni un’wana wa hina a nga swi kota ku yi tirhisela ku dyondzisa van’wana leswi Xikwembu xi swi languteleke. Handle ko kanakana, vahuweleri vo tala va ta va ni lunghelo ro fambisa dyondzo ya Bibele hi ku tirhisa broxara leyi.

¹⁵ Vanhu van’wana lava vonaka onge a va na wona nkarhi wo dyondza buku leyi nge Vutivi va nga ha tsakela ku va ni tidyondzo to koma hi ku tirhisa broxara leyi nge Leswi Xi Swi Languteleke. Va ta nyanyuriwa hi leswi va swi dyondzaka! Eka matluka mambirhi kumbe manharhu ntsena, va ta kuma tinhlamulo ta swivutiso leswi vanhu va swi vutiseke hi malembe-xidzana layo tala: Xikwembu i mani? Diyavulosi i mani? Hi xihi xikongomelo xa Xikwembu hi misava? Xana Mfumo wa Xikwembu i yini? Xana u nga byi kumisa ku yini vukhongeri bya ntiyiso? Hambileswi broxara leyi yi nyikelaka ntiyiso hi marito yo olova, rungula ra yona ri ni matimba swinene. Yi ni tinhla-nkulu leti vakulu va nga ta ti pfuxeta ni lava yaka eku khuvuriweni naswona yi nga tirha tanihi nyangwa wo ya edyondzweni leyi enteke hi ku tirhisa buku leyi nge Vutivi.

¹⁶ Leswaku u nyikela dyondzo eka riendzo ro vuyela, u nga ha vula u ku: “Xana a wu swi tiva leswaku hi ku tirhisa timinete ti nga ri tingani ntsena, u nga kuma nhlamulo ya xivutiso xa nkoka xa Bibele?” Kutani, vutisa xivutiso lexi nga eku sunguleni ka yin’wana ya tidyondzo leti nga eka broxara leyi. Hi xikombiso, loko u endzela munhu lonkulu, u nga ha ku: “Ha swi tiva leswaku enkarhini lowu nga hundza Yesu u horise vanhu. Kambe enkarhini lowu taka, i yini leswi Yesu a nga ta swi endlela vanhu lava vabyaka? lava dyuhaleke? lava feke?” Tinhlamulo ti kumeka eka dyondzo 5. Munhu la nga wa vukhongeri a nga ha tsakela xivutiso lexi nge: “Xana Xikwembu xi yingisela swikhongelo hinkwaswo?” Xivutiso lexi xi hlamuriwa eka dyondzo 7. Swirho swa ndyangu swi ta lava ku tiva leswi: “Xana Xikwembu xi langutele yini eka vatswari ni vana?” Leswi va ta swi kuma loko va dyondza dyondzo 8. Swivutiso swin’wana swi ri: “Xana vafi va nga va vavisa lava hanyaka?” swa hlamuseriwa eka dyondzo 11; “Ha yini ku ri ni vukhongeri byo tala swonghasi lebyi tivulaka bya Vukreste?” swa hlamuseriwa eka dyondzo 13; naswona “Xana u fanele ku endla yini leswaku u va munghana wa Xikwembu?” sweswo ku buriwa ha swona eka dyondzo 16.

¹⁷ Pfuna Lava Vulavulaka Ririmi Rimbe: Ku vuriwa yini hi vini va miti lava vulavulaka ririmi rimbe? Loko swi koteka, va fanele va dyondzisiwa hi ririmi leri va ri tivaka kahle. (1 Kor. 14:9) Nyika mulanguteri wa ntirho vito ni adirese ya munhu la tsakelaka, ku katsa ni vuxokoxoko byin’wana bya nkoka. U ta kuma vandlha leri vulavulaka ririmi rimbe kumbe ntlawa endhawini yoleyo lowu nga dyondzisaka munhu la tsakelaka. Rungula leri ri fanele ri rhumeriwa eka Sosayiti ntsena loko vandlha leri faneleke ri nga kumeki. Loko ku nga ri na mavandlha kumbe mintlawa ekusuhi, naswona ku nga ri na vahuweleri kwalaho lava kotaka ku vulavula ririmi leri n’wini wa muti a vulavulaka rona, muhuweleri a nga ringeta ku dyondza ni n’wini wa muti, a tirhisa broxara leyi nge Leswi Xi Swi Languteleke hi tindzimi timbirhi.

¹⁸ Muhuweleri la vulavulaka Xinghezi u sungule dyondzo ni wanuna la vulavulaka Xivietnam ni nsati wakwe, la vulavulaka Xithai. Ku tirhisiwe tibuku ni Tibibele ta Xinghezi, Xivietnam ni Xithai hi nkarhi wa dyondzo. Hambileswi ku nga twanani hi tindzimi swi veke ntlhontlho eku sunguleni, muhuweleri loyi wa tsala: “Mpatswa lowu wu hatlise wu kula emoyeni. Va vone xilaveko xo sungula ku hlanganyela minhlangano ni vana va vona vambirhi, naswona va hlaya Bibele vusiku byin’wana ni byin’wana tanihi ndyangu. N’wana wa vona wa nhwanyana wa malembe ya tsevu hi vukhale u fambisa dyondzo ya yena n’wini ya Bibele.”

¹⁹ Loko u dyondza ni vanhu lava vulavulaka ririmi rimbe, vulavula khwatsi, hi vuswikoti byo vulavula naswona u tirhisa marito ni swiga swo olova. Hambiswiritano, tsundzuka leswaku vanhu lava vulavulaka ririmi rimbe va fanele va khomiwa hi xichavo. A va fanelanga va khomiwa ku fana ni swihlangi.

²⁰ Swi tirhise kahle swifaniso swo xonga leswi nga eka broxara leyi nge Leswi Xi Swi Languteleke. Loko “xifaniso xi vulavula ku tlula marito,” swifaniso swo tala leswi nga eka broxara leyi swi ta n’wi dyondzisa swinene n’wini wa muti. N’wi kombele leswaku a hlaya matsalwa eBibeleni ya yena n’wini. Loko dyondzo yi ta fambisiwa hi nkarhi lowu xirho xa ndyangu lexi tivaka ririmi ra kwalaho xi nga ta va kona leswaku xi hundzuluxela, leswi swi ta pfuna swinene.—Vona Our Kingdom Ministry, May 1984, tluka 8.

²¹ Endla Maendzo Yo Vuyela Handle Ko Hlwela: Xana u fanele ku rindza nkarhi wo leha ku fikela kwihi u nga si endla riendzo ro vuyela? Vahuweleri van’wana va tlhelela endzhaku ka siku rin’we kumbe mambirhi endzhaku ka riendzo ro sungula. Van’wana va tlhelela hi siku rolero! Xana va hatlise ngopfu? Hi ntolovelo, vini va miti a va vileli. Hakanyingi i muhuweleri la endlaka riendzo la faneleke a hlakulela ku tsakela loku engetelekeke kun’we ni xivindzi. Xiya mintokoto leyi landzelaka.

²² Muhuweleri wa malembe ya 13 hi vukhale a a ri karhi a tirha hi yindlu na yindlu siku rin’wana loko a vona vavasati vambirhi va ri karhi va famba swin’we. Loko a tsundzuka xikhutazo xo chumayela vanhu hinkwako-nkwako lomu hi va kumaka kona, u tshinelele vavasati lava exitarateni. Va kombise ku tsakela rungula ra Mfumo, naswona un’wana ni un’wana wa vona u teke buku leyi nge Vutivi. Makwerhu lontsongo u teke tiadirese ta vona, a tlhelela endzhaku ka masiku mambirhi ivi a sungula dyondzo ya Bibele ni un’wana ni un’wana wa vona.

²³ Makwerhu un’wana wa xisati u endle malunghiselelo yo tlhelela evhikini leri tlhandlamaka. Kambe endzhaku ka siku rin’we kumbe mambirhi endzhaku ka riendzo ro sungula, u hundze a nyika n’wini wa muti magazini lowu nga ni nhloko-mhaka leyi va burisaneke ha yona enkarhini lowu hundzeke. U byele n’wini wa muti a ku: “Ndzi vone xihloko lexi naswona ndzi ehlekete leswaku u ta tsakela ku xi hlaya. A ndza ha tshami, kambe ndzi ta vuya hi Ravunharhu nindzhenga hilaha ndzi vuleke hakona. Xana nkarhi wolowo wa ha lulamile eka wena?”

²⁴ Loko munhu a kombisa ku tsakela ntiyiso, hi nga tiyiseka leswaku u ta langutana ni nkaneto hi swivumbeko swo hambana-hambana. Ku tlhelela ka hina hi ku hatlisa endzhaku ko vonana ro sungula swi ta n’wi tiyisa leswaku a lwisana ni mintshikilelo leyi humaka eka maxaka, vanghana lavakulu ni vanhu van’wana.

²⁵ Hlakulela Ku Tsakela Ka Lava Kumiwaka eTindhawini Ta Mani Na Mani: Vo tala va hina hi tsakela ku chumayela eswitarateni, etindhawini to paka timovha, eka swo famba swa mani na mani, emabindzwini, etindhawini ta vuwiselo ni kun’wana. Ku engetela eku fambiseni ka tibuku, hi fanele hi hlakulela ku tsakela. Hi ri ni xikongomelo xexo, hi fanele hi tikarhatela ku kuma vito, adirese naswona loko swi koteka, ni nomboro ya riqingho ya munhu un’wana ni un’wana la tsakelaka loyi hi hlanganaka na yena. A swi nonon’hwi hilaha u nga ehleketaka hakona ku kuma rungula leri. Loko mi ri ekusuhi ni ku gimeta bulo, humesa buku ya wena ya tinotsi ivi u vutisa u ku: “Xana yi kona ndlela yin’wana leyi hi nga kotaka ku yisa bulo leri emahlweni nkarhi wun’wana?” Kumbe u ku: “Ndzi tsakela leswaku u hlaya xihloko lexi ndzi tshembaka leswaku xi ta ku tsakisa. Xana ndzi nga ku tisela xona ekaya kumbe ehofisini ya wena?” Makwerhu un’wana u vutise hi ku olova a ku: “Xana ndzi nga tirhisa nomboro yihi ku ku bela riqingho?” U vika leswaku endzhaku ka tin’hweti tinharhu vanhu lavan’wana hinkwavo handle ka vanharhu va tsakele ku n’wi nyika tinomboro ta vona ta riqingho.

²⁶ Tirhisa Riqingho Leswaku U Kuma Ku Tsakela Ni Ku Ku Kurisa: Makwerhu un’wana wa xisati la nga phayona u tirhisa riqingho leswaku a vulavula ni vanhu lava tshamaka emiakweni leyi sirheleriweke swinene. U tlhela a endla maendzo yo vuyela hi ndlela leyi fanaka. Eka riendzo ro sungula, u ri: “Ndza swi tiva leswaku a wu ndzi tivi. Ndzi tikarhatela ku tihlanganisa ni vanhu endhawini ya ka n’wina leswaku ndzi va byela leswi humaka eBibeleni. Loko u ri ni nkarhi, ndzi tsakela ku ku hlayela xitshembiso lexi kumekaka eka . . .” Endzhaku ko hlaya tsalwa, u ri: “Xana a swi nga ta tsakisa ku vona nkarhi wolowo wu fika? Ndzi tsakele ku ku hlayela mhaka leyi. Loko na wena u yi tsakerile, ndzi ta tsakela ku tlhela ndzi ku bela riqingho leswaku hi ta bula hi tsalwa rin’wana.”

²⁷ Loko a tlhela a ba riqingho, u tsundzuxa n’wini wa muti hi ta bulo ra nkarhi lowu nga hundza ni ku vula leswaku u tsakela ku hlaya eBibeleni malunghana ni leswi swiyimo swi nga ta va xiswona loko vubihi byi herisiwile. Kutani u ve ni bulo ro koma ra Bibele ni n’wini wa muti. Hi nkarhi wa mabulo yo tala hi riqingho, vanhu vo ringana 35 va n’wi rhambele emakaya ya vona naswona ku sunguriwe nkombo wa tidyondzo ta le kaya ta Bibele! Xana swa ku tikela minkarhi yin’wana ku endla maendzo yo vuyela eka vanhu lava tsakelaka hikwalaho ka maxelo layo biha kumbe vuvabyi? Loko swi ri tano, ha yini u nga tihlanganisi na vona hi riqingho?

²⁸ Landzela Ku Tsakela Loku Kumiweke eTindhawini Ta Mabindzu: Ku katseka swo tala loko hi tirha nsimu ya le mavhengeleni ku tlula ku fambisa timagazini ntsena. Vunyingi bya vini va mavhengele va wu tsakela swinene ntiyiso, naswona ku tsakela koloko ku fanele ku hlakuleriwa. Eswiyin’weni swin’wana, swi nga ha koteka ku va ni bulo ra Bibele kumbe hambi ku ri dyondzo endzeni ka vhengele. Eswiyin’weni swin’wana, wena ni munhu la tsakelaka mi nga ha kota ku hlangana hi nkarhi wa ku wisa ninhlikanhi kumbe enkarhini wun’wana lowu faneleke.

²⁹ Mulanguteri la famba-fambaka u endzele n’wini wa vhengele leritsongo ra swakudya ivi a n’wi byela leswaku u lava ku n’wi kombisa ndlela yo endla dyondzo ya Bibele. Loko a vutisiwe leswaku nkombiso wa yona wu ta teka nkarhi wo tanihi kwihi, mulanguteri la famba-fambaka u vule leswaku wu ta teka 15 wa timinete ntsena. Loko a twa sweswo, n’wini wa vhengele u hayeke mfungho erivantini wu tsariwe leswaku: “Ndzi Ta Vuya Endzhaku Ka 20 Wa Timinete,” ivi a teka switulu swimbirhi, kutani hivumbirhi bya vona va burisane hi tindzimana ta ntlhanu to sungula ta buku leyi nge Vutivi. Wanuna loyi la nga ni mbilu leyinene u tsakisiwe ngopfu hileswi a swi dyondzeke lerova u ve kona eNhlanganweni wa le Rivaleni ni le ka Dyondzo ya Xihondzo xo Rindza Sonto yoleyo naswona u pfumerile ku ya emahlweni ni dyondzo evhikini leri tlhandlameke.

³⁰ Leswaku u fambisa dyondzo endhawini ya mabindzu, u nga ha vula leswi: “Nongonoko wa hina wa dyondzo ya Bibele wu heta 15 wa timinete ntsena ku endla nkombiso wa yona. Loko swi koteka, ndzi nga tsakela ku ku kombisa ndlela leyi swi endliwaka ha yona.” Kutani, hlayisa nkarhi lowu vekiweke. Loko swi nga koteki ku va ni bulo ro leha endhawini ya mabindzu, swi nga ha fanela swinene ku endzela n’wini wa vhengele ekaya rakwe.

³¹ Tlhelela Hambiloko Ku Nga Ri Na Buku Leyi Fambisiweke: Xikombiso xihi na xihi xa ku tsakela xi faneriwa hi riendzo ro vuyela, hambiloko ku fambisiwe buku kumbe e-e. Kavula, loko swi sungula ku tikomba leswaku hakunene n’wini wa muti a nga ri tsakeli rungula ra Mfumo, swa antswa u hundzela kun’wana.

³² Entirhweni wa yindlu na yindlu, makwerhu wa xisati u hlangane ni wansati loyi a ri ni xinghana swinene kambe loyi a aleke nyiko ya timagazini hilaha ku heleleke. Muhuweleri loyi wa tsala: “Ku ringana masikunyana a ndzi ehleketa hi yena naswona ndzi kunguhate ku tlhela ndzi vulavula na yena.” Eku heteleleni, makwerhu loyi wa xisati u khongerile, a kuma xivindzi ivi a gongondza enyangweni wa wansati loyi. Lexi n’wi tsakiseke n’wini wa muti u n’wi amukerile. Ku sunguriwe dyondzo ya Bibele, naswona yi tlhele yi fambisiwa esikwini leri landzeleke. Hi ku famba ka nkarhi, n’wini wa muti u amukele ntiyiso.

³³ Kunguhata Ka Ha Ri eMahlweni Leswaku U Hetisisa Mintirho Yo Tala: Ku bumabumeriwa leswaku nkarhi wun’wana wu tirhiseriwa ku endla maendzo yo vuyela vhiki rin’wana ni rin’wana. Ku nga hetisisiwa swo tala hi ku kunguhata kahle. Endla malunghiselelo yo endla maendzo yo vuyela endhawini leyi fanaka leyi u nga ta va u tirha hi yindlu na yindlu eka yona. Loko mi tirha hi movha, ntlawa wu fanele wu va lowutsongo leswaku un’wana ni un’wana a ta va ni nkarhi wo endla maendzo yo vuyela. Muchayeri u fanele a swi tiva ka ha ri emahlweni leswaku hi kwihi laha ku nga ta endliwa maendzo yo vuyela kona leswaku ku ta papalatiwa ku famba hi movha swi nga fanelanga.

³⁴ Lava humelelaka eku endleni ka maendzo yo vuyela ni le ku sunguleni ka tidyondzo ta le kaya ta Bibele va vula leswaku i swa nkoka leswaku hi tsakela vanhu swi huma embilwini ni ku tshama hi ri karhi hi ehleketa hi vona endzhaku ka loko hi va endzerile. Nakambe i swa nkoka leswaku mi va ni nhloko-mhaka ya Bibele leyi tsakisaka yo bula ha yona, ni ku andlala masungulo ya riendzo ro vuyela ma ha ri eka riendzo ro sungula. Ku tlula kwalaho, i swa nkoka ku tlhelela hi xihatla leswaku u landzela ku tsakela. Xikongomelo xo sungula dyondzo ya Bibele xi fanele ku tshama xi ri emianakanyweni.

³⁵ Mfanelo ya nkoka ya ku humelela eku endleni ka riendzo ro vuyela i ku va ni xivindzi. Xana xi kumiwa njhani? Muapostola Pawulo u hlamula hi ku vula leswaku hi ‘va ni xivindzi’ xo twarisa mahungu lamanene eka van’wana ‘hi ku pfuniwa hi Xikwembu xa hina.’ Loko u lava ku humelela exiyin’weni lexi, khongela Yehovha leswaku a ku pfuna. Kutani, hi ku pfumelelana ni swikhongelo swa wena, landzela ku tsakela hinkwako. Yehovha u ta katekisa matshalatshala ya wena hakunene!

[Xifaniso lexi nga eka tluka 3]

Ndlela Yo Humelela Eku Endleni Ka Maendzo Yo Vuyela

■ Kombisa ku tsakela vanhu swi huma embilwini.

■ Hlawula nhloko-mhaka ya Bibele leyi tsakisaka leswaku u bula hi yona.

■ Veka masungulo ya riendzo rin’wana ni rin’wana leri landzelaka.

■ Tshama u ri karhi u ehleketa hi munhu yoloye endzhaku ka loko u fambile.

■ Tlhelela endzhaku ka siku rin’we kumbe mambirhi leswaku u landzela ku tsakela.

■ Tsundzuka leswaku xikongomelo xa wena i ku sungula dyondzo ya Bibele.

■ Khongelela mpfuno wo va ni xivindzi xo endla ntirho lowu.